Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  april 2017

„I mu du san i paamisi”

„I mu du san i paamisi”

„Te u paamisi Yehofa wan sani, u mu du en.”MATEYESI 5:33.

SINGI: 63, 59

1. (a) Sowtu pelensipali sani Yefta anga Hana be du? (Luku a fowtow na a bigin.) (b) Sowtu akisi wi o luku aini a artikel ya?

YEFTA a be wan fesiman di á be e feele. Hana a be wan uman di be abi sakafasi. A be e solugu en man. A be e seeka en osu bun tu. Yefta anga Hana be e dini Yehofa. Boiti dati den be paamisi Yehofa wan sani, neen den du san den paamisi en anga den hii ati. Den sama fu a ten ya di paamisi Yehofa wan sani, sa waka a Yefta anga Hana baka. Meke u poti pakisei a den dii akisi ya: San a wan paamisi? Fa u mu si den sani di u paamisi Gadu? San u sa leli fu Yefta anga Hana?

2, 3. (a) San a wani taki fu paamisi wan Gadu wan sani? (b) San Beibel taki u mu du te u paamisi Gadu wan sani?

2 Te Beibel taki wan sama paamisi Gadu wan sani, da dati wani taki a sama e meke mofu anga Gadu taki a o du wan sani. Son leisi wan sama e paamisi Gadu taki a o gi en wan sani, taki a o du wan wooko gi en efuso taki a ná o du son sani. Sama nai dwengi taawan fu paamisi wan sani, ma na a sama seefi e paamisi taki a o du wan sani. Yehofa e si en enke wan gaan sani te wan sama  paamisi wan taawan wan sani. A wani u du san u paamisi (Genesesi 14:22, 23; Hebrewsama 6:16, 17). Fa Beibel taki u mu si den sani di wi e paamisi Gadu?

3 A Weiti fu Mosesi e soi taki te wan sama be paamisi Yehofa wan sani, ’a á be mu kengi mofu. A be mu du san a taki’ (Numeri 30:2). Bakaten Salomo taki: „Te i paamisi Gadu taki yu o du wan sani, yu á mu daaidaai fu du san i paamisi, bika a á lobi don sama. I mu du san i paamisi” (Peleikiman 5:4). Yesesi soi kiin taki Gadu e si en fu wan gaan sani te wan sama paamisi en wan sani. A be taki: „U be yee tu taki den be taigi den afo fu u taki: ’Wi á mu sweli taki wi o du wan sani, da wi á du en, ma te u paamisi Yehofa wan sani, u mu du en.’”Mateyesi 5:33.

4. (a) Fa u mu si den sani di wi e paamisi Gadu? (b) San u wani sabi fu Yefta anga Hana?

4 Wi á mu si den sani di u paamisi Yehofa enke lawlaw sani. Den sani di wi e du baka te u paamisi Yehofa wan sani e soi efu wi anga en a mati tuutuu. David be fusutan a sani ya bun. A be taki: „Sama sa subi a mongo fu Yehofa? Sama sa taampu aini en santa peesi?” Baka di a taki den sani ya, a taki Yehofa o gi den sama ’di nai koli taawan te den sweli’ a okasi fu dini en (Psalm 24:3, 4). San Yefta anga Hana be paamisi Yehofa? A be makiliki gi den fu du san den be paamisi?

DEN DU SAN DEN PAAMISI GADU

5. San Yefta be paamisi Yehofa? San pasa di a paamisi Yehofa a sani ya?

5 Yefta be paamisi Yehofa wan sani di a be de fu go feti anga den Amonsama. Den sama ya be e fooseli a foluku fu Gadu (Kuutubakaa 10:7-9). Di Yefta e go feti anga den, neen a begi Yehofa fu a yeepi en fu wini. A paamisi en taki: „Efi i meke mi wini den Amonsama, neen mi daai kon a osu sondee wan sani du mi, da mi o gi Yehofa a sama di o komoto a mi osu kon miti mi a pasi. A sama de o de enke wan boon-ofaandi gi i.” Yehofa du san Yefta begi en. A meke a wini a feti. Di Yefta go a osu, neen en umanpikin kon miti en a pasi. Neen na a sama di a be abi fu gi Yehofa (Kuutubakaa 11:30-34). San a sani ya be wani taki gi a umanpikin fu Yefta?

Yefta anga en umanpikin be e si en enke wan pelensipali sani fu du san den be paamisi

6. (a) A be makiliki gi Yefta anga en umanpikin fu du san Yefta be paamisi Yehofa? (b) Fa u mu si den sani di wi e paamisi taawan, te u luku san sikiifi a Deitolonomi 23:21, 23 anga Psalm 15:4?

6 A umanpikin fu Yefta be abi fu go wooko en hii libi na a tabernakel fu du san en dda be paamisi Yehofa. Yefta be paamisi Yehofa wan sani sondee fu a denki? Nono. Kande Yefta be sabi taki en umanpikin be o de a fosi sama di be o lon kon miti en. Ma winsi a á  be sabi, a á be makiliki gi en fu du san a paamisi Yehofa. A á be makiliki gi en umanpikin tu. Di Yefta si en umanpikin e kon miti en, neen tyali kisi en. A umanpikin fu Yefta go kee bika noiti a be o „didon anga wan man”. Saide? We Yefta á be abi manpikin kaba. Now a wan kodo umanpikin fi en á be o toow fu meke pikin. Sama á be o de fu tyai Yefta nen. Ma Yefta anga en umanpikin be sabi taki wan sani be de di pelensipali moo a fasi fa den be e fii. Yefta taki: „Mi paamisi Yehofa wan sani, mi á poi kengi mofu.” En umanpikin taki: „Meke sani waka enke fa i paamisi” (Kuutubakaa 11:35-39). Yefta anga en umanpikin be e si en enke wan pelensipali sani fu du san den paamisi. A umanpikin fu Yefta á be e pakisei seefi fu booko a mofu di en dda meke anga Yehofa, winsi fa a be taanga gi en.Leisi Deitolonomi 23:21, 23; Psalm 15:4.

7. (a) San Hana be paamisi Gadu? Saide a be paamisi Gadu a sani ya? (b) San a sani di Hana paamisi Gadu be wani taki? (Luku a maiki a ondoo.)

7 Hana seefi be paamisi Yehofa wan sani di sani be e moo en. A be e kusumi fu di a á be poi meke pikin. Boiti dati sama be e soso en fu di a á be abi pikin (1 Samuweli 1:4-7, 10, 16). A taigi Yehofa fa a be e fii. Baka dati a paamisi Yehofa taki: „Masaa Yehofa di e tii den engel fi en, mi e begi i baa, poti pakisei na a nowtu fi i uman saafu. Membee mi baa. Ná feegete mi. Yehofa, efi i gi mi wan manpikin, mi o gi i en. En hii libi a o dini i. Nawan sama o koti en uwii” * (Luku a maiki a ondoo.) (1 Samuweli 1:11). Yehofa gi Hana san a begi en. Baka wan yali neen a meke wan manpikin, Samuweli. Hana poolo te. Ma a á feegete san a be paamisi Gadu. Di Hana meke Samuweli a taki: „A Yehofa mi be begi a pikin ya.”1 Samuweli 1:20.

A be de kabakaba fu fika sani di be pelensipali gi en fu di a be wani du san a be paamisi Yehofa

8. (a) A be makiliki gi Hana fu du san a be paamisi? (b) Fa Psalm 61 e yeepi i fu waka a Hana baka?

8 Di Samuweli be abi wan sani fu dii yali, Hana du san a be paamisi Yehofa. A tyai Samuweli go gi Eli, a Edeman fu den pilisite di be de na a tabernakel a Silo. A taigi Eli taki: „Na a boi ya mi be begi Yehofa, neen a gi mi en. Now mi leni Yehofa a boi. Solanga a de a libi, a o de fu Yehofa” (1 Samuweli 1:24-28). Fanafu a dei de, na a tabernakel Samuweli be e tan. Beibel taki ’Samuweli be e goo kon bigi aini a osu fu Yehofa’ (1 Samuweli 2:21). A be musu taanga gi Hana fu  du san a be paamisi Yehofa, bika a á be o man de ala yuu anga en manpikin Samuweli di a be lobi. A á be o de anga en fu si fa ai kon bigi. Ma toku Hana be e si a sani di a be paamisi Yehofa enke wan pelensipali sani. A be de kabakaba fu fika sani di be pelensipali gi en fu di a be wani du san a be paamisi Yehofa.1 Samuweli 2:1, 2; leisi Psalm 61:1, 5, 8.

Yu e du san i paamisi Yehofa?

9. Sowtu akisi wi o luku?

9 U si kaba taki wi á mu si en enke wan lawlaw sani te u paamisi Yehofa wan sani. Meke u luku wantu akisi: San a wantu sani di u sa paamisi? Fa u mu si den sani di u paamisi?

A PAAMISI DI I PAAMISI YEHOFA TAKI YU O DINI EN

A sani di u paamisi fosi u dopu (Luku paragraaf 10)

10. San na a moo pelensipali sani di wan Kelesten paamisi? San a sani ya wani taki?

10 A moo pelensipali sani di u du enke Kelesten, a di u paamisi Yehofa taki wi o libi enke fa a wani. U begi Yehofa, neen u taigi en taki wi o dini en u hii libi, winsi san e miti u. Yesesi taki u nai ’teli useefi moo’. A sani ya wani taki, a san Yehofa wani wi e poti a fesi aini u libi (Mateyesi 16:24). Fanafu a dei di u  paamisi Yehofa a sani ya, „wi a fu Yehofa” (Romesama 14:8). U nai si a sani di u paamisi Yehofa enke wan lawlaw sani. Wi e fii enke a psalm sikiifiman di be taki: „San mi o gi Yehofa fu ala den bun di a du mi? Mi o du san mi paamisi Yehofa. Eeye, mi o du san mi sweli a lanti fesi.”Psalm 116:12, 14.

11. San pasa na a dei di i dopu?

11 I paamisi Yehofa taki yu o dini en, neen i dopu? A wan bun sani i du efi i du a sani ya. Yu e membee ete di a baala di be e holi a dopu lezing be akisi i efi i paamisi Yehofa taki yu o libi enke fa a wani? Yu e membee ete di a baala be akisi i efu „yu e fusutan taki a paamisi di i paamisi Yehofa taki yu o dini en, anga a dopu di yu o dopu, o meke sama sabi taki i toon wan Yehofa Kotoigi”? Di i piki iya, ala den sama di be de ape be yee taki i paamisi Yehofa taki yu o libi enke fa a wani. Den be sabi tu taki i be kaba fu dopu. A sani ya be meke Yehofa piisii.

12. (a) San u mu akisi useefi? (b) San Peitilisi gi u taanga-sikin fu du?

12 Di i dopu, i paamisi Yehofa taki yu o libi enke fa a wani. I paamisi en taki yu o du ala san i man fu dini en. Ma te i dopu a bigin i bigin. Baka wan pisiten ala u mu akisi useefi taki: Fa mi anga Yehofa de fu den ten di mi dopu kaba? Mi e dini en anga mi hii ati ete? (Kolosesama 3:23) Mi gwenti begi? Mi e leisi Beibel ala dei? Mi gwenti go a komakandaa? Mi e du ala san mi man fu du a peleikiwooko? Mi e du den sani ya anga piisii ete? Apostel Peitilisi be wasikoi taki efu wi á luku bun u ná o dini Yehofa anga u hii ati moo. Te wi e meke moiti fu taanga u biibi, fu sabi Yehofa moo bun anga fu holidoo, da a sani di Peitilisi taki ná o miti u.Leisi 2 Peitilisi 1:5-8.

13. San wan dopu Kelesten mu holi a pakisei?

13 Te u paamisi Yehofa taki wi o dini en, wi á poi kengi mofu. Wan sama di weli fu dini Yehofa efuso di weli fu libi enke wan Kelesten, á poi taki a dopu di a be dopu nai teli moo. A á poi taki a paamisi di a be paamisi Yehofa taki a o libi enke fa a wani nai teli moo. * (Luku a maiki a ondoo.) Efu wan sama di dopu du wan gaan sondu, a mu gi faantiwowtu a Yehofa anga a kemeente. (Romesama 14:12). Noiti u wani de enke den sama di Yesesi be taigi taki: „Mi si wan sani a yu di mi á lobi. Mi si taki i ná abi a lobi di i be abi biginbigin moo.” Ma u wani a taigi u taki: „Mi sabi fa yu e tyai iseefi. Mi sabi taki yu abi lobi anga biibi. Mi sabi fa yu e du a diniwooko. Yu e holidoo. Den sani di yu e du nownow, bigi moo den sani di i be e du fosi” (Openbaring 2:4, 19). U wani Yehofa piisii, neen meke wi e libi enke fa a wani, bika a dati u paamisi di u dopu.

A PAAMISI DI I MEKE A YU TOOW DEI

A sani di u paamisi di u toow (Luku paragraaf 14)

14. San a wan taa pelensipali paamisi di sama e meke? Saide a sani ya pelensipali?

14 Du fu tu pelensipali paamisi di wan sama e meke, a te a de fu toow.  Toow a wan santa sani. Yehofa e si toow enke wan pelensipali sani. Te wan man anga wan uman toow, a Yehofa anga den sama di de ape fesi den e paamisi taki den ná o fika denseefi. Den e paamisi taki den o lobi denseefi, den o solugu denseefi. Den e paamisi denseefi tu taki solanga den de a libi, den o holi den weiti di Gadu poti gi sama di toow. Son sama á taki den sani ya di den e toow, ma tokuso Gadu si san den paamisi denseefi na a toow dei. Te den paamisi den sani ya, den e toon man anga uman. Te tu sama toow, a den hii libi den mu de anga denseefi (Genesesi 2:24; 1 Korentesama 7:39). Yesesi be taki: „Nawan sama mu paati san Gadu tyai kon a makandii.” Den sama di toow á mu denki taki den sa booko a toow fu ala pikinpikin sani.Malikisi 10:9.

15. Saide Kelesten á mu si toow enke fa den sama fu a goontapu e si en?

15 Ala wi a sondu sama, neen meke toowlibi á de di ná abi polobelema. Beibel taki ala sama di toow, „o miti anga banowtu aini den libi” (1 Korentesama 7:28). Aini a ten ya, a omen sama e si toow enke modo. Den e si enke den sa booko a toow solanga sani nai go enke fa den wani aini a toowlibi. Ma a ná so Kelesten e si a toowlibi. Den e fusutan taki den sweli a Gadu fesi taki den ná o fika denseefi. Den sabi taki efu den booko a sweli de, da a leti enke a lei den be e lei di den sweli a Gadu fesi a dei di den be e toow. Den e holi a pakisei taki Gadu e buuse leiman (Lefitikesi 19:12; Odo 6:16-19). Kelesten di toow mu holi san apostel Pawlesi be taki a ede. A taki: „Yu abi wan uman? Ná suku fasi fu towe en” (1 Korentesama 7:27). Pawlesi taki a sani ya fu di a sabi taki Yehofa e buuse a booko di sama e booko toow fu lawlaw sani.Maleyaki 2:13-16.

16. San Beibel e taki fu booko toow anga a paati di man anga uman e paati sondee fu booko toow?

16 Yesesi be soi kiin taki a te a man waka gi en uman efuso te a uman du ogii neen man osu namo, da a toow sa booko. Na a toowpaa di á fowtu mu luku efu a wani booko a toow (Mateyesi 19:9; Hebrewsama 13:4). Ma san Beibel e taki fu a paati di man anga uman e paati sondee fu booko toow? (Leisi 1 Korentesama 7:10, 11.) Beibel nai taki nawan sani fu a paati di man anga uman e paati sondee fu booko toow. Ma toku, a fasi fa sani e go aini a toowlibi e meke son Kelesten e si enke a moo bun fu den paati. Kande den si taki efu den tan anga den toowpaa den ná o poi dini Yehofa, fu di a toowpaa fu den di nai dini Yehofa moo e tapu den fu dini Yehofa. Kande den e si tu taki den sa dede efu den tan anga den toowpaa fu di den toowpaa e du ogii anga den. * (Luku a maiki a ondoo.)

17. San Kelesten toowpaa sa du fu den toow á booko?

 17 Te wan toowpaa go akisi den owluman san den mu du fu den toowlibi waka bun, den owluman sa akisi den efu den luku a felon San a tuutuu lobi? Den mu akisi den tu efu den sutudeli a bolosilo di den e kai I toowlibi poi waka bun. A felon anga a bolosilo ya e yeepi toowpaa fu den toowlibi waka bun. Wan toowpaa taki: „Fanafu di u bigin sutudeli a bolosilo ya, a toowlibi fu wi e go moo bun.” Wan sisa di toow 22 yali taki beina a toow fi en booko. Ma baka di a luku a felon fu tuutuu lobi, a taki: „Mi anga mi man a tu dopu Kelesten, ma u manii kengi. A felon ya yeepi u tuutuu. Nownow u toowlibi e go moo bun.” A sani ya e soi taki efu man anga uman e wooko anga den leli fu Yehofa, a toowlibi fu den o go moo bun. Den o libi anga piisii.

A PAAMISI DI U MEKE FU DU A FUUTEN DINIWOOKO

18, 19. (a) San wantu mma anga dda du? (b) San u sa taki fu den baala anga sisa di e du a fuuten diniwooko?

18 Na a bigin fu a artikel ya, u be taki fu den sani di Yefta anga Hana be paamisi Yehofa. Fu di den be meke den paamisi ya, meke a umanpikin fu Yefta anga a manpikin fu Hana be e dini Yehofa a wan apaiti fasi. A omen Kelesten fu a ten ya gi den pikin taanga-sikin fu du a fuuten diniwooko anga fu poti pakisei na a dini di den e dini Gadu. Ala u sa gi den yonkuuwan ya taanga-sikin fu tan du a fuuten diniwooko.Kuutubakaa 11:40; Psalm 110:3.

A sani di u paamisi di u bigin du a fuuten diniwooko (Luku paragraaf 19)

19 Nownow a wan sani fu 67.000 sama a hii goontapu e du a fuuten diniwooko. Son wan e wooko a Betel, taawan e bow kownukondee zaal. Son sama e du a kelen wooko, spesuutu-pioniliwooko efuso zendeling wooko. Taawan e leli baala anga sisa a den sikoo fu a olikanisâsi. Sama de di e seeka den peesi pe wi e holi kelen komakandaa anga den peesi pe den Beibel sikoo e holi. Ala den poti den nen a wan pampila pe den paamisi taki den o du ala den wooko di den baala gi den fu du aini a olikanisâsi. Den paamisi tu taki den ná o libi bigi, den ná o du wan taa wooko boiti efu den baala gi den a okasi. A ná den sama pelensipali, ma na a wooko di den e du. Fu di den abi sakafasi meke den e du san den paamisi solanga den e du a fuuten diniwooko.

20. Fa u mu si den sani di u paamisi Gadu? Saide u mu si den so?

20 U taki fu dii sani di sama e paamisi Gadu aini a artikel ya. Kande i paamisi Gadu wan fu den sani ya. U sabi taki wi á mu si den sani ya enke lawlaw sani. U mu du ala san u poi fu du san u paamisi Gadu (Odo 20:25). Efu u nai du san u paamisi Yehofa, da a sani de sa tyai ogii gi u (Peleikiman 5:6). Neen meke u mu de enke a psalm sikiifiman di be taki: „Mi o singi gafa i nen fu teego, fu mi sa du san mi paamisi i ala dei.”Psalm 61:8.

^ paragraaf 7 Hana be paamisi Yehofa taki a manpikin di a be o gi en, be o dini en enke wan Nasireisama en hii libi. A sani ya be wani taki a be o gi Yehofa a boi fu wooko gi en.Numeri 6:2, 5, 8.

^ paragraaf 13 A omen sani den owluman e luku fosi wan sama dopu. Neen meke a nai pasa makiliki taki a dopu di wan sama dopu nai teli.

^ paragraaf 16 Luku a pisi di den e kai Tra prenspari sani „San Bijbel e taki fu brokotrow èn fu a prati di trowpatna e prati?” aini a buku Meki Gado tan lobi yu.