Skip to content

Skip to table of contents

 SANI DI U DU DEN TEN DI PASA

„On ten wan gaan komakandaa o holi baka?”

„On ten wan gaan komakandaa o holi baka?”

NA A kaba pisi fu november 1932, wan piisii sani pasa aini Mekisikow foto pe moo enke wan miliyun sama e tan. A wan wiki kaba di den poti faya a den pasi fu a foto ya. Ala sama e wakiti wan simpan sani. Nyunsuman de anga den sani fu meke felon a pe den loko e sitopu. Den e wakiti wan pelensipali sama. Sama na a sama ya? A Joseph F. Rutherford, a peleisidenti fu a Watch Tower Society (A olikanisâsi fu Yehofa Kotoigi). A omen baala anga sisa e wakiti fu bali wadaa gi Baala Rutherford. Baala Rutherford seefi be o kon na a konkelesi di be o holi dii dei.

A sikiifi aini The Golden Age taki (Nownow wi e kai en Ontwaakt!): „A ná abi misi, bakaten sama o taki a konkelesi ya a be wan pelensipali konkelesi di holi” fu meke sama yee a bun nyunsu aini Mekisikow. A 150 sama kon na a konkelesi ya, da saide u taki a be wan pelensipali konkelesi?

Fosi a konkelesi ya, a bun nyunsu á be paati bunbun a Mekisikow. Fanafu 1919, den be e holi wantu pikin konkelesi. Ma baka a yali de kemeente á be ipi so moo. Ma di a beikantoo opo aini Mekisikow Foto aini 1929, a be gei enke sani be o go moo bun. Ma toku wantu polobelema be de ete di be mu seeka. A olikanisâsi be taigi den pionili di den be e kai colporteur a ten de, taki den á mu du bisnis te den e du a peleikiwooko. A sani ya be meke wan fu den colporteur ati boon te a fika a waaleiti, neen a go opo en Beibelsutudi kulu. Boiti dati fu di a beikantoo fesiman di be de a ten de, á be e tyai enseefi bun, meke den puu en poti wan taawan. Den Kotoigi fu Mekisikow di be e dini Yehofa anga den hii ati, be abi taanga-sikin fanowdu.

Di Baala Rutherford go a Mekisikow, a holi tu lezing na a konkelesi di gi den baala anga sisa taanga-sikin. Boiti dati a holi feifi lezing a laadiyow. Dati na a fosi leisi di den baala fu Mekisikow koboloiki laadiyow fu paati a bun nyunsu a hii Mekisikow. Baka a konkelesi den poti wan nyun fesiman na a beikantoo fu sete a wooko. Den Kotoigi be kon de fayafaya baka. Yehofa be e holibaka gi den tu, neen meke den go doo anga a peleikiwooko.

A konkelesi di holi aini 1941 aini Mekisikow Foto

A yali neen baka, 1933 tu konkelesi be holi aini a kondee, wan a Veracruz anga a taawan aini Mekisikow Foto. Den baala be e wooko taanga, neen meke a wooko be e go a fesi. Aini 1931, a 82 peleikiman namo be de. Ma aini 1941, den peleikiman be kon tin toon moo ipi. A wan sani fu 1000 sama be kon aini Mekisikow Foto, di a konkelesi be holi.

„DEN BE E BOOKO GO A DEN PASI”

Aini 1943, den Kotoigi be e piki sama na ala se taki a konkelesi di den e kai „Vrije Natie” (Wan  foluku di fii), be o holi aini 12 foto fu Mekisikow. * (Luku a maiki a ondoo.) Den be e waka anga gaan pampila fu piki sama taki wan gaan konkelesi o holi. Den be e tei den tu pampila miti da den be e poti den a den neki, wan a baka anga wan a fesi. Fanafu 1936, den Kotoigi be e koboloiki den pampila ya fu piki sama taki den e holi konkelesi.

Wan fowtow di den koti puu a wan kolanti fu 1944 di e soi fa wantu baala e koboloiki wantu gaan pisi pampila fu bolotyasi wan konkelesi a Mekisikow Foto

Den Kotoigi fende wini fu den pampila di den be e koboloiki aini Mekisikow foto. A kolanti di den e kai La Nación be sikiifi fu den Kotoigi di be go na a konkelesi taki: „A fosi dei, den gi den taanga-sikin fu kai moo sama. Du fu tu dei, sama be kon te a peesi á be poi holi ala den.” Lomusu keliki á be e piisii di den si a sani ya, neen meke den bigin tesi den Kotoigi. Ma den Kotoigi á be e feele. Den baala anga sisa kai sama go doo. Wan taa artikel aini a kolanti taki: „A hii foto si den.” A taki ala den baala anga sisa be de anga a gaan „pisi pampila” ya. A artikel be abi wan fowtow fu wantu baala anga sisa di be de a wan fu den pasi fu Mekisikow. Den sikiifi na a fowtow ondoo: „Den be e booko go a den pasi.”

DEN BEDI BE „WAAN, DEN BE SAFU MOO A SIMA DOTI”

Aini den yali de, den Kotoigi be mu meke omen moiti fu go a den konkelesi di be e holi a Mekisikow. A pisiten de konkelesi á be e holi ipi a Mekisikow. A omen baala anga sisa be e komoto te a faawe pe loko anga pasi á de. Den be abi fu lei anga buliki efuso waka omen dei fu go teke wan loko di o tyai den go na a foto pe a konkelesi e holi.

Gaanse fu den Kotoigi be pooti te, a bunbun moiti den be mu meke fu doo den konkelesi. Ma te den be doo, a omen fu den be e siibi a den osu fu den Kotoigi di be e tan na a pisi de. Taawan be e siibi a den Kownukondee zaal. Wan leisi moo enke 90 baala siibi na a beikantoo. A den dosu di den be e poti buku tapu den be e siibi. A Jaarboek taki den baala be e teke a sani ya fu bigi, bika den dosu be „safu moo a sima doti. Den á be koo enke a sima doti tu.”

Den Kotoigi be e fusutan taki a ná fu soso den be e meke omen moiti fu kon makandaa anga den baala anga sisa. Nownow a moo enke 850.000 Kotoigi de a Mekisikow. Denseefi e teke den komakandaa fu bigi. * (Luku a maiki a ondoo.) A Jaarboek fu 1949 taki den somen moiti di den Kotoigi be e meke fu doo den konkelesi, á meke a biibi fu den kon swaki. Te den be go a wan konkelesi „da a soso toli fu a konkelesi den be e gi hii dei. Den be e du a sani ya wan hii pisiten.” A sani di den baala be lobi akisi ala yuu na: „On ten wan gaan komakandaa o holi baka?”​—Sani di u du den ten di pasa a Mindii-Ameekan.

^ paragraaf 9 Enke fa a Ingiisi Jaarboek fu 1944 e soi, na a konkelesi ya meke omen sama yee fu Yehofa Kotoigi a Mekisikow.

^ paragraaf 14 A 2.262.646 sama kon na a Membeefesa aini 2016 a Mekisikow.