Skip to content

Skip to table of contents

Fa u sa komoto a katibo?

Fa u sa komoto a katibo?

„Efu a Manpikin puu wi a katibo, wi o fii tuutuu.”​—YOHANISI 8:36.

SINGI: 54, 36

1, 2. (a) San sama e du fu di den wani fii? (b) Fa sani e waka te den e du den sani ya?

AINI a ten ya, a omen sama e taki fu a libi di den mu libi aseefi fasi anga ala sama. Son sama á wani taawan libi ogii anga den. Boiti dati den á wani pina moo. Taawan wani taki san den wani, du san den wani efuso tan a pe den wani. Ná ala se fu goontapu sama wani fii.

2 Fu di sama wani fii meke den e go waka a sitaati. Taawan e puubei fu teke kondee abaa. Ma i si enke den sani ya e yeepi den fu fende san den wani? Nono. Gaanse leisi a den sani ya e meke a libi moo banowtu den. Den e tyai dede gi den tu. Kownu Salomo be abi leti di a taki a Peleikiman 8:9 taki: „Fanafu di libisama bigin tii taa libisama, sani nai waka bun gi den.”

3. San u mu du efu u wani de koloku?

3 Beibel e soi san u mu du efu u wani de koloku. A disipel Yakowbesi be taki: „Efu wan sama e luku finifini san  sikiifi aini a weiti di ná abi fowtu, di e puu sama a katibo, neen ai du san a weiti ya taki . . . a o de koloku” (Yakowbesi 1:25). A Yehofa abi a weiti di ná abi nawan fowtu. Neen na a moo bun sama di sabi san wi abi fanowdu fu de koloku. Adan anga Efa á be de a katibo di Yehofa meke den. Den be abi ala san den be abi fanowdu fu de koloku.

A TEN DI LIBISAMA BE FII

4. Saide u sa taki Adan anga Efa be fii? (Luku a fowtow na a bigin.)

4 Te u leisi Genesesi kapitel 1 anga 2, da wi e leisi taki Adan anga Efa be fii tuutuu. Na a libi de, sama wani aini a ten ya. Den be abi ala san den be abi fanowdu. Nawan sama be e libi ogii anga den. Den á be e booko den ede anga nyanyan, wooko, siki anga dede (Genesesi 1:27-29; 2:8, 9, 15). Ma dati wani taki den be sa taki san bun anga san á bun? Meke u luku a toli ya moo fini.

5. San wi abi fanowdu efu u wani fii?

5 A omen sama e denki taki a wan enkii fasi fa den sa fii, a te den man du ala san den wani sondee fu booko den ede anga san den e du. Wan buku (The World Book Encyclopedia) taki: „Te wan sama fii, a abi a okasi fu du san a wani.” A buku ya taki solanga lanti nai meke weiti di á de fanowdu efuso weiti di e fooseli sama, da sani o waka bun gi ala sama. A sani ya e soi taki son weiti de fanowdu fu meke ala sama fii. Ma sama mu luku efu wan weiti de fanowdu efuso bun?

6. (a) Saide u sa taki sama á de di fii enke Yehofa? (b) San libisama ná abi a leti fu du?

6 U mu holi a pakisei taki nawan sama poi tapu Yehofa fu du san a wani. Saide? Bika neen meke ala sani. Boiti dati neen na a Moo Gaan Gadu fu hemel anga goontapu (1 Timotiyesi 1:17; Openbaring 4:11). Kownu David be koboloiki moin wowtu fu taki fu a makiti di Yehofa abi. (Leisi 1 Koloniki 29:11, 12.) Yehofa poti weiti gi den engel di e tan a hemel anga ala libisama di e tan a goontapu. Winsi fa den sa du san den wani anga den libi, tokuso a ná den abi a leti fu taki san bun anga san á bun. Yehofa wani u fusutan taki neen wawan abi a leti fu taki efu wan weiti de fanowdu anga efu a bun. Fanafu a bigin Yehofa be poti weiti gi den sani di a meke.

7. San a wantu sani di u mu du fu meke a libi switi gi u?

7 Winsi fa Adan anga Efa be fii, toku den be abi fu du son sani fu tan a libi. A omen fu den sani ya á be taanga gi den fu du. Efu den be wani tan a libi, den be mu e boo, den be mu e nyan, den be mu e siibi tu. Ma a sani ya be wani taki den be de a sitaafu? Nono. Yehofa sabi taki den sani ya be o meke a libi moo switi gi den (Psalm 104:14, 15; Peleikiman 3:12, 13). Ala wi e fii bun te wi e hali boo, te wi e nyan den sani di u lobi anga te wi e siibi bun a neti. U nai fii enke u de a katibo te wi e du den sani ya. A letiso Adan anga Efa á be e fii enke den de a katibo te den be e du den sani ya.

8. San Yehofa be taigi Adan anga Efa fu du? Saide a taigi den fu du den sani ya?

 8 Yehofa be taigi Adan anga Efa kiin san den be mu du. A be taigi den taki den mu meke pikin fuu a goontapu, da den solugu a goontapu (Genesesi 1:28). A sani ya wani taki den be de a dwengi? Nono! A sani ya be o gi den a okasi fu meke a hii goontapu toon wan paladeisi. Aini a paladeisi ya den anga den pikin fu den be o tan fu teego. Na a sani ya Gadu be abi a pakisei gi libisama (Yesaya 45:18). Aini a ten ya, te sama á toow a ná taangayesi den e taangayesi Gadu. Den nai taangayesi en tu efu den á meke pikin. Taawan e toow, da den e meke pikin winsi fa den sabi taki den o abi booko-ede (1 Korentesama 7:36-38). Saide? A fu di den sabi taki den sani ya sa meke den piisii (Psalm 127:3). Efu Adan anga Efa be aliki Yehofa, a toowlibi fu den be o waka bun. A osufamii fu den be o de koloku fu teego.

SAN POTI LIBISAMA A KATIBO?

9. Saide a weiti fu Gadu di sikiifi a Genesesi 2:17 be bun?

9 Yehofa be gi Adan anga Efa wan weiti. A be taigi den san o pasa efu den ná aliki en. A taigi den taki: „A bon di den e kai sabi bun anga ogii, yu á mu nyan a sii fi en, bika a dei di yu o nyan en, yu o dede namo” (Genesesi 2:17). A weiti ya be de fanowdu? A weiti ya be e fooseli den? A weiti ya be o meke den á fii moo? Nono. A omen sabiman fu Beibel taki a di Gadu koni meke a gi Adan anga Efa a weiti ya. Wan fu den taki a weiti ya be e soi taki ’a Gadu wawan sabi san bun gi libisama anga san á bun gi den. Efu libisama wani sani waka bun gi den, den mu biibi Gadu da den du san a taki. Efu den á wani aliki en, a denseefi o abi fu taki san bun anga san á bun’. Ma libisama á poi du a sani ya.

A sani di Adan anga Efa du tyai ogii gi den! (Luku paragraaf 9-12)

10. Saide u sa taki te wan sama abi a leti fu taki san bun anga san á bun anga te a man du san a wani anga en libi, a ná aseefi?

A Yehofa wawan abi a leti fu taki san bun anga san á bun

10 Son sama e taki Yehofa be e fooseli Adan, bika a á be poi du ala san a wani. Ma te wan sama abi a leti fu taki san bun anga san á bun anga te a man du san a wani anga en libi, a ná aseefi. Na Adan anga Efa seefi be mu luku efu den o du san Yehofa taki. Ma a Yehofa wawan abi a leti fu taki san bun anga san á bun. ’A bon fu sabi bun anga ogii’ be e soi Adan anga Efa taki a Yehofa abi leti fu du a sani ya (Genesesi 2:9). A ná ala yuu wi e sabi fa sani o waka te u du wan sani. Wi á poi taki na ala san wi o du o waka bun. Neen meke winsi wi e si enke wi e du wan bun sani, toku son leisi a sa tyai ogii gi u bakaten (Odo 14:12). A sani ya e soi taki a ná ala sani libisama poi du. Di Yehofa gi  Adan anga Efa a weiti taki den á mu nyan a sii fu a bon fu sabi bun anga ogii, a wani a be wani leli den taki den mu aliki en efu den wani fii fu alaten. Ma san Adan anga Efa du?

11, 12. Saide a sani di Adan anga Efa du tyai ogii gi den? Gi wan ageisitoli.

11 A wan tyali sani taki Adan anga Efa taangayesi Yehofa. Efa aliki san Didibii taigi en. Didibii be taigi en taki: „Wi ain o opo, wi o kon de enke Gadu, wi o sabi san bun anga san ogii” (Genesesi 3:5). Adan anga Efa kon moo fii di den aliki Saatan? Nono. Den kon si taki sani nai waka bun gi libisama te den ná aliki Yehofa (Genesesi 3:16-19). Saide sani e miti libisama te den ná aliki Yehofa? Bika Yehofa á gi den pasi fu taki san bun anga san ogii.​—Leisi Odo 20:24; Yelemiya 10:23.

12 I mu si a toli ya enke te wan sama e fee wan opalani. Efu a wani a opalani doo pe a mu go, a mu fee a opalani go na a se de. A mu wooko anga den sani fu a opalani di e yeepi en fu sabi pe a de. Boiti dati a mu e taki anga den sama di e wooko a den opalani goon. Ma efu a ná aliki den, neen a du san a wani, ogii sa miti en. Adan anga Efa du sani enke fa denseefi be wani. Den poti den sani di Yehofa taigi den a wan se. Fa sani waka gi den? Ogii miti den. A sani di den du tyai sondu anga dede gi den anga ala den bakapikin fu den (Romesama 5:12). Adan anga Efa á kon moo fii di denseefi teke a faantiwowtu  fu taki san bun anga san ogii. A denseefi den poti a tyotyo.

SAN WAN SAMA MU DU EFU A WANI FII TUUTUU?

13, 14. San wan sama mu du efu a wani fii tuutuu?

13 Son sama e denki taki a libi be o moo bun efu sama be sa du ala san den wani. Ma a tuu? A tuu taki wi o fende son wini efu u man du ala san u wani. Ma pakisei a sani ya: Fa a goontapu be o de efu weiti á be de? Wan buku (The World Book Encyclopedia) taki den weiti fu den kondee á makiliki fu holi. Bika na a wan se den wani meke sama fii, ma na a taase den e tapu sama fu du ala san den wani. A sani ya á makiliki bika a omen weiti de. Pakisei omen afukati anga omen kuutubakaa de fanowdu fu yeepi sama fu fusutan den weiti ya anga fu du san den weiti ya e taki.

14 Yesesi be taki san u mu du efu u wani fii tuutuu. A taki: „Efu wi e du san mi taki, da wi a mi bakaman tuutuu. Wi o sabi a tuu, da a tuu o meke u fii” (Yohanisi 8:31, 32). A sani ya e soi taki efu u wani fii, u mu du tu sani. A fosi sani di u mu du, na a wooko di u mu wooko anga den leli fu Yesesi. A taa sani di u mu du, a wan bakaman fu Yesesi u mu toon. A den sani ya o puu wi a katibo. Ma sowtu katibo wi o komoto? Yesesi taki: „Ala sama di e sondu, a wan saafu fu sondu. Ma efu a Manpikin puu wi a katibo, wi o fii tuutuu.”​—Yohanisi 8:34, 36.

15. Saide a Yesesi man puu wi a katibo tuutuu?

 15 Yesesi paamisi den bakaman fi en taki a o fii den. A fii di Yesesi o fii den bun moo a fii di omen sama wani aini a ten ya. Yesesi be taki: „Efu a Manpikin puu wi a katibo, wi o fii tuutuu.” Yesesi be taki fu a fii di a o fii wi fu sondu. A sondu na a moo gaan sani di e fooseli libisama. Saide wi a saafu fu sondu? Sondu e meke wi e du sani di á bun. Ai tapu u fu du den sani di u sabi taki bun efuso di o tyai wini gi u. Sondu e tyai dede, booko ede, pen anga pina gi u tu (Romesama 6:23). Apostel Pawlesi be sabi san a wani taki fu de wan saafu fu sondu. (Leisi Romesama 7:21-25.) A te u ná abi sondu moo, fosi wi o fii enke fa Adan anga Efa be fii na a bigin.

16. On ten wi o fii tuutuu?

16 Yesesi be taki „efu wi e du san a taki”. A sani ya e soi taki efu u wani Yesesi puu wi a katibo, u mu du wantu sani. Sowtu sani? Enke Kelesten u paamisi Yehofa taki wi o libi enke fa a wani. U ná o teli useefi moo. U de kabakaba fu wooko anga den weiti di Yesesi gi u tu (Mateyesi 16:24). Yesesi paamisi u taki wi o fii tuutuu aini a ten di e kon. Na a ten de wi o si ala den wini fu a dede di Yesesi dede gi u.

17. (a) San o yeepi u fu de koloku? (b) San wi o luku aini a taa artikel?

17 Efu u wani de koloku, u mu wooko anga den leli fu Yesesi. Efu u du a sani ya, wi o fii fu sondu anga dede. (Leisi Romesama 8:1, 2, 20, 21.) Aini a taa artikel, wi o si fa u sa du sani anga koni di Yehofa fii wi. A sani ya o yeepi u fu gi Yehofa gaandi fu teego, a Gadu di e meke sama fii.