Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  april 2017

Yu e gafa Yehofa te i de kabakaba fu wooko gi en!

Yu e gafa Yehofa te i de kabakaba fu wooko gi en!

„A foluku be de kabakaba fu go feti, neen meke u mu gafa Yehofa!”KUUTUBAKAA 5:2.

SINGI: 150, 10

1, 2. (a) San Elifas anga Bildad taki fu a wooko di libisama e du gi Gadu? (b) San Yehofa taki fu a toli ya?

DII dunsu yali pasa, dii man be go taki anga Yopu, wan man di be e dini Yehofa anga en hii ati. Wan fu den man ya a be Elifas, wan man fu a foto Teiman. Elifas akisi Yopu taki: „I denki libisama o man du sani gi Gadu? I denki wan sama di e fusutan sani kiin o man yeepi en a wan sani? I si enke A Moo Taanga Gadu e piisii te yu e tyai iseefi a wan leti fasi? I denki ai fende wini te yu e du soso bun sani?” (Yopu 22:1-3) Elifas be e denki taki Gadu nai du den sani ya. Wan taa man di be go taki anga Yopu a Bildad. A man ya a be wan bakapikin fu Suwa. Bildad taki noiti Gadu o si enke libisama e tyai enseefi a wan bun fasi.Leisi Yopu 25:4.

A Yehofa gi u ala den bun manii di wi abi, neen gi wi a koni fu du omen sani. Ai luku fa wi e wooko anga den sani di a gi u

2 Elifas anga Bildad be wani Yopu biibi taki a fu soso ai dini Yehofa. Den man ya be wani Yopu biibi taki libisama á bun moo woon gi Gadu (Yopu 4:19; 25:6). A fu di den be abi sakafasi meke den be e taki den sani ya?  (Yopu 22:29) A tuu taki Yehofa na A Moo Gaan Gadu fu hii goontapu. Te u maiki useefi anga en wi e si taki u ná abi nawan fa. Efi i de a wan mongo ede efuso aini wan opalani, neen i luku kon a ondoo, da yu o si taki wi enke libisama nyoni. Wi á de taanga fanowdu. Ma a so Yehofa e si den sani di wi e du gi en anga en Kownukondee? Nono. Yehofa taigi Elifas, Bildad anga Sofar taki den e lei gi en. Baka dati Gadu taki a be e piisii anga Yopu. A kai Yopu „mi futuboi” (Yopu 42:7, 8). A sani ya e soi taki sondu libisama abi wini gi Gadu. Den „man du sani gi Gadu”.

„SAN YU E DU GI GADU?”

3. San Elihu taki fu den sani di wi e du gi Yehofa? San a sani de wani taki?

3 Wan yonkuman di den be e kai Elihu be e aliki di Yopu anga den dii man be e taki. Di den kaba, neen Elihu akisi Yopu wantu sani fu Yehofa. A akisi en taki: „Efi i si enke yu abi leti, da i si enke a wan bun sani yu e du? San yu e du gi Gadu?” (Yopu 35:7) A soi Elihu be wani soi taki a fu soso wi e dini Gadu? Nono. Yehofa á kaasi Elihu fu a sani di a taki enke fa a kaasi den dii taa man. A wan taa sani Elihu be wani soi Yopu. A be wani soi Yopu taki te i luku en bun Yehofa ná abi sama fanowdu fu dini en. A nai mankei nawan sani. Nawan fu den sani di wi e du poi meke a kon moo gudu efuso moo taanga. Neen gi u ala den bun manii di wi abi. A gi u koni fu du omen sani tu. Ai luku fa wi e wooko anga den sani di a gi u.

4. Fa Yehofa e fii te wi e du bun gi taawan?

4 Te wi e du sani fu soi taki u lobi den sama di e dini Yehofa, da Yehofa e si enke neen wi e du den sani ya gi. Odo 19:17 taki: „A sama di e du bun gi den pootiman e leni Yehofa sani. A o pai a sama de fu den bun di a du.” Te wi e du bun gi taawan fu di tyali fu den e kisi u, Yehofa e si. Winsi fa a Yehofa meke ala sani, tokuso ai si den bun di wi e du gi taawan enke wan moni di wi e leni en. Ai du omen bun gi u fu pai u tu. Gadu Manpikin Yesesi be taki a sani ya tu.Leisi Lukasi 14:13, 14.

5. Sowtu toli wi o luku aini a artikel ya?

5 Yehofa be akisi a polofeiti Yesaya fu du wan wooko gi en a goontapu ya. A be mu dini en a wan apaiti fasi (Yesaya 6:8-10). Yesaya teke a wooko di Yehofa gi en anga en hii ati. A taki: „Luku mi ya! Sende mi!” Aini a ten ya, Yehofa e gi den sama di e dini en anga den hii ati, a okasi fu wooko gi en. Dunsudunsu Kotoigi fu Yehofa e soi taki den de enke Yesaya. Den de kabakaba fu du iniiwan wooko gi Yehofa, winsi den mu go a wan taa kondee  efuso wan taa foto. Winsi den sabi taki tesi o miti den efuso taki a wooko ná o makiliki tokuso den e du en. Ma toku son sama e akisi denseefi taki: ’Mi e teke en fu bigi taki mi abi a okasi fu wooko gi Yehofa. Ma a wooko di mi e du de fanowdu tuutuu? Winsi mi á du a wooko, Yehofa o solugu taki a wooko du.’ I denki so wan leisi kaba? Meke u luku fa a toli fu Debora anga Barak di be e dini Yehofa aini a ten di pasa e yeepi u fu piki den akisi ya.

GADU YEEPI DEN SAMA DI BE E FEELE FU ABI DEKI-ATI

6. Saide a be gei enke a á be o taanga gi den suudati fu Yabin fu feti anga den Islayelisama?

6 Barak a be wan suudati fu Islayeli. Debora a be wan uman polofeiti. A kownu fu Kana-an di den be e kai Yabin be e „du ogii-ati sani anga den Islayelisama” 20 yali langa, neen meke den Islayelisama be e feele fu komoto a den osu. Den suudati fu Yabin be abi 900 asiwagi. Den wagi ya be abi insii nefi a den futu. Ma den Islayelisama á be abi fetisani fu feti.Kuutubakaa 4:1-3, 13; 5:6-8.

7, 8. (a) San na a fosi sani di Yehofa sende Barak fu a du? (b) Fa den Islayelisama wini den suudati fu Yabin? (Luku a fowtow na a bigin.)

7 Te i luku den suudati fu Yabin, da a be gei enke den Islayelisama á be o poi feti anga den. Ma Yehofa taigi uman polofeiti Debora fu a taigi Barak taki: „Teke tin dunsu sama fu a lo fu Naftali anga du fu Seibulon, da u go a Tabor mongo. U mu tiingi na a hii mongo. Da mi o meke Sisera, a man di Yabin poti enke suudati edeman, kon na a paata pisi pe Kison liba e waka. Sisera o kon anga den suudati anga den asi wagi fi en. Da mi o meke i wini den.”Kuutubakaa 4:4-7.

8 Barak suku 10.000 man, neen den go a Tabor mongo. Baka dati Barak anga den man fi en feti anga den a wan peesi den e kai Tanak. (Leisi Kuutubakaa 4:14-16.) A Yehofa yeepi den Islayelisama? Eeye. Wanboowanboo so wan gaan alen bigin kai, neen a hii peesi tokotoko. A sani ya be yeepi den Islayelisama. Barak lon a den suudati fu Sisera baka wan sani fu 24 kilomeiti. Di Sisera lon te a doo Haroset, neen den asi wagi fi en fasi. A saka neen a lon go a Sananim, wan peesi koosube fu Keides. Di Sisera lon doo ape, neen a go kibii aini wan tenti fu wan uman den e kai Ya-el. Sisera be weli te neen a siibi pii. Di Ya-el si a siibi neen a kii en (Kuutubakaa 4:17-21). Yehofa be meke den Islayelisama wini den feyanti! * (Luku a maiki a ondoo.)

A NÁ ALA SAMA DE KABAKABA FU WOOKO GI YEHOFA

9. San wi e leli fu a feti di den Islayelisama feti anga Sisera te u leisi san sikiifi aini Kuutubakaa 5:20, 21?

9 Wi o fusutan Kuutubakaa kapitel 4 moo bun efu u leisi kapitel 5. Kuutubakaa 5:20, 21 taki: „A hemel anda den sitali be de e feti. A den peesi den be de e feti anga Sisera. Kison liba wasi den gwe.” A sani ya wani taki den engel be  yeepi den Islayelisama di den be e feti? A siton be komoto a tapu kai naki den feyanti fu den Islayelisama? Beibel nai taki finifini fu a pisi de. Ma u sa biibi taki a Yehofa be meke a gaan alen kai di den Islayelisama be e feti anga den feyanti. Na a alen meke den 900 asi wagi fu Sisera á be poi lei bunbun. Aini Kuutubakaa 4:14, 15 wi e leisi dii toon taki a Yehofa meke den Islayelisama wini a feti. Nawan fu den 10.000 man fu Islayeli be poi taki a denseefi wini a feti.

10, 11. San na a Meros di kai a Kuutubakaa 5:23? Saide den be fuuku en?

10 Meke u luku san pasa baka di den Islayelisama wini. Di den Islayelisama wini a feti, neen Debora anga Barak singi wan singi fu gafa Yehofa. Den singi taki: „’Fuuku Meros, a so a engel fu Yehofa taki. U mu e fuuku den sama di e tan ape naamo, bika den á gi Yehofa wan ana. Den á meke den taanga man fu den yeepi Yehofa.’”Kuutubakaa 5:23.

11 San na a Meros di kai a Kuutubakaa 5:23? Wi á sabi pilisisi. Ma a fuuku kisi Meros te neen sama á sabi nawan sani fi en aini a ten ya. A kan tu taki Meros a be wan foto di á be wani yeepi Barak di a go feti anga Sisera. A 10.000 man Barak be e suku fu yeepi en feti anga Sisera. Den sama fu a foto Meros be musu yee taki Barak e suku fetiman. A kan tu taki Meros a be wan fu den foto di Sisera lon go di Barak be e lon neen baka. Kande den sama fu a foto be abi a okasi fu kisi Sisera gi den Islayelisama, ma den á be wani. Pakisei fa a be de di den si a suudati ya di sama be e feele, e lon fu den Islayelisama á fende en kii. Den be sa du wan sani fu holibaka gi Yehofa. Efu den be holibaka gi Yehofa, a be o pai den. Ma den á yeepi en di den be abi a okasi. Efu a so sani waka, da den anga Ya-el kengi. Bika Ya-el be abi deki-ati.Kuutubakaa 5:24-27.

U mu ondoosuku useefi luku fu sabi fa wi e si a gaandi di wi abi fu wooko gi Yehofa

12. Saide u sa taki den sama di kai aini Kuutubakaa 5:9, 10 á be e denki aseefi fasi? San a sani ya e leli u?

12 Aini Kuutubakaa 5:9, 10 wi e si kiin taki den 10.000 man di be go feti, anga den sama di á be wani go na a feti, á be e denki aseefi fasi. Debora anga Barak be gafa „den suudati edeman fu Islayeli, bika den be de kabakaba fu go anga a foluku.” Den á be de enke den ’man di be e lei den wetiweti buliki’. Bika den man ya be e fii denseefi, den á be de kabakaba fu yeepi taawan. Beibel taki den be e sidon „a moin ketebe”, boiti dati den be e ’waka a den pasi’. Ma den man di be go yeepi Barak be subi Tabor mongo di be lai anga siton. Den be waka aini a swampu fu Kison tu. Den taigi den sama di á be wani fooseli taki: „Poti pakisei na a sani ya!”  Den be mu go sidon pakisei a okasi di den lasi fu wooko gi Yehofa. Aini a ten ya u mu ondoosuku useefi luku fu sabi fa wi e si a gaandi di wi abi fu wooko gi Yehofa.

13. Saide a lo fu Ruben, Dan anga Aser á be e denki enke a lo fu Seibulon anga Naftali?

13 Den 10.000 man di be yeepi Barak be si fa Yehofa soi taki neen na a Moo Gaan Tiiman. Te den be e taki anga taawan fu „den bun sani di Yehofa du”, den be abi a okasi fu taigi den san den si (Kuutubakaa 5:11). A lo fu Ruben, Dan anga Aser be e moo booko den ede anga den gudu. Sani enke den meti fu den, sipi anga den lanpeesi fu den. Den á be e poti a wooko fu Yehofa a fesi (Kuutubakaa 5:15-17). Ma a ná ala den lo be de enke den lo ya, bika a lo fu Seibulon anga Naftali „be de kabakaba fu dede” di den go yeepi Debora anga Barak (Kuutubakaa 5:18). A omen sani wi e leli te u luku fa sama be e si a wooko di den be mu wooko gi Yehofa.

„U GAFA YEHOFA!”

14. Fa wi e soi aini a ten ya taki wi e si Yehofa enke u tiiman?

14 Aini a ten ya u nai go feti anga sama fu soi taki a Yehofa wi e si enke u tiiman. Ma wi e holibaka fayafaya gi a peleikiwooko. Noiti ete sama be de fanowdu so fu du a wooko fu Yehofa. Miliyunmiliyun baala anga sisa, yonkuuwan anga gaandiwan e du a fuuten diniwooko. A omen fu den e pionili, son wan e wooko a Betel, taawan e meke Kownukondee zaal. Son baala anga sisa e yeepi du wooko a den gaan komakandaa. Son owluman e wooko enke ati-osu komte, taawan e seeka den sani di mu du a den konkelesi. Den baala anga sisa ya e wooko taanga. U sa biibi taki Yehofa e teke en fu bigi  taki u de kabakaba fu du ala sowtu wooko gi en. Noiti a o feegete den sani di wi e du gi en.Hebrewsama 6:10.

Fosi i du wan sani, denki sowtu bakapisi a o abi gi yu osufamii anga a kemeente (Luku paragraaf 15)

15. San u mu du efu wi á wani a faya di wi abi fu wooko gi Yehofa koo?

15 U mu ondoosuku useefi fu sabi fa wi e denki fu den wooko di u sa du gi Yehofa. U mu akisi useefi taki: ’Mi e meke taawan du gaanse fu a wooko? Mi e booko mi ede fu wooko gi Yehofa efuso mi e moo booko mi ede anga goontapu gudu? Mi e waka a Barak, Debora, Ya-el anga den 10.000 man fu Islayeli baka? Mi e koboloiki ala san mi abi fu dini Yehofa? Mi e pakisei fu go a wan taa foto efuso kondee fu wooko moo moni fu mi sa abi wan moo bun libi? Efu yu e pakisei fu du a sani de, i akisi iseefi fa sani o waka anga yu osufamii anga a kemeente?’ * (Luku a maiki a ondoo.)

16. San u sa du fu meke Yehofa piisii winsi fa neen abi ala sani?

16 Yehofa gi wi a gaandi fu soi taki wi e holibaka gi en enke u tiiman. Fanafu a ten fu Adan anga Efa, neen Didibii wani libisama holibaka gi en anga a sitee di ai sitee anga Gadu. Ma te wi e holibaka gi Yehofa, da wi e soi Saatan sama se u de. A biibi di wi e biibi Yehofa anga a lobi di u lobi en, e meke u de kabakaba fu wooko gi en. A sani ya e meke a piisii (Odo 23:15, 16). Te wi e du san Yehofa taki, te wi e holibaka gi en, da a o man soi Saatan taki a ná abi leti (Odo 27:11). Ai bigi gi Yehofa te wi e soi en taki u lobi en. Ná pikin piisii ai piisii.

17. Fa sani o waka aini a ten di e kon enke fa Kuutubakaa 5:31 e soi?

17 Dyonson moo, ala sama a goontapu o wani Yehofa tii den. Ná pikin angii wi e angii fu a ten de. Wi e fii enke Debora anga Barak di den be singi taki: „Yehofa, meke ala den feyanti fi i dede, ma meke den sama di lobi i de enke te a san e pii a tapu” (Kuutubakaa 5:31). Na a sani de o pasa te Yehofa o poli a ogii goontapu fu Saatan. Yehofa ná o abi libisama fanowdu fu yeepi en kii den feyanti fi en na Alimakedon. A foluku fi en a goontapu ya o ’taampu pii luku fa Yehofa o fii den’ (2 Koloniki 20:17). Ma a ten de á doo ete, neen meke wi abi a gaandi fu wooko gi Yehofa fu soi taki wi e holibaka gi en.

18. Sowtu wini taawan o fende te i de kabakaba fu wooko gi Yehofa?

18 Di Debora anga Barak bigin singi di den wini a feti, a Yehofa den gafa, ná libisama. Den singi taki: „A foluku be de kabakaba fu go feti, neen meke u mu gafa Yehofa!” (Kuutubakaa 5:1, 2). Efu useefi de kabakaba fu wooko gi Yehofa, taawan o fende taanga-sikin fu „gafa Yehofa”!

^ paragraaf 8 U sa leisi moo fu den sowtu moin toli ya aini a artikel „Mi opo leki wan mama na ini Israel” aini a Saanantongo Wakititolen fu 1 augustus 2015.

^ paragraaf 15 Luku a artikel „Moni booko-ede” aini A Wakititolen fu 1 yuli 2015.