Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2017

Fa u sa toon nyun sama?

Fa u sa toon nyun sama?

„U mu toon nyun sama.”​—KOLOSESAMA 3:10.

SINGI: 126, 28

1, 2. (a) Saide u sabi taki u poi kengi? (b) Enke fa Kolosesama 3:10-14 e soi, sowtu manii wi o abi efu u kengi kon enke fa Yehofa wani?

AINI a Nyun-Grontapuvertaling wi e leisi taki „u mu kengi u manii” (Efeisesama 4:24; Kolosesama 3:10). Dati wani taki u mu kon de „enke fa Gadu wani”. Ma u poi kengi tuutuu? Eeye. Yehofa meke libisama anga den manii fi en. Neen meke u poi soi den manii fu Gadu.​—Genesesi 1:26, 27; Efeisesama 5:1.

2 Fu di wi a sondu sama, meke son leisi wi e fii efuso pakisei fu du sani di á bun. Boiti dati wi e waka a den sama di wi anga den de na a wan peesi baka. Ma fu di Yehofa e yeepi u, meke u poi de enke fa a wani. Wi o luku wantu manii di u mu meke moiti fu abi. (Leisi Kolosesama 3:10-14.) Wi o luku fa u sa soi den manii ya te wi e peleiki.

 ’ALA U NA A WAN’

3. San a wan fu den manii di wi o abi te u toon nyun sama?

3 Pawlesi taki te u toon wan nyun sama u ná go e paati bee. A taki: „Te wan sama abi den manii ya, da a ná abi toobi efu a wan Giikisama, wan Dyu, wan sama di besnei efu wan sama di á besnei. A ná abi toobi efu a wan taa kondee sama, wan Skitsama, wan saafu efuso wan sama di fii.” * (Luku a maiki a ondoo.) Nawan sama aini a kemeente mu si enke en foluku, en kondee efuso den faantiwowtu di a abi meke a bun moo taawan. Saide? Bika enke bakaman fu Kelestesi ’ala u na a wan’.​—Kolosesama 3:11; Galasiyasama 3:28.

U lobi ala sama. U nai luku sowtu kondee den komoto efuso fa den kiya

4. (a) Fa den sama di e dini Yehofa mu libi anga taawan? (b) San sa meke a taanga fu libi na a wan anga u baala anga sisa?

4 Efu u kengi toon sama di de enke fa Gadu wani, wi o lesipeki ala sama. U ná o luku sowtu kondee den komoto efuso a fasi fa den kiya (Romesama 2:11). A sani ya á makiliki a son kondee. Aini a ten di pasa, lanti fu Zuid-Afiikan seeka peesi gi ala den nasi di be de aini a kondee. Gaanse fu den sama di be e tan a den peesi ya, e tan ape ete. Yehofa Kotoigi seefi e tan a den sowtu peesi ya. Den baala di e tii a wooko a hii goontapu, be wani gi den Kelesten taanga-sikin fu ’opo den ati’ gi taawan. Neen meke aini oktober 2013 den sete wan nyun sani gi den baala anga sisa fu ala sowtu nasi aini a kondee de fu leli sabi denseefi moo bun.​—2 Korentesama 6:13.

5, 6. (a) San den baala be sete aini wan kondee fu yeepi a foluku fu Gadu fu libi na a wan? (Luku a fowtow na a bigin.) (b) Sowtu wini den baala anga sisa fende fu a sani ya?

5 Den baala seeka sani fu tu kemeente di e taki wan taa tongo kon a makandii fu leli sabi denseefi son sataa anga sonde. Den baala anga sisa fu den tu kemeente be e peleiki makandaa, den be e go makandaa a komakandaa. Boiti dati den be e go luku denseefi a osu. A omen ondoo kemeente be du a sani ya. Neen meke a omen biifi den sende gi beikantoo fu soi den fa a sani ya tyai wini gi den. Son sama di á be de Kotoigi be lobi a sani ya tu. Wan pastoo taki: „Mi a ná Yehofa Kotoigi. Ma toku mi mu taki kiin taki u nai du a peleikiwooko fanyafanya. Boiti dati wi e libi na a wan anga ala sama.” Fa den kemeente be e si a sani di den baala sete?

 6 Biginbigin Noma, wan sisa di e taki Eksosatongo taki sen be e kisi en fu kai Kotoigi fu a Ingiisitongo kemeente kon neen osu. Ma baka di a peleiki makandaa anga wantu bakaa baala anga sisa, anga di a go a den osu, sen á bee kisi en moo. A sisa ya taki: „Den na sama enke wi.” Neen meke te a Ingiisi kemeente kon peleiki anga en kemeente, Noma e kai son wan fu den kon nyan neen osu. A foondoo di a si taki wan fu den bakaa baala, wan owluman, be e piisii di a sidon a wan balata sani tapu. A sani di den baala sete be yeepi omen Kelesten fu meke mati anga baala anga sisa fu taa nasi.

U MU E FII GI TAAWAN, U MU ABI BUN MANII

7. Saide u mu e fii gi taawan ala yuu?

7 Solanga u de aini a goontapu fu Saatan, tesi o go e miti u. A o go e taanga gi u fu fende wooko, wi o go e siki, sama o go e du ogii anga u. Son wan fu wi e tan a peesi pe gaan ogii enke seke doti anga gaan winta e pasa. Boiti den tesi ya taa tesi sa miti u tu. Efu u wani yeepi makandaa te den sani ya e pasa anga son wan fu u, u mu e fii gi makandaa. Efu wi e fii gi taawan wi o soi bun fasi gi den (Efeisesama 4:32). Wi abi den manii ya fanowdu fu man de enke fa Gadu wani. Den manii ya o yeepi u fu waka a Gadu baka. Den o yeepi u fu toosutu taawan tu.​—2 Korentesama 1:3, 4.

8. San o de a bakapisi te wi e soi taki wi e fii gi taawan anga te wi soi bun fasi gi ala sama aini a kemeente? Gi wan ondoofenitoli.

8 Fa u sa soi taki wi e fii gi taa kondee sama anga den pootiman di de aini a kemeente? U wani soi den taki wi e piisii taki den de na a kemeente. U wani toon den mati tu. Boiti dati u wani soi den taki wi abi den fanowdu (1 Korentesama 12:22, 25). Dannykarl komoto a Yapan neen a go tan a Filipeinikondee. Fu di den be si taki en a wan taa kondee sama, meke den á be e libi bun anga en neen wookope. Bakaten a go a wan fu den komakandaa fu Yehofa Kotoigi. Dannykarl taki: „Gaanse fu den sama fu a kemeente a be sama fu Yapan, ma toku den bali wadaa gi mi. Mi be e fii enke a senten mi be sabi den.” A bun fasi di a kemeente soi gi en yeepi en fu toon Yehofa mati. Baka wan pisiten Dannykarl dopu. Nownow en a wan owluman. Den taa owluman fu a kemeente e piisii taki en anga en uman de aini a kemeente. Den taki: „Enke pionili, den nai libi bigi, boiti dati taawan sa waka a den baka, bika den e poti Gadu kownukondee a fesi.”​—Lukasi 12:31.

9, 10. Sowtu ondoofenitoli e soi taki wi e fende wini te wi e soi taki wi e fii gi taawan aini a peleikiwooko?

9 Wi abi a okasi fu „du bun gi taawan” te wi e paati a bun nyunsu fu a Kownukondee (Galasiyasama 6:10). A omen Kotoigi e du sani fu soi taki den lobi taa kondee sama. Den e  meke moiti fu leli a tongo fu den (1 Korentesama 9:23). A omen wini den fende di den du a sani ya. Tiffany wan pionili sisa aini Australiya, leli Swahilitongo fu yeepi wan Swahilitongo kemeente aini a foto Brisbane. Winsi a be taanga gi en fu leli a tongo ya, tokuso a fende wini di a leli en. Tiffany taki: „Efi i wani a peleikiwooko moo switi gi i, i mu de aini wan kemeente di e taki wan taa tongo. A de leti enke te wan sama e koi aini en kondee. Yu o sabi omen baala anga sisa. Boiti dati yu o si kiin taki den e libi na a wan a hii goontapu.”

Sowtu manii wan Kelesten mu abi efu a wani yeepi taa kondee sama? (Luku paragraaf 10)

10 Wan osufamii aini Yapan be du a sani ya tu. A umanpikin fu den di den e kai Sakiko taki: „U lobi miti sama fu Balasilikondee aini a peleikiwooko. Te wi e leisi Openbaring 21:3, 4 anga Psalm 37:10, 11, 29 aini Balasilitongo, den e aliki bun. Son leisi wataa e lon a den ain.” A osufamii ya e booko den ede anga den sama ya. Den be wani yeepi den fu sabi a waaleiti, neen meke den leli Balasilitongo. Aini den yali di pasa den yeepi omen taa kondee sama fu toon Kotoigi. Sakiko taki: „A á be makiliki fu leli Balasilitongo, ma toku den belesi di u fende ipi moo a moiti di u meke fu leli a tongo. Wi e gi Yehofa daa.”​—Leisi Toli 10:34, 35.

U MU ABI SAKAFASI

11, 12. (a) Saide u mu meke moiti fu kengi u manii? (b) San o yeepi u fu abi sakafasi ala yuu?

11 A ná di u wani taawan gafa u, meke wi e meke moiti fu kengi u manii, ma a di u wani gi Yehofa gaandi. Holi a pakisei taki wan engel di á be abi sondu, be kon abi heimembee. Na a sani ya be meke a sondu. (Luku Eseikiyeli 28:17 tu.) Wi a sondu sama, neen meke a moo makiliki gi u fu abi heimembee. Ma toku u poi abi sakafasi. San o yeepi u fu abi sakafasi?

12 Wan fu den sani di o yeepi u fu abi sakafasi, a te wi e leisi Gadu Wowtu ala dei, anga te wi e teke ten pakisei den sani di u leisi (Deitolonomi 17:18-20). U mu teke ten pakisei den  sani di Yesesi leli u, anga a fasi fa a soi sakafasi (Mateyesi 20:28). Yesesi be abi sakafasi te a wasi den apostel fi en futu (Yohanisi 13:12-17). Wan taa sani di u mu du, a begi u mu begi Yehofa fu a gi wi en santa yeye. A santa yeye poi yeepi u fu wi á fii enke u bun moo taawan.​—Galasiyasama 6:3, 4; Filipisama 2:3.

Te wi abi sakafasi, sani e waka bun aini a kemeente, a kemeente e libi na a wan

13. Sowtu wini wi o fende te wi abi sakafasi?

13 Leisi Odo 22:4. Yehofa wani wi abi sakafasi. Sakafasi e tyai omen wini gi u. Te wi abi sakafasi, sani e waka bun aini a kemeente. A kemeente e libi na a wan. Boiti dati Yehofa e soi bun-ati gi u. Apostel Peitilisi be taki: „Ala u mu abi sakafasi te u de a makandii, bika Gadu e buuse den sama di abi heimembee, ma ai soi bun-ati gi den sama di abi sakafasi.”​—1 Peitilisi 5:5.

U MU ABI SAFU-ATI ANGA PASENSI

14. Sama na a moo bun sama di abi safu-ati anga pasensi?

14 Aini a ten ya, te wan sama abi safu-ati anga pasensi, den e si enke a soso. Ma a sani ya a ná tuu. A Moo Taanga Gadu fu hemel anga goontapu abi den manii ya. Sama á de di abi safu-ati anga pasensi enke Yehofa (2 Peitilisi 3:9). Pakisei a pasensi di a be abi anga Abalaham anga Lot di a meke wan engel piki den akisi di den be e poti gi en (Genesesi 18:22-33; 19:18-21). Pakisei a pasensi di a be abi tu anga den Islayelisama pasa 1500 yali.​—Eseikiyeli 33:11.

15. Fa Yesesi soi taki a abi pasensi anga safu-ati?

15 Yesesi be abi „safu-ati” (Mateyesi 11:29). A be abi pasensi anga den bakaman fi en winsi den be abi swakifasi. Di Yesesi be de a goontapu, sama be lobi kuutu efuso poli en nen sosokaali. Ma tokuso Yesesi be abi pasensi anga safu-ati te enke a dede. Anga ala fa a be e fii pen di a be de na a ponsu, a begi en Dda fu a gi den man di kii en paadon. A taki: „Nda gi den paadon, bika den á sabi san den e du” (Lukasi 23:34). Winsi Yesesi be e fii pen efuso winsi a be abi booko-ede, tokuso a be abi pasensi anga safu-ati.​—Leisi 1 Peitilisi 2:21-23.

16. Fa u sa soi taki wi abi safu-ati anga pasensi?

16 Pawlesi soi u fa u sa soi taki wi abi pasensi anga safu-ati. A sikiifi taki: „U mu abi boo anga taawan. Gi taawan paadon anga u hii ati te wan sama du wan hati sani anga u. Leti enke fa Yehofa e gi u paadon anga en hii ati, a so useefi mu gi taawan  paadon tu” (Kolosesama 3:13). Efu u wani gi taawan paadon, u mu abi pasensi anga safu-ati. A sani ya o meke u libi na a wan aini a kemeente.

17. Saide safu-ati anga pasensi de taanga fanowdu?

17 Yehofa wani u soi anga a fasi fa wi e libi anga taawan, taki wi abi pasensi anga safu-ati. Den manii ya de taanga fanowdu efu u wani libi aini a nyun goontapu (Mateyesi 5:5; Yakowbesi 1:21). Te wi abi safu-ati anga pasensi wi e gi Yehofa gaandi. Boiti dati taawan sa waka a u baka.​—Galasiyasama 6:1; 2 Timotiyesi 2:24, 25.

U MU LOBI TAAWAN

18. Saide u sa taki efu u lobi taawan u ná o paati bee?

18 Ala den manii di u luku te anga now abi fu du anga lobi. A disipel Yakowbesi be abi fu taki anga den baala, bika den be e libi bun anga guduman moo den pootiman. A taigi den taki den nai du san a weiti fu Gadu taki, den á ’lobi taawan enke fa den lobi denseefi’. Baka dati a taki: „Efu wi e gi sama gaandi moo taawan, da a wan sondu wi e du.” (Yakowbesi 2:8, 9). Efu u lobi sama, u ná o luku sowtu sikoo den go, sowtu kololu den abi efuso sowtu wooko den e du. A ná du u mu du enke u nai paati bee, ma a hii fasi fa wi e libi mu soi kiin taki u nai paati bee.

19. Saide a de taanga fanowdu fu lobi taawan?

19 Lobi abi „pasensi anga bunfasi”. A „nai meke bigi” tu (1 Korentesama 13:4). U mu abi pasensi, bunfasi anga sakafasi fu man paati a bun nyunsu gi taawan (Mateyesi 28:19). Den manii ya e yeepi u fu libi bun anga ala den baala anga sisa fu a kemeente. Efu u lobi useefi na a fasi ya, a kemeente o libi na a wan, da a so wi o gi Yehofa gaandi. Taawan o wani kon dini Yehofa te den si fa wi e libi na a wan. Neen meke Beibel taki: „Boiti den fasi ya, u mu wei lobi enke wan koosi a u sikin tu, bika a lobi e meke sama e libi na a wan.”​—Kolosesama 3:14.

„MEKE MOITI FU DENKI TAA FASI”

20. (a) San u mu akisi useefi? Saide u mu akisi useefi a sani ya? (b) Sowtu ten wi e angii fu si?

20 Ala u mu akisi useefi taki ’san mi mu du ete fu kengi mi manii?’ Boiti dati san mi mu du fu mi á teke den manii fu fosi moo? U mu begi Yehofa, da wi akisi en fu a yeepi u. U mu du ala san u man fu wi á du efuso pakisei sani di á fiti, fu u sa go aini „a Kownukondee fu Gadu” (Galasiyasama 5:19-21). U mu akisi useefi tu taki: ’Mi e meke moiti ala yuu fu kengi a fasi fa mi e denki fu meke Yehofa piisii?’ (Efeisesama 4:23, 24) Wi a sondu sama, neen meke u mu meke moiti fu kengi a fasi fa u be de fosi. Boiti dati u mu du ala san u man fu u ná abi den manii ya moo. Solanga u de a libi wi abi fu du a sani ya. Pakisei fa a libi o switi te ala sama kengi kon de enke fa Gadu wani, anga te den o abi den manii fu Yehofa.

^ paragraaf 3 Aini Beibel ten den á be e si Skitsama enke bunbun sama. Den be e soso den.