Skip to content

Skip to table of contents

 SUTUDI-ARTIKEL 15

Waka a Yesesi baka, da i ná o buuya

Waka a Yesesi baka, da i ná o buuya

„A freide fu Gadu di libisama á poi fusutan o kibii wi ati.”​—FILIP. 4:7.

SINGI 113 Gadu o meke u libi na a wan

SAN WI O LELI *

1-2. Anga san Yesesi be e booko en ede?

A LASITI dei di Yesesi be de a goontapu, a be e booko en ede anga omen sani. Sama di á be e holi den weiti fu Yehofa be o kii en a wan ogii-ati fasi. Ma a ná a sani de wawan be e gi Yesesi booko-ede. Yesesi lobi en Dda tuutuu, neen meke a be wani du ala san a akisi en. Yesesi be sabi taki efu a be pasa ala den tesi di be o miti en, a be o santa a nen fu Yehofa. Yesesi be lobi sama tu. A be sabi taki efu a holidoo, libisama be o abi a howpu baka fu libi fu teego.

2 Winsi fa sani be hebi gi Yesesi, toku a á be e buuya. A be taigi den apostel fi en taki: „Mi o gi wi a freide fu mi” (Yoh. 14:27). A be abi „a freide fu Gadu”. A freide ya na a buuya di wan sama nai buuya, fu di a sabi taki en anga Yehofa a mati. Na a freide fu Gadu di libisama á poi fusutan, be yeepi Yesesi fu a á buuya.​—Filip. 4:6, 7.

3. San wi o luku aini a artikel ya?

3 U ná o abi denseefi booko-ede di Yesesi be abi di tesi be e miti en, ma tokuso tesi o miti u te wi e waka neen baka (Mat. 16:24, 25; Yoh. 15:20). Son leisi a o hebi gi u tu, leti enke fa a be e hebi gi Yesesi. San o yeepi u fu wi á booko wi ede te da u nai piisii moo? Meke u luku dii sani di be yeepi Yesesi di a be de a goontapu. Wi o luku fa den sani ya sa yeepi u tu te tesi e miti u.

 YESESI BE E BEGI ALA YUU

Begi o yeepi u fu wi á lasi u piisii (Luku paragraaf 4-7)

4. San e soi taki Yesesi be du san sikiifi a 1 Tesalonikasama 5:17 a lasiti dei fosi a dede?

4 Leisi 1 Tesalonikasama 5:17. A lasiti dei di Yesesi be de a goontapu a omen leisi a begi. A begi fosi a paati a beele anga a win, di a be e soi den disipel fi en fa den mu membee a dede fi en (1 Kor. 11:23-25). Fosi den komoto a pe den holi a Paskafesa, a begi anga den disipel fi en (Yoh. 17:1-26). A omen leisi Yesesi begi di en anga den disipel fi en doo na a Oleifi-mongo a neti de (Mat. 26:36-39, 42, 44). Den lasiti wowtu di Yesesi taki fosi en boo koti a be wan begi tu (Luk. 23:46). Yesesi taigi Yehofa ala den sani di miti en a dei de aini den begi fi en.

5. Saide den apostel biibi be kon swaki?

5 Wan fu den sani di be yeepi Yesesi fu pasa den tesi di be miti en, na a begi di a be e begi en Dda ala yuu. A be e biibi taki en Dda be o yeepi en fu holidoo. Den apostel fi en á be e begi naamo, neen meke di tesi miti den a neti de, den á be man soi deki-ati (Mat. 26:40, 41, 43, 45, 56). Wan sani di o yeepi u fu holidoo te tesi e miti u, a te wi e „begi naamo” enke Yesesi. San u sa akisi Gadu te wi e begi?

6. Fa biibi o yeepi u fu wi á buuya winsi sowtu tesi e miti u?

6 U sa begi Yehofa fu a yeepi u fu u ’biibi kon moo taanga’ (Luk. 17:5; Yoh. 14:1). U biibi mu taanga, bika Saatan e tesi ala sama di e waka a Yesesi baka (Luk. 22:31). Fa biibi o yeepi u  fu wi á buuya winsi tesi e miti u baka makandaa? Te u du ala san u poi fu losi wan polobelema, neen sani á go enke fa u be wani, a biibi fu wi o yeepi u fu fika ala sani gi Yehofa. Wi e biibi taki Yehofa sabi san na a moo bun fasi fu losi a polobelema fu u. A sani ya e yeepi u fu wi á buuya, winsi san e miti u.​—1 Peit. 5:6, 7.

7. San den sani di Robert taki e leli i?

7 Begi e yeepi u fu wi á buuya tumisi winsi sowtu tesi e miti u. Luku a toli fu Robert, wan owluman di pasa 80 yali. A taki: „Den sani di sikiifi a Filipisama 4:6, 7 yeepi mi fu pasa omen tesi. Mi be abi moni polobelema. Wan pisiten mi be lasi mi gaandi enke owluman tu.” San yeepi Robert fu a á buuya tumisi di den sani ya be miti en? A taki: „Solanga mi bigin kusumi fu wan sani, mi e begi. Moo mi e begi, moo mi e fii bun.”

YESESI BE E PELEIKI FAYAFAYA

Peleiki o yeepi u fu wi á lasi u piisii (Luku paragraaf 8-10)

8. Enke fa Yohanisi 8:29 e soi, da san a wan taa sani di be yeepi Yesesi fu a á buuya?

8 Leisi Yohanisi 8:29. Winsi tesi be e miti Yesesi a á be buuya, bika a be sabi taki a be e meke en Dda piisii. A be e du san en Dda wani winsi a be taanga son leisi. A du di a be e du san Yehofa wani a be a moo pelensipali sani gi en, bika a lobi en Dda. Fosi a kon a goontapu a be yeepi Gadu fu meke ala sani (Odo 8:30). Boiti dati, di a kon a  goontapu a be e peleiki fayafaya (Mat. 6:9; Yoh. 5:17). A wooko ya be e meke Yesesi piisii.​—Yoh. 4:34-36.

9. Fa a peleiki di wi e peleiki fayafaya e yeepi u fu wi á lasi u piisii?

9 Wi e waka a Yesesi baka te wi e du san Yehofa taki anga te wi e „wooko taanga gi Masaa” (1 Kor. 15:58). Efu wi e peleiki „fayafaya”, u ná o abi ten fu e booko wi ede tumisi anga den polobelema fu u (Toli 18:5). Somen fu den sama di wi e miti aini a peleikiwooko e miti sani moo wi. Ma te den kon lobi Yehofa anga den weiti fi en, neen den bigin du san den leli, sani e go moo bun anga den. A sani ya e meke den e piisii. Te wi e si fa den leli fu Beibel e yeepi sama, wi e moo biibi taki Yehofa o yeepi u. A sani ya e yeepi u fu wi á lasi u piisii. Luku a toli fu wan sisa di e fii booko-saka ala yuu. En hii libi langa ai fii enke a á bun. A taki: „Te mi e du a peleikiwooko mi e fii moo bun. Mi e piisii tu. Te mi de aini a peleikiwooko mi e fii taki mi anga Yehofa a mati.”

10. San den sani di Brenda taki e leli i?

10 Luku a toli fu wan sisa den e kai Brenda. En anga a meisyo fi en abi wan siki di e fooseli den. Brenda á poi waka, aini lolosutuu ai de. Ai weli gaw tu. Son leisi ai peleiki osu fu osu, ma gaanse leisi a biifi ai sikiifi. A taki: „Di mi kon fusutan taki mi ná o betee moo aini a goontapu ya, neen mi bigin poti ala mi pakisei na a peleikiwooko. Te mi e peleiki, mi nai booko mi ede anga a siki fu mi tumisi, bika mi e poti ala mi pakisei na a yeepi di mi mu yeepi den sama di mi e peleiki gi. A peleikiwooko e yeepi mi fu poti pakisei a den sani di Yehofa paamisi u.”

YESESI BE E MEKE DEN MATI FI EN YEEPI EN

Mati o yeepi u fu wi á lasi u piisii (Luku paragraaf 11-15)

11-13. (a) Fa den apostel anga den taa mati fu Yesesi soi taki den a be tuutuu mati? (b) Sowtu wini Yesesi fende fu di den mati fi en be e yeepi en?

11 Di Yesesi be e du a peleikiwooko, den apostel be soi taki den anga Yesesi a be tuutuu mati. Den be soi taki a sani di Beibel taki a tuu. Beibel taki ’yu abi mati di lobi i moo i baala’ (Odo 18:24). Yesesi be lobi den mati fi en. Di a be e du a peleikiwooko a goontapu ya, nawan fu den baala fi en be e biibi en (Yoh. 7:3-5). Wan pisiten den famii fi en be e denki taki en ede á be e wooko bun (Malik. 3:21). Ma den apostel fi en be e biibi en. Neen meke a neti fosi den kii Yesesi, a be man taigi den apostel fi en taki: „A wi be e holibaka gi mi di tesi be e miti mi.”​—Luk. 22:28.

12 Den apostel be e meke fowtu, ma Yesesi á be e poti pakisei a den fowtu fu den namo. A be e moo poti pakisei na a biibi di den be e biibi en (Mat. 26:40; Malik. 10:13, 14; Yoh. 6:66-69). A lasiti neti fosi Yesesi dede, a taigi den apostel fi en taki: „Mi e kai u mati, bika mi taigi wi ala den sani di Nda taigi mi” (Yoh. 15:15). Ná pikin taanga-sikin den mati fu Yesesi be musu e gi en. A yeepi di den apostel be e yeepi Yesesi anga a peleikiwooko be e meke a piisii.​—Luk. 10:17, 21.

13 Boiti den apostel, Yesesi be abi taa mati tu di be e yeepi en aini a peleikiwooko. Den be e yeepi en anga taa sani di a be abi fanowdu tu. Son wan be e kai en kon a den osu fu nyan wan sani (Luk. 10:38-42; Yoh. 12:1, 2). Taawan be e teke waka anga en, den be e paati san  den be abi anga en (Luk. 8:3). A di Yesesi be lobi yeepi taawan meke den mati fi en be lobi yeepi en tu. A be e libi bun anga den, a á be e akisi den fu du sani di a be sabi taki den á poi du. Winsi fa Yesesi á be abi sondu, a be e teke en fu bigi te den mati fi en di be abi sondu be e yeepi en. Den mati fu Yesesi be e yeepi en tu fu a á lasi en piisii.

14-15. San o yeepi u fu fende bun mati? Fa den mati ya o yeepi u?

14 Tuutuu mati e yeepi u fu wi á gwe fika Yehofa. A moo bun fasi fu fende bun mati, a te useefi a wan bun mati (Mat. 7:12). Beibel e gi u taanga-sikin fu koboloiki u ten anga u kaakiti fu yeepi taawan, moomoo den wan di de „a nowtu” (Efe. 4:28). I sabi wan sama aini i kemeente di i sa yeepi? Kande i sa go a wenkii gi wan baala efu sisa di gaandi efuso di siki. Kande i sa gi wan osufamii di pooti wan sani fu nyan. Efi i sabi wooko anga a jw.org® website anga a JW Library® app, kande i sa soi taawan fa den mu wooko anga den sani ya. Te wi e du ala san u poi fu yeepi taawan, wi o moo de koloku.​—Toli 20:35.

15 Den mati fu wi o yeepi u te tesi e miti u. Den o yeepi u fu wi á lasi u piisii. Leti enke fa Elihu be e aliki Yopu di a be e taigi en san e miti en, a so den mati fu wi e aliki u te wi e taigi den fa wi e fii (Yopu 32:4). Den ná o taigi u san u mu du, ma te wi e aliki den te den e soi u san Beibel taki, da wi e soi taki u koni (Odo 15:22). Kownu David be abi  sakafasi, neen meke te a be abi yeepi fanowdu a be e meke den mati fi en yeepi en. Useefi mu meke den mati fu u yeepi u te wi abi yeepi fanowdu, leti enke Kownu David (2 Sam. 17:27-29). Tuutuu mati de enke wan kado di Yehofa gi u.​—Yak. 1:17.

SAN O YEEPI U FU WI Á BUUYA TE TESI E MITI U?

16. Enke fa Filipisama 4:6, 7 e soi, da san na a wan kodo fasi fa u sa abi a freide fu Gadu?

16 Leisi Filipisama 4:6, 7. A wan kodo fasi fa u sa abi a freide fu Gadu fu alaten, a te wi e biibi taki Gadu sende Yesesi kon fu dede gi u, fu u sa fende den sani di a paamisi u. Neen meke Yehofa taki „anga yeepi fu Yesesi Kelestesi” wi o man abi a freide fi en. Wan fu den wini di wi e fende fu a dede di Yesesi dede gi u, na a gi di Gadu e gi u paadon te u meke wan fowtu (1 Yoh. 2:12). A sani ya e gi u taanga-sikin tuutuu! Yesesi, a Kownu fu Gadu Kownukondee, o puu ala den booko-ede di Saatan anga a goontapu fi en e meke wi abi aini a ten ya (Yes. 65:17; 1 Yoh. 3:8; Openb. 21:3, 4). A sani ya e yeepi u fu abi a howpu taki sani o go bun aini a ten di e kon. A wooko di Yesesi gi u fu du á makiliki, ma Yesesi e yeepi u fu holidoo aini den lasiti dei ya di taanga fu pasa (Mat. 28:19, 20). A sani ya e yeepi u fu abi deki-ati. Taanga-sikin, howpu, anga deki-ati a dii pelensipali sani di e yeepi u fu abi a freide fu Gadu.

17. (a) San o yeepi wan Kelesten fu a á buuya te tesi e miti en? (b) Enke fa Yesesi taki a Yohanisi 16:33, da san wi o man du?

17 San o yeepi i fi yu á buuya te tesi e miti i? Den sani di o yeepi yu a denseefi sani di be yeepi Yesesi. A fosiwan: I mu e begi naamo. Du fu tu: Du san Yehofa taki, peleiki fayafaya winsi ai taanga son leisi. Du fu dii: Meke den mati fi i yeepi i te tesi e miti i. Te u du den sani ya, a freide fu Gadu di bigi moo san libisama poi fusutan o kibii wi ati anga u fusutan. Da leti enke Yesesi, wi o man pasa iniiwan tesi di e miti u.​—Leisi Yohanisi 16:33.

SINGI 41 Aliki a begi fu mi baa

^ paragraaf 5 Ala wi abi polobelema di sa meke u lasi u piisii. Wi o luku dii sani aini a artikel ya di Yesesi be e du fu a á lasi en piisii. Den sani ya o yeepi u fu wi á buuya te tesi e miti u.