Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  april 2016

„U mu holidoo, wi á mu gi abaa”

„U mu holidoo, wi á mu gi abaa”

„Ma u mu holidoo, wi á mu gi abaa, da wi o bun na ala fasi, u ná o abi nawan fowtu. U ná o mankei nawan sani tu.”YAKOWBESI 1:4

SINGI: 135, 139

1, 2. (a) San wi e leli te u luku fa Gidiyon anga den 300 suudati fi en holidoo? (Luku a fowtow na a bigin.) (b) Fa a sani di sikiifi a Lukasi 21:19 e soi taki a de taanga fanowdu fu holidoo?

PUUBEI fu si fa den suudati fu Islayeli anga den feyanti fu den e feti. A feti ya á makiliki, boiti dati den suudati be weli. Gidiyon anga den suudati fi en lon a hii neti a den suudati fu Midiyan baka anga den suudati fu den taa kondee di be e holibaka gi Midiyan. Den lon wan sani fu 32 kilomeiti. Beibel e taigi u san pasa a dei de. A taki: „Di Gidiyon doo na a Yordan liba, neen en anga den 300 suudati fi en abaa a liba. Den be weli.” Ma den á wini a feti ete, bika den be mu feti anga ete 15.000 suudati. Gidiyon anga den suudati fi en á be poi gi abaa, bika a omen yali den feyanti ya be e pina den Islayelisama. Den lon a den baka te enke den wini den!Kuutubakaa 7:22; 8:4, 10, 28.

2 Aini a ten ya, useefi e feti wan feti di e meke u weli. A feyanti fu u a Saatan, a goontapu fi en, anga den sondu fii fu u. Son wan fu u e feti a feti ya omen yali kaba.  Yehofa e holibaka gi u, neen meke wi e wini. Ma wi á kaba wini a feti ya ete. Enke libisama wi e weli son leisi. Kande u weli fu wakiti a kaba fu a goontapu ya. Yesesi be taigi wi a fesi taki tesi be o miti u aini den lasiti dei. A be taki sama be o du ogii anga u tu. Ma a be taki efu u holidoo, wi o wini a feti. (Leisi Lukasi 21:19.) On ten u sa taki wan sama e holidoo? San o yeepi u fu holidoo? Fa u sa waka a den sama di be holidoo baka? Boiti dati, fa u sa holidoo te na a kaba?Yakowbesi 1:4.

ON TEN U SA TAKI WAN SAMA E HOLIDOO?

3. On ten u sa taki wan sama e holidoo?

3 Enke fa Beibel e soi da holidoo á wani taki namo taki wan sama nai gi abaa te tesi e miti en. Ma na a fasi fa ai denki fu den polobelema efuso den tesi di e miti en, e soi taki ai holidoo. Wan sama di holidoo abi deki-ati, biibi anga pasensi. Wan buku taki te wan sama e holidoo, da a sani de e yeepi en fu abi howpu. Ai yeepi en tu fu a á gi abaa te tesi e miti en. Ai meke wan sama taampu gingin winsi sowtu tesi e miti en. Boiti dati ai yeepi en fu a á poti pakisei a den tesi, ma fu poti pakisei na a sani di a poti neen ede fu du.

4. Fa lobi e yeepi wan sama fu holidoo?

4 Lobi e yeepi u fu holidoo. (Leisi 1 Korentesama 13:4, 7.) Fa ai yeepi u? A lobi di u lobi Yehofa e gi u taanga-sikin fu holidoo winsi sowtu tesi e miti u (Lukasi 22:41, 42). A lobi di u lobi u baala anga sisa e yeepi u fu holidoo tu winsi den e du sani di wi á lobi (1 Peitilisi 4:8). Boiti dati a lobi di man anga uman lobi denseefi e yeepi den fu holidoo winsi „banowtu” e miti den aini a toowlibi. Banowtu e miti man anga uman di abi wan bun toowlibi tu. Ma na a lobi di den lobi denseefi e meke a toowlibi fu den waka bun.1 Korentesama 7:28.

SAN O YEEPI U FU HOLIDOO?

5. Saide Yehofa na a moo bun sama di poi yeepi u fu holidoo?

5 Begi Yehofa fu a gi i kaakiti. A Yehofa na a ’Gadu di e yeepi sama fu holidoo. Ai toosutu den tu’ (Romesama 15:5). Sama á de di e fusutan wi enke fa ai fusutan u. A sabi san e miti u. Boiti dati a sabi u bun. Neen meke a sabi san wi abi fanowdu fu holidoo. Beibel taki: „Ai gi den sama di e lesipeki en san den wani. Ai yee den te den e kai en, da ai yeepi den” (Psalm 145:19). Ma fa Gadu o yeepi u fu holidoo, te u begi en?

Yehofa sabi san wi abi fanowdu fu holidoo

6. San Yehofa paamisi u te tesi e miti u?

6 Efu u begi Yehofa fu a yeepi u fu holidoo, „a o yeepi” u, bika na a sani de a paamisi u. (Leisi 1 Korentesama 10:13.) Fa Yehofa e yeepi u? Son leisi ai puu a tesi gi u. Ma moo gaanse, ai gi u kaakiti fu „holidoo anga pasensi, anga ala piisii” (Kolosesama 1:11). Fu di a sabi u gusontu, a fasi fa wi  e denki, anga a fasi fa wi e fii, meke a ná o meke tesi di wi á poi tyai miti u. Fu di a sabi taki u poi holidoo meke a nai puu son tesi gi u.

7. Saide wi abi den sani di sikiifi aini Beibel taanga fanowdu?

7 Meke den sani di sikiifi aini Beibel taanga i biibi. Saide wi abi den sani di sikiifi aini Beibel taanga fanowdu? Efu wan sama wani subi a mongo di den kai Everest, da a mu nyan a nyanyan di wan sama be o nyan aini dii efuso fo dei. Na a sani de u mu du tu. Efu u wani doo a nyun goontapu, u mu meke moiti fu e leisi a Beibel, u mu e sutudeli. Boiti dati u mu e go a den komakandaa. A den sani ya o taanga u biibi.Yohanisi 6:27.

8, 9. (a) Te u luku san Yopu 2:4, 5 e taki, sowtu okasi wi abi te tesi e miti u? (b) San i mu puubei fu si te tesi e miti i?

8 Yu á mu feegete taki i mu dini Yehofa winsi san e pasa. Den tesi di e miti u, á switi. Den e pina u. Ma den tesi ya e gi wi a okasi fu soi Yehofa taki wi e dini en winsi san e pasa. Den sani di wi e du e soi efu a Yehofa wi e si enke a sama di mu tii hemel anga goontapu. Saide? Bika Saatan e sitee anga Gadu. Ai soso Yehofa, bika a taki a di libisama e fende wini meke den e dini Gadu. A taki: „Te wan sama de fu dede, a o du ala san a poi fu tan a libi.” Saatan taigi Yehofa taki: „Langa yu ana du ogii anga Yopu. Meke a fii te aini en bon. Da yu o si efu a ná o kosi i” (Yopu 2:4, 5). I si enke Saatan kengi? Nono! Di den fiingi Saatan kon a goontapu, a be e lei gi den sama di e dini Gadu anga den hii ati (Openbaring 12:10). Te anga now Saatan e si enke a di libisama e fende wini meke den e dini Yehofa. A wani u daai baka gi Gadu tu.

9 Te yu e nyan pina te tesi miti i, puubei fu si a sani ya. Saatan anga den ogii yeye e luku san yu o du. Den e taki yu o gi abaa. Ma Yehofa, u Kownu Yesesi, den salufu Kelesten di de a hemel, anga den dunsudunsu engel e luku tu. Den e si fa yu e meke moiti. Boiti dati den e gi i taanga-sikin fu holidoo! Ná pikin piisii den e piisii te yu holidoo. Den e piisii tu te den si taki yu e dini Yehofa winsi san e pasa. I sabi san Yehofa e taigi i? A taki: „Mi manpikin, soi taki i koni. Meke mi piisii, da mi o poi piki a sama di e soso mi.”Odo 27:11.

Yesesi be e pakisei den wini di a be o fende te a be o holidoo

10. Fa i sa waka a Yesesi baka te tesi e miti i?

10 Pakisei den wini di yu o fende. Kon u taki i de a pasi e go a wan faawe peesi. A pasi langa te, na a hii neti yu abi fu waka fu doo a peesi. A libi fu u de enke a pasi ya. Son leisi a libi e taanga gi u. Den polobelema e moo wi. Kande a so Yesesi seefi be e fii. Di den sipikii en na a ponsu, ná pikin pen a fii. Boiti dati den gi en sen a sama  ini. Di Yesesi be de a hemel den sani ya á be e miti en. San yeepi Yesesi fu holidoo? Beibel taki a be e pakisei „a piisii di a be o piisii aini a ten di e kon” (Hebrewsama 12:2, 3). Yesesi be e pakisei den wini di a be o fende te a be o holidoo. A moo pelensipali sani di a be e pakisei na a santa di a be o santa a nen fu Gadu, anga a soi di a be mu soi taki a Gadu abi a leti fu tii hemel anga goontapu. A be sabi taki den tesi á be o de fu teego. Ma a paiman di a be o fende aini hemel o de fu teego. Winsi den tesi di e miti i aini a ten ya e moo yu, toku yu á mu feegete taki tesi a fu wan ten.

„DEN SAMA DI HOLIDOO”

11. Saide a de fanowdu fu poti pakisei na a libi fu „den sama di holidoo”?

11 A ná u wawan mu holidoo. A apostel Peitilisi be gi den Kelesten taanga-sikin fu holidoo te Saatan e tesi den. A be taki: „Taampu gingin te ai kon a yu, i biibi mu taanga. Yu á mu feegete taki a denseefi tesi ya e miti den baala fu u a hii goontapu” (1 Peitilisi 5:9). Te wi e luku a libi fu „den sama di holidoo”, da wi o si fa den dini Yehofa winsi san be e pasa. Wi o si taki useefi poi holidoo winsi sowtu tesi e miti u. Boiti dati wi o si taki Yehofa o pai u te wi holidoo (Yakowbesi 5:11). Meke u go luku wantu fu den sama di be holidoo. [1]—Luku a pisi ete wan pelensipali sani.

12. San wi e leli fu den engel di be e holi wakiti gi a dyali fu Eden?

12 Den kerub-engel abi wan hei posisi a hemel. Di Adan anga Efa taanga yesi Yehofa, neen Yehofa gi wantu fu den kerub-engel wan nyun wooko a goontapu. A wooko ya, á be de enke a wooko di den be e du a hemel. Te u luku a sani di den kerub engel du, da wi e leli taki u mu holidoo winsi Yehofa gi u wan wooko di e taanga gi u. Beibel taki Yehofa be „poti kerub-engel na a se fu a dyali pe a san e opo. A poti wan feti-how tu di be abi faya. A be e daai lontu naamo, fu tapu a pasi di e go na a bon di den e kai libi.” [2] (Luku a pisi ete wan pelensipali sani.) (Genesesi 3:24). A á sikiifi aini Beibel taki den kerub be e kuutu di Yehofa gi den a wooko de. A á sikiifi tu taki den be e si enke a wooko á fiti den. Den á be e weli efuso gi abaa. Ma den du a wooko te enke a á be de fanowdu moo. Kande a di a hii goontapu  be sungu baka 1600 yali neen a wooko á be de fanowdu moo.

13. San yeepi Yopu fu holidoo di gaan tesi be miti en?

13 Yopu be e dini Yehofa anga en hii ati. Son leisi yu ati e boon fu di i mati efuso i famii taigi i wan sani di booko i saka. Kande i siki. Kande yu e kusumi fu di wan sama di i lobi dede. Winsi sowtu tesi e miti i, a toli fu Yopu o gi i taanga-sikin (Yopu 1:18, 19; 2:7, 9; 19:1-3). Yopu á be sabi saide omen tesi be e miti en wanboowanboo so. Ma tokuso a á gi abaa. San yeepi en fu holidoo? A fosi sani di yeepi en, na a lobi di a be lobi Yehofa. A be wani du sani di Yehofa lobi (Yopu 1:1). Yopu be wani du sani enke fa Yehofa wani winsi sowtu tesi be e miti en. Bakaten Yehofa yeepi Yopu fu fusutan a kaakiti fi en. A taigi en wantu fu den gaan sani di a meke. A sani ya be meke Yopu biibi taki Yehofa be o puu a tesi fi en na a yuu di a si taki a de fanowdu (Yopu 42:1, 2). Na a sani de Yehofa du. A „puu ala den tesi di be e miti en. Neen a gi Yopu tu toon fu den sani di a be abi”. Boiti dati „Yopu libi wan switi libi. A libi langa fosi a dede”.Yopu 42:10, 17.

14. Enke fa 2 Korentesama 1:6 e soi, saide meke u sa taki a fasi fa Pawlesi be holidoo e gi taawan taanga-sikin?

14 Apostel Pawlesi. Sama e du ogii anga i fu di yu e dini Yehofa? Efu yu a wan owluman efuso wan kelen owluman, yu e si enke a wooko fi i taanga tumisi? Efu den sani ya e miti i, da a libi fu Pawlesi o gi i taanga-sikin. Sama be e du omen ogii anga Pawlesi. Boiti dati Pawlesi be e booko en ede anga den baala anga sisa fu den kemeente (2 Korentesama 11:23-29). Ma noiti Pawlesi gi abaa, neen meke a  libi fi en e gi u taanga-sikin. (Leisi 2 Korentesama 1:6.) Efi i holidoo yu o gi taawan taanga-sikin tu.

HOLIDOO, NÁ GI ABAA?

15, 16. (a) Sowtu wini wi o fende te wi o holidoo? (b) San u mu du fu soi taki wi e holidoo te na a kaba?

15 Gadu be meke Yakowbesi sikiifi taki: „U mu holidoo, wi á mu gi abaa, da wi o bun na ala fasi, u ná o abi nawan fowtu. U ná o mankei nawan sani tu” (Yakowbesi 1:4). Fa u sa holidoo te na a kaba? Den tesi di e miti u, e yeepi u fu si efu wi abi moo pasensi fanowdu. Den e yeepi u tu fu si efu u mu meke moo moiti fu soi taawan taki u lobi den. Kande a o yeepi u fu si taki u mu tifeedi anga san wi abi. Te wi e holidoo ai yeepi u fu soi den manii fu Yehofa moo bun.

Te wi e holidoo, da a sani de e yeepi u fu moo abi den manii di wan Kelesten mu abi (Luku paragraaf 15, 16)

16 Fu di wi o toon wan moo bun Kelesten te wi holidoo, meke u ná o wani pasa den weiti fu Yehofa fu di u wani komoto aini a tesi. Efu yu e pakisei sani di á fiti, yu á mu gi abaa! Akisi Yehofa meke a yeepi i fi i pakisei sani di a lobi. Den famii fi i e libi ogii anga i fu di yu e dini Yehofa? Yu á mu gi abaa! I mu tan dini Yehofa winsi san e pasa. A sani de o yeepi i fi i moo fitoow Yehofa. Noiti i mu feegete taki: A te wi holidoo fosi, Yehofa o piisii.Romesama 5:3-5; Yakowbesi 1:12.

17, 18. (a) Gi wan ageisitoli di e soi taki a de taanga fanowdu fu holidoo. (b) Fa u biibi mu de di u sabi taki a kaba de koosube?

17 U mu holidoo, wi á mu gi abaa. Pakisei wan sipi di e sungu. Efu den sama di de aini a sipi wani tan a libi den mu suwen go a se. Efu wan fu den sama bigin suwen neen a gi abaa, a o dede. Boiti dati efu wan fu den de fu doo neen a gi abaa, a o dede. Efu u wani doo a nyun goontapu, u mu holidoo, wi á mu gi abaa. U mu meke moiti fu de enke Pawlesi. A be taki: „U nai gi abaa.”2 Korentesama 4:1, 16.

18 Leti enke Pawlesi wi e biibi taki Yehofa o yeepi u fu holidoo. A be taki: „Winsi den sani ya e pasa anga u tokuso wi o wini, bika a sama di lobi u, e holibaka gi u. Bika mi e biibi taki sani á de di poi tapu Gadu fu a lobi u. Dede á poi. Libi seefi ná o poi. Nawan engel, nawan tiimakiti, nawan sani fu a ten ya efuso fu a ten di e kon, nawan kaakiti, nawan sani di hei, nawan sani di dipi, nawan enkii sani di Gadu meke, poi tapu Gadu fu a lobi u. Na aseefi fasi ya Yesesi Kelestesi, a Masaa fu wi lobi u tu” (Romesama 8:37-39). A tuu, son leisi wi o weli. Ma u mu puubei fu de enke Gidiyon anga den suudati fi en. Winsi fa den be weli, den á be gi abaa. „Den be e lon a den feyanti baka”!Kuutubakaa 8:4.

^ [1] (paragraaf 11) Wi o fende taanga-sikin te wi e leisi den ondoofenitoli fu den baala anga sisa di holidoo aini a ten ya. A Jaarboek fu 1992, 1999 anga 2008 abi ondoofenitoli fu baala anga sisa fu Etiyopiya, Malawi anga Rosiyakondee. Den ondoofenitoli ya e taanga u biibi.

^ [2] (paragraaf 12) Beibel nai taki omen kerub-engel be e du a wooko ya.