Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2016

„Yu á mu lasi-ati”

„Yu á mu lasi-ati”

„Yu á mu lasi-ati.”SEFANYA 3:16.

SINGI: 81, 32

1, 2. (a) San e miti gaanse sama aini a ten ya? San sa pasa anga wan sama te den sani ya e miti en? (b) San wi e leli te u luku san sikiifi a Yesaya 41:10, 13?

WAN pionili sisa di toow anga wan owluman taki: „Winsi fa mi gwenti du den sani di wan Kelesten mu du, tokuso mi e booko mi ede omen yali kaba anga wantu sani. A sani de e meke mi nai poi siibi, mi gusontu e go a baka, mi á poi libi switi anga taawan. Boiti dati mi e wani gi abaa.”

2 A sani di e miti a sisa ya, e miti i tu? Fu di wi e libi aini a goontapu fu Saatan meke a omen sani e miti u. Den sani ya sa meke u fii booko-saka son leisi. Leti enke fa wan ankaa e holi wan boto a wan peesi, a letiso wi á poi go a fesi te wi e fii booko-saka (Odo 12:25). San a den sani di sa meke i fii booko-saka? Kande wan sama di i lobi dede efuso kande i siki wan gaan siki. Kande sama e du ogii anga i fi i biibi ede. Kande ai taanga gi i fu solugu yu osufamii aini a taanga ten ya. Baka wan pisiten booko-ede sa meke i biibi kon swaki. A sa meke i nai piisii moo, ma toku i sa biibi taki Yehofa de kabakaba fu yeepi i.Leisi Yesaya 41:10, 13.

3, 4. (a) San Beibel e taki fu a ana? (b) San a den sani di sa meke wi ana kon swaki?

3 Son leisi te Beibel e taki fu son pisi fu u sikin, da ai soi  go a den manii efuso den sani di wan sama e du. Wan fu den pisi de na a ana. A omen ondoo leisi Beibel e taki fu a ana. Te Beibel e taki wan sama ana kon taanga, da dati wani taki, a sama fende taanga-sikin. A abi ati fu du wan sani (1 Samuweli 23:16; Esra 1:6). Son leisi a wani taki tu taki, a sama e fii moo bun. Ai biibi taki sani o waka bun aini a ten di e kon.

4 Son leisi Beibel e taki tu taki, wan sama ana kon swaki. Dati wani taki a sama lasi-ati. A nai si enke sani o waka bun aini a ten di e kon (2 Koloniki 15:7; Hebrewsama 12:12). Te yu e fii booko-saka efuso te yu e fii taki i biibi kon swaki, da yu e wani gi abaa. Ma pe i sa fende taanga-sikin? San i mu du fu fende a kaakiti di yu abi fanowdu? San o yeepi i fu piisii baka?

„YEHOFA ANA Á SATU, A POI YEEPI I”

5. (a) Fa wi e fii te wi abi polobelema? Ma san u mu holi a pakisei? (b) San wi o luku aini a artikel ya?

5 Leisi Sefanya 3:16, 17. Wi á mu feele efuso meke wi ana kon swaki te wi abi polobelema. U dda Yehofa a hemel, wani u fika ala den booko-ede fu u gi en (1 Peitilisi 5:7). Yehofa o solugu u leti enke fa a be solugu den Islayelisama. A be taigi den taki en ana á satu. ’A poi yeepi den.’ A de kabakaba fu yeepi den sama di nai gwe fika en (Yesaya 59:1). Aini a artikel ya, wi o taki fu dii toli fu Beibel di e soi taki Yehofa poi gi en foluku taanga-sikin winsi sowtu tesi e miti den. Den toli ya e soi taki Yehofa de kabakaba fu gi en foluku taanga-sikin. Wi o luku fa u sa fende wini fu den toli ya.

6, 7. San wi e leli fu a wini di den Islayelisama wini den Amaleksama?

6 Di den Islayelisama komoto a Egepte enke saafu, a á teke langa neen den Amaleksama kon feti anga den. Mosesi taigi Yowsuwa, wan man di be abi deki-ati, fu a teke fesi aini a feti. Baka dati Mosesi, Aron anga Hur subi go a wan mongo di be de koosube. Di den be de na a mongo den be poi si fa a feti be e feti. A feele den dii man ya be e feele fu go feti? Noiti!

7 Mosesi du wan sani fu yeepi den Islayelisama fu wini a feti. A be holi a tiki fu a tuu Gadu anga tu se ana, neen a opo en a tapu. Di Mosesi du a sani ya, neen Yehofa gi den Islayelisama kaakiti fu feti anga den Amaleksama. Ma te Mosesi be e saka en ana te a be weli, da den Amaleksama be e wini. Aron anga Hur á daaidaai, den yeepi Mosesi wanten. „Den teke wan siton, neen den poti en neen ondoo fu a sidon, neen Aron anga Hur holi en ana. Aron be taampu a wan se, da Hur be taampu na a taa se. A so den holi en ana a tapu te enke a san saka.” Fu di Yehofa ana taanga, meke den Islayelisama be wini a feti.Ekisodesi 17:8-13.

8. (a) San Asa du di den Etiyopiyasama be kon feti anga Yuda? (b) Fa u sa waka a Asa baka?

8 Aini a ten fu kownu Asa Yehofa be soi tu taki en ana á be satu tumisi fu yeepi en foluku. Beibel e taki fu omen kulu suudati, ma a moo gaanwan a du fu Sera, a Etiyopiya man. A man ya be abi wan miliyun suudati di be sabi feti. Den  suudati fi en be e puu tu fu den suudati fu Asa. Di Asa si so, a feele? A lasi-ati? A meke en ana kon swaki? Nono! A begi Yehofa wantenwanten fu a yeepi en. Libisama be o si enke noiti Asa be o poi feti anga den Etiyopiyasama. Ma „Gadu man du ala sani” (Mateyesi 19:26). Gadu be koboloiki a kaakiti fi en fu meke ’Asa wini den Etiyopiyasama’. Bika Asa „dini Yehofa anga en hii ati te enke a dede”.2 Koloniki 14:8-13; 1 Kownu 15:14.

9. (a) San á tapu Nehemiya fu meke a sikotu fu Yelusalem? (b) Fa Gadu aliki a begi fu Nehemiya?

9 San Nehemiya si di a go a Yelusalem baka? A be si taki den taa kondee sama di be de feyanti fu den Dyu, be wani du ogii anga den Islayelisama. Neen meke den Islayelisama á be e meke a sikotu fu Yelusalem moo. A foto be de opo-opo, a á be abi sikotu. Boiti dati den Dyu be lasi-ati. Ma fa fu Nehemiya? A be lasi-ati tu? A be meke en ana kon swaki? Nono! Leti enke Mosesi, Asa anga wantu taa sama di be e dini Yehofa, Nehemiya be e fitoow Yehofa. Leti enke den man ya, Nehemiya begi Yehofa fu a yeepi en. Neen meke Yehofa yeepi en tu. Gadu be koboloiki a kaakiti fi en fu gi den Dyu taanga-sikin. (Leisi Nehemiya 1:10; 2:17-20; 6:9.) Yu e biibi taki Yehofa e koboloiki en kaakiti aini a ten ya fu gi den sama di e dini en taanga-sikin?

YEHOFA O GI I TAANGA-SIKIN

10, 11. (a) Fa Saatan e meke moiti fu meke wi ana kon swaki? (b) Anga san Yehofa e gi u taanga-sikin anga kaakiti? (c) Sowtu wini wi e fende fu den leli fu Yehofa?

10 U sabi taki noiti Saatan o weli fu tesi u. A o tan meke moiti fu tapu u fu wi á du san Beibel e taki. A o meke sama lei gi u, a o meke lanti, den fesiman fu den keliki, anga sama di gwe fika a waaleiti tapu u fu dini Yehofa. Fu saide? A á wani u paati a bun nyunsu fu a Kownukondee. Ma Yehofa poi yeepi u. A o gi u taanga-sikin anga en santa yeye (1 Koloniki 29:12). A de taanga fanowdu fu wi akisi Yehofa en santa yeye fu a yeepi u fu Saatan anga en goontapu á koli u (Psalm 18:39; 1 Korentesama 10:13). Ai bigi gi u taki a Wowtu fu Gadu e yeepi u tu. Pakisei den somen sani di wi e leli, anga den buku di wi e fende ala mun. Na a ten di den be e seeka a tempel den be taki den sani di sikiifi a Sakaliya 8:9, 13 (leisi), ma tokuso den e yeepi u aini a ten ya ete.

11 Yehofa e gi u taanga-sikin tu a den komakandaa, den kelen-komakandaa, konkelesi anga den sikoo fu a olikanisâsi. Den leli ya e yeepi u fu dini Gadu anga u hii ati, fu go a fesi, anga fu du ala den sani di Beibel taki (Psalm 119:32). I wani den leli fu Yehofa gi i taanga-sikin?

12. San u mu du efu wi á wani lasi-ati?

12 Yehofa be yeepi en foluku fu wini den Amaleksama anga den Etiyopiyasama. A be gi Nehemiya anga den Dyu kaakiti fu kaba meke a sikotu fu Yelusalem. Aini a ten ya, Gadu e gi u kaakiti tu fu go doo anga peleikiwooko winsi wi abi booko-ede. Sama e du ogii anga wi, taawan á wani aliki u, ma toku u nai gi abaa (1 Peitilisi 5:10). Yehofa ná o du wan wonduu fu puu den polobelema fu u. Efu u wani a yeepi u, u mu meke moiti. San u mu du? U mu leisi Gadu Wowtu  ala dei, u mu e seeka useefi, da u go a den komakandaa ala wiki, u mu e sutudeli Beibel, u mu e holi a osufamii Anbegi. Boiti dati u mu e begi Yehofa fu a yeepi u. Wi á mu meke nawan sani tapu u fu du den sani ya. Bika anga den sani ya Yehofa e gi u taanga-sikin anga kaakiti. Efi i si taki i nai du den sani ya, i mu begi Yehofa fu a yeepi i, da yu o si fa a yeye fu Gadu ’o gi i kaakiti. A o meke yu angii fu du sani di e meke a piisii tu’ (Filipisama 2:13). I poi yeepi den sama di lasi-ati?

GI DEN SAMA DI LASI-ATI TAANGA-SIKIN

13, 14. (a) Fa wan baala fende taanga-sikin di en uman dede? (b) Fa u sa gi taawan taanga-sikin?

13 Yehofa gi wi omen baala anga sisa a hii goontapu di e booko den ede anga wi. Ala den poi gi u taanga-sikin. Apostel Pawlesi taki: „Neen meke u mu meke den ana di swaki kon taanga baka. Meke den kini di swaki kon taanga baka. Tan seeka a pasi di yu e waka” (Hebrewsama 12:12, 13). A omen Kelesten aini a ten fu den apostel be fende taanga-sikin fu den baala anga sisa. Aini a ten ya, na aseefi sani e pasa. Wan baala uman dede. Boiti dati wantu gaan tesi miti en tu. A baala ya taki: „Mi leli taki a ná wan sama seefi e luku sowtu tesi a wani miti en. A neen e taki on ten efuso omen leisi tesi mu miti en. Begi anga sutudeli de enke wan sani di e holi yu a tapu wataa. A fasi fa den baala anga sisa holibaka gi mi, meke mi fii bun. A  tesi ya meke mi fusutan taki u mu meke moiti fu taanga u biibi fosi gaan tesi miti u.”

Ala sama aini a kemeente poi gi sama taanga-sikin (Luku paragraaf 14)

14 Aron anga Hur yeepi Mosesi fi en ana á saka di den Islayelisama be e feti anga den Amaleksama. Aini a ten ya, useefi mu meke moiti fu yeepi taawan. Son baala anga sisa e kusumi fu di den kon gaandi, siki efuso fu di famii e tesi den. Son wan e fii enke sama á lobi den. Taawan e kusumi fu di wan sama di den lobi dede. U mu meke moiti fu gi den yonkuuwan taanga-sikin tu, bika taawan e gi den taanga-sikin fu suku wan bun libi aini a goontapu fu Saatan. Den e gi den taanga-sikin tu fu du sani di á bun (1 Tesalonikasama 3:1-3; 5:11, 14). Meke moiti fu soi taawan taki yu e booko yu ede anga den te i de aini a Kownukondee zaal, peleikiwooko, te i sidon e nyan efuso te yu e taki anga sama a telefon.

15. Sowtu wini den baala anga sisa e fende te wi e taki sani di e gi den taanga-sikin?

15 Baka di Asa wini den somen suudati fu Etiyopiya, a polofeiti Asariya taigi Asa anga a foluku taki: „U mu abi deki-ati. Ná lasi-ati, bika Gadu o pai u gi den sani di u du” (2 Koloniki 15:7). A sani ya gi Asa taanga-sikin fu yeepi a foluku fu dini Yehofa baka. Aini a ten ya, den bun sani di yu e taki poi yeepi taawan fu holidoo te den e dini Yehofa (Odo 15:23). Noiti i mu feegete taki i baala anga i sisa e fende taanga-sikin te yu e gi piki a komakandaa.

16. Fa owluman sa waka a Nehemiya baka? Gi wan ondoofenitoli di e soi fa baala anga sisa gi i taanga-sikin.

16 Di Yehofa gi Nehemiya anga den Dyu taanga-sikin, den á be lasi-ati moo. Neen meke den be kaba meke a sikotu fu Yelusalem aini 52 dei (Nehemiya 2:18; 6:15, 16). Nehemiya á be e taampu luku fa den taawan be e wooko. Ma enseefi be e yeepi di den be e meke a sikotu fu Yelusalem (Nehemiya 5:16). Aini a ten ya, a omen owluman e waka a Nehemiya baka, bika den e yeepi meke Kownukondee zaal, den e yeepi seeka den tu. Den lobi den baala anga sisa, bika den e gi den taanga-sikin te den go luku den a osu efuso te den e wooko anga den aini a peleikiwooko.Leisi Yesaya 35:3, 4.

„YU Á MU LASI-ATI”

17, 18. Te wi abi polobelema efuso booko ede, da san u mu holi a pakisei?

17 Te wi e wooko makandii anga u baala anga sisa, da a sani de e yeepi u fu libi na a wan. Ai meke u toon bun mati. Boiti dati wi e moo biibi taki den sani di Gadu paamisi o kon tuu. Te wi e gi taawan taanga-sikin, wi e yeepi den fu holidoo te tesi e miti den. Wi e yeepi den tu fu biibi taki sani o waka bun aini a ten di e kon, ma useefi e fende taanga-sikin tu. Ai yeepi u fu pakisei den wini di wi o fende aini a ten di e kon.

18 Wi e fende taanga-sikin te wi e sidon pakisei fa Yehofa be e kibii efuso yeepi den sama di be e dini en a fositen. Neen meke te yu abi polobelema efuso te yu e booko yu ede, „yu á mu lasi-ati”! I sa biibi taki efi i begi Yehofa fu a yeepi i, a o gi i taanga-sikin. A o yeepi i tu fu fende den sani di a paamisi u aini a ten di e kon.Psalm 73:23, 24.