Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  december 2016

Fika ala den polobelema fi i gi Yehofa

Fika ala den polobelema fi i gi Yehofa

„Fika ala den polobelema fi i gi en, bika ai booko en ede anga i.”1 PEITILISI 5:7.

SINGI: 60, 23

1, 2. (a) Saide wi abi booko-ede? (Luku a fowtow na a bigin.) (b) San wi o luku aini a artikel ya?

NOWNOW Saatan e „waka lontu enke wan lew di e bali. Ai suku sama fu gwili” (1 Peitilisi 5:8; Openbaring 12:17). Neen meke, a libi e taanga gi ala sama. Ai taanga gi a foluku fu Gadu tu. A foluku fu Gadu a fositen be abi booko-ede tu. Beibel e soi taki Kownu David seefi be abi booko-ede (Psalm 13:2). Pawlesi be e ’booko en ede anga den kemeente’ (2 Korentesama 11:28). Ma san u mu du te wi abi booko-ede?

2 Aini a ten di pasa, u Dda di de a hemel be e yeepi a foluku fi en fu den á booko den ede tumisi. Na a sani de a wani du gi u tu. Beibel taki i mu „fika ala den polobelema fi i gi en, bika ai booko en ede anga i” (1 Peitilisi 5:7). Fa i sa du a sani ya? Wi o taki fu fo  fasi fa i sa du a sani ya. I sa (1) begi, (2) leisi Beibel, da i teke ten pakisei san i leisi, (3) meke Yehofa santa yeye yeepi i (4) taki anga wan sama di yu e fitoow. Te wi e taki fu den fo sani ya, meke moiti fu si sowtu wan fu den i mu du moo bun.

„FIINGI DEN LAI FI I GI YEHOFA”

3. Fa i sa „fiingi den lai fi i gi Yehofa”?

3 Wan fasi fa u sa fiingi u booko-ede gi Yehofa, a te wi e begi. Te yu e booko yu ede anga wan sani, i Dda di de a hemel wani i taigi en fa yu e fii. A psalm sikiifiman David be begi Yehofa taki: „Gadu, aliki a begi fu mi baa.” Aini aseefi psalm ya David taki: „Fiingi den lai fi i gi Yehofa, da enseefi o holibaka gi i” (Psalm 55:1, 22). Te i du ala san i poi fu losi wan polobelema, neen sani á go enke fa i be wani, ná booko yu ede. Taigi Yehofa fa yu e fii. Ma fa begi e yeepi? Fa begi sa yeepi u fu wi á booko wi ede tumisi?Psalm 94:18, 19.

4. Saide a pelensipali fu begi te wi abi booko-ede?

4 Leisi Filipisama 4:6, 7San Yehofa e du te wi e begi en naamo anga u hii ati? A o yeepi u fu fii bun. A o yeepi u tu fu wi á pakisei sani di e meke u fii booko-saka. Te wi e feele efuso te wi e booko wi ede, da Gadu e yeepi u fu fii bun. A omen baala anga sisa a yeepi na a fasi ya. A poi yeepi i tu. „A freide fu Gadu” sa yeepi i fu pasa ala sowtu tesi. I sa biibi san Yehofa paamisi anga i hii ati. A taki: „Ná booko yu ede, bika a mi a yu Gadu. Mi o meke yu abi deki-ati, mi o yeepi i.”Yesaya 41:10.

GADU WOWTU SA GI I TAANGA-SIKIN

5. Fa a Wowtu fu Gadu sa yeepi i fu yu á booko yu ede tumisi?

5 Du fu tu sani di o yeepi u fu fii bun, a te wi e leisi Beibel da u teke ten pakisei den sani di u leisi. Saide a sani ya pelensipali? Beibel na a Wowtu fu Gadu. Gadu e soi wi aini a Beibel san u mu du fu sani waka bun gi u. Winsi on ten yu e fii booko-saka, i sa pakisei den sani di i leisi aini a Beibel. Puubei fu si fa den sani de sa gi i taanga-sikin. A sani ya o yeepi i fu yu á booko yu ede tumisi. A o yeepi i tu fu sabi san i mu du te yu abi booko-ede. Yehofa taki te wi e leisi en Wowtu wi o abi  „deki-ati”. U ná o ’feele te da u sikin e dansi’.Yowsuwa 1:7-9.

Biibi o yeepi u fu fitoow taki Yehofa o yeepi u fu fende den sani di wi abi fanowdu

6. Fa i sa fende wini fu den sani di Yesesi taki?

6 Te wi e leisi Beibel, da wi e si fa Yesesi be e taki anga sama. Den be lobi aliki Yesesi, bika ala yuu den sani di a be e taki be e meke den fii bun, moomoo den sama di be booko-saka anga den sama di be lasi-ati. (Leisi Mateyesi 11:28-30.) Yesesi be e booko en ede tuutuu anga a fasi fa taawan be e fii (Malikisi 6:30-32). Leti enke fa Yesesi be paamisi den apostel taki a o yeepi den, a so a o yeepi u tu. U ná abi fu de a hemel anga Yesesi fu a yeepi u. U Kownu Yesesi di de a hemel, e soi wi a omen fasi taki a lobi u. Neen meke te yu e booko yu ede anga wan sani, i sa biibi taki a o yeepi i na a moo bun yuu. Yesesi e yeepi u fu abi howpu. A sani ya e yeepi u fu wi á booko wi ede pasa peesi.Hebrewsama 2:17, 18; 4:16.

DEN MANII DI A YEYE FU GADU E YEEPI SAMA FU ABI

7. Sowtu wini wi o fende te wi abi a santa yeye?

7 Yesesi paamisi taki u Dda o gi u santa yeye efu u begi en (Lukasi 11:10-13). Fa a sani ya e yeepi u anga booko-ede? A santa yeye efuso a kaakiti fu Gadu, e yeepi u fu soi den fasi di Gadu seefi abi (Kolosesama 3:10). Beibel e kai den fasi ya „den manii di a yeye e meke sama abi”. (Leisi Galasiyasama 5:22, 23.) Te wi e meke moiti fu abi den fasi ya, wi o man libi bun anga taawan. Den fasi ya o yeepi u tu fu wi á du sani di o gi u booko-ede bakaten. Meke u luku fa den fasi di a santa yeye e meke sama abi sa yeepi u.

8-12. Fa den fasi di a santa yeye e meke sama abi sa yeepi u?

8 „Lobi, piisii, freide.” Te wi e libi bun anga taawan, u ná o go e booko wi ede tumisi. Saide? Te wi e soi u baala anga sisa taki u lobi den anga te wi e lesipeki den, da a sani ya o yeepi u fu wi anga den á kisi toobi efuso kwali. U ná o du sani di o meke den ati boon tu. A sani ya o yeepi u fu wi anga u baala anga sisa á poli.Romesama 12:10.

Te wi e meke moiti fu abi bun manii, wi o man libi bun anga taawan

9 „Pasensi, switifasi, bunfasi.” Beibel taki: „U mu libi switi anga useefi, tyali mu e kisi i gi taawan, gi useefi paadon anga u hii ati” (Efeisesama 4:32). Efu wi e du a sani ya, wi anga taawan ná o kisi toobi. U ná o du sani di o gi u booko-ede tu. Boiti dati, a o moo makiliki gi u fu sabi san u mu du te wan sama du wan sani di wi á lobi.

 10 „Biibi.” Son leisi wi e booko wi ede anga moni efuso gudu (Odo 18:11). San o yeepi u fu wi á booko wi ede anga den sani ya? U mu meke moiti fu du san apostel Pawlesi taki. A taki: „U mu tifeedi anga san wi abi nownow.” Biibi o yeepi u fu fitoow taki Yehofa o yeepi u fu fende den sani di wi abi fanowdu. A paamisi u taki: „Mi ná o gwe fika i. Noiti mi o fika i wawan.” Neen meke leti enke Pawlesi u sa taki: „A Yehofa a mi yeepiman. Mi ná o feele. San libisama o poi du anga mi?”Hebrewsama 13:5, 6.

11 „Safu-ati, dwengi iseefi.” Pakisei den wini di yu o fende te yu abi safu-ati anga te yu e dwengi iseefi. Den fasi ya o yeepi i fu yu á du efuso taki sani di o gi i booko-ede. Den o yeepi i tu fu tan faawe fu sani enke „takuu ati boon, atiboon, babali, anga kosi”.Efeisesama 4:31.

12 Te wi abi sakafasi, wi o biibi taki Gadu poi yeepi u. Boiti dati wi o ’fika ala den polobelema fu u gi en’ (1 Peitilisi 5:6, 7). Yehofa o yeepi i te yu abi sakafasi. Te i sabi san i man du anga san yu á poi du, da a sani ya o yeepi i fu biibi Yehofa moo iseefi. Fu di yu o fitoow en meke i ná o booko yu ede tumisi.Mika 6:8

„NÁ BOOKO YU EDE”

13. San Yesesi be wani soi u di a taki: „Ná booko yu ede”?

13 Yesesi taigi wi a Mateyesi 6:34 (leisi) taki: „Ná booko yu ede.” A gei enke a sani ya taanga fu du. Ma san Yesesi be wani soi u? U be si kaba taki son leisi David anga Pawlesi be e booko den ede anga son sani. Yesesi á taki den sama di e dini Gadu ná o abi booko-ede. Ma a be wani soi den bakaman fi en taki booko-ede nai losi polobelema. Ala dei sani o pasa di o gi u booko-ede, neen meke enke Kelesten wi á mu suku moo booko-ede fu di wi e pakisei sani di pasa efuso fa  sani o waka den ten di de a u fesi. Fa a sani di Yesesi taki sa yeepi u fu wi á booko wi ede tumisi?

14. Fa u sa waka a David baka te wi abi booko-ede?

14 Son sama e booko den ede fu di den be meke wan fowtu. Kande den kosensi e fon den fu di den be meke wan gaan fowtu omen yali pasa. Son leisi Kownu David be e booko en ede fu di a be meke wantu fowtu. A be taki: „Mi e fii pen aini mi ati, neen meke mi e bali taanga” (Psalm 38:3, 4, 8, 18). Di a sani ya miti David a du wan koni sani. A be e biibi taki Yehofa be abi tyali-ati gi en. A be e biibi tu taki Yehofa be o gi en paadon. A be piisii di a kon fusutan taki Gadu gi en paadon.Leisi Psalm 32:1-3, 5.

15. (a) San wi e leli fu David? (b) San i mu du te yu abi booko-ede? (Luku a faki „ Wantu sani di o yeepi i fu yu á booko yu ede tumisi.”)

15 Son leisi a den sani di e miti yu e gi i booko-ede. Na a pisiten di sama be e suku fu kii David a sikiifi Psalm 55 (Psalm 55:2-5). Ma winsi fa a be abi booko-ede, a be e fitoow Yehofa. David begi Yehofa fu a yeepi en anga den polobelema fi en. Ma a be sabi taki enseefi be mu du wan sani tu (2 Samuweli 15:30-34). A toli fu David e leli u taki pe fu u meke booko-ede meke u lasi-ati, u mu meke moiti fu losi a polobelema. Boiti dati u mu biibi taki Yehofa o yeepi u.

16. Te i luku san a nen fu Gadu wani taki, da fa ai taanga u biibi?

16 Son Kelesten e booko den ede anga sani di den denki taki o pasa aini a ten di e kon. Ma a á de fi i booko yu ede anga wan sani di á pasa ete. Saide? Bika moo gaanse te wan sani pasa, a nai ogii enke fa u be denki. Boiti dati, i mu holi a pakisei taki sani á de di Gadu á poi du. En nen wani taki „mi o toon iniiwan sani di mi wani toon” (Ekisodesi 3:14). Neen meke a á de fanowdu fu booko wi ede anga sani di á pasa  ete. Bika a nen fu Gadu e soi taki a o du ala den sani di a wani du gi libisama. I sa biibi taki Gadu o belesi den sama di nai gwe fika en. Boiti dati a o yeepi u fu wi á booko wi ede tumisi anga den sani di be miti wi a ten di pasa, den sani di e miti u nownow anga den sani di sa miti u aini a ten di e kon.

TAKI ANGA WAN SAMA DI YU E FITOOW

17, 18. Fa a taki di wi e taki anga taawan e yeepi u te wi abi booko-ede?

17 Du fu fo sani di sa yeepi u te wi abi polobelema, a te wi e taigi wan sama di wi e fitoow san e gi u booko-ede. I toowpaa, wan bun mati, efuso wan owluman aini a kemeente sa yeepi i fi i fusutan a polobelema fi i moo bun. Beibel taki: „Tyaipi booko-ede o meke wan sama booko-saka, ma te wan sama taki switi anga en, da ai piisii” (Odo 12:25). Beibel taki tu: „Te sama nai taki kiin anga denseefi, ala sani e buuya, ma te omen sama e taki fu seeka wan toli, sani e waka bun.”Odo 15:22.

18 Den komakandaa e yeepi u te wi abi booko-ede tu. Ala wiki wi e kon makandaa anga baala anga sisa di e booko den ede anga u. Den wani gi u taanga-sikin tu (Hebrewsama 10:24, 25). Te wi e ’gi useefi taanga-sikin’ na a fasi ya, ai yeepi u fu wi á booko wi ede tumisi.Romesama 1:12.

TE WI ANGA YEHOFA A MATI WI E MOO FENDE TAANGA-SIKIN

19. Saide i sa biibi taki yu o fende taanga-sikin efu Yehofa a yu mati?

19 Wan owluman fu Kanada kon fusutan saide a be mu fika den booko-ede fi en gi Yehofa. A baala ya e leli pikin a sikoo. A wooko ya e gi en booko-ede. Boiti dati a abi wan siki di e meke ai buuya gawgaw. San e yeepi a baala ya? Ai meke moiti fu toon wan moo bun mati fu Yehofa. Den mati fi en seefi e yeepi en. Ai taigi en uman fa ai fii. Boiti dati, den owluman anga a kelen-owluman yeepi en fu a si a polobelema fi en enke fa Yehofa e si en. Wan dataa yeepi en tu fu fusutan a siki fi en moo bun. A sani ya yeepi en fu bigin du sani taa fasi. A be e meke ten fu du sport anga fu e teke boo tu. Baka wan pisiten a kon sabi fa a be mu libi anga a siki fi en. Nownow te a á poi du wan sani, ai fika en gi Yehofa.

20. (a) Fa u sa fika den booko-ede fu u gi Gadu? (b) San wi o luku aini a taa artikel?

20 Aini a artikel ya u si fa u sa fika den booko-ede fu u gi Yehofa. U si taki u mu begi, leisi a Wowtu fi en da u teke ten pakisei san u leisi. U si tu taki u mu meke a santa yeye fu Yehofa yeepi u. U mu taki anga wan sama di wi e fitoow. Boiti dati u mu e go a den komakandaa. Aini a taa artikel wi o taki fu den sani di Yehofa paamisi u.Hebrewsama 11:6.