Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  december 2016

Poti pakisei a den sani fu a yeye, da yu o fende libi, yu o piisii

Poti pakisei a den sani fu a yeye, da yu o fende libi, yu o piisii

„Den sama di e du san a yeye wani, e poti pakisei a den sani fu a yeye.”ROMESAMA 8:5.

SINGI: 57, 52

1, 2. Saide Romesama kapitel 8 pelensipali gi salufu Kelesten?

KANDE yu e leisi Romesama 8:15-17 na a ten fu a Membeefesa. Den tekisi ya e soi fa salufu Kelesten e sabi taki den abi a howpu fu libi fu teego a hemel. Romesama 8:1 taki salufu Kelesten ’de wan anga Yesesi’. Ma a den salufu Kelesten wawan sa fende wini fu den sani di sikiifi a Romesama kapitel 8? Den sama di o libi fu teego a goontapu poi fende wini fu den tekisi ya tu?

2 Romesama kapitel 8 be sikiifi na a fosi peesi gi salufu Kelesten. Den fende a „yeye”, neen meke den e wakiti a ten di ’Gadu o teke den enke en manpikin, a ten di a o koboloiki a lusu-paiman fu fii den’ (Romesama 8:23). Aini a ten di e kon, den salufu Kelesten o de manpikin fu Gadu a hemel. Yesesi dede gi den, neen meke Yehofa gi den paadon fu den sondu. Yehofa e si den enke  kiin ati sama. Neen meke den toon en manpikin.Romesama 3:23-26; 4:25; 8:30.

3. Saide den sama di o libi fu teego a goontapu mu poti pakisei a den sani di sikiifi a Romesama kapitel 8?

3 Romesama kapitel fo e taki fu wan man di á be salufu anga santa yeye. Ma Yehofa be e si a man ya enke wan kiin ati sama. A man ya a Abalaham. A dede omen yali fosi Yesesi dede gi libisama. (Leisi Romesama 4:20-22.) Aini a ten ya, Yehofa e si den Kelesten di o libi fu teego a goontapu ya, enke kiin ati sama tu. Denseefi e fende wini fu den sani di sikiifi a Romesama kapitel 8.

4. San u mu akisi useefi te wi e leisi Romesama 8:21?

4 Yehofa paamisi wi a Romesama 8:21 taki a nyun goontapu o kon. A taki a o puu sondu anga dede gi libisama. A tekisi ya taki wi o „fii a wan foondoo fasi enke pikin fu Gadu”. Yu e si iseefi aini a nyun goontapu kaba? Meke u luku san u mu du fu man tan aini a nyun goontapu.

„POTI PAKISEI A DEN SANI DI A SIKIN WANI”

5. San Pawlesi taki a Romesama 8:4-13?

5 Leisi Romesama 8:4-13. Aini Romesama kapitel 8, Pawlesi taki fu tu sowtu sama. Den sama di e „poti pakisei a den sani di a sikin wani” anga  den sama di e „poti pakisei a den sani fu a yeye”. Son sama e denki taki Pawlesi be e taki fu den sama di e dini Gadu anga den sama di nai dini Gadu. Ma a den Kelesten Pawlesi be sikiifi den sani ya gi. Gadu be kai den sama ya fu „toon santa sama” (Romesama 1:7). Den sama di be e „poti pakisei a den sani di a sikin wani” anga den sama di be e „poti pakisei a den sani fu a yeye” a be Kelesten. Saide den á be e tyai denseefi na aseefi fasi?

6, 7. (a) San „sikin” wani taki aini Beibel? (b) San Beibel e taki fu „sikin” aini Romesama 8:4-13?

6 Te Beibel e taki fu „sikin”, da a omen sani a wani taki. Son leisi na a sikin fu u enke libisama ai taki (Romesama 2:28; 1 Korentesama 15:39, 50). Ma son leisi te Beibel kai a wowtu „sikin”, da a den famii fu wan sama ai taki. Yuda be taigi den baala fi en taki den á mu du ogii anga Yowsefu. A be taigi den taki: „Winsi fa, a u baala, wi eigi buulu [efuso sikin].”Genesesi 37:27.

7 Pawlesi be taki fu sama di „poti pakisei a den sani di a sikin wani”. Efu u wani sabi sama a den sama ya, u mu luku san Romesama 7:5 e taki. Pawlesi sikiifi ape taki: „Di u be e libi enke fa a sikin wani, a Weiti be e soi kiin taki wi a sondu sama. A sondu ya be o tyai dede gi u.” Pawlesi e soi ya taki den sama di e „poti pakisei a den sani  di a sikin wani”, a den sama di e poti pakisei a den sondu fii fu den. Den sama ya e du ala san den fii fu du.

8. Saide Pawlesi be abi fu wasikoi den salufu Kelesten fu den á „poti pakisei a den sani di a sikin wani”?

8 Saide Pawlesi wasikoi den salufu Kelesten fu den á „poti pakisei a den sani di a sikin wani”? Saide den Kelesten fu a ten ya mu poti pakisei na a wasikoi ya? Efu wan Kelesten di e dini Gadu anga en hii ati á luku bun, a o bigin si den sani di a sikin wani enke den moo pelensipali sani. Pawlesi taki son baala fu Rome a be „saafu fu den fii fu den”. Kande a be wani soi taki den baala ya be e si man anga uman libi, nyanyan anga taa sani enke den moo pelensipali sani (Romesama 16:17, 18; Filipisama 3:18, 19; Yudasi 4, 8, 12). Wan pisiten wan gaan sani be pasa aini a kemeente fu Korente. Wan baala be e didon anga „en dda uman” (1 Korentesama 5:1). Neen meke Pawlesi be abi fu wasikoi den fosi Kelesten ya fu den á „poti pakisei a den sani di a sikin wani”.Romesama 8:5, 6.

9. San Romesama 8:6 á wani taki?

9 A sani di Pawlesi taigi den salufu Kelesten, e teli gi u tu. Winsi wi e dini Yehofa wan hii pisiten kaba, tokuso efu wi á luku bun, u sa bigin „poti pakisei a den sani di a sikin wani”. Ma den sani di Pawlesi taki, wani taki wi á mu pakisei sani enke nyanyan, wooko, piisii efuso man anga uman libi? Nono. Den sani ya de aini a libi. Yesesi seefi be e nyan. A be e gi sama nyanyan tu. A be sabi taki a be de fanowdu fu teke boo tu. Boiti dati, Pawlesi taki a didon di man anga uman e didon anga denseefi a wan pelensipali pisi fu a toowlibi.

Sowtu toli u lobi gi? (Luku paragraaf 10, 11)

10. San den wowtu „poti pakisei a den sani di a sikin wani”, wani taki?

10 Pawlesi taki ’sama e poti pakisei a san a sikin wani’. San a be wani taki anga a sani de? A Giiki wowtu di Pawlesi taki ya, wani taki wan sama e poti ala en pakisei a wan sani. Ai poti neen ede fu du wan sani. Wan koniman taki den sama ya be e taki naamo fu den sani ya. Den be lobi den sani fu a sikin pasa peesi. Den be e poti ala den pakisei a den sani ya. Ala san den be fii den be e du.

San na a moo pelensipali sani gi u?

11. San a wantu sani di sa toon den moo pelensipali sani gi u?

11 Den Kelesten fu Rome be mu ondoosuku denseefi fu si sowtu sani den be e moo poti pakisei. A den sani „di a sikin wani”? Useefi mu luku san moo pelensipali gi u. Sowtu toli u lobi gi? San u lobi du? Kande son wan fu u kon si taki hii dei wi e taki fu den win di u wani tesi efuso fu a fasi fa u wani sete wi osu. Kande taawan lobi taki fu den koosi di den wani bai efuso den peesi pe den wani go koi. Den sani ya á fowtu. Den de aini a libi. Yesesi seefi be  meke win a wan toow fesa. Boiti dati Pawlesi be sende Timotiyesi fu a diingi pikinso win (1 Timotiyesi 5:23; Yohanisi 2:3-11). Ma win, á be de a moo pelensipali sani gi den. Fa a de anga u? San na a moo pelensipali sani gi u?

12, 13. Saide u mu luku bun anga den sani di wi e pakisei?

12 Pawlesi be taki: „Te wan sama e poti pakisei a den sani di a sikin wani, da a o tyai dede gi en” (Romesama 8:6). San a be wani taki anga a sani ya? Efu wi e libi enke fa „a sikin wani” wi anga Yehofa ná o de mati moo. U ná o poi libi fu teego tu. Ma a sani ya ná abi fu miti u. Ala sama poi kengi. Pakisei a man fu Korente di be e libi anga en dda uman. Di den puu en na a kemeente, a fika a fasi fa a be e libi. A á be e libi a tyobo libi de moo, neen meke a be man dini Yehofa anga wan kiin ati baka.2 Korentesama 2:6-8.

13 Winsi fa a man fu Korente be e libi wan gaan tyobo libi, tokuso a kengi. Neen meke efu wan Kelesten bigin du san a sondu sikin wani, a poi kengi tu. Te wi e holi a sani di Pawlesi taki a pakisei, da a sani de e gi u taanga-sikin fu meke moiti fu kengi den manii fu u di á bun.

„POTI PAKISEI A DEN SANI FU A YEYE”

14, 15. (a) San Pawlesi taki u mu poti pakisei? (b) San „poti pakisei a den sani fu a yeye” á wani taki?

14 Baka di Pawlesi taki san e pasa „te wan sama e poti pakisei a den sani di a sikin wani”, a taki: „Te wan sama e poti pakisei a den sani fu a yeye, da a o fende libi anga freide.” A disi a den wini di u sa fende.

15 Ma te wan sama e poti „pakisei a den sani fu a yeye”, dati á wani taki a Yehofa anga Beibel wawan ai pakisei. A á wani taki a fu Yehofa anga Beibel wawan ai taki tu. Den fosi Kelesten be de enke ala taa sama. Den be e nyan, diingi, toow, meke pikin, boiti dati den be e wooko.Malikisi 6:3; 1 Tesalonikasama 2:9.

Na a dini di Pawlesi be e dini Gadu a be e si enke a moo pelensipali sani

16. San be moo pelensipali gi Pawlesi?

16 Ma Pawlesi anga den taa Kelesten á be e si den sani di sama gwenti du enke den moo pelensipali sani. A tenti Pawlesi be e meke gi sama, da den e pai en. A so a be e fende a moni di a be abi fanowdu. Ma a á be e si a wooko fi en enke a moo pelensipali sani. Na a dini di a be e dini Gadu a be e si enke a moo pelensipali sani. Pawlesi be e moo poti pakisei na a peleikiwooko anga a leli di a be e leli sama. (Leisi Toli 18:2-4; 20:20, 21, 34, 35.) Den baala anga sisa fu Rome be mu waka a Pawlesi baka. Useefi mu waka neen baka.Romesama 15:15, 16.

17. Sowtu wini wi o fende efu wi e „poti pakisei a den sani fu a yeye”?

17 Sowtu wini wi o fende te wi e poti  a dini di wi e dini Yehofa a fesi? Romesama 8:6 taki: „Te wan sama e poti pakisei a den sani fu a yeye, da a o fende libi anga freide.” Dati wani taki wi e meke a yeye fu Yehofa tii wi. Wi e meke moiti fu denki enke fa Yehofa e denki tu. Yehofa paamisi u taki wi o abi wan koloku libi aini a ten ya, ma aini a ten di e kon wi o libi fu teego.

Ai bigi gi u taki Yehofa e yeepi u fu de anga piisii

18. Fa a poti di wi e „poti pakisei a den sani fu a yeye” e yeepi u fu de anga piisii?

18 San Pawlesi be wani soi, di a taki te wan sama e „poti pakisei a den sani fu a yeye”, a o abi freide? Ala sama wani piisii aini a libi. Ma a ná ala sama e piisii tuutuu. Neen meke ai bigi gi u taki Yehofa e yeepi u fu de anga piisii. Ai yeepi u fu libi bun anga u famii anga den sama aini a kemeente. Ma wi a sondu sama, neen meke son leisi wi anga u baala efuso sisa nai fusutan useefi. Te a sani ya miti u, a san Yesesi taki u mu du. A taki: „Meke en bun anga i baala” (Mateyesi 5:24). Holi a pakisei taki i baala efuso sisa e dini Yehofa tu „a Gadu di e gi sama freide”.Romesama 15:33; 16:20.

19. Sowtu wini wi o fende te wi e „poti pakisei a den sani fu a yeye”?

19 Efu wi e „poti pakisei a den sani fu a yeye”, Gadu o piisii anga wi tu. Polofeiti Yesaya be sikiifi taki: „Yu [Yehofa] o kibii den sama di e fitoow yu, yu o meke sani waka bun gi den fu ala ten.”Yesaya 26:3; leisi Romesama 5:1.

20. Saide yu e teke den sani di sikiifi a Romesama kapitel 8 fu bigi?

20 Winsi wi e howpu fu libi fu teego a hemel efuso goontapu, ala wi e fende wini fu den sani di sikiifi a Romesama kapitel 8. Ai bigi gi u taki Beibel e gi u taanga-sikin fu poti pakisei na a dini di wi e dini Yehofa, a peesi fu poti pakisei a den sani di wi e fii fu du. U sabi taki efu wi e „poti pakisei a den sani fu a yeye” wi o fende wini, bika „Gadu koboloiki Kelestesi Yesesi fu gi u teego libi enke kado”.Romesama 6:23.