Skip to content

Skip to table of contents

„U mu gi useefi taanga-sikin o moo wi e si a dei e koosube”

„U mu gi useefi taanga-sikin o moo wi e si a dei e koosube”

„Meke wi e poti pakisei a makandaa . . . , u mu gi useefi taanga-sikin o moo wi e si a dei e koosube.”​—HEBREWSAMA 10:24, 25.

SINGI: 90, 87

1. Saide Pawlesi be taigi den Hebrew Kelesten taki den mu gi denseefi taanga-sikin?

PAWLESI be taigi den Hebrew Kelesten taki: „Meke wi e poti pakisei a makandaa, fu u sa gi makandaa taanga-sikin fu soi lobi anga fu du bun wooko. Wi á mu e puu dei fu go a komakandaa, enke fa son sama gwenti, ma u mu gi useefi taanga-sikin o moo wi e si a dei e koosube” (Hebrewsama 10:24, 25). Kande den baala anga sisa be e akisi denseefi saide Pawlesi taigi den taki den mu gi denseefi taanga-sikin. Ma a á kisi feifi yali, neen den bigin si saide Pawlesi be gi den taanga-sikin fu du a sani ya. Den be bigin si maiki di e soi taki a dei di Yehofa be o poli Yelusalem be koosube. Den be fusutan taki den be mu lowe komoto aini a kondee enke fa Yesesi be taigi den (Lukasi 21:20-22; Toli 2:19, 20). A dei fu Yehofa doo aini a yali 70, di den Romesama poli Yelusalem.

2. Saide u mu moo gi useefi taanga-sikin aini a ten ya?

 2 Wi abi taanga-sikin fanowdu aini a ten ya tu. A „dei fu Yehofa” koosube (Yoweli 2:11). Den sani di polofeiti Sefanya be taki fiti a ten fu u ya. A taki: „A gaan dei fu Yehofa de koosube. A de a pasi e kon. Ai kon gawgaw” (Sefanya 1:14). Neen meke u mu e „poti pakisei a makandaa, fu u sa gi makandaa taanga-sikin fu soi lobi anga fu du bun wooko” (Hebrewsama 10:24). Aini a ten ya u mu e moo booko wi ede anga u baala anga sisa, fu u sa gi den taanga-sikin.

SAMA ABI TAANGA-SIKIN FANOWDU?

3. San Pawlesi be taki fu a gi di u mu gi useefi taanga-sikin? (Luku a fowtow na a bigin.)

3 „Tyaipi booko-ede e meke wan sama booko-saka, ma te wan sama taki switi anga en, da ai piisii” (Odo 12:25). Ala wi abi taanga-sikin fanowdu son leisi. Pawlesi be taki den baala di abi a faantiwowtu fu gi taawan taanga-sikin abi taanga-sikin fanowdu tu. Aini a biifi di Pawlesi be sikiifi gi den Kelesten fu Rome, a be taki: „Mi e angii fu si u te, fu mi sa taigi u sani fu Gadu fu u sa taampu gingin. Fu taki en kiin, mi wani mi anga u miti fu u sa gi useefi taanga. Dati wani taki a biibi fi i o gi mi taanga-sikin. Du fu mi o gi i taanga-sikin tu (Romesama 1:11, 12). A sani ya e soi taki son leisi Pawlesi be abi taanga-sikin fanowdu.​—Leisi Romesama 15:30-32.

4, 5. Sama u sa gi taanga-sikin aini a ten ya? Saide u mu gi den taanga-sikin?

4 Aini a ten ya u sa gi den sama di e du a fuuten diniwooko taanga-sikin tu. Son wan fu den sama ya e pionili. A omen sani den fika fu den sa du a pioniliwooko. Den sama di e wooko a Betel, den zendeling, den kelen owluman anga den uman anga den sama di e wooko a den kantoo pe den e poti den buku fu wi go aini taa tongo, fika omen sani di den be lobi tu. Neen meke denseefi abi taanga-sikin fanowdu. Boiti dati a omen sama di be e du a fuuten diniwooko á poi du en moo. Den e teke en fu bigi te wi e gi den taanga-sikin.

5 Sama abi taanga-sikin fanowdu tu? U sa gi den baala anga sisa di á toow taanga-sikin fu di den wani du sani enke fa Yehofa wani. Den wani toow anga wan „bakaman fu Masaa” (1 Korentesama 7:39). Den sisa di toow e fende taanga-sikin te den man e taigi den taki den lobi den. Den e fii bun tu te den man e gafa den fu den sani di den e du (Odo 31:28, 31). Baala anga sisa di siki efuso di tesi e miti abi taanga-sikin fanowdu tu (2 Tesalonikasama 1:3-5). Yehofa anga Yesesi e toosutu ala den baala anga sisa ya.​—Leisi 2 Tesalonikasama 2:16, 17.

OWLUMAN E GI U TAANGA-SIKIN

6. San na a wooko fu den owluman te u luku san sikiifi a Yesaya 32:1, 2?

6 Leisi Yesaya 32:1, 2. Wi e libi aini wan taanga ten, neen meke u sa lasi-ati efuso fii booko-saka son yuu. Yesesi e meke den salufu baala fi en anga den „gaanman” fu a gaan kulu gi u taanga-sikin. Den owluman a ná u basi, ma den e yeepi u fu dini Yehofa anga piisii. Den wani u de koloku. Den á wani u gwe fika Yehofa tu.​—2 Korentesama 1:24.

7, 8. Fa owluman sa gi taawan taanga-sikin anga den sani di den e taki anga den sani di den e du?

 7 Den owluman sa waka a Pawlesi baka. A be e meke moiti fu gi den baala anga sisa taanga-sikin. Di tesi be e miti den Kelesten fu Tesalonika, a sikiifi gi den taki: „A di u lobi u meke wi á paati a bun nyunsu fu Gadu gi u namo. Ma u be de kabakaba fu dede gi u tu, bika u be kon lobi u anga u hii ati.”​—1 Tesalonikasama 2:8.

8 Owluman sa gi taawan taanga-sikin anga den sani di den e taki. Ma a sani de sai? Pawlesi taigi den owluman fu Efeise taki: „Mi soi u na ala fasi taki useefi mu e wooko taanga fu u sa yeepi den sama di swaki. Wi á mu feegete san Masaa Yesesi seefi be taki: ’Te wan sama e gi taawan sani, a o de koloku moo te taawan e gi en sani’” (Toli 20:35). Pawlesi be e ’du ala san a poi’ fu yeepi den baala anga sisa. Den sani di a be e du be e soi taki a be de kabakaba fu yeepi den (2 Korentesama 12:15). A ná anga mofu namo owluman mu gi taawan taanga-sikin, ma den mu gi den taanga-sikin anga den sani di den e du tu. A so den o soi taki den e booko den ede anga den tuutuu.​—1 Korentesama 14:3.

9. Fa owluman sa gi taawan taanga-sikin te den e poti den a pasi?

9 Son leisi a de fanowdu fu den owluman poti den baala anga sisa a pasi. Owluman sa luku aini a Beibel fa den sa gi wan sama taanga-sikin te den e poti den a pasi. Di Yesesi weki baka a poti wantu kemeente fu Pikin Asiya a pasi. Den kemeente ya be de a Efeise, Pergamum anga Tiyatira. Owluman sa waka a Yesesi baka. Fosi Yesesi poti den kemeente ya a pasi a gafa den (Openbaring 2:1-5, 12, 13, 18, 19). A be taigi a kemeente fu Laodiseya taki: „A den sama di mi lobi mi e kaasi. Mi e sitaafu den tu. Neen meke u mu wooko taanga. U mu daai u libi tu” (Openbaring 3:19). Owluman mu waka a Yesesi baka te den e meke moiti fu yeepi den baala anga sisa fu a kemeente.

A NÁ OWLUMAN WAWAN MU GI TAAWAN TAANGA-SIKIN

Mma anga dda wi e leli u pikin fu gi taawan taanga-sikin? (Luku paragraaf 10)

10. Fa ala u sa gi taawan taanga-sikin?

10 A ná den owluman wawan mu gi taawan taanga-sikin. Pawlesi be taigi ala Kelesten taki den mu „taki sani di e gi sama taanga-sikin te a de fanowdu. Da den sama di e aliki, o yee sani di e tyai wini gi den” (Efeisesama 4:29). Ala u mu sidon pakisei fa u sa yeepi taawan. Pawlesi be taigi den Hebrew Kelesten taki: „Neen meke u mu meke den ana di swaki kon taanga baka. Meke den kini di swaki kon taanga baka. Tan seeka a pasi di yu e waka fu den futu di malengii á komoto a sukuufu. A betee den mu betee” (Hebrewsama 12:12, 13). Ala u sa gi taawan taanga-sikin anga den sani di wi e taki winsi u yonkuu.

11. San yeepi sisa Marta di a be e kusumi?

11 Wan sisa den e kai Marta be e kusumi wan hii pisiten. * (Luku a maiki a ondoo.) A sikiifi taki: „Di mi begi Yehofa wan dei fu a gi mi taanga-sikin, mi miti  wan gaandi sisa di soi mi taki a lobi mi. A soi mi tu taki a be e booko en ede anga mi. Na a sani de mi be abi fanowdu. A gi mi en eigi toli. Mi si taki a denseefi sani di miti mi be miti en. Neen meke mi á be e fii enke a mi wawan de moo.” Kande a sisa á be sabi seefi taki a so a be gi Marta taanga-sikin anga den sani di a taigi en!

12, 13. Fa u sa wooko anga san sikiifi a Filipisama 2:1-4?

12 Pawlesi be taigi den Kelesten fu Filipi taki: „Efu wi e gi useefi taanga-sikin enke Kelesten, efu wi e toosutu useefi fu di u lobi useefi, efu wi e booko wi ede anga useefi anga efu wi e soi tyali-ati gi useefi, wi o meke mi moo piisii, fu di wi e denki go na a wan se. Wi abi aseefi lobi bika wi na a wan tuutuu. Wi á mu e sitee anga useefi. Wi á mu e fii useefi, ma u mu abi sakafasi. U mu e si enke taawan pelensipali moo wi. Yu á mu e suku wini fi i wawan, ma i mu e booko yu ede anga taawan tu.”​—Filipisama 2:1-4.

13 Ala u mu e suku fasi fu yeepi u baala anga u sisa. U sa gi u baala anga sisa taanga-sikin te wi e soi den taki u lobi den. U mu soi den taki wi e booko wi ede anga den tu.

SANI DI U SA DU FU GI TAAWAN TAANGA-SIKIN

14. San a wan fu den fasi fa u sa gi taawan taanga-sikin?

14 Wi e fii bun te u yee taki den sama di u be yeepi aini a ten di pasa, e dini Yehofa anga den hii ati ete. Apostel  Yohanisi be sikiifi taki: „Sani á de di e gi mi piisii enke te mi e yee taki den pikin fu mi e du san den leli” (3 Yohanisi 4). A omen pionili e piisii te den e si fa den sama di den yeepi fu kon a waaleiti e dini Yehofa anga den hii ati. Kande son wan fu den e pionili tu. Neen meke efu wan pionili e fii booko-saka, u sa membee en taki a omen bun sani a du den ten di pasa fu yeepi taawan. A sani ya o meke a fii moo bun.

15. San u sa du fu gi den sama di e dini Yehofa anga den hii ati taanga-sikin?

15 A omen kelen owluman taki den anga den uman fende taanga-sikin di baala anga sisa sikiifi biifi fu gi den daa di den kon luku a kemeente. A so den owluman, zendeling, pionili anga den sama di e wooko a Betel e fii tu te taawan e gi den taanga-sikin. Winsi san e pasa den e dini Yehofa. Wi e gi den sama ya taanga-sikin te wi e soi den taki den sani di den e du e bigi gi u.

FA ALA U SA GI TAAWAN TAANGA-SIKIN?

16. Fa i sa gi taawan taanga-sikin?

16 San i mu du efu ai taanga gi i fu gi taawan taanga-sikin? A á makiliki fu gi taawan taanga-sikin. Meke moiti fu lafu te i si wan sama. Efu a á lafu gi i baka, da kande wan sani du en. Kande a abi wan sama fanowdu fu taki anga en. I sa gi en taanga-sikin te yu aliki en.​—Yakowbesi 1:19.

17. San gi wan yonkuu baala taanga-sikin?

17 Wan yonkuu baala di den e kai Henri be e fii booko-saka di wantu  famii fi en gwe fika Yehofa. Wan fu den sama ya a be en dda. En dda a be wan owluman. Wan kelen owluman be si taki wan sani du Henri, neen meke a tyai en go diingi kofi. A aliki anga pasensi di Henri be e taki fa ai fii. Henri be fusutan taki a wan enkii fasi fa a be sa yeepi en famii fu daai kon baka, a te a tan dini Yehofa anga en hii ati. A fende taanga-sikin di a leisi Psalm 46, Sefanya 3:17, anga Malikisi 10:29, 30.

Ala u sa gi taawan taanga-sikin (Luku paragraaf 18)

18. (a) San Kownu Salomo taki fu a gi di u mu gi taawan taanga-sikin? (b) San apostel Pawlesi taki u sa du fu gi taawan taanga-sikin?

18 San u sa leli fu a ondoofenitoli fu Marta anga Henri? Wi e leli taki winsi sama a wi, u sa toosutu u baala anga u sisa te den abi en fanowdu. Kownu Salomo sikiifi taki: „Ná pikin switi a switi te wan sama taki wan sani na a yuu di a de fanowdu” (Odo 15:23, 30). I sabi wan sama di e fii booko-saka? Kande i sa leisi wan Wakititolen gi en efuso wan sani fu a website. Pawlesi be si taki te wi e singi Kownukondee singi anga taawan wi e fii moo bun. A sikiifi taki: „U mu e leli makandaa. U mu e gi useefi taanga-sikin anga psalm, singi di e gafa Gadu anga taa singi fu gi en daa. Singi anga u hii ati gi Yehofa.”​—Kolosesama 3:16; Toli 16:25.

19. Saide wi o abi fu gi useefi moo taanga-sikin aini a ten di e kon? San u mu du di u sabi a sani ya?

19 Moo a dei fu Yehofa e koosube, moo a o de fanowdu fu gi useefi taanga-sikin (Hebrewsama 10:25). Wi o piisii efu u du san Pawlesi taki. A taki: „Neen ede meke, u mu e gi makandaa taanga-sikin, u mu e yeepi makandaa tu, enke fa u gwenti.”​—1 Tesalonikasama 5:11.

^ paragraaf 11 Son wan fu den nen aini a artikel ya kengi.