Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  februari 2016

Yehofa be e kai en „mi mati”

Yehofa be e kai en „mi mati”

„Ma Islayeli, yu a mi futuboi. Yakopu, a yu na a sama di mi teke, a yu na a pikin fu mi mati Abalaham.”YESAYA 41:8.

SINGI: 91, 22

1, 2. (a) Fa u du sabi taki libisama sa toon Gadu mati? (b) San wi o luku aini a artikel ya?

FANAFU a dei di wan sama ain pii te enke a dede, a abi lobi fanowdu. Wi abi mati fanowdu di lobi u. A lobi ya a ná aseefi enke te man anga uman lobi denseefi. A lobi di wi abi taanga fanowdu, a du fu Yehofa. Ma fu di omen sama á poi si Gadu, meke den nai biibi taki den sa toon mati anga en. Den e si enke a hei tumisi. Ma u sabi taki a sani de a ná tuu!

2 Beibel e soi u taki aini a ten di pasa, sama be toon Gadu mati. U mu puubei fu waka a den sama de baka. Saide? Bika a sani di de moo taanga fanowdu aini a libi, a fu de Gadu mati. Meke u luku a libi fu Abalaham. (Leisi Yakowbesi 2:23.) Fa a du toon Gadu mati? A fu di a be e biibi Gadu. Neen meke Beibel e kai en „a dda fu ala  biibiman” (Romesama 4:11). Te yu o luku a toli fu Abalaham, akisi iseefi den sani ya: ’Fa mi sa soi taki mi biibi taanga enke Abalaham? Fa mi sa toon moo bun mati anga Gadu?’

FA ABALAHAM DU TOON YEHOFA MATI?

3, 4. (a) San be de a moo taanga sani di Abalaham be mu du fu soi taki ai biibi Gadu? (b) Saide Abalaham be de kabakaba fu kii Isaki enke wan ofaandi?

3 Puubei fu si fa Abalaham e subi wan mongo saafisaafi. A ten de a be abi wan sani fu 125 yali. [1] (Luku a pisi ete wan pelensipali sani.) A manpikin fi en di den e kai Isaki e waka neen baka. A ten de Isaki be abi 25 yali. Ai tyai a udu fu meke a faya. Abalaham e tyai wan nefi anga den sani di a o meke a faya. Kande a waka ya be de a moo ibi waka di Abalaham waka aini en libi. Ma a ná fu di a be gaandi, bika a be abi kaakiti ete. A waka ya be ibi, fu di Yehofa be akisi en fu kii en boi enke wan ofaandi!Genesesi 22:1-8.

Abalaham ná aliki Gadu sondee fu a denki

4 Kande na a sani ya a be a moo taanga sani di Abalaham be mu du fu soi taki ai biibi Gadu. Son sama e taki a ogii-ati Gadu abi di a akisi Abalaham fu kii en manpikin enke wan ofaandi. Taawan e taki a fu di Abalaham á be lobi a boi tuutuu, meke a be wani kii en. Ma den sama di e taki den sani ya ná abi biibi. Den á sabi san biibi wani taki tuutuu efuso san wan sama e du te ai biibi (1 Korentesama 2:14-16). Ma Abalaham ná aliki Gadu sondee fu a denki. A be aliki Gadu fu di a be e biibi tuutuu. A be sabi taki Yehofa ná o akisi en wan sani di o du en ogii fu alaten. A be sabi taki efu a aliki, Yehofa be o meke en anga en manpikin fende wini. Ma san be yeepi Abalaham fi en biibi taanga ? A be sabi Yehofa. A be si san Yehofa poi du tu.

5. Fa Abalaham leli sabi Yehofa? Fa a be fii di a kon sabi Yehofa?

5 A be sabi Yehofa. Abalaham kiya aini wan foto den e kai Ur. Den sama fu a foto de be e dini falisi gadu. Abalaham dda seefi be e dini falisi gadu  (Yowsuwa 24:2). Da fa Abalaham du sabi Yehofa? Beibel e soi taki a manpikin fu Nowa di den e kai Sem a be Abalaham famii. Di Abalaham be abi 150 yali, Sem be de a libi ete. Sem biibi be taanga. Wi á sabi efu a Sem be leli Abalaham sama a Yehofa. Ma Sem be musu e leli den famii fi en san a be sabi fu Yehofa. Kande a so Abalaham kon sabi Yehofa. Den sani di Abalaham leli be meke a lobi Yehofa. Na a sani ya taanga en biibi.

6, 7. Fa den sani di miti Abalaham taanga en biibi?

6 A be si san Yehofa poi du. Fa den sani di miti Abalaham taanga en biibi? Son sama taki te yu e pakisei wan sani, yu e wani du en. Da a fii de e meke i du a sani tuutuu. Den sani di Abalaham be e leli fu Yehofa be doo en ati. A sani de meke a be e lesipeki „Yehofa, a Moo Gaan Gadu, a Sama di meke hemel anga goontapu” (Genesesi 14:22). Beibel e soi taki a so u mu lesipeki Gadu efu u wani toon bun mati anga en (Hebrewsama 5:7; Psalm 25:14). Na a sani de yeepi Abalaham fu aliki Yehofa.

7 Gadu be taigi Abalaham anga Sala fu fika a foto Ur fu go tan a wan kondee di den á sabi. Den be gaandi kaba. Den be o tan aini tenti te enke den dede. Ma winsi fa Abalaham be sabi taki ogii be sa miti en, tokuso a aliki Yehofa. Gadu seigi en fu di a aliki en. A be e kibii en tu. Di den be teke Sala puu a Abalaham ana, neen Yehofa kibii Abalaham anga Sala, bika den sama di teke Sala be sa kii Abalaham. A ná wan leisi namo a sani ya pasa (Genesesi 12:10-20; 20:2-7, 10-12, 17, 18). Den sani ya be taanga Abalaham biibi.

8. San o yeepi u fu toon Yehofa mati?

8 I si enke wi anga Yehofa poi toon mati? Eeye, u poi! Leti enke Abalaham, den sani di wi e leli fu Yehofa anga a fasi fa wi e si ai du sani o yeepi u fu toon en mati. Wi di e libi aini a ten ya, sabi moo sani fu Yehofa moo Abalaham (Daniyeli 12:4; Romesama 11:33). Den somen toli di sikiifi aini Beibel e yeepi u fu sabi „a Sama di meke hemel anga goontapu”. Den sani di wi e leli e meke u moo lobi Yehofa. Den e yeepi u tu fu lesipeki en. A lobi di u lobi Yehofa anga a lesipeki di wi e lesipeki en o yeepi u fu du san ai taki. Te wi e aliki Yehofa, wi o si fa a o seigi u, anga fa a o kiibi u. A sani ya o meke  u si fa Yehofa de tuutuu, da u biibi e moo taanga. Te wi e dini Yehofa anga u hii ati, wi o fii bun. Wi o piisii tu (Psalm 34:8; Odo 10:22). Te wi e leli sabi Yehofa moo bun efuso e si den sani di ai du, wi o toon moo bun mati anga en.

SAN BE YEEPI ABALAHAM FU TAN GADU MATI?

9, 10. (a) San wan sama mu du efu a wani toon bun mati anga wan taawan? (b) San e soi taki Abalaham be e meke moiti fu toon moo bun mati anga Yehofa?

9 Wan bun mati de enke wan gudu. (Leisi Odo 17:17.) A ná wan gudu di sama e poti aini osu enke moinmoin. Ma a de enke wan moin boomiki di i mu solugu. I mu gi en wataa ala yuu efi i wani a goo bun. A leti so Abalaham be e meke moiti fu tan Yehofa mati. San a den sani di a be e du?

A de di yu anga taawan e de mati, de enke wan moin boomiki di i mu solugu

10 Abalaham be e meke moiti naamo fu lesipeki Gadu. A be e aliki Gadu ala yuu. Di a be go a Kana-an anga en famii anga den futuboi fi en, a be e meke Gadu soi en fa a mu du sani, winsi a wan pikin sani a be mu du. A yali fosi Isaki meke, Abalaham be abi 99 yali. Yehofa be taigi en fu besnei ala den manengee aini en osu. I denki Abalaham be akisi Yehofa saide a mu du a sani de? I denki a be e meke moiti fu du san enseefi be wani? Nono. A be e fitoow Yehofa. „Aseefi dei de” a du san Gadu taigi en.Genesesi 17:10-14, 23.

11. Saide Abalaham be e booko en ede di Gadu taigi en taki a o poli Sodom anga Gomora? Fa Yehofa yeepi en?

11 Winsi a wan pikin sani Gadu be akisi Abalaham, Abalaham be e aliki en. Neen meke den toon bun mati. A be e taigi Yehofa ala san be de neen ati. A á be e feele fu akisi en fu yeepi en, te a á be kaba fusutan wan sani. Di Yehofa be taigi en taki a be o boon Sodom anga Gomora, a be e booko en ede. Saide? A be e si enke bun sama be o dede te Gadu be o kii den ogii sama. Kande a be e booko en ede anga en baala pikin Lot di be e tan a Sodom. A be e tan ape anga en uman anga den tu umanpikin fi en. Abalaham be e fitoow Yehofa, bika a Yehofa na „a sama di e koti kuutu a hii goontapu”. Neen meke Abalaham taigi Yehofa san neen booko-ede. Yehofa be abi pasensi anga Abalaham. A meke Abalaham fusutan taki en a wan Gadu di abi tyali ati anga sama. Yehofa be meke a fusutan taki ai kibii den bun sama te ai kii den ogii sama.Genesesi 18:22-33.

12, 13. (a) Fa den sani di Abalaham be sabi anga den sani di a si Yehofa du be yeepi en bakaten? (b) San e soi taki Abalaham be e fitoow Yehofa?

12 Den sani ya e soi kiin taki den sani di Abalaham be sabi anga den sani di a si Yehofa du, be yeepi en fu tan Yehofa  mati. Neen meke a á buuya di Yehofa akisi en fu kii en manpikin enke wan ofaandi, bika a be sabi taki Yehofa abi pasensi anga tyali ati. A be sabi taki a sa fitoow Yehofa, bika Yehofa e kibii den sama di e dini en. Abalaham be sabi taki Yehofa á be o kengi wanboowanboo so toon wan Gadu di abi ogii-ati. Saide meke u sa taki a sani ya?

13 Fosi Abalaham fika den futuboi fi en a baka, neen a taigi den taki: „U tan ya anga a buliki. Ma mi anga a boi o go anda go dini Gadu. Te u kaba wi o kon baka” (Genesesi 22:5). San Abalaham be wani taki anga a sani ya? A lei a be e lei taki a be o daai kon baka anga Isaki? Nono. Beibel e soi taki Abalaham be e biibi taki Yehofa be poi meke Isaki kon a libi baka. (Leisi Hebrewsama 11:19.) Abalaham be sabi taki a Yehofa gi en wan manpikin, bika en anga Sala be gaandi kaba (Hebrewsama 11:11, 12, 18). Neen meke a be fusutan taki sani á de di Yehofa á poi du. Abalaham á be sabi fa sani be o waka a dei de. Ma a be e biibi taki efu a de fanowdu, Gadu be o weki en manpikin baka, fu den sani di a be paamisi en be sa kon tuu. Neen meke Beibel e kai Abalaham „a dda fu ala biibiman”!

Abalaham be e biibi taki efu a de fanowdu, Gadu be o weki en manpikin baka, fu den sani di a be paamisi en be sa kon tuu

14. San e taanga gi i aini a dini di yu e dini Yehofa? Sowtu taanga-sikin yu o fende te i denki Abalaham?

14 Aini a ten ya, Yehofa nai akisi u fu kii u pikin gi en enke wan ofaandi. A sani di ai akisi u, a fu du den sani di sikiifi aini a wowtu fi en. Kande u nai kaba fusutan den weiti fi en son leisi. Kande a taanga son leisi fu du san Yehofa taki. A so yu e fii son leisi? Son sama e si a peleikiwooko enke wan taanga sani. Kande sen e kisi den. Kande ai taanga gi den fu taki anga sama di den á sabi. Taawan e feele fu soi a sikoo efuso a den wooko taki den de taa fasi (Ekisodesi 23:2; 1 Tesalonikasama 2:2). Efi i si enke a taanga gi i fu du den sani di Yehofa e akisi i, da i mu pakisei a biibi anga a deki-ati fu Abalaham. Te wi e sidon denki a libi fu den man anga uman di be soi taki den abi biibi, da wi o fende taanga-sikin fu waka a den baka. Wi o toon moo bun mati anga Yehofa.Hebrewsama 12:1, 2.

WI O FENDE WINI TE U TOON GADU MATI

15. Fa u du sabi taki a á hati Abalaham di a libi enke fa Yehofa wani?

15 A be hati Abalaham di a libi enke fa Yehofa wani? Beibel taki: „Abalaham libi wan bun libi, a gaandi fosi en boo koti. A so a go boo enke den afo fi en” (Genesesi 25:8). Di Abalaham be abi 175 yali a be e fii bun te a be e pakisei  fa en libi waka. Saide? Bika a be e si a de di en anga Yehofa de mati enke a moo pelensipali sani aini en libi. Ma te Beibel e taki „Abalaham libi wan bun libi”, da dati á wani taki a á be wani libi aini a ten di e kon.

16. Fa Abalaham o fii te a o de aini a paladeisi?

16 Beibel taki Abalaham „be e wakiti a foto di abi wan tuutuu fondamenti. A Gadu na a sama di meke a foto ya” (Hebrewsama 11:10). A foto ya a Gadu Kownukondee. Abalaham be e biibi taki wan dei a be o si fa a Kownukondee ya e tii goontapu. A o si a sani ya tuutuu! Pakisei fa Abalaham o piisii te a o libi aini a paladeisi. Pakisei fa a o fii te en anga Gadu o toon moo bun mati aini a ten de. A o piisii te a o yee taki a omen dunsu yali langa a biibi fi en gi den sama di e dini Gadu taanga-sikin. A o fusutan taki a kii di a be mu kii en manpikin enke ofaandi na a Moriya-mongo, wani taki wan moo gaan sani di be mu pasa bakaten (Hebrewsama 11:19). A o fusutan tu taki a pen di a be e fii di a be mu kii Isaki, yeepi miliyunmiliyun sama fu fusutan fa Yehofa fii di a meke en Manpikin Yesesi dede enke wan ofaandi gi libisama (Yohanisi 3:16). A sani di Abalaham du, e yeepi u fu teke a dede di Yesesi dede gi u fu bigi. Na a moo gaan sani di Yehofa du fu soi u taki a lobi u!

17. Sowtu moiti ala u mu meke? San wi o luku aini a taa artikel?

17 Ala u mu meke moiti fu u biibi taanga enke Abalaham. Te wi e meke moiti fu kon sabi Yehofa moo bun, da wi o du den sani di ai taki. Wi o si fa ai seigi u tu te wi e libi enke fa a wani. (Leisi Hebrewsama 6:10-12.) U wani Yehofa enke mati fu teego! Aini a taa artikel, wi o taki fu ete dii sama di be toon Gadu mati.

^ [1] (paragraaf 3) Fosi, a Ablam den be e kai a man ya. En uman den be e kai Salai. Ma aini a artikel ya, wi o koboloiki den nen di Yehofa gi den: Abalaham anga Sala.