Skip to content

Skip to table of contents

 SUTUDI-ARTIKEL 31

„U nai gi abaa”!

„U nai gi abaa”!

„Neen meke u nai gi abaa.”​—2 KOR. 4:16.

SINGI 128 Holidoo te na a kaba

SAN WI O LELI *

1. San Kelesten mu du fu fende a tuutuu libi?

KELESTEN e lon wan siteelon fu fende a teego libi. Winsi a omen yali yu e lon a siteelon ya, efuso a taade ya i bigin, yu á mu gi abaa. A taanga-sikin di apostel Pawlesi be gi den Kelesten a Filipi, sa yeepi wi aini a ten ya fu holidoo aini a siteelon. Son wan fu den Kelesten ya a omen yali den be de aini a tuu biibi kaba di Pawlesi sende a biifi gi a kemeente. Den be e dini Yehofa anga den hii ati tu. Tokuso Pawlesi membee den taki den mu holidoo winsi san e pasa. Pawlesi be wani yeepi den Kelesten ya fu holidoo leti enke fa enseefi be e holidoo fu den sa „fende a pai fu Gadu”.​—Filip. 3:14.

2. Saide na a moo bun yuu Pawlesi be gi den Kelesten a Filipi taanga-sikin?

2 Na a moo bun yuu Pawlesi be gi den Kelesten a Filipi a taanga-sikin ya. Bika fanafu di a kemeente sete a Filipi, neen sama bigin du ogii anga den baala anga sisa. Aini a yali 50, Pawlesi be si wan fisyun pe wan man be e kai en fu a ’abaa go yeepi den a Masedoniya’. Neen meke en anga Silas go peleiki a Filipi (Toli 16:9). Di den doo ape neen den miti wan uman den e kai Lidiya. „Yehofa opo a uman ya ati, neen meke a be poti pakisei a den sani di Pawlesi be e taki” (Toli 16:14). A á teke langa, neen a uman ya anga den sama fi en osu dopu. Ma Didibii bigin du ogii anga den Kelesten wantenwanten. Wantu man fu a foto tyai Pawlesi anga Silas go a gaan kuutu, neen den lei gi den taki den e tyai buuya kon aini a foto. A sani ya meke den fon Pawlesi anga Silas, neen den yaki den puu  aini a foto (Toli 16:16-40). Den gi abaa di a sani ya miti den? Nono! Den baala anga sisa aini Filipi be gi abaa? Nono, denseefi á gi abaa. A fasi fa Pawlesi anga Silas holidoo be musu gi den taanga-sikin fu den á gi abaa.

3. Fa Pawlesi soi taki a be wani holidoo te na a kaba?

3 Pawlesi á be wani gi abaa (2 Kor. 4:16). Ma a be sabi taki efu a be wani dini Yehofa en hii libi, a be o abi fu tan poti pakisei na a pai di a be o fende. San a toli fu Pawlesi e leli u? Sowtu toli fu sama aini a ten ya e soi taki u poi holidoo winsi san e pasa? Fa a howpu di wi abi sa yeepi u fu holidoo winsi san e pasa?

SAN U SA LELI FU PAWLESI?

4. Fa Pawlesi be tan peleiki winsi san be e miti en?

4 Pakisei fa a libi fu Pawlesi be de di a be e sikiifi a biifi gi den Kelesten a Filipi. A be de a sitaafu a Rome. A á be poi peleiki enke fa a be wani. Ma toku a be e peleiki gi den sama di be e go luku en. A be e sikiifi biifi gi den kemeente di be de faawe tu. Aini a ten ya, a omen Kelesten di á poi komoto a osu e suku ala fasi fu peleiki gi den sama di e kon a den osu. Den e sikiifi biifi tu gi sama di u nai miti a osu.

5. Te i luku den sani di Pawlesi taki a Filipisama 3:12-14, da san be yeepi en fu tan poti pakisei na a wooko di a be mu du?

5 Pawlesi á be meke nawan sani puu en pakisei na a dini di a be e dini Yehofa. Pawlesi be taki fu di a be wani wini a siteelon, meke a be abi fu ’feegete ala den sani di a be fika, da a meke taanga moiti fu lon go miti den sani di be de neen fesi’. (Leisi Filipisama 3:12-14.) San a wantu sani di be sa puu Pawlesi pakisei na a wooko di a be mu du? Wan fu den sani ya na a hei sikoo leli di a be kisi. Fosi Pawlesi be toon wan Kelesten, en a be wan pelensipali man aini a Dyu biibi. Toku bakaten a be e si den sani ya enke „soso sani” (Filip. 3:3-8). Wan taa sani di be sa puu en pakisei, na a hati di a be e hati en taki be e du ogii anga den bakaman fu Yesesi fosi a toon wan Kelesten. Toku a á meke a sani ya tapu en fu dini Yehofa. Du fu dii sani di be sa puu Pawlesi pakisei, a den somen sani di a be abi a gaandi fu du gi Yehofa. Ma a á be si enke a ná abi fu wooko taanga moo. Pawlesi be tan peleiki fayafaya winsi fa den be e sooto en, fon en efuso fiingi siton naki en. Son leisi a be e sungu. A ná ala yuu a be e abi sani fu nyan efuso bunbun koosi fu wei (2 Kor. 11:23-27). Ma winsi san be e pasa, Pawlesi be sabi taki a mu holidoo te na a kaba. Na aseefi sani u mu du tu.

6. San a wantu fu den sani di u „fika” di u mu meke moiti fu feegete?

6 Fa u sa ’feegete den sani di u fika’ a baka, leti enke Pawlesi? Kande wi e fii enke wi á bun fu di u be meke wan fowtu den ten di pasa. Efi yu e fii so, i sa ondoosuku sani di e taki fu den wini di wi e fende fu a dede di Yesesi kon dede gi u. Te wi e sutudeli, u mu begi da u teke ten pakisei den sani di u leli. A sani ya o yeepi u fu wi á booko wi ede tumisi fu di u be meke wan fowtu. U ná o kuutu useefi moo fu wan sani di Yehofa gi u paadon kaba. Pakisei wan taa sani di u sa leli fu Pawlesi. Kande i fika wan wooko di be sa meke i gudu fu di i wani poti a Kownukondee a fesi. Efi i du a sani ya, meke moiti fu feegete den sani di i fika a baka. Yu á mu fii enke i lasi wan sani (Num. 11:4-6; Peleik. 7:10). Son wan fu den sani di  u „fika”, a den sani di u be abi a gaandi fu du gi Yehofa. Kande u holidoo tu di tesi be e miti u. Te wi e pakisei fa Yehofa be holibaka gi u anga fa a be belesi u den ten di pasa, a sani ya e meke wi anga en toon moo bun mati. Tokuso wi á mu si enke u du ala san u mu du gi Yehofa kaba.​—1 Kor. 15:58.

Te wi e lon a siteelon fu fende a libi, wi á mu meke sani puu u pakisei (Luku paragraaf 7)

7. Enke fa 1 Korentesama 9:24-27 e soi, da san u mu du efu u wani wini a siteelon fu fende a libi?

7 Pawlesi be fusutan bun san Yesesi be wani taki di a taki: „Du ala san i man” (Luk. 13:23, 24). Pawlesi be sabi taki leti enke Yesesi a be mu du ala san a man gi Yehofa en hii libi. Neen meke a taki a libi fu wan Kelesten de enke sama di e siteelon. (Leisi 1 Korentesama 9:24-27.) Wan sama di e siteelon e meke moiti fu wini, a nai meke sani puu en pakisei. Meke u taki wantu sama e siteelon a wan peesi di lai wenkii anga taa sani di sa puu den pakisei. I si enke wan fu den sama ya o sitopu fu luku san den e seli aini den wenkii? Efu a wani wini, a ná o du a sani de. A letiso wi á mu meke nawan sani puu u pakisei na a moiti di wi e meke fu fende a tuutuu libi. Efu wi á meke nawan sani puu u pakisei na a dini di wi e dini Yehofa, da leti enke Pawlesi wi o fende a tuutuu libi!

SAN O YEEPI U FU HOLIDOO WINSI SAN E MITI U?

8. San a den dii sani di wi o luku?

8 Meke u luku dii sani di sa meke u lasi-ati. A fosiwan, te sani á waka enke fa u be denki. Du fu tu, te u gusontu e go a baka fu di wi e kon gaandi. Du fu dii, te tesi e miti u wan hii pisiten. Wi o fende wini te wi o luku fa taawan holidoo di den sani ya miti den.​—Filip. 3:17.

9. San sa pasa te sani á waka enke fa u be denki?

9 Te sani á waka enke fa u be denki. Wi e angii fu den sani di Yehofa paamisi u. Di polofeiti Habakuk be begi Yehofa fu a puu den ogii di be e pasa a Yuda, Yehofa taigi en taki a mu „tan luku en” (Hab. 2:3). Te wi e fii enke den sani di Yehofa  paamisi u ná o pasa ete, a sani ya sa meke u nai dini en fayafaya moo. A sa meke u lasi-ati tu (Odo 13:12). Na a sani ya be pasa aini a pisiten fu 1914. A ten de a omen salufu Kelesten be denki taki den be o go a hemel aini 1914. Ma san den sama di be e dini Yehofa anga den hii ati du di sani á waka enke fa den be denki?

Royal anga Pearl Spatz tan dini Yehofa omen yali langa winsi fa sani á be waka enke fa den be denki aini 1914 (Luku paragraaf 10)

10. San wan toowpaa du di sani á waka enke fa den be denki?

10 Meke u luku a toli fu tu Kelesten di á gwe fika Yehofa winsi fa sani á be waka enke fa den be denki. Baala Royal Spatz be dopu aini 1908 di a be abi 20 yali. A be e biibi taki a á be fika langa moo fu a go a hemel. Di a akisi a sisa di en anga en be abi mofu, fu toow anga en aini 1911, a taigi en taki: „I sabi san o pasa aini 1914. Efu wi o toow, da a nownow u mu toow!” A baala anga a sisa ya komoto a waaleiti di den á go a hemel aini 1914? Nono, bika den be e moo poti pakisei na a dini di den be e dini Yehofa, a ná a wini di den be o fende wawan den be e poti pakisei. Den be de kabakaba fu lon a siteelon te na a kaba. Royal anga Pearl dini Yehofa anga den hii ati te enke den dede omen yali baka dati. I musu e angii fu si a ten di Yehofa o santa a nen fi en, anga a ten di a o du san a paamisi. I sa biibi taki den sani ya o pasa na a yuu di Yehofa poti. Ma fu nownow, meke u dini Yehofa fayafaya. Noiti u mu lasi-ati te sani á waka enke fa u be denki.

Winsi fa baala Arthur Secord be gaandi, a be e du san a man gi Yehofa (Luku paragraaf 11)

11-12. Saide u sa dini Yehofa anga u hii ati ete winsi u gusontu go a baka? Gi wan ondoofenitoli.

11 Te u gusontu e go a baka fu di wi e kon gaandi. Wan sama di e lon wan tuutuu siteelon abi kaakiti fanowdu fu man lon. Ma winsi u sikin swaki, toku u sa du sani fu taanga u biibi. A omen baala anga sisa di kon gaandi e meke moiti fu du san den poi gi Yehofa (2 Kor. 4:16). Luku a toli fu Baala Arthur Secord. Di a baala ya be abi 88 yali, a 55 yali a be wooko a Betel kaba, ma a be kon swaki. Wan dei wan fu den sesite di be e yeepi en, luku en neen a taigi en taki: „Baala Secord, i wooko taanga gi Yehofa.” Ma a baala ya á be e poti pakisei namo a san a be du gi Yehofa kaba. A luku a sesite neen a piki en taki: „Eeye, san i taki a tuu. Ma a ná san u du kaba na a moo pelensipali sani, u mu holidoo te na a kaba.”

12 Kande yu e dini Yehofa omen yali kaba, ma now yu á poi du san i be gwenti moo fu di i gusontu e go a baka. Efu a sani ya e miti i, yu á mu lasi-ati. I sa biibi taki Yehofa á feegete san i du gi en (Heb. 6:10). Holi a pakisei taki a ná den somen sani di wi e du gi Yehofa e soi taki u lobi  en. Ma a te wi e piisii anga san u man du gi Yehofa da wi e soi taki u lobi en (Kol. 3:23). Yehofa sabi san u poi du. A á wani u du moo enke san u man du.​—Malik. 12:43, 44.

Anatoly anga Lidiya Melnik holidoo winsi fa omen tesi miti den (Luku paragraaf 13)

13. San wi e leli fu a fasi fa Anatoly anga Lidiya holidoo di tesi miti den?

13 Te tesi e miti u wan hii pisiten. Tesi e miti son baala anga sisa baka makandaa. Taawan a wan hii pisiten sama e du ogii anga den. Luku a toli fu Baala Anatoly Melnik. Di a be abi 12 yali neen den poti en dda a sitaafu-osu. Baka dati den tyai en dda go a Siberiya, moo enke 7000 kilomeiti fu den sama fi en di be e tan a Moldova. Baka wan yali, den sende Anatoly anga en mma anga en gaandda go a Siberiya. Bakaten den be man go a komakandaa, ma den be mu waka 30 kilomeiti fu doo pe a komakandaa be e holi. Den tan du a sani ya winsi fa a peesi be e koo. Bakaten den sooto Baala Melnik dii yali langa. A pisiten di a sooto fika en uman Lidiya, a wan yali a meisyo fu den be abi. Winsi fa den sani ya be e miti Anatoly anga en famii, den á gwe fika Yehofa. Nownow Anatoly di abi 82 yali de a wan Beikantoo Komte a Centraal Asiya. Leti enke Anatoly anga Lidiya, meke u du ala san u man fu tan dini Yehofa. Meke u holidoo enke fa u be du kaba aini a ten di pasa.​—Gal. 6:9.

POTI PAKISEI NA A HOWPU DI WI ABI

14. San Pawlesi be fusutan taki a be mu du fu fende a tuutuu libi?

14 Pawlesi be e biibi taki a be o poi lon a siteelon te na a kaba. Pawlesi a be wan salufu Kelesten, neen meke a be abi a howpu fu go a „hemel”. Ma efu a be wani fende a libi ya, a be ’mu tan lon’ (Filip. 3:14). A wan bun ageisitoli Pawlesi be koboloiki fu soi den Kelesten fu Filipi taki den á mu meke nawan sani puu den pakisei na a moiti di den e meke fu fende a tuutuu libi.

15. Sowtu ageisitoli Pawlesi gi fu gi den Kelesten fu Filipi taanga-sikin fu tan meke moiti fu fende a libi?

15 Pawlesi be membee den Kelesten fu Filipi taki den be abi a howpu fu go a hemel (Filip. 3:20). Saide den á be mu feegete a sani ya? A ten de a omen sama be e wani Rome pampila bika a be abi wini te i be abi a pampila ya. * Ma a gaandi di den  salufu Kelesten be abi fu go a hemel, be bigi moo a fende di wan sama be o fende pampila fu tan a Rome. Den wowtu „tyai useefi a wan fasi di fiti” di sikiifi a Filipisama 1: 27, wani taki tyai useefi enke wan sama di abi pampila fu tan aini wan kondee. Neen meke Pawlesi be taigi den Kelesten a Filipi taki den mu tyai denseefi „a wan fasi di fiti a bun nyunsu fu Kelestesi” (Filip. 1:27). U sa waka a den salufu Kelesten fu a ten ya baka, bika den e meke taanga moiti fu fende a gaandi fu go libi fu teego a hemel.

16. Enke fa Filipisama 4:6, 7 e soi, da san u mu du winsi wi abi a howpu fu libi a hemel efuso a goontapu?

16 Winsi wi abi a howpu fu libi fu teego a hemel efuso aini wan paladeisi a goontapu, u mu tan meke moiti fu fende a libi ya. Winsi san e miti u, noiti u mu daai luku den sani di u fika a baka. Wi á mu meke nawan sani tapu u fu dini Yehofa tu (Filip. 3:16). Kande a omen yali kaba wi e wakiti fu Yehofa du den sani di a paamisi u. Kande u gusontu go a baka fu di u kon gaandi. A omen tesi miti son wan fu u den ten di pasa, ma u holidoo. Winsi sowtu wan fu den sani ya e miti i, ná ’booko yu ede anga nawan sani’. Pe fi i booko yu ede, a moo bun fu begi Gadu fayafaya. Da Gadu o gi yu a freide fi en di libisama á poi fusutan.​—Leisi Filipisama 4:6, 7.

17. San wi o luku aini a taa artikel?

17 Leti enke fa wan sama di e siteelon e moo lon taanga te ai doo pe a mu lon doo, a so useefi mu meke taanga moiti fu fende a tuutuu libi. Wi á mu meke nawan sani puu u pakisei. Leti enke fa wan sama di e siteelon e poti pakisei na a wini di a mu wini, a so u mu poti ala u pakisei a den sani di Yehofa taki a o du gi wi aini a ten di e kon. U mu tan du ala san u man fu fende a tuutuu libi. San o yeepi u fu holidoo aini a siteelon fu fende a tuutuu libi? Aini a taa artikel wi o si „san a den moo pelensipali sani” di u mu poti a fesi.​—Filip. 1:9, 10.

SINGI 79 Yeepi den fu tan a yu se

^ paragraaf 5 Winsi on langa wi e dini Yehofa kaba, u mu tan meke muiti fu go a fesi enke Kelesten. Apostel Pawlesi be e gi den taa Kelesten taanga-sikin fu holidoo. Te wi e leisi a biifi di a be sikiifi gi den Kelesten a Filipi, useefi sa leli sani di o yeepi u fu holidoo aini a siteelon fu fende a tuutuu libi. Aini a artikel ya wi o luku fa u sa wooko anga den leli ya.

^ paragraaf 15 Fu di a foto Filipi be de a Rome ondoo, meke den sama fu a foto be abi son leti di den Romesama be abi. Neen meke den baala anga sisa be man fusutan a ageisitoli fu Pawlesi.