Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2017

U mu kengi a fasi fa u be de fosi

U mu kengi a fasi fa u be de fosi

„Kengi a fasi fa u be de fosi. U mu tapu anga den sani di u be e du.” ​—KOLOSESAMA 3:9.

SINGI: 121, 142

1, 2. San sama e taki fu Yehofa Kotoigi?

A OMEN sama e si taki Yehofa Kotoigi de taa fasi. Wan man di den e kai Anton Gill be gafa den Kotoigi di be de aini den sitaafuman kampu a Doisilikondee. A be sikiifi taki: „Ná pikin buuse den suudati fu Doisilikondee be e buuse den Yehofa Kotoigi. . . . Aini 1939 a 6000 Kotoigi be de aini den sitaafuman kampu.” A taki winsi fa den suudati be e du omen sowtu ogii anga den Kotoigi, den á be e daai baka gi a Gadu fu den. Sama be sa fitoow den. Den á be e buuya. Den be e yeepi denseefi.

2 Den sama a Zuid-Afiikan seefi si taki Yehofa Kotoigi de taa fasi. A wan hii pisiten lanti be tapu den Kotoigi fu kon makandaa anga Kotoigi fu wan taa nasi. Ma sonde 18 december 2011, a moo enke  78.000 Kotoigi fu ala sowtu nasi fu Zuid-Afiikan anga taa kondee kon makandaa aini a moo gaan sitadiyon fu Johannesburg. Wan fu den fesiman fu a sitadiyon taki: „Noiti mi si sama tyai denseefi bun so ete enke den Kotoigi. Ala den wei koosi di fiti. Den kiin a hii sitadiyon. Ma a sani di moo foondoo mi, a den somen nasi di kon makandaa.”

3. Saide a olikanisâsi fu u á de enke taa olikanisâsi?

3 Sama di á de Kotoigi seefi e si taki Yehofa Kotoigi a hii goontapu e libi na a wan (1 Peitilisi 5:9). Saide wi á de enke den taa olikanisâsi? A fu di Beibel anga a santa yeye fu Gadu e yeepi u fu kengi den manii fu u di Gadu á lobi. Wi e „kengi a fasi fa u be de fosi”, da wi e meke moiti fu toon „nyun sama”.​—Kolosesama 3:9, 10.

U poi kengi u libi

4. San wi o luku aini a artikel ya? Saide wi o luku a sani ya?

4 Te u kengi a fasi fa u be de fosi, u mu meke moiti fu wi á libi enke fosi moo. Aini a artikel ya, wi o luku fa u sa kengi a fasi fa u be de fosi. Wi o luku saide a pelensipali fu kengi. Wi o si tu taki wan sama sa kengi, winsi sowtu ogii a be e du. Baka dati wi o luku san den sama di de langa a waaleiti e du fu den á libi enke fa den be e libi fosi moo. Saide a de fanowdu fu luku a toli ya? A fu di son sama di be e dini Yehofa nai dini en moo. A tyali, bika den sama ya bigin libi enke fa den be e libi di den á be sabi Yehofa. Neen meke u mu holi san Beibel e soi wi a pakisei. A taki: „A sama di denki a taampu, mu luku bun a á kai.”​—1 Korentesama 10:12.

LUKU BUN ANGA TAKUU FII

5. (a) Gi wan ageisitoli di e soi saide u mu kengi a fasi fa u be de fosi. (Luku a fowtow na a bigin.) (b) Fa wan sama di á kengi e tyai enseefi te u luku san sikiifi a Kolosesama 3:5-9?

5 San i be o du efi i si taki i koosi tyobo efuso e tingi? I be o puu en, ná so noh? A so a de anga den sani di wi e du. Te u si taki wi e du wan sani di Yehofa e buuse, u mu kengi wanten. Pawlesi be taki „u mu fika ala den sani” de. Meke u poti pakisei a tu fu den sani ya: Te sama e didon anga wan sama di en anga en á toow, anga te sama nai libi wan kiin libi.​—Leisi Kolosesama 3:5-9.

6, 7. (a) Fa Pawlesi soi taki a á makiliki fu kengi a fasi fa u be de fosi? (b) Fa Sakura be e libi? San yeepi en fu kengi a fasi fa a be e libi?

6 Te sama e didon anga wan sama di en anga en á toow. Beibel e soi taki a á fiti te wan sama e didon anga wan taawan di a á toow anga en. Pawlesi be taki Kelesten mu ’kii den pisi fu den sikin’ di be sa meke den du a sani de. A sani ya wani taki a  bunbun moiti u mu meke fu feti anga den sowtu fii ya. A á makiliki, ma u poi!

7 Wi e si taki u poi kengi te u luku fa sani waka anga Sakura, wan sisa a Yapan. * (Luku a maiki a ondoo.) Di a be yonkuu a be e fii enke neen wawan de. A á be wani fii so moo, neen meke a bigin didon anga omen sama fanafu di a be abi 15 yali. A dii leisi a puu bee. A taki: „Fosi, mi be e fii bun te mi be e didon anga den, bika mi be e fii enke sama abi mi fanowdu. Mi be e fii enke den lobi mi. Ma o moo mi be e du a sani ya, o moo mi á be e fii bun.” A so Sakura be e libi te enke a be abi 23 yali. A ten de a bigin sutudeli Beibel anga den Yehofa Kotoigi. A be lobi den sani di a be e leli. Yehofa yeepi en fu tapu anga a fasi fa a be e libi. A yeepi en tu fu a á fii booko-saka. Boiti dati, a yeepi en fu sen á kisi en moo. Nownow Sakura a wan kowownu pionili. A nai fii enke neen wawan de moo. A taki: „Mi e piisii te mi e si ala dei fa Yehofa lobi mi.”

SAN O YEEPI U FU TAPU ANGA SANI DI Á BUN

8. San a wantu sani di sa meke Gadu si wi enke sama di nai libi wan kiin libi?

8 Libi di á kiin. A ná te wan sama didon anga wan sama di a á toow anga en namo, da ai libi wan libi di á kiin. Enke fa Beibel e soi da taa sani de aini tu. Sani enke somoko anga a gi di sama e gi tyobo lafu toli (2 Korentesama 7:1; Efeisesama 5:3, 4). A wani taki ogii di sama e du sondee fu taawan sabi tu. Sani enke a leisi di sama e leisi buku di e meke den e fii fu didon anga taawan. Den sani ya sa meke wan sama libi a wan fasi di á fiti. Den sa meke wan sama pee anga en senpeesi tu. (Kolosesama 3:5) *​—Luku a maiki a ondoo.

9. San sa pasa anga wan sama di á poi holi enseefi fu a á luku fa sama e didon anga denseefi?

9 Te sama gwenti luku soso sikin fowtow efuso felon, da den e wani du aseefi sani di den e si. Den nai poi holi denseefi moo. Ondoosukuman kon si taki wan sama di gwenti luku den sani ya, de enke wan sama di á poi holi enseefi fu a á somoko efuso diingi sopi. Neen meke a sa tyai ogii gi u. Boiti taki sen sa kisi wan sama di e luku den sani ya, en osulibi ná o waka bun. Den sowtu sama ya nai wooko taanga enke fosi moo. En anga en toowpaa sa paati. Son wan e kii denseefi. Di wan man holi enseefi wan hii yali fu a á luku fa sama e didon anga denseefi, a taki a no fosi ai lesipeki enseefi baka.

10. San yeepi Ribeiro fu tapu anga a gwenti di a be gwenti luku buku anga felon di e soi fa man anga uman e didon anga denseefi?

10 A taanga gi omen sama fu den á luku buku efuso felon pe sama e  didon anga denseefi. Ma a wan feti di u poi wini. Luku a toli fu Ribeiro di e tan a Balasilikondee. Di a be moo yonkuu, a foloisi komoto a osu, neen a go wooko a wan peesi di e teke gaandi buku fu meke pampila. Aini den gaandi buku ya, a be e si buku pe sama e didon anga denseefi. A taki: „Fosi mi denki, mi á be poi tan mi á luku den buku ya. A fii fu luku den buku ya be taanga. Son leisi mi á be e poi wakiti fu mi uman komoto a osu fu mi be sa go luku felon pe sama e didon anga denseefi.” Ma wan dei di Ribeiro be de a wooko, a si a buku di den e kai A sroto gi wan kolokoe osofamiri aini den gaandi pampila. A teke en neen a bigin leisi. Den sani di a be e leisi meke a bigin sutudeli Beibel anga Yehofa Kotoigi. Ma tokuso a be taanga gi en ete fu fika a gwenti di a be gwenti luku buku di e soi fa man anga uman e didon anga denseefi. San yeepi en? A taki: „Begi, sutudeli Beibel, anga sidon denki den sani di mi leli yeepi mi fu moo lobi den manii fu Yehofa. A sani ya meke mi lobi Yehofa moo den buku anga felon di e soi fa man anga uman e didon anga denseefi.” A Beibel anga a santa yeye yeepi Ribeiro fu kengi a fasi fa a be e libi. Te fu kaba a dopu. Nownow Ribeiro a wan owluman.

U mu lobi Yehofa anga u hii ati, da u buuse san ai buuse

11. San o yeepi wan sama fu tapu anga a gwenti di a gwenti luku buku anga felon di e soi fa man anga uman e didon anga denseefi?

11 A ná sutudeli Beibel wawan yeepi Ribeiro fu tapu anga a gwenti di a be gwenti luku buku anga felon di e soi fa man anga uman e didon anga denseefi. A be e sidon pakisei den sani di ai leisi fu den be sa doo en ati. A be e begi Yehofa fu a yeepi en. A den sani ya yeepi en fu lobi Yehofa moo a lobi di a be lobi den sowtu buku anga den felon ya. Efu u wani tapu anga a gwenti di u gwenti luku den sani ya, u mu lobi Yehofa anga u hii ati, da u buuse sani di á bun.​—Leisi Psalm 97:10.

FIKA TAKUU ATI BOON, KOSI, ANGA LEI

12. San yeepi Stephen fu tapu anga boon ati anga kosi?

12 Son sama ati e boon gaw. Te den ati boon, den e taigi taawan hati sani. Den e soso den. Te a sani ya pasa, na a hii osufamii e fii en. Wan man a Australiya di den e kai Stephen be lobi kosi. En ati be e boon gaw. A taki: „Mi anga mi uman paati dii leisi. U be de fu booko toow.” Ma di den bigin sutudeli Beibel anga Yehofa Kotoigi, Stephen bigin meke moiti fu du den sani di ai leli. A taki di a á be sabi Yehofa, en  ati be e boon fu lawlaw sani. En ati be e boon te ala en ede e puu somoko. Ma di a bigin du san Beibel taki, neen sani be e go moo bun. A taki: „A osulibi be e go moo bun. Yehofa yeepi mi fu kengi, bika nownow mi ati nai boon gaw moo. A nai taanga gi mi fu holi miseefi.” Nownow Stephen a wan dinali. En uman a wan kowownu pionili omen yali kaba. Den owluman fu Stephen kemeente taki: „Stephen a wan tan pii sama. Ai wooko taanga aini kemeente. A abi sakafasi.” Den taki noiti den si pe en ati boon. Stephen nai gafa taki neen meke moiti fu kengi. A taki: „Noiti mi be o fende den belesi ya efu Yehofa á be yeepi mi fu kengi mi manii.”

13. Saide takuu ati boon sa tyai ogii gi u? Anga san Beibel taki u mu luku bun?

13 Beibel e soi taki wi ati á mu e boon gaw. Wi á mu e bali taawan efuso kosi den (Efeisesama 4:31). Den sani ya e tyai ogii. Aini a ten ya a omen sama e si enke a wan kowownu sani te yu ati boon efuso te yu ligei anga taawan. Ma a sani ya nai gi Yehofa gaandi. Neen meke omen baala anga sisa kengi a fasi fa den be e libi fosi. Den toon nyun sama.​—Leisi Psalm 37:8-11.

14. Wan ogii sama poi kengi?

14 Wan baala di den e kai Hans a wan owluman aini wan kemeente a Oostenrijk. A fesiman fu den owluman aini en kemeente taki: „Hans a  wan fu den moo tan pii baala di mi sabi.” Ma a ná ala yuu Hans be de so. Di a be moo yonkuu, a be lobi diingi duungu. Te a be duungu a be e suku toobi. Wan leisi di a be duungu, en ati boon te neen a kii en uman. Den be leisi 20 yali sitaafu gi en, ma a sani ya á yeepi en fu kengi en manii. Te fu kaba en mma sende wan owluman go luku en. A so Hans bigin sutudeli Beibel. A taki: „A be taanga gi mi fu kengi a fasi fa mi be de fosi. Ma wantu tekisi aini Beibel gi mi taanga-sikin. Wan fu den a Yesaya 55:7, pe sikiifi taki: ’Meke a sama di e du ogii tapu anga den ogii di ai du.’ A taawan a 1 Korentesama 6:11 pe sikiifi taki: ’Son wan fu u be e du den sani ya.’ A tekisi ya e taki fu den sama di be fika den ogii di den be e du. A omen yali Yehofa holi pasensi anga mi. En santa yeye yeepi mi fu toon wan nyun sama.” Hans dopu aini sitaafu-osu, neen den losi en di a koti sitaafu 17 yali anga afu. A taki: „Ai bigi gi mi taki Yehofa gi mi paadon.”

15. San a wan taa sani di sama e du te den á kengi ete? San Beibel e taki fu a sani ya?

15 Lei a wan taa sani di sama mu kengi te den e meke moiti fu toon nyun sama. A omen sama e lei fu den á mu pai lantimoni. Son leisi den e lei fu di den á wani fende sitaafu fu wan sani di den du. Ma Yehofa na „a Gadu fu a tuu” (Psalm 31:5). Neen meke a wani ala den sama di e dini en taki a tuu. A á wani den lei (Efeisesama 4:25; Kolosesama 3:9). Winsi sen o kisi u, efuso winsi a á makiliki, u mu taki a tuu ala yuu.​—Odo 6:16-19.

SAN YEEPI DEN FU WINI A FETI

16. San o yeepi u fu kengi a fasi fa u be de fosi?

16 Useefi ná abi a kaakiti fu kengi a fasi fa u be de fosi. Sakura, Ribeiro, Stephen, anga Hans be mu meke taanga moiti fu kengi a fasi fa den be e libi. Na a Wowtu fu Gadu anga a santa yeye yeepi den fu kengi (Lukasi 11:13; Hebrewsama 4:12). Efu u wani Yehofa yeepi u tu, u mu leisi Beibel ala dei, sidon denki den sani di u leisi, da u begi Gadu fu a gi u koni anga kaakiti fu du den sani di u leli (Yowsuwa 1:8; Psalm 119:97; 1 Tesalonikasama 5:17). A Wowtu fu Gadu anga a santa yeye o yeepi u tu te wi e seeka gi den komakandaa, anga te wi e go a komakandaa (Hebrewsama 10:24, 25) U wani wooko anga den taa sani di Yehofa gi u tu, sani enke den buku fu u, JW Broadcasting, JW Library, anga jw.org.​—Lukasi 12:42.

San o yeepi u fu kengi a fasi fa u be e libi? (Luku paragraaf 16)

17. San wi o luku aini a taa artikel?

17 Aini a artikel ya, u taki fu wantu manii di Kelesten á mu abi efu den wani Yehofa lobi den. Ma moo sani de di u mu du. U mu toon nyun sama. U hii libi mu soi taki u kengi. Aini a taa artikel wi o luku fa u sa du a sani ya.

^ paragraaf 7 Den kengi wantu nen aini a artikel ya.

^ paragraaf 8 Luku a pisi, „Fa wan sma kan tapu nanga a gwenti fu prei nanga en syenpresi?”, aini a buku Meki Gado tan lobi yu bladzijde 249, 250.