Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  december 2016

Yehofa e pai den sama di e suku en anga den hii ati

Yehofa e pai den sama di e suku en anga den hii ati

„Wan sama di e dini Gadu mu biibi taki a de tuutuu. A mu biibi tu taki ai pai den sama di e suku en anga den hii ati.”HEBREWSAMA 11:6.

SINGI: 85, 134

1, 2. (a) San lobi e du anga a biibi fu wan sama? (b) Sowtu akisi wi o luku?

U DDA Yehofa paamisi taki, a o belesi den sama di e dini en anga den hii ati. Disi a wan fasi fa Yehofa e soi u taki a lobi u. Useefi lobi en ’fu di en fosi soi u taki a lobi u’ (1 Yohanisi 4:19). O moo u lobi Yehofa, o moo wi e biibi en. Wi e biibi taki a o du den sani di a paamisi den sama di lobi en tu.Leisi Hebrewsama 11:6.

2 Yehofa na a Gadu di e pai libisama. A sani ya, a wan fu den pelensipali sani di e soi fa Yehofa de. Neen meke efu u nai biibi taki Yehofa o pai den sama di e dini en anga den hii ati, da wi á poi taki wi e biibi tuutuu. Saide u sa taki a sani ya? Bika „biibi a te wan sama abi a fitoow taki den sani di ai howpu, o kon tuu” (Hebrewsama 11:1). Wan sama di e biibi sabi taki Gadu o  pai den sama di e dini en anga den hii ati. Sowtu wini wi e fende fu di wi e biibi taki Gadu o pai u? Fa Yehofa pai den sama di be e dini en fosi anga den sama di e dini en aini a ten ya? Meke u luku den toli ya.

YEHOFA PAAMISI TAKI A O BELESI DEN SAMA DI E DINI EN

3. San Yehofa paamisi wi aini Maleyaki 3:10?

3 Yehofa paamisi den sama di e dini en anga den hii ati taki a o pai den. A taki u mu gi en den moo bun sani di wi abi, da wi o si taki a o belesi u. A taki: „Gaantangi luku san mi o du. Wi o si fa mi o opo den doo fu hemel fu kandi belesi gi u enke alen. Mi o belesi u te enke u nai mankei nawan sani moo” (Maleyaki 3:10). Te wi e dini Yehofa anga u hii ati, da wi e soi taki wi e teke en fu bigi taki Yehofa kai u fu kon dini en.

4. Saide u sa biibi a sani di Yesesi taki a Mateyesi 6:33?

4 Yesesi paamisi den disipel fi en taki Gadu o holibaka gi den, efu den poti a Kownukondee a fesi. (Leisi Mateyesi 6:33.) A di Yesesi sabi taki te Gadu paamisi wan sani ai du en meke a taki a sani ya (Yesaya 55:11). Neen meke useefi ná abi fu feele. Efu u biibi Gadu anga u hii ati, a o du san a paamisi u. A paamisi u taki: „Mi ná o gwe fika i. Noiti mi o fika i  wawan” (Hebrewsama 13:5). A sani di Yehofa paamisi u ya, e yeepi u fu biibi san Yesesi taki a Mateyesi 6:33.

Yesesi be taki den bakaman fi en be o fende wini fu den sani di den e du gi a Kownukondee (Luku paragraaf 5)

5. Saide a fasi fa Yesesi piki Peitilisi e gi ala u taanga-sikin?

5 Wan leisi Peitilisi be akisi Yesesi taki: „U gwe fika ala san u be abi, neen u kon waka ai baka. Sowtu paiman wi o fende?” (Mateyesi 19:27). Di Peitilisi akisi Yesesi a sani ya, Yesesi á bali en. Ma Yesesi taigi den disipel fi en taki, Gadu o pai den gi den sani di den du gi a Kownukondee. Aini a ten di e kon, den apostel anga wantu taa sama di holidoo, o tii anga Yesesi a hemel. Ma Yesesi be taki wi o fende wini aini a ten ya tu. A be taki: „Soseefi ala sama di gwe fika en osu, en baala, en sisa, en dda, en mma, en uman, en pikin, efuso ala san a abi, fu di a wani waka a mi baka, o fende den sani ya wan ondoo toon baka. A o fende teego libi tu” (Mateyesi 19:29). Ala den sama di e waka a Yesesi baka sa fende dda, mma, baala, sisa anga pikin aini a kemeente nownow. Den sani ya abi wini moo ala den sani di u fika fu a Kownukondee fu Gadu ede.

„WAN ANKAA GI U LIBI”

6. Saide Yehofa paamisi a foluku fi en taki a o pai den?

6 A omen belesi wi e fende aini a ten ya, ma wi e angii fu fende moo aini a ten di e kon (1 Timotiyesi 4:8). Yehofa paamisi taki a o pai den sama di e dini en anga den hii ati. A sani ya e yeepi u fu holidoo, winsi sowtu tesi e miti u. Efu wi e biibi tuutuu taki Yehofa e „pai den sama di e suku en anga den hii ati” wi o holidoo.Hebrewsama 11:6.

7. Fa a howpu di wi abi de enke wan ankaa?

7 Di Yesesi be e leli sama na a mongo, a be taki: „U mu poolo, u mu piisii, bika wi o fende wan gaan paiman a hemel. Bika a so sama be e du ogii anga den polofeiti di waka a u fesi” (Mateyesi 5:12). Son wan fu den sama di e dini Yehofa o fende wan paiman a hemel. Den taawan o libi fu teego aini wan paladeisi a goontapu ya. Disi a wan fu den sani di e gi u „piisii” (Psalm 37:11; Lukasi 18:30). Ala u sa abi wan howpu di „de enke wan ankaa”. Ai meke u taampu gingin aini a waaleiti (Hebrewsama 6:17-20). Leti enke fa wan ankaa e meke wan sipi tan a wan peesi te gaan winta e wai, a so a howpu fu wi e yeepi u fu holidoo. Ai gi u kaakiti fu wi á gi abaa te tesi e miti u.

Yehofa paamisi taki a o pai den sama di e dini en anga den hii ati. A sani ya e yeepi u fu holidoo, winsi sowtu tesi e miti u

8. Fa a howpu di wi abi e yeepi u anga u booko-ede?

 8 A howpu fu u sa yeepi u te wi e booko wi ede anga wan sani. Leti enke fa wan deesi e yeepi i fu fii moo bun te i sikin e hati i, a so den sani di Gadu paamisi u, e yeepi u fu fii bun te wi abi booko-ede. A sabi di u sabi taki Yehofa o yeepi u te u fika den nowtu fu u gi en, e meke u fii bun (Psalm 55:22). U sa biibi taki Gadu poi ’du moo san wi e begi en efuso san wi e denki’ (Efeisesama 3:20). A ná enke fa wi e denki Yehofa o yeepi u, ma a o ’du moo san wi e denki’!

9. San u mu du fu Yehofa belesi u?

9 Efu u wani Yehofa pai wi, u mu biibi en anga u hii ati, da u du san a taki. Mosesi be taigi den Islayelisama taki: „Nawan fu u o pina, bika u Gadu Yehofa, o belesi u aini a kondee di Yehofa gi u fu tan. Ma a te wi e aliki u Gadu Yehofa anga te wi e du ala san mi taigi u tide fosi a o belesi u. Yehofa u Gadu o belesi u enke fa a paamisi” (Deitolonomi 15:4-6). Yu e biibi anga i hii ati taki Yehofa o belesi i efu yu á gwe fika en? Yu abi leti fu biibi a sani de.

A YEHOFA BE E PAI DEN

10, 11. Fa Yehofa pai Yowsefu?

10 Wi e fende wini fu den sani di sikiifi aini Beibel. A omen toli de aini di e soi fa Yehofa seigi a foluku fi en aini a ten di pasa (Romesama 15:4). Yowsefu a wan fu den sama ya. En baala be seli en enke saafu. Baka dati a uman fi en basi lei gi en, neen den sooto en a Egepte. Ma Yehofa be fika en di a be de sitaafu-osu? Nono. Beibel taki: „Yehofa be de anga Yowsefu. A á gwe fika en, bika a be lobi en.” Beibel taki tu: „Yehofa be de anga Yowsefu. Yehofa be e meke ala san Yowsefu be e du, waka bun” (Genesesi 39:21, 23). Aini den taanga ten ya seefi, Yowsefu wakiti en Gadu fu yeepi en.

11 Baka omen yali, neen Farao puu Yowsefu a sitaafu-osu. A saafu ya di be abi sakafasi, toon du fu tu tiiman fu Egepte (Genesesi 41:1, 37-43). Di Yowsefu anga en uman meke tu boi, a „kai a fosiwan Manase, bika a taki: ’Gadu meke mi feegete ala den sani di miti mi, a meke mi feegete a osu fu nda.’ A kai du fu tu manpikin Efrayim, bika a taki: ’Gadu meke mi meke pikin aini a kondee di mi be e pina’” (Genesesi 41:51, 52). Yehofa pai Yowsefu, fu di a dini en anga en hii ati. Boiti dati Yowsefu be man yeepi den Islayelisama anga den Egeptesama fu den á dede di a gaan angiiten be de. Yowsefu be sabi taki a Yehofa be pai en. A be sabi tu taki  a Yehofa be belesi en.Genesesi 45:5-9.

Yesesi be e piisii fu di a be fende a okasi fu santa a nen fu Gadu

12. Fa Yesesi holidoo di tesi miti en?

12 Di Yesesi Kelestesi holidoo di tesi be e miti en, Yehofa pai en. San yeepi Yesesi fu a á gwe fika Yehofa? Gadu Wowtu taki: „A di a be e pakisei a piisii di a be o piisii aini a ten di e kon, meke a be de kabakaba fu dede na a pina ponsu, winsi a be sabi taki a wan sen sani” (Hebrewsama 12:2). Yesesi be e piisii fu di a be fende a okasi fu santa a nen fu Gadu. Yehofa belesi Yesesi fu di a meke a sabi taki a be e piisii anga en. A gi Yesesi omen faantiwowtu tu. Beibel taki ’a go sidon a Gadu leti-ana’. A taki tu: „Gadu hei en moo fa a be de kaba. A gi en wan nen di bigi moo ala taa nen.”Filipisama 2:9.

YEHOFA NAI FEEGETE DEN SANI DI WI E DU GI EN

13, 14. Fa Yehofa e si den sani di wi e du gi en?

13 Yehofa e teke ala san wi e du gi en fu bigi. Ai fusutan fa wi e fii te wi e si enke wi á poi du son sani. Ai booko en ede anga u te wi e pakisei sowtu wooko wi o du efuso fa wi o solugu wi osufamii. Ai fusutan wi tu te wi á poi wooko gi en enke fosi moo, fu di u siki efuso fu di u lai polobelema. U sa biibi taki Yehofa e teke en fu bigi te wi e holidoo winsi fa u lai polobelema.Leisi Hebrewsama 6:10, 11.

14 Holi a pakisei tu taki Yehofa „na a sama di e aliki begi”. U sa biibi taki te u begi en, a o aliki u (Psalm 65:2). „A Dda di abi tyali-ati, a Gadu di e toosutu sama”, o gi u ala san wi abi fanowdu fu wi á gwe fika en. Son leisi a baala anga sisa ai koboloiki fu du a sani ya (2 Korentesama 1:3). Yehofa e piisii te wi e fii gi taawan. „A sama di e du bun gi den pootiman e leni Yehofa sani. A o pai a sama de fu den bun di a du” (Odo 19:17; Mateyesi 6:3, 4). Te wi e yeepi u baala anga sisa, da Yehofa e si a bun di wi e du enke a leni wi e leni en sani. A paamisi taki a o pai u.

A O PAI WI NOWNOW, ANGA FU TEEGO

15. Sowtu paiman yu e angii fu fende? (Luku a fowtow na a bigin.)

15 Yesesi o gi salufu Kelesten „a kownu-ati fu leti-du” (2 Timotiyesi 4:7, 8). Ma a sani ya á wani taki a moo lobi den Kelesten ya. Miliyunmiliyun „taa sikapu” fu Yesesi, e angii fu libi fu teego aini wan paladeisi a goontapu ya. „Den o piisii fu a libi, bika ala sani o waka bun” aini a paladeisi.Yohanisi 10:16; Psalm 37:11.

16. Sowtu taanga-sikin wi e fende a 1 Yohanisi 3:19, 20?

16 Son yuu wi e fii enke u nai wooko sai gi Yehofa. Boiti dati son leisi wi e akisi useefi efu Yehofa e piisii te ai si den sani di wi e du gi en. Kande wi e si enke wi á fiti fu Yehofa pai wi. Ma wi á mu feegete taki „Gadu bigi moo wi ati, a sabi ala sani”. (Leisi  1 Yohanisi 3:19, 20.) Te wi e dini Yehofa fu di u lobi en anga fu di u biibi taanga, u sa biibi taki a o pai wi, winsi wi e si enke den sani di wi e du gi en, a lawlaw sani.Malikisi 12:41-44.

17. San a wantu belesi di wi e fende nownow?

17 Winsi fa wi e libi aini den lasiti dei fu a ogii goontapu fu Saatan, Yehofa e belesi en foluku ete. Ai leli u omen sani. Boiti dati, ai yeepi u fu wi anga ala den baala anga sisa a hii goontapu de koloku (Yesaya 54:13). Leti enke fa Yesesi be paamisi, Yehofa e belesi u nownow anga omen baala anga sisa a hii goontapu di de enke u famii (Malikisi 10:29, 30). Boiti dati, Gadu e yeepi den sama di e dini en anga den hii ati fu den fii bun, fu den de koloku anga fu den á booko den ede tumisi.Filipisama 4:4-7.

18, 19. Fa a foluku fu Yehofa e si a belesi di ai belesi den?

18 A omen baala anga sisa a hii goontapu si fa Yehofa belesi den. Bianca di e tan a Doisilikondee a wan fu den sama ya. A taki: „Mi á sabi fa fu gi Yehofa daa fu a fasi fa ai yeepi mi, anga a fasi fa ai holibaka gi mi ala dei anga den booko-ede fu mi. A goontapu buuya nownow. Sama nai booko den ede anga taawan. Ma te mi e wooko makandaa anga Yehofa, mi e fii taki ai kibii mi. Te mi du wan sani gi en, ai belesi mi wan ondoo toon.”

19 Paula wan sisa fu Kanada di abi 70 yali abi a takuu siki di den e kai spina bifida. A siki ya a te a sama baka bon opo. A taki winsi fa a á poi waka, tokuso a sani de nai tapu en fu wooko gi Yehofa. A taki: „Mi e peleiki a omen sowtu fasi. Mi e peleiki anga telefon efuso te mi miti wan sama. Mi abi wan pikin buku pe mi sikiifi wantu tekisi anga wantu sani di mi leisi aini den buku fu a olikanisâsi. Mi e leisi en te mi abi taanga-sikin fanowdu. Mi kai a buku ya ’A buku di e holi mi a libi’. Efu wi e poti pakisei a den sani di Yehofa paamisi u, u ná o booko wi ede tumisi. Ala yuu Yehofa de kabakaba fu yeepi u, winsi san e miti u.” Kande a ná denseefi sani di miti Bianca anga Paula e miti i. Ma tokuso, iseefi sa luku fa Yehofa yeepi i efuso fa a yeepi taa baala anga sisa. A omen wini yu o fende efu yu e poti pakisei a den fasi fa Yehofa e pai yu aini a ten ya, anga fa a o pai yu aini a ten di e kon.

20. Sowtu wini wi o fende efu wi e meke moiti fu du san u poi gi Yehofa?

20 Wi á mu feegete taki efu wi e begi Yehofa fayafaya, a o aliki den begi fu u. Holi a pakisei taki efu u „du san Gadu wani, wi o fende san a paamisi u” (Hebrewsama 10:35, 36). Neen meke u mu e meke moiti naamo fu u biibi taanga. U mu du san u poi gi Yehofa tu. A o pai wi fu den sani di wi e du!Leisi Kolosesama 3:23, 24.