Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  december 2016

Na a bun-ati fu Gadu meke u fii

Na a bun-ati fu Gadu meke u fii

„Wi á mu meke sondu toon u basi, bika . . . Gadu soi u bun-ati.”ROMESAMA 6:14.

SINGI: 2, 61

1, 2. Sowtu wini wi e fende fu Romesama 5:12?

ROMESAMA 5:12 taki: „Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu.” A tekisi ya a wan fu den tekisi di u sabi bun. Wi e leisi en gi sama tu te wi e leli den san Beibel taki.

2 Yu o fende a tekisi ya omen leisi aini a San Bijbel e leri wi trutru? buku. A ná abi misi, te wi e sutudeli kapitel 3, 5 anga 6 makandii anga u pikin efuso taa sama, wi e leisi Romesama 5:12. U sa leisi a tekisi ya gi sama fu soi den saide a goontapu á de wan paladeisi nownow. U sa soi den tu saide a de fanowdu fu libisama fii fu sondu anga dede, anga saide meke wi e dede. Boiti dati a tekisi e yeepi u fu teke en fu bigi taki wi anga Yehofa a mati. Ai gi u taanga-sikin fu du san Yehofa lobi anga fu angii fu den sani di a paamisi u.

3. San ala libisama abi?

 3 A tyali taki ala wi abi sondu. Wi e meke fowtu ala dei. Ma Yehofa abi tyali-ati. A sabi taki wi a sondu sama, neen meke a de kabakaba fu gi u paadon (Psalm 103:13, 14). Yesesi be taki u mu e begi Gadu fu a gi u paadon fu u sondu (Lukasi 11:2-4). Efu Yehofa gi u paadon fu den fowtu di u meke aini a ten di pasa, a á de fanowdu fu wi e denki den fowtu de moo. Meke u luku saide Yehofa e gi u paadon.

SAIDE YEHOFA E GI U PAADON?

4, 5. (a) San e yeepi u fu fusutan Romesama 5:12? (b) San a „bun-ati” fu Gadu wani taki?

4 A Beibel buku Romesama, moomoo kapitel 6 e yeepi u fu fusutan saide Yehofa e gi u paadon. Aini kapitel 3 wi e leisi taki „ala sama e sondu”. Baka dati Pawlesi taki: „Na a bun-ati fu Gadu meke ai si wi enke sama di e libi a wan leti fasi fu di Yesesi Kelestesi pai a paiman fu fii wi. A sani ya de enke wan kado di Gadu gi libisama” (Romesama 3:23, 24). San Pawlesi be wani taki anga a wowtu „bun-ati”? Wan buku taki a Giiki wowtu di Pawlesi koboloiki, wani taki wan sama e du wan bun gi taawan sondee fu pakisei taki a sama o pai en baka. A wan sani di wan sama ná abi leti fu fende.

5 Wan sabiman taki moo gaanse a Giiki wowtu fu bun-ati, e soi go a san Yehofa anga Yesesi du fu fii libisama fu sondu anga dede. Neen meke a Nyun-Grontapuvertaling e kai a sani ya bun-ati. Meke u luku san Yehofa du fu soi bun-ati gi u anga fa u sa fende wini fu a bun-ati fi en aini a ten ya. Wi o luku tu fa a bun-ati di a soi u, o meke sani waka bun aini a ten di e kon.

Yehofa soi bun-ati gi u, a du wan sani fu fii ala sama anga yeepi fu Yesesi Kelestesi

6. Sama sa fende wini fu a bun-ati fu Gadu? Fa den sa fende wini fi en?

6 A di Adan sondu, meke ala libisama abi sondu, neen meke wi e dede. Beibel taki a „wan man sondu neen dede e tii wi enke kownu”. Ma Yehofa soi bun-ati gi u, a du wan sani fu fii ala sama anga yeepi fu „wan man, Yesesi Kelestesi” (Romesama 5:12, 15, 17). A „omen sama o toon sama di e libi a wan leti fasi di wan sama aliki Gadu”. Na a sani di Yesesi du meke ala den sama ya sa fende a okasi fu libi fu teego.Romesama 5:19, 21.

7. Saide nawan sama á be abi leti fu fende a bun-ati fu Gadu?

7 Denki a sani ya. A ná namonamo Yehofa be mu meke en Manpikin dede gi u. Ma a soi bun-ati gi u, di a seeka sani fu fii wi fu sondu anga  dede. Nawan fu u be abi leti fu fende a sani di Yehofa anga Yesesi du gi u. Wi e teke en fu bigi taki Gadu seeka sani gi u fu u sa fende paadon fu sondu. A sani ya o yeepi u fu fende teego libi tu. Meke u soi Gadu anga a fasi fa wi e libi taki a sani di a du, e bigi gi u.

WI E TEKE EN FU BIGI TAKI GADU SOI BUN-ATI GI U

8. San wi á mu denki noiti?

8 U sabi taki Yehofa de kabakaba fu gi u paadon, winsi u du wan gaan sondu. Ma noiti u mu si enke u sa du sondu fu seefi, fu di Gadu soi bun-ati gi u. Son Kelesten be abi a denki ya aini a ten fu den apostel. (Leisi Yudasi 4.) Aini a ten ya, u mu luku bun fu wi á meke taawan meke wi e denki so tu.

9, 10. Fa Pawlesi anga taa Kelesten fii fu sondu anga dede?

9 Pawlesi be taigi den Kelesten taki den á mu denki taki Yehofa o gi den paadon efu den e sondu fu seefi. A be taigi den taki noiti den mu denki a sani de, bika ’a sondu fasi fa den be e libi dede’. (Leisi Romesama 6:1, 2.) San a sani ya wani taki?

Ala u sa du den sani di a sondu sikin lobi, ma u sa basi den sondu fii fu u tu

10 A di Yesesi dede gi libisama, meke Gadu be man gi Pawlesi anga den taa Kelesten fu a ten de paadon. Yehofa salufu den anga en santa yeye fu den sa toon en manpikin. Efu den be holidoo, den be o go tii anga Yesesi a hemel. Efu den be e libi a goontapu ete, da fa ’a sondu fasi fa den be e libi dede’? Pawlesi soi kiin taki den kengi a hii fasi fa den be e libi. A taki baka di Yesesi dede, a weki baka enke wan yeye di á poi dede moo. Neen meke „dede á neen basi moo”. Pawlesi taki a fasi fa den Kelesten be e libi be dede tu. A hii fasi fa den be e libi kengi, bika den á be e meke den sondu fii fu den tii den moo. Fanafu a ten de, den be e du ala san den man fu libi enke fa Yehofa wani. ’A sondu fasi fa den be e libi dede.’ Neen den toon „sama di e libi gi Gadu” fu di Yesesi Kelestesi yeepi den.Romesama 6:9, 11.

11. Saide u sa taki „a sondu fasi” fa den Kelesten fu a ten ya be e libi dede?

11 Fa a de anga wi? A „sondu fasi fa u be e libi dede” tu? Aini a ten di pasa, u be e du omen sani di á be bun, sondee fu pakisei fa Yehofa e si den sani ya. Wi a be „saafu fu wan molusu libi. U be e du sani di á bun”, dati wani taki „saafu fu sondu” (Romesama 6:19, 20). Ma di u leli aini Beibel fa Gadu wani u libi, neen u kengi u libi. U paamisi Gadu taki wi o libi enke fa a wani, neen u dopu. U be e angii fu libi enke fa Yehofa wani. „Nownow wi a ná saafu fu sondu moo”, ma u „toon saafu fu leti-du”.Romesama 6:17, 18.

12. San ala u mu du?

12 Pakisei iseefi te yu e leisi a sani di Pawlesi taki ya. A taki: „Wi á mu meke sondu tii a sikin fu u di o dede, enke kownu moo. Ná du san a sondu  sikin wani tu” (Romesama 6:12). A sani ya e soi taki u sa du den sani di a sondu sikin lobi, ma u sa basi den sondu fii fu u tu. Akisi iseefi den sani ya: ’Mi e fika den takuu fii fu mi te enke mi á poi basi den moo? Mi e feti fu puu den fii ya gawgaw?’ Efu wi e teke a bun-ati di Gadu soi u fu bigi, wi o du ala san u man fu libi enke fa a wani.

I POI MEKE MOITI FU YU Á SONDU

13. Saide u sa biibi taki u poi tyai useefi bun?

13 Aini a ten fu den apostel, son sama di be e tan a Korente a be fufuuman, man di e didon anga taa man efuso uman di be e didon anga taa uman, sama di be e waka gi den toowpaa, sama di be e dini falisi Gadu anga sopiman. Ma di den kon sabi Yehofa, den kon lobi en. A sani ya yeepi den fu kengi. Sen be e kisi den te den be e pakisei a fasi fa den be e libi fosi (Romesama 6:21; 1 Korentesama 6:9-11). Den Kelesten fu Rome seefi be mu kengi a fasi fa den be e libi. Pawlesi taigi den taki: „Wi á mu e si u sikin enke wooko sani fu du sondu. Wi á mu e si en enke feti sani fu du ogii tu. Ma u mu poti u libi aini Gadu ana, bika u de enke sama di weki baka. Du sani enke fa Gadu wani anga u sikin. Dati wani taki u mu si u sikin enke feti sani fu du bun” (Romesama 6:13). Pawlesi be sabi taki den sama ya be poi tyai denseefi bun. A sani de be o yeepi den fu fende wini fu a bun-ati fu Gadu.

14, 15. San u mu akisi useefi?

14 Na aseefi sani e pasa aini a ten ya. Son wan fu den baala anga sisa fu u be e libi enke den sama fu Korente. Ma di den kon sabi Yehofa, neen den kengi. A be de leti enke den kon „kiin”. Efu u wani Yehofa piisii, da ala u mu kengi a fasi fa u be e libi. Te anga now u wani soi Yehofa taki ai bigi gi u taki a soi u bun-ati. Neen meke u wani du ala san u man fu feti anga den sondu fii fu u. U wani dini Yehofa tu.

15 Noiti u wani du den gaan sondu di son sama fu Korente be e du. Wi á mu denki taki efu wi e du den sondu de naamo, da Yehofa o gi u paadon. Ma fa fu den sondu di son sama nai si enke gaan sondu? U de kabakaba fu du ala san Yehofa e akisi u?Romesama 6:14, 17.

16. Fa u du sabi taki a ná den sondu di sikiifi a 1 Korentesama 6:9-11, wawan wi á mu du?

16 Pakisei apostel Pawlesi. A á be e du den gaan sondu di kai a 1 Korentesama  6:9-11, ma tokuso a be sikiifi taki: „Ma mi á wan sondu sama, wan saafu fu sondu. Mi á sabi saide mi e tyai miseefi so. Bika mi nai du den sani di mi wani du, ma a den sani di mi e buuse mi e du” (Romesama 7:14, 15). A sani ya e soi taki Pawlesi be e si taa sani enke sondu tu. A be wani libi enke fa Yehofa wani, neen meke a be e meke moiti fu a á du den sondu de. (Leisi Romesama 7:21-23.) Meke u du ala san u man fu waka a Pawlesi baka, da u libi enke fa Yehofa wani.

17. Saide u mu e du sani anga wan kiin ati?

17 U sabi taki te wi e dini Yehofa, u mu e du sani anga wan kiin ati. (Leisi Odo 14:5; Efeisesama 4:25.) Wi á wani de enke Saatan di Beibel e kai „a dda fu lei”. Wi á mu feegete taki a lei kii Ananiyas anga Safira. Neen meke wi á mu e lei (Yohanisi 8:44; Toli 5:1-11). Ma a ná te wan sama nai lei, da dati wani taki ai du sani anga wan kiin ati. Efu a bun-ati di Gadu soi wi e bigi gi u, wi o meke moiti fu du ala sani anga wan kiin ati.

18, 19. San a wani taki fu du sani anga wan kiin ati?

 18 Wan sama sa bidiigi taawan sondee fu lei gi en. Meke u luku a toli ya moo fini. Yehofa be taigi den Islayelisama taki: „Wi á mu fufuu. Wi á mu e bidiigi sama. Wi á mu e koli taawan tu.” Saide den be abi a weiti ya fanowdu? Yehofa be taigi den taki: „U mu santa, bika mi, Yehofa u Gadu, santa” (Lefitikesi 19:2, 11). Kande u nai lei, ma efu wi e meke sama biibi wan sani di á tuu, u nai du sani anga wan kiin ati.

Wi o meke moiti fu wi á lei efuso bidiigi sama? (Luku paragraaf 19)

19 Meke u taki, wan man taigi en basi anga den sama fu a wooko pe taki a mu gwe fuuku bika a mu go a dataa. Ma a ná fu a sani de ede a wani gwe fuuku. A wani gwe fuuku fu go koi anga en famii. A mofu di a be abi anga a dataa a ná be langa sani. A wan deesi a be mu go teke gawgaw a wan powli. A kan tu taki a pai a be mu go pai fu wan deesi. A man ya du sani anga wan kiin ati efuso a bidiigi taawan? A meke taawan biibi wan sani di á be de tuu. Son leisi sama e bidiigi taawan fu fende wini efuso fu di den á wani sitaafu. Ma wi dati e du san Yehofa taki, neen meke u nai „bidiigi sama”. A san a taki bun efuso santa u wani du.Romesama 6:19.

20, 21. San u ná o du efu ai bigi gi u taki Gadu soi bun-ati gi u?

20 Enke Kelesten u sabi taki wi á mu waka gi u toowpaa, wi á mu e diingi duungu efuso du taa gaan sondu. Te i luku en bun, wi á wani du nawan sani di Yehofa á lobi. Boiti taki wi á wani didon anga wan sama di á de u toowpaa, u wani luku bun anga den sani di wi e du te wi e meke piisii. Boiti taki wi á wani diingi duungu, wi á wani diingi sopi te enke u hei. Anga ala fa wi e fii fu du den sani ya son leisi, tokuso u sabi taki efu u meke moiti wi o poi holi useefi.

21 U wani meke moiti fu du ala san u man fu du san Pawlesi taigi den Kelesten. A be taigi den taki: „Ná meke sondu tii a sikin fu u di o dede enke kownu moo. Ná du san a sondu sikin wani tu” (Romesama 6:12; 7:18-20). A tuu taki wi á poi wai pasi gi ala sondu, ma te wi e meke moiti fu wi á du nawan sondu, da wi e soi Yehofa anga Yesesi taki a bun-ati di den soi gi u, e bigi gi u.

22. San wi o fende aini a ten di e kon efu a bun-ati di Gadu soi gi u, e bigi u?

22 Yehofa gi u paadon fu den sondu di u du aini a ten di pasa. Te anga now ai gi u paadon ete. Ai bigi gi u taki a soi u a bun-ati fi en. Neen meke u mu du ala san u man fu wi á du sani di ai buuse, winsi taa sama nai si den sani de enke sondu. Sowtu wini wi o fende efu wi e du a sani de? Pawlesi taki: „Ma nownow u fii, wi a ná saafu fu sondu moo. U toon saafu fu Gadu. A sani de meke u kon santa. Wi o fende teego libi te fu kaba.”Romesama 6:22.