Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  april 2016

Saide u mu e kon makandaa te wi e dini Gadu?

Saide u mu e kon makandaa te wi e dini Gadu?

„Meke wi e poti pakisei a makandaa . . . . Wi á mu e puu dei fu go a komakandaa.”HEBREWSAMA 10:24, 25.

SINGI: 20, 119

1-3. (a) Fa Kelesten e soi taki den e si komakandaa enke wan pelensipali sani? (Luku a fowtow na a bigin.) (b) San wi o luku aini a artikel ya?

DI CORINNA be abi 17 yali den kisi en mma tyai go a wan sitaafuman kampu di be de faawe. Bakaten den tyai Corinna go a Siberiya, di be de dunsudunsu kilomeiti fu pe a be e tan. A be e wooko enke saafu a wan peesi pe den be e kweki meti. Son leisi den be e dwengi en fu wooko aini a koo, winsi a á be abi koosi sai fu tapu a koo. Winsi fa den tesi ya be e miti Corinna, toku en anga wan taa sisa be e du ala san den man fu go a komakandaa.

2 Corinna taki: „U komoto neti a pe u be e wooko, neen u waka 25 kilomeiti go a pe sama e teke loko. U komoto ape 2 yuu musude anga a loko. Baka dati u sidon sigisi yuu langa aini a loko. Di u saka neen u waka ete tin kilomeiti fu doo a komakandaa peesi.” Ná pikin poolo Corinna poolo di a go a komakandaa. A taki: „U luku A Wakititolen-sutudi, u singi Kownukondee singi na a  komakandaa. Den sani ya taanga u biibi. Den gi u taanga-sikin tu.” Baka dii dei neen Corinna anga a taa sisa doo a sitaafuman kampu baka, ma a basi á sabi taki den be komoto ape.

3 Den sama di e dini Yehofa lobi te den de makandaa anga den baala anga sisa. Den fosi Kelesten be e piisii te den be e kon a wan fu dini Yehofa (Toli 2:42). Kande yu e angii fu go a komakandaa tu. Ma leti enke den taa baala anga sisa, kande ai taanga gi i fu go ala yuu a komakandaa. Kande yu e komoto lati a wooko. Kande den somen sani di yu abi fu du, e meke i weli. San o yeepi u fu du ala san u poi fu de na ala den komakandaa? [1] (Luku a pisi ete wan pelensipali sani.) Fa u sa gi den Beibelsutudi fu u taanga-sikin fu kon na ala den komakandaa? A artikel ya o soi (1) saide wi e fende wini te wi e go a komakandaa, (2) saide taawan e fende wini te wi e go a komakandaa, anga (3) fa Yehofa e fii te wi e go a komakandaa. [2]—Luku a pisi ete wan pelensipali sani.

WI E FENDE WINI TE WI E GO A KOMAKANDAA

4. Fa den komakandaa e yeepi u fu sabi Yehofa moo bun?

4 Wi e leli omen sani a den komakandaa. Den komakandaa e yeepi u fu sabi Yehofa moo bun. Taade ya a omen kemeente sutudeli a buku di den e kai Kon krosibei na Yehovah na a kemeente Beibel sutudi. Fa i be e fii di u be e taki fu den manii fu Yehofa? Fa i be e fii di den baala anga sisa be e gi piki di be e soi taki den lobi Yehofa? A ná abi misi, den sani ya yeepi i fu moo lobi Yehofa. Wi e fusutan a Beibel moo bun a den komakandaa te wi e aliki den lezing, te wi e luku den demo anga te wi e aliki te den e leisi a Beibel (Nehemiya 8:8). Pakisei den sani di wi e leli ala wiki te wi e seeka gi a leisi pisi fu Beibel. Pakisei den sani di yu e leli tu te baala anga sisa e gi piki na a pisi ya.

5. Fa den komakandaa e yeepi i fu du san Beibel taki? Fa den e yeepi u fu peleiki moo bun?

5 Den komakandaa e yeepi u fu du san Beibel taki (1 Tesalonikasama 4:9, 10). Yu e membee wan Wakititolen-sutudi di be gi i taanga-sikin fu du moo gi Yehofa? Yu e membee wan Wakititolen-sutudi di yeepi i fu begi moo bun? Yu e membee wan Wakititolen-sutudi di yeepi i fu gi wan baala efuso wan sisa paadon? A libi fu wi anga a peleikiwooko komakandaa, e soi u fa u mu paati a bun nyunsu. Ai yeepi u tu fu sabi fa u mu yeepi taawan fu fusutan Beibel moo bun.Mateyesi 28:19, 20.

6. Fa den komakandaa e gi u taanga-sikin?

6 Wi e fende taanga-sikin a den komakandaa. A goontapu fu Saatan e du ala san a poi fu swaki u biibi.  A wani u fii booko saka. Ma wi e fende taanga-sikin a den komakandaa. Den e yeepi u fu holidoo. (Leisi Toli 15:30-32.) U lobi taki fu den polofeititoli fu Beibel di kon tuu. A sani ya e yeepi u fu biibi taki Yehofa o du den sani di a paamisi u. A ná anga lezing wawan den baala anga sisa e gi u taanga-sikin, ma den e gi u taanga-sikin tu te den e gi piki a komakandaa anga te den e singi gafa Yehofa anga den hii ati (1 Korentesama 14:26). Te wi e taki anga den fosi a komakandaa anga baka a komakandaa, da wi e fii bun, bika den e booko den ede anga u.1 Korentesama 16:17, 18.

Wi e fende taanga-sikin a den komakandaa, den e yeepi u fu holidoo

7. Saide a de taanga fanowdu fu go a komakandaa?

7 A santa yeye fu Gadu e yeepi wi a den komakandaa. Anga a santa yeye Yesesi e tii a kemeente. Neen meke a taigi u taki, u mu „yee san a santa yeye e taigi den kemeente” (Openbaring 2:7). A santa yeye e yeepi u fu holidoo te tesi e miti u. Ai gi u taanga-sikin fu peleiki. Ai yeepi u tu fu denki bun fosi u du wan sani. Neen meke u mu du ala san u poi fu go a den komakandaa, da a santa yeye fu Gadu o yeepi u.

TAAWAN E FENDE WINI TE WI E GO A KOMAKANDAA

8. Fa a go di wi e go a komakandaa, den piki di wi e gi anga a singi di wi e singi e gi den baala anga sisa taanga-sikin? (Luku a faki „ Den komakandaa e meke a fii moo bun.”)

8 Te u de a den komakandaa wi e fende a okasi fu soi den taa baala anga sisa taki u lobi den. Son baala anga sisa aini a kemeente abi omen polobelema. A apostel Pawlesi be sikiifi taki: „Meke wi e poti pakisei a makandaa” (Hebrewsama 10:24, 25). Wi e soi taki wi e booko wi ede anga den baala anga sisa fu u te wi e kon na a wan fu gi useefi taanga-sikin. Te wi e go a komakandaa, da wi e soi den baala anga sisa fu u taki u lobi den. Den e si taki u wani taki anga den. Wi  e soi den tu taki wi e booko wi ede anga den. Wi e gi den taanga-sikin te wi e gi piki anga te wi e singi anga u hii ati.Kolosesama 3:16.

9, 10. (a) Fa den sani di Yesesi taki aini Yohanisi 10:16 e soi taki a de fanowdu fu kon a makandii anga u baala anga sisa? (b) Son baala anga sisa famii nai mumui anga den moo fu a waaleiti ede. Sowtu wini den o fende te wi e go a den komakandaa?

9 Den komakandaa e yeepi u fu kon a wan anga den baala anga sisa fu u. (Leisi Yohanisi 10:16.) Yesesi be kai enseefi wan sikapuman. A taki den bakaman fi en be o de wan ipi sikapu. Pakisei a toli ya: Kon u taki tu fu den sikapu de a wan mongo ede, tu de na a mongo ondoo, da ete tu de a wan taa peesi. U sa taki den sikapu de a wan ipi? Nono, bika te den sikapu de a wan ipi den nai waka fanyafanya. Na a sikapuman baka den e waka. A so useefi á mu de faawe fu den baala anga sisa fu u. U mu e go a komakandaa. U mu e kon makandaa enke „wan ipi di abi wan kodo sikapuman”.

10 Den komakandaa e yeepi u fu libi na a wan enke famii (Psalm 133:1). Son baala anga sisa famii nai mumui anga den moo fu a waaleiti ede. Son leisi a den mma, dda, sisa efuso baala nai mumui anga den. Ma Yesesi paamisi taki a o gi den famii di lobi den (Malikisi 10:29, 30). Efu yu e go ala yuu a komakandaa, i sa toon mma, dda, baala efuso sisa gi taawan aini a kemeente. Te wi e pakisei a sani ya, da wi o meke moiti fu de na ala den komakandaa.

 WI O MEKE YEHOFA PIISII

11. Fa den komakandaa e yeepi u fu gi Yehofa san a abi leti fu fende?

11 Te wi e go a komakandaa, wi e gi Yehofa san abi leti fu fende. A Yehofa meke u, neen meke u mu dini en, u mu gi en daa, u mu gafa en tu. (Leisi Openbaring 7:12.) Wi e du den sani ya te wi e begi, te wi e singi, anga te wi e gi piki a den komakandaa. U mu teke en fu bigi taki wi abi a okasi fu gafa Yehofa ala wiki!

Yehofa e si fa wi e meke moiti fu go a komakandaa, den sani di wi e du fu go a komakandaa e bigi gi en

12. Yehofa taki u mu e go a komakandaa. Fa ai fii te wi e du a sani ya?

12 A Yehofa meke u, neen meke u mu aliki en. A taki wi á mu e puu dei fu go a komakandaa, ma u mu gi useefi taanga-sikin o moo wi e si a dei e koosube (1 Yohanisi 3:22). Ai si fa wi e meke moiti fu go a komakandaa. Den sani di wi e du fu go a komakandaa e bigi gi en.Hebrewsama 6:10.

13, 14. Fa wi e kon koosube a Yehofa anga en manpikin te wi e go a komakandaa?

13 Te wi e go a komakandaa, da wi e soi Yehofa taki u wani kon koosube neen anga en manpikin. Te u de a den komakandaa wi e sutudeli a Beibel. Yehofa e soi u san u mu du anga fa u mu libi (Yesaya 30:20, 21). Winsi wan sama di nai dini Yehofa kon a den komakandaa fu u, ai si wanten taki a Yehofa e tii wi (1 Korentesama 14:23-25). Yehofa e tii den komakandaa anga en santa yeye. Neen e leli u te u de a den komakandaa. Neen meke te wi e go a komakandaa, da wi e aliki san Yehofa e taigi u. Wi e si taki a lobi u. Boiti dati wi e kon moo koosube neen.

14 Yesesi a edeman fu a kemeente be taki: „Bika te tu efuso dii sama kon a wan aini mi nen, da mi de a den mindii de tu” (Mateyesi 18:20). Beibel taki Yesesi de anga a kemeente (Openbaring 1:20–2:1). Yehofa anga Yesesi e holibaka gi u. Den i gi u taanga te u go a komakandaa. Fa i denki Yehofa e fii te yu e meke moiti fu kon koosube neen anga en manpikin?

15. San wi e soi Yehofa te wi e go a komakandaa?

15 Te wi e go a komakandaa wi e soi Yehofa taki wi e du san a taki. Yehofa nai dwengi u fu du san a wani (Yesaya 43:23). Neen meke te wi e go a komakandaa, da wi e soi en taki u lobi en. Wi e soi en tu taki wi e biibi taki neen abi leti fu taigi u san u mu du (Romesama 6:17). Meke u taki u basi wani u du wan wooko di o meke wi á poi go na ala den komakandaa. San wi o du? Kande lanti fu a kondee taki, efu sama kon makandaa fu dini Yehofa den o meke den pai butu, den o go a sitaafu efuso den o du taa sani  anga den. Son leisi wi e wani puu komakandaa dei fu di u wani du wan taa sani. Te den sowtu sani ya e miti u, a useefi mu luku san wi o du (Toli 5:29). Ma solanga u du san Yehofa taki ai piisii.Odo 27:11.

U MU E KONMAKANDAA ANGA U BAALA ANGA SISA

16, 17. (a) Fa u du sabi taki den fosi Kelesten be e si komakandaa enke wan pelensipali sani? (b) Fa baala George Gangas be e si den komakandaa?

16 Baka a Paskafesa fu a yali 33, na ala yuu den Kelesten be e kon makandaa fu dini Yehofa. „Den be e poti pakisei a den sani di den apostel be e leli den. Den be lobi paati san den abi anga taawan” (Toli 2:42). Winsi den Romesama anga den fesiman fu a Dyu biibi be e du ogii anga den, toku den á be e tapu fu holi komakandaa. A sani ya á be makiliki, toku den be e du ala san den man fu kon makandaa.

17 Den sama di e dini Yehofa aini a ten ya seefi e piisii te den e go a den komakandaa. George Gangas, a be wan fu den baala di e tii a wooko fu u. A du a wooko ya 22 yali. A taki: „Komakandaa a wan fu den sani di e meke mi piisii. Den e gi mi taanga-sikin. Mi be e doo enke fosi sama na a Kownukondee zaal, da mi e komoto enke lasiti sama son leisi. Mi e piisii te mi e taki anga den baala anga sisa. Te mi de anga den mi e fii enke mi de a osu anga mi famii aini wan paladeisi. Ná pikin angii mi e angii fu de a den komakandaa.”

18. Fa yu e si den komakandaa?

18 Na aseefi fasi yu e si a dini de wi e dini Yehofa? Meke moiti fu de makandaa anga den baala anga sisa winsi a á makiliki. Soi Yehofa taki yu e fii enke fa kownu David be e fii. A taki: „Yehofa mi lobi a osu fi i. Mi lobi a peesi pe a gendee fasi fi i de.”Psalm 26:8.

^ [1] (paragraaf 3) Fu di a libi e taanga gi son baala anga sisa meke den á poi go ala yuu a komakandaa. Son wan fu den siki. Ma Yehofa sabi fa den e fii. Ai si a moiti di den e meke fu dini en enke wan gaan sani. Den owluman sa seeka sani fu yeepi den sama ya. Kande den sa sete sani gi den fu aliki a komakandaa a telefon. Den sa fanga den komakandaa gi den tu fu den aliki.

^ [2] (paragraaf 3) Luku a faki „ Saide wi e go a komakandaa.”