Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  april 2016

Ná teke se aini a goontapu ya pe sama nai libi na a wan

Ná teke se aini a goontapu ya pe sama nai libi na a wan

„Pai Gadu san a fu Gadu.”MATEYESI 22:21

SINGI: 33, 137

1. Fa u sa aliki Gadu anga den tiiman?

BEIBEL e gi u taanga-sikin fu aliki lanti, ma ai soi kiin taki a Gadu u mu moo aliki (Toli 5:29; Titesi 3:1). Fa u sa du a sani ya? Den sani di Yesesi taki e yeepi u fu fusutan a sani ya. A taki u mu ’pai a Gaankownu san a fu a Gaankownu, ma u mu pai Gadu san a fu Gadu.’ [1] (Luku a pisi ete wan pelensipali sani.) (Mateyesi 22:21). Wi e ’pai Gaankownu san a fu Gaankownu” te wi e holi den weiti fu a kondee, te wi e lesipeki den sama di lanti poti a wooko anga te wi e pai lantimoni (Romesama 13:7). Ma te lanti wani u du wan sani di Gadu á lobi, u ná o aliki den. Wi o soi den anga lesipeki taki u ná o du a sani de.

2. Fa wi e soi taki u nai holibaka gi politiki?

2 Wan fu den fasi fa wi e „pai Gadu san a fu Gadu” a te u nai mumui anga politiki (Yesaya 2:4). A Yehofa gi lanti a okasi fu tii, neen meke u mu aliki den. Boiti dati, u nai du sani fu soi taki a kondee di wi e tan bun moo den  taawan (Romesama 13:1, 2). U nai meke moiti fu puu den sama di e tii a kondee fu poti taawan. U nai dwengi den fu du san u wani tu. Boiti dati, u nai sitemu. U nai meke sama sitemu gi u tu.

3. Saide wi á mu mumui anga politiki?

3 A ná fu soso Gadu taigi u taki wi á mumui anga politiki. Wan fu den sani, a di wi e waka a Yesesi baka. Yesesi á be e „mumui anga a goontapu”. A á be e mumui anga feti efuso politiki (Yohanisi 6:15; 17:16). Wan taa sani, a fu di wi e holibaka gi Gadu Kownukondee. U nai holibaka gi den sama di e tii goontapu, neen meke u kosensi nai fon u te wi e paati a bosikopu taki a Gadu Kownukondee wawan o puu ala den fuka fu libisama. Den falisi keliki e mumui anga politiki, neen meke den nai libi na a wan. Ma wi e libi na a wan anga den baala anga sisa a hii goontapu, bika u nai mumui anga politiki.1 Peitilisi 2:17.

4. (a) Fa u du sabi taki a o moo taanga fu du san Yehofa wani aini a ten di e kon? (b) Saide u mu seeka nownow fu du sani enke fa Yehofa wani aini a ten di e kon?

4 Kande wi e tan a wan peesi pe sama nai dwengi u fu mumui anga politiki. Ma o moo wi e doo a kaba fu a goontapu fu Saatan, o moo sama o wani dwengi u fu mumui anga politiki. Nownow kaba den sama fu a goontapu ya, ’nai wani meke kuudei’. Boiti dati a ’san den wani den e du’. A ten di e kon a o moo ogii (2 Timotiyesi 3:3, 4). A omen sani miti son baala anga sisa di lanti be kengi wantu weiti fu a kondee. Neen meke a nownow u mu seeka gi den sowtu tesi de. A sani ya o yeepi u fu du sani enke fa Yehofa wani te tesi miti tu. Meke u luku fo sani di o seeka u gi den sowtu tesi ya.

SI DEN SAMA DI E TII ENKE FA YEHOFA E SI DEN

5. Fa Yehofa e si a tii di libisama e tii denseefi?

5 Wan sani di o yeepi u fu wi á mumui anga politiki, a te wi e si den sama di e tii goontapu enke fa Yehofa e si den. Di Yehofa meke libisama, a á gi den a leti fu tii taa sama (Yelemiya 10:23). Gadu e si libisama enke wan famii. Ma den tiiman fu a goontapu ya e paati sama, bika den e fende taki a foluku fu den bun moo den taa foluku. Winsi a gei enke wan tiiman bun, toku a ná o poi losi ala polobelema. Boiti dati solanga wan sama e tii kondee, a toon feyanti anga Gadu Kownukondee di bigin tii 1914. Dyonson a Kownukondee ya o puu ala den tiiman fu a goontapu ya.Leisi Psalm 2:2, 7-9.

A nownow u mu seeka gi tesi. A sani ya o yeepi u fu du sani enke fa Yehofa wani te tesi miti u

6. Fa u mu si den tiiman fu a kondee?

6 Gadu gi libisama a okasi fu tii goontapu. A sani de meke goontapu ná ogii tumisi. A sani ya e gi wi a okasi fu peleiki a bun nyunsu fu Gadu Kownukondee  (Romesama 13:3, 4). Gadu seefi e gi u taanga-sikin fu begi gi den tiiman. U mu begi fu den tiiman gi wi a okasi fu dini Gadu enke fa a wani (1 Timotiyesi 2:1, 2). Te sama du wan ogii anga wi, u sa go a lanti go suku yeepi. Pawlesi be du a sani ya (Toli 25:11). Beibel e taki a Saatan e tii a goontapu, ma a á taki neen e meke ala den tiiman du san a wani (Lukasi 4:5, 6). Neen meke wi á mu taigi sama taki: „I si a tiiman de, a Saatan e meke a du san a wani.” Beibel e soi kiin taki wi á mu e taigi sama hati sani.Titesi 3:1, 2

7. San wi á mu du?

7 A di wi e aliki Gadu meke u nai holibaka gi den sama di e tii a kondee, winsi u sa fende wini fu den sani di den wani du. Son leisi a sani ya á makiliki. Kande sama e go a sitaati efuso e du taa sani fu di den sama di e tii a kondee e meke den e pina. Kande sani miti baala anga sisa tu. Winsi i ná o holibaka gi den sama di e go a sitaati, i be o si enke a wan bun sani den e du? I be o begi Gadu fu den wini? (Efeisesama 2:2) Fu di u nai mumui anga a goontapu, meke wi á mu holibaka gi nawan sama. Den sani di wi e taki anga den sani di wi e du mu soi tu taki u nai holibaka gi den.

„KONIKONI”, MA „DE ENKE DOIFI DI NAI DU OGII”

8. San a wani taki fu „konikoni”, ma tokuso de enke doifi di nai du ogii te a abi fu du anga politiki?

8 Wan taa fasi fa u sa soi taki u nai teke se, a te wi e ’konikoni enke sineki, ma toku de enke doifi, di nai du ogii’. (Leisi Mateyesi 10:16, 17.) „Konikoni” wani taki yu e denki a fesi san sa pasa. Wi o „de enke doifi, di nai du ogii” te u nai holibaka gi politiki winsi san e pasa. Meke u luku wantu sani di sa meke a taanga gi u fu soi taki u nai mumui anga goontapu. Wi o luku fa u sa du sani enke fa Yehofa wani den ten de.

9. Anga san u mu luku bun te wi e taki anga sama?

9 Te wi anga wan sama e taki. U mu konikoni te sama bigin taki fu politiki. Te wi e taki fu Gadu Kownukondee anga wan sama, u mu luku bun fu wi á taki fa wi e si wan politiki palitei. Wi á mu taki san u lobi, efuso san wi á kaba lobi fu wan fu den politiki palitei. Pe fu u taki fa libisama e meke moiti fu losi polobelema, soi den anga a Beibel fa Gadu Kownukondee o puu polobelema fu teego. Te wan sama e sitee anga i fu sani enke, a puu di sama e puu bee, makume libi, soi den san a Wowtu fu Gadu e taki fu den sani ya. Soi den tu fa yu e meke moiti fu du san a Beibel taki. Efu wan sama fende taki lanti mu puu efuso kengi wan weiti fu a kondee u mu soi en taki u nai mumui anga den toli de. Wi á mu dwengi en fu a si sani taa fasi tu.

I mu e luku efu den sani di yu e yee e kai anga den sani di sikiifi aini Beibel

10. San o yeepi u fu wi á teke se te wi e aliki efuso leisi nyunsu?

10 Nyunsu. Son leisi a fasi fa wan nyunsu man e taki e soi taki ai teke se. Moomoo aini kondee pe den nyunsu man e wooko gi lanti. Efu den sama di  e paati nyunsu e teke se, u mu luku bun taki wi á waka a den baka. Akisi iseefi a sani ya: „A di mi lobi fa a nyunsu man e taki fu den politiki man meke mi lobi aliki en efuso luku te ai gi nyunsu?” Wan sani di o yeepi i fu yu á holibaka gi politiki, a te i nai luku, aliki efuso leisi nyunsu pe yu e si kelle taki a sama di e gi a nyunsu e teke se. Meke moiti fu aliki nyunsu di nai holibaka gi politiki. Boiti dati i mu e mu luku efu den sani di yu e yee e kai anga den sani di sikiifi aini Beibel.2 Timotiyesi 1:13.

11. Fa a lobi di wan sama lobi gudu sa meke a holibaka gi politiki?

11 Moni anga gudu. Te wan sama e si moni anga den gudu fi en enke a moo pelensipali sani, ai taanga gi en fu du sani enke fa Yehofa wani. Baka 1970 a omen Kotoigi fu Malawi be lasi ala den gudu, fu di den á be wani holibaka gi politiki palitei. A tyali, bika a ná ala den du a sani ya. Wan sisa den e kai Ruth taki: „Son wan fu den be de a sitaafuman kampu enke wi, ma bakaten den holibaka gi politiki palitei. A so den go a osu baka. Den á be wani teke a pina di den be e pina na a sitaafuman kampu.” Ma a moo gaanse fu a foluku fu Gadu a de so. Den nai holibaka gi politiki, winsi den lasi den moni anga ala den gudu fu den.Hebrewsama 10:34.

12, 13. (a) Fa Yehofa e si libisama? (b) San o yeepi u fu wi a si á kondee efuso a lo fu wi bun moo taawan?

12 Heimembee. Libisama lobi gafa den nasi, lo, foto anga den kondee. Ma Yehofa nai si wan sama efuso wan kulu sama betee moo wan taawan. Ala u na aseefi gi en. Di Yehofa meke u, a á gi wi aseefi kololu, uwii anga fesi. U mu teke en fu bigi taki a meke u so. Yehofa á taki den gwenti fu u kondee á bun, ma a á wani u si enke u bun moo taawan.Romesama 10:12

13 Wi a mu lobi u kondee efuso a lo fu u te, da wi e si enke a bun moo den taawan. Efu wi e si enke u kondee efuso u lo bun moo taawan, da a o taanga gi u fu wi á teke se. A sani ya be pasa a fositen. Son wan fu den Hebrew baala á be e libi bun anga den Giiki uman di man be dede (Toli 6:1). Fa wi o sabi efu wi e fii useefi? Efu wan baala efuso sisa fu wan taa kondee soi i fa i sa du wan sani moo bun, yu e si enke a kondee fi i sabi du sani moo a kondee fi en? Efu a so, da a be o bun fu pakisei a sani ya: „Soi sakafasi. Si enke a taawan bigi moo yu.”Filipisama 2:3.

YEHOFA O YEEPI I

14. Fa begi sa yeepi u? Sowtu Beibel toli e soi a sani ya?

14 Wan taa sani di o yeepi u fu wi á mumui anga a goontapu, a te wi e fitoow  Yehofa. Begi Yehofa fu a gi i santa yeye. A santa yeye o yeepi i fu abi sakafasi. A o yeepi i fu holi iseefi tu. A sani ya o yeepi i te lanti du wan sani di á fiti. Begi Yehofa fu a yeepi i fu si den sani di sa meke i mumui anga a goontapu. Begi en fu a yeepi i fi i du sani enke fa a wani (Yakowbesi 1:5). Kande den o poti yu a sitaafu-osu efuso du taa ogii anga i fu di yu e du san Yehofa wani. Efu a sani ya miti i, begi Yehofa fu a gi i deki-ati fu taigi taawan kiin saide i nai teke se. A ná abi misi, Yehofa o yeepi i fi i holidoo.Leisi Toli 4:27-31.

I mu e sidon pakisei tekisi di o yeepi i fu yu á mumui anga a goontapu, anga tekisi di e taki fu den sani di i wani si aini a nyun goontapu

15. Fa a Beibel o yeepi i fu yu á mumui anga a goontapu? (Luku a faki „ A Wowtu fu Gadu yeepi den fu den á holibaka gi feti.”)

15 Yehofa gi wi a Beibel fu gi u taanga-sikin. I mu e sidon pakisei Beibel tekisi di o yeepi i fu yu á mumui anga a goontapu. Meke moiti fu sabi den tekisi ya a ede. Den o yeepi i te i ná abi Beibel. A Beibel sa yeepi u tu fu biibi taki Gadu o du den sani di a paamisi u. Na a biibi di wi o biibi taki a o du den sani ya, o yeepi u fu holidoo te tesi e miti u (Romesama 8:25). Leisi den tekisi di e taki fu den sani di i wani si aini a nyun goontapu. Meke moiti fu si iseefi aini a nyun goontapu.

WAKA A DEN SAMA DI BE HOLIDOO BAKA

16, 17. San wi e leli fu den sama di du san Yehofa wani di sama be e dwengi den fu mumui anga a goontapu? (Luku a fowtow na a bigin.)

16 Du fu fo sani di o yeepi u fu wi á mumui anga a goontapu, a te wi e waka a den sama di be holidoo baka. A omen sama a Beibel ten be abi deki-ati. Boiti dati den á be e du sani di be e soi taki den e holibaka gi a goontapu. Pakisei Sadrak, Meisak, Abedneikow. Den á be wani dini a pobiki di den be meke gi a kownu fu Babilon. (Leisi Daniyeli 3:16-18.) A toli ya  yeepi omen Kotoigi fu abi deki-ati. Den nai dini a faaka fu a kondee. Yesesi á be e mumui anga politiki. A á be e holibaka gi den sani di be e tapu sama fu libi na a wan. A be sabi taki den bakaman fi en be o waka neen baka fu di a be e tyai enseefi bun. A taki: „Tei ati! Mi wini goontapu kaba.”Yohanisi 16:33.

17 A omen Kotoigi holidoo aini a ten ya. Den pina son wan fu den, den poti son wan a sitaafu osu. Taawan den kii, fu di den be e du sani enke fa Yehofa wani. Den toli fu den e gi u taanga-sikin. Wan baala fu Tolukukondee taki: „Franz Reiter a be wan yonkuu baala di den kii, fu di a á be wani toon suudati na a ten fu Hitler. A biifi di a sikiifi gi en mma a neti fosi den kii en, e soi taki a baala ya be e biibi Yehofa. A be e fitoow en tu. Mi wani waka na a baala ya baka.” [2]—Luku a pisi ete wan pelensipali sani.

18, 19. (a) Fa den sama fi i kemeente sa yeepi i fu yu á mumui anga goontapu? (b) San u mu meke moiti fu du?

18 Den baala anga sisa fi i kemeente seefi sa yeepi i fu yu á mumui anga a goontapu. Taigi den owluman te tesi e miti i. Akisi den fu den begi gi i. U mu holibaka gi den baala fu u tu. Boiti dati u mu e begi gi den (Mateyesi 7:12). Wantu nen fu baala anga sisa di de a sitaafu osu de a jw.org. [3] Suku wantu nen, da i aksi Yehofa fu a gi den taanga-sikin fu den holidoo.Efeisesama 6:19, 20.

19 A kaba fu a goontapu ya e koosube namo, neen meke lanti o wani dwengi u fu mumui anga politiki. Neen meke a de taanga fanowdu fu seeka nownow fu wi á teke se aini a goontapu ya.

^ [1] (paragraaf 1) Di Yesesi taki fu Gaankownu, a lanti a be e taki. A ten de na a Gaankownu be abi makiti moo ala den taa tiiman.

^ [2] (paragraaf 17) Luku Jehovah’s Getuigen—Verkondigers van Gods koninkrijk (Yehofa Kotoigi peleikiman fu Gadu kownukondee) blz. 662. Luku a faki „A dede fu di a ben wani gi Gado glori”, aini kapitel 14 fu a buku Gado Kownukondre e tiri!

^ [3] (paragraaf 18) Go a jw.org/nl. Luku a pisi di den e kai NIEUWS > JURIDISCHE ONTWIKKELINGEN. Yu o fende wantu nen fu son baala anga sisa di de a sitaafu osu fu a biibi fu den ede.