Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  december 2016

 ONDOOFENITOLI

Mi „toon ala sani gi ala sama”

Mi „toon ala sani gi ala sama”

„Efi i dopu mi o towe i!” A so nda be taigi mma aini 1941. Winsi fa nda taki a sani ya, toku mma dopu. Di a dopu, neen nda towe en, enke fa a be taki. A ten de na aitin yali namo mi be abi.

FOSI a sani ya pasa, mi be wani sabi moo fu a waaleiti. Mma be abi wantu buku di be e taki fu Beibel a ten de. Ná pikin lobi mi be lobi den buku ya. Ma a sani di mi be moo lobi, a den fowtow aini den buku. Nda á be wani mma leli mi sani fu Beibel. Ma mi be e akisi mma omen sani, fu di mi be wani sabi moo. Mma be e lulu te nda komoto a osu, da a be e sutudeli anga mi. A á teke langa, neen miseefi be wani dopu. Mi dopu aini a yali 1943 a Blackpool, wan peesi a Ingiisikondee. A ten de mi be abi tin yali.

MI BIGIN DINI YEHOFA

Fanafu a ten de, mi anga mma bigin peleiki makandii. Bakaten u bigin peleiki anga gaanmanfon. Den gaanmanfon ya be bigi, da den ibi. Den be e wegi wan sani fu fo kilo anga afu. Na a sani ya mi be e sow, winsi fa mi be nyoni!

Di mi be abi 14 yali, mi be wani toon  pionili. Ma mma be taigi mi taki mi mu taki anga a baala di be e go luku den kemeente (nownow den e kai den baala ya kelen-owluman). A baala ya taigi mi taki mi mu meke moiti fu leli wan wooko di sa yeepi mi te mi o pionili. A dati mi du tu. Di mi wooko tu yali, neen mi akisi wan taa kelen-owluman efu mi sa pionili. Neen a taigi mi taki „meke a piki!”

Aini april 1949, mi anga mma paati ala den sani di u be abi aini wi osu, neen u foloisi go a Middleton, wan peesi koosube fu Manchester. Na ape u bigin pionili. A beikantoo taigi mi anga mma taki a be o bun fu u go na a nyun kemeente di be opo a Irlam. Mma be e pionili makandaa anga wan sisa aini wan taa kemeente.

Mi anga a pionili paa fu mi, be e holi komakandaa, bika baala di be poi holi komakandaa á be ipi aini a nyun kemeente. A ten de a 17 yali namo mi be abi. Bakaten, mi foloisi go na a kemeente di be de a Buxton. A kemeente ya be abi yeepi fanowdu. A wantu peleikiman namo be de na a kemeente ya. Den sani ya yeepi mi fu be man tyai taa faantiwowtu.

Mi anga wantu peleikiman e kai sama fu kon a wan publiki taki a Rochester New York aini 1953

Aini 1951, mi poti mi nen fu go na a Gileyad Sikoo. Aini december 1952, neen lanti kai mi fu go poti mi nen fu go a suudati. Mi akisi den fu den sa luku wan fasi gi mi, bika mi á poi go a suudati fu di mi e du fuuten diniwooko. Ma den á be wani. Den poti mi a sitaafu-osu sigisi mun. A sitaafu-osu ape mi be de, neen den baala sende kai mi fu go na a Gileyad Sikoo. Disi a du fu 22 toon di a sikoo ya be o holi. Di mi komoto a sitaafu aini yuli 1953, a á teke langa neen mi go a New York anga a sipi di den kai Georgic.

Fa i si mi doo, neen mi go na a New World Society (Den sama di o de aini a nyun goontapu) konkelesi aini 1953. Baka a konkelesi, mi teke loko neen mi go a Lansing, a peesi pe a Gileyad Sikoo be e holi a  New York. Mi á be abi bunbun moni bika a sitaafu-osu mi be komoto. Di mi komoto aini a loko neen mi teke wan besi, ma mi á be abi moni. Mi be abi fu leni moni a wan fu den sama aini a besi, fu pai a besi.

DEN SENDE MI GO A WAN PEESI DI MI Á SABI

Den leli u omen sani na a Gileyad Sikoo di yeepi u fu toon „ala sani gi ala sama” (1 Korentesama 9:22). Den sende mi, Paul Bruun anga Raymond Leach go a Filipeini, ma wi á be poi go wanten. U be mu wakiti omen mun fosi u pampila seeka. Di u fende den pampila neen u go anga sipi a Rotterdam, wan foto a Bakaakondee. Baka dati u teke sipi, neen u pasa aini a Mindiikondee Se, Sues Kanaal anga India Se go a Maleisiya anga Honkon. U doo Manila 19 november 1954. A 47 dei langa a teke fosi u doo.

Mi anga Raymond Leach waka a boto 47 dei fu go a Filipeini enke zendeling

Di u doo ape, u be abi fu du sani enke fa den sama fu a kondee be e du sani. U be mu gwenti a peesi. U be abi fu leli wan nyun tongo tu. Biginbigin den be sende u go a wan kemeente a Quezon Foto. Gaanse fu den sama ya be e taki Ingiisi. Neen meke baka sigisi mun, a wantu sani namo u be sabi taki aini Tagalogtongo. Ma sani kengi bakaten.

Wan dei di mi anga Baala Leach komoto a peleikiwooko aini mei 1955, neen u si wan biifi a u doomofu, pe sikiifi taki den poti wi enke kelen-owluman. A ten de a 22 yali namo mi be abi, ma a wooko ya be o leli mi taa fasi fa mi be sa „toon ala sani gi ala sama”.

Mi e holi wan publiki taki aini Bicol-tongo a wan kelen komakandaa

A fosi publiki taki di mi holi enke kelen-owluman, a wan wenkii doomofu mi holi en. A ten de, te den be e holi publiki taki a Filipeinikondee, a den peesi pe tyaipi sama be de, den be e holi en. Di mi be e du a kelen-owluman wooko, mi be e holi lezing a peesi pe sama be e sidon e booko fatu,  wowoyo, peesi pe den be e pee basketbal, peesi pe sama be e go koi anga den tapu uku. Wan leisi, mi be mu holi wan publiki taki a wan wowoyo a San Pablo, ma alen kai a dei de te, mi á be poi holi en. Di mi si so, neen mi akisi den baala di e teke fesi efu mi sa holi a lezing ya aini a Kownukondee zaal. Bakaten, den akisi mi efu den mu teli a lezing ya enke wan publiki taki, bika aini a Kownukondee zaal mi be holi en!

A den baala anga sisa osu mi be e tan te mi be go a den kemeente. Den á be abi gaan kofaliki osu, ma den osu be kiin. A omen leisi mi be e siibi a doti a wan ketebe tapu. A wan enkii peesi pe mi be abi fu wasi, a doose pe sama be e si mi. Mi be e teke besi, ma te mi be e go a wan fu den taa tabiki, da mi be e go anga boto. A ten di mi be e du a kelen wooko, mi á be abi wagi.

Mi e taki Tagalogtongo, ma mi á go a sikoo fi en. Te u be de a peleikiwooko anga komakandaa, da mi be e aliki fa den baala anga sisa e taki. A so mi leli a tongo ya. Den baala be e yeepi mi tu. Ai bigi gi mi taki den be e pasensi anga mi. Ai bigi gi mi tu taki den be soi mi fa fu taki a tongo ya moo bun.

Bakaten, mi be abi fu du sani taa fasi, di den baala be gi mi moo faantiwowtu. Di Baala Nathan Knorr kon luku u aini 1956, u be holi wan gaan konkelesi. Den be gi mi a faantiwowtu fu taki anga den nyunsuman. Mi á be du a wooko ya ete, ma taa baala be soi mi fa mi mu du a wooko ya.  A á doo yali, neen u holi wan gaan konkelesi baka. A omen sani mi leli fu Baala Frederick Franz di a edekantoo sende en kon luku u. Di a be e holi a publiki taki, a be wei wan barong Tagalog, wan koosi di den sama fu Filipeinikondee e wei. A sani ya leli mi taki mi mu de kabakaba fu fiti miseefi a taa sama.

Di mi toon distrikt-owluman, mi be abi fu kengi moo sani. U be soi sama a felon di den kai The Happiness of the New World Society (A piisii fu a libi aini a nyun goontapu). A doose u be gwenti pee a felon ya a den peesi pe tyaipi sama be e de. Son leisi fee-sani be e kon fasi aini a projector te wi e pee a felon. A á be makiliki fu kiin a projector te u kaba luku a felon. A á be makiliki fu seeka sani fu soi den sama a felon ya tu. Ma te u be si fa sama e kon fu leli moo fu a olikanisâsi fu Yehofa, u be e piisii.

A son peesi den pilisite fu Lomusu keliki be e dwengi lanti fu den á gi u a okasi fu holi gaan komakandaa. Te u be e holi komakandaa koosube fu den keliki fu den, den be e naki a gengen fu a keliki taanga, fu sama á yee a lezing di a baala e holi. Winsi fa den be e du den sani ya, tokuso omen fu den sama di be e tan a den pisi ya yee a tuu leli. Nownow a omen fu den e dini Yehofa.

NYUN FAANTIWOWTU, MOO KENGI

Den akisi mi fu go wooko na a beikantoo aini 1959. A omen sani mi leli di mi go ape. Baka wan pisiten den akisi mi fu go luku fa a wooko e go a taa kondee. Wan leisi di mi go du a wooko ya, neen mi miti wan sisa den e kai Janet Dumond, wan zendeling a Tailand. Fanafu di u miti ape, neen u bigin  sikiifi biifi gi useefi. Bakaten mi anga en toow. A 51 yali mi anga en e dini Yehofa kaba. Wi e dini en anga piisii.

Mi anga Janet de a wan fu den tabiki a Filipeini

Mi e piisii taki mi be abi a okasi fu go a 33 kondee fu gi a foluku fu Yehofa taanga-sikin. Mi e gi Yehofa daa, bika den wooko di a gi mi, yeepi mi fu libi bun anga sama fu ala nasi, winsi mi anga den á kiya aseefi fasi. A wooko ya yeepi mi fu fusutan taki Yehofa lobi ala sama.Toli 10:34, 35.

Wi e piisii te wi e si fa den Kotoigi e kon moo ipi

A OMEN SANI WI E KENGI ETE

Mi anga Janet e piisii taki wi anga den baala anga sisa a Filipeinikondee e dini Yehofa makandaa. Te anga now wi e wooko na a beikantoo fu Quezon Foto. Nownow den peleikiman ipi tin toon moo den wan di mi be kon miti ya 60 yali pasa. Te anga now mi abi fu meke moiti fu kengi son sani. Den pisiten ya a omen sani kengi aini a olikanisâsi. Neen meke useefi be mu de kabakaba fu kengi son sani.

Wi e meke moiti fu go a peleikiwooko ala yuu

U du ala san u poi fu du sani enke fa Yehofa wani. A disi na a moo bun fasi fa wan sama sa libi. U du ala san be de fanowdu fu yeepi u baala anga sisa tu. Solanga Yehofa gi wi a okasi, u de kabakaba fu „toon ala sani gi ala sama”.

Te anga now wi e wooko na a beikantoo fu Quezon Foto