Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2016

Mma anga dda, yeepi u pikin fu den biibi taanga

Mma anga dda, yeepi u pikin fu den biibi taanga

„Yonkuman anga den yonkuu uman. . . Meke ala den gafa a nen fu Yehofa.”PSALM 148:12, 13.

SINGI: 88, 115

1, 2. (a) Saide a á makiliki gi mma anga dda fu yeepi den pikin fu den biibi Yehofa? San o yeepi mma anga dda fu du a sani ya? (b) San a den fo sani di wi o luku?

WAN mma anga wan dda fu Faansikondee taki: „Wi e biibi Yehofa, ma dati á wani taki den pikin fu wi o biibi en tu. Nawan sama nai meke anga biibi. A saafisaafi wan pikin e bigin biibi Yehofa.” Wan baala fu Australiya sikiifi taki: „Yeepi i pikin fu biibi Yehofa anga en hii ati, na a moo taanga sani gi wan mma anga wan dda.” A taki: „Son yuu yu e si enke i yeepi i pikin fu fusutan wan toli bun. Ma bakaten ai akisi i aseefi sani baka! Den sani di yu e taigi en nownow nai sai fu a fusutan a toli, bika te a kon moo bigi ai wani sabi moo.” Te wan pikin e bigi, wantu mma anga dda e si taki den abi fu yeepi den fu fusutan aseefi toli baka. Ma den e moo fini a toli gi den. Den kon si tu taki na aseefi fasi ya den mu yeepi den fu lobi Yehofa.

2 Efu yu a wan mma efuso dda, yu e booko yu ede efu yu o man yeepi i pikin fu lobi Yehofa? Yu e booko yu ede efu yu o poi yeepi en fu dini Yehofa? Holi a pakisei taki sama á de  di poi du sani sondee Yehofa (Yelemiya 10:23). Neen meke u mu biibi taki a o yeepi u. A gi mma anga dda omen sani di sa yeepi den. Fa i sa yeepi i pikin? (1) Meke moiti fu sabi a pikin bun. (2) Leli den san i sabi fu Yehofa. (3) Leli en anga ageisitoli. (4) Begi Yehofa fu a gi yu en santa yeye, da i pasensi anga a pikin.

MEKE MOITI FU SABI I PIKIN BUN

3. Fa mma anga dda sa waka a Yesesi baka te den e leli den pikin?

3 Yesesi akisi den disipel fi en wantu leisi san den e biibi (Mateyesi 16:13-15). I sa waka neen baka. Te yu anga i pikin e gi toli efuso te wi e du wan sani makandii, akisi en fa ai denki anga fa ai fii. Meke a taigi i san a nai kaba fusutan. Wan baala fu Australiya di abi 15 yali taki: „Son yuu nda e taki anga mi fu mi biibi, da ai yeepi mi fu pakisei son sani. Ai akisi mi taki: ’San Beibel e taki?’ ’Yu e biibi a sani de?’ ’Saide yu e biibi en?’ Ai wani mi taigi en san mi e pakisei. A nai wani mi taki denseefi sani di en anga mma taigi mi. Di mi kon moo bigi, den be wani sabi saide mi e taki son sani.”

4. Gi wan toli di e soi saide mma anga dda mu abi pasensi te den pikin e akisi den wan sani.

4 Efi i pikin nai kaba biibi wan sani di Beibel e taki, da i mu abi pasensi. Yeepi den fu den kon sabi son sani moo bun. Wan dda taki: „Yu a mu si den sani di den pikin e akisi yu enke lawlaw sani. Yu á mu du enke a sani di ai taki á pelensipali. Yu á mu daai a taki fu di sen e kisi i fu taki son sani anga en.” A bun te den pikin e akisi i sani, dati e soi taki den wani sabi moo. Yesesi seefi be e akisi sani di a be yonkuu. (Leisi Lukasi 2:46.) Wan yonkuuwan a Deinsikondee taki: „Wan leisi mi taigi mi mma anga nda taki mi be e akisi miseefi efu na a tuu biibi mi de. Winsi fa den be e booko den ede anga mi, tokuso den á ligei. Den piki ala den akisi fu mi anga a Beibel.”

5. San mma anga dda mu du, winsi a gei enke den pikin e dini Yehofa anga den hii ati?

5 Meke moiti fu sabi i pikin bun. Yu á mu si enke den biibi taanga fu di den e peleiki efuso fu di den e go a komakandaa. Meke moiti fu sabi fa den e si Yehofa anga a Beibel. Meke moiti fu sabi san sa meke den gwe fika Yehofa. Taki anga den ala dei te wi e du sani makandaa. Begi gi den pikin fi i te yu anga den de, efuso te i wawan de.

LELI DEN SAN I SABI FU YEHOFA

6. Saide mma anga dda mu sabi Yehofa anga a Beibel efu den wani leli den pikin bun?

6 Den sama be lobi aliki Yesesi fu di a be lobi Yehofa. Boiti dati a be sabi a Wowtu fu Gadu bun. Den be e si tu taki Yesesi be lobi den. Neen meke den be e aliki en anga ala den pakisei (Lukasi 24:32; Yohanisi 7:46). Te den pikin fi i e si taki i lobi Yehofa, da a sani de o yeepi den fu lobi en tu. (Leisi Deitolonomi 6:5-8; Lukasi 6:45.) Neen meke i mu lobi leisi Beibel anga den buku fu u. Poti pakisei a den sani di Gadu meke tu (Mateyesi 6:26, 28). Te i sabi Yehofa moo bun, a o moo makiliki gi i fu leli i pikin.Lukasi 6:40.

7, 8. San i sa du te i leli wan sani fu Yehofa? Fa wantu mma anga dda du a sani ya?

7 I mu e leli i pikin den sani di i sabi fu Yehofa. Ala yuu te yu anga den de i mu du a sani ya, a ná te wi e seeka gi komakandaa efuso te yu e holi a Osufamii Anbegi wawan. Na a sani ya wan mma anga  wan dda fu Ameekankondee be e du. Den be e taki fu Yehofa anga den pikin te den be si wan moin sani di Yehofa meke efuso te den be e nyan wan switi nyanyan. Den taki: „U be e membee den pikin fu u taki Yehofa pakisei bun fosi a meke den sani di a gi u, fu di a lobi u.” Wan toowpaa fu Zuid-Afiikan, lobi taki anga den tu umanpikin fu den, fu den sani di Yehofa meke te den de aini goon. Wan fu den sani ya na a fasi fa wan sii e goo toon wan bon. A toowpaa ya taki: „Wi e yeepi den pikin fu u fu den abi lesipeki gi a libi, anga a fondoo fasi fa den sani meke.”

8 Wan baala fu Australiya tyai wan boi fi en di abi tin yali go a wan peesi pe den e poti fositen sani. A baala koboloiki a okasi de fu yeepi en boi fu si taki wan sama musu meke ala sani. A taki: „U si gaandi nkola anga wan sowtu wataa kakaaka di be e tan aini a se. U foondoo di u si fa den meti ya meke. Ná pikin moin den be moin. A so den meti fu a ten ya meke a wan foondoo fasi tu. Efu a ná Gadu meke ala sani, da fa a waka den fositen meti di u si de, be meke a wan foondoo fasi so, winsi fa den be de omen yali kaba? Na a sani de mi leli, di mi si den fositen nkola anga a sowtu wataa kakaaka. Mi paati san mi leli anga mi boi tu.”

LELI I PIKIN ANGA AGEISITOLI

9. Saide a bun fu leli i pikin anga ageisitoli? Anga sowtu ageisitoli wan mma leli en pikin?

9 Yesesi be lobi leli sama anga ageisitoli. Son leisi te a be wani leli den wan sani, a wan toli a be e gi den (Mateyesi 13:34, 35). Te yu e leli i pikin anga ageisitoli, yu e yeepi den fu denki. A sani ya e yeepi den fu pakisei a sani di i leli den. Ai yeepi den fu fusutan en bun, boiti dati den ná o feegete san i leli den. Den o aliki i anga piisii. Wan mma a Yapan be wani leli den tu boi fi en taki a di Yehofa lobi u meke a meke a goontapu so. Wan fu den boi be abi aitin yali, a taawan be abi tin. A mma leli den anga wan ageisitoli di den be poi fusutan. A gi den boi meliki, sukuu anga kofi. Neen a akisi den fu ibiiwan fu den meke wan kan kofi gi en. A mma taki: „Den booko den ede fu meke a kofi bun. Di mi akisi den saide den e booko den ede so, neen den taki den wani meke a kofi enke fa mi lobi en. Baka dati mi taigi den taki a so Gadu meke a goontapu gi u. A meke en a wan fasi di bun gi u.” Den be lobi a fasi fa den mma leli den a sani ya. Noiti den feegete san a leli den!

Gi den pikin fi i makiliki ageisitoli fu yeepi den fu biibi taki a wan sama meke ala sani (Luku paragraaf 10)

10, 11. (a) Sowtu ageisitoli i sa gi i pikin fu soi en taki a Gadu meke ala sani? (Luku a fowtow na a bigin.) (b) Sowtu ageisitoli i gi i pikin fu leli en a sani de?

10 Anga sowtu ageisitoli i sa leli den  pikin fi i taki a Gadu meke ala sani? I sa koboloiki wan buku di e soi fa fu baka kuku, da i baka wan kuku anga a pikin. Taigi en saide a de fanowdu fu du san a buku e soi. Baka dati, gi en wan apaa efuso wan taa sii, da i akisi en taki: „I be sabi taki wan fasi de fu meke a apaa ya? Baka dati koti a apaa a mindii, da i gi en a sii. Soi en taki a sii de enke wan buku. Ai soi fa a apaa mu meke. Ma a sii meke a wan foondoo fasi. I sa akisi en taki: „A wan sama sikiifi a buku di e soi fa a kuku mu baka. Da sama sikiifi fa a apaa mu meke?” Efu a wan gaangaan pikin, i sa soi en taki a sii fu a apaa, de enke wan buku di e soi fa wan nyun apaa bon o de. Ai soi fa den nyanyan di a o meke o de tu. I sa soi en a sani ya a bladzijde 10 te anga 20 fu a bolosilo di den e kai Vijf belangrijke vragen over het ontstaan van het leven.

11 A omen mma anga dda e leisi den artikel di e de aini den Ontwaakt! anga den pikin. Den e kai den artikel ya „Toeval of ontwerp?” Efu a pikin yonkuu, a mma anga a dda sa yeepi en a wan moo makiliki fasi. Wan toowpaa a Deinsikondee be e maiki opalani anga foo. Den taki: „Opalani anga foo e gei. Ma opalani e meke igi? Den poi meke pikin? Foo abi wan apaiti peesi fanowdu fu saka? Sowtu wan moo moin, a bali fu a opalani efuso a singi di den foo e singi? Sama moo koni, a sama di meke a opalani efuso a sama di meke a foo? Te yu e poti akisi gi i pikin yu e yeepi en fu a koboloiki en fusutan. Yu e yeepi en fu a biibi Yehofa tu.Odo 2:10-12.

12. Sowtu ageisitoli u sa koboloiki, fu leli u pikin taki ala san sikiifi aini Beibel a tuu?

12 I sa gi i pikin wan ageisitoli tu fu leli en taki ala den sani di sikiifi aini Beibel a tuu. I sa leisi Yopu 26:7. (Leisi.) Yu á mu taigi a pikin namo taki a Yehofa taki a sani di sikiifi ya. A moo bun fu yeepi en fu a denki. I sa taigi en taki, den sama fu a ten fu Yopu be e biibi taki a wan sani tapu a goontapu de. Sani enke bal efuso siton á poi de a tapu e dai e lontu, da a nai kai. A ten de sama á be sabi taki a goontapu á fasi a wan sani, bika faikenki anga opalani á be de. A sani ya e soi taki winsi fa a Beibel gaandi, tokuso a nai taki sani di á tuu, bika a Yehofa meke sama sikiifi en.Nehemiya 9:6.

SOI DEN SAIDE A BUN FU DU SAN BEIBEL TAKI

13, 14. Fa mma anga dda sa yeepi den pikin fu du san Beibel taki?

13 A bun fu leli i pikin tu taki den o moo piisii te den e libi enke fa Beibel taki. (Leisi Psalm 1:1-3.) I sa akisi den pikin fi i taki, efu den be abi wan tabiki, sama den be o teke fu tan anga den, efu den wani ala sama libi na a wan. Baka dati leisi Galasiyasama 5:19-23 di e soi sama Yehofa wani aini a nyun goontapu.

14 Te yu o du a sani ya, da yu o leli i pikin tu pelensipali sani: (1) Yehofa e leli u fa u sa de anga piisii nownow anga san u mu du fu libi bun anga taawan. (2) Ai leli u fa u mu libi aini a nyun goontapu (Yesaya 54:13; Yohanisi 17:3). I sa soi den pikin fa a Beibel yeepi baala anga sisa fu kengi. Kande i sa suku ondoofenitoli aini den buku fu u. Wantu fu den ondoofenitoli ya e kon aini den Waktitoren na a artikel di den e kai „Bijbel e kenki sma libi”. Boiti dati i sa akisi baala efuso sisa aini i kemeente fu taigi yu anga den pikin fi i, fa a Beibel yeepi den fu kengi a fasi fa den be e libi.Hebrewsama 4:12.

15. San o yeepi i fu leli i pikin?

 15 Meke moiti fu leli i pikin a wan fasi di o meke a angii fu aliki i. Pakisei san i sa du fu meke a leli di yu e leli den fu lobi Yehofa, de wan piisii sani. Tan du a sani ya winsi den e kon moo bigi. Wan dda taki: „Yu á mu weli fu leli i pikin den sani di den sabi kaba. Puubei fu leli den a wan taa fasi.”

BEGI YEHOFA FU A GI YU EN SANTA YEYE, DA I PASENSI ANGA A PIKIN

16. Saide u mu abi pasensi te wi e leli u pikin? Fa wantu mma anga dda pasensi anga den pikin?

16 A yeye fu Yehofa poi yeepi i pikin fu taanga en biibi (Galasiyasama 5:22, 23). Ma ai teke ten fu den biibi taanga. Neen meke i mu pasensi anga i pikin, yu á mu weli fu leli en. Wan dda di abi wan boi anga wan meisyo taki: „Mi anga mi uman be e meke ten fu de anga den pikin fu u. Di den be yonkuu, a 15 miniti u be e sutudeli anga den ala dei, boiti komakandaa dei. Tinafeifi miniti á be langa tumisi gi wi anga den.” Wan kelen owluman taki: „Di mi be abi wan sani fu twalufu yali, a omen sani mi á be e kaba fusutan. Mi be e akisi miseefi efu son sani di mi be e leli a be tuu. Mi be e leli somen fu den sani di mi be wani sabi a komakandaa, Osufamii Anbegi efuso te mi be e sutudeli. Neen meke, mma anga dda á mu weli fu leli den pikin fu den.”

Efi i wani leli i pikin bun, i mu lobi a Wowtu fu Gadu (Luku paragraaf 17)

17. Saide mma anga dda biibi mu taanga? Fa wan mma anga wan dda di e tan a Bermuda yeepi den umanpikin fu biibi Yehofa?

17 A tuu, te den pikin fi i si taki yu e biibi Yehofa anga i hii ati, a omen sani den o leli. Den o luku san yu e du. Neen meke i mu meke moiti fi i biibi taanga. Meke den pikin fi i si taki yu anga Yehofa a bun mati. A dati wan mma anga wan dda di e tan a Bermuda be e du. Solanga den be e booko den ede anga wan sani, den be e begi anga den umanpikin fu den. Den be e akisi Yehofa fu a yeepi den fu sabi san den be mu du. Den be e gi den pikin fu den taanga sikin fu den begi tu. Den taki: „U be e taigi a moo gaan umanpikin fu u taki: ’Fitoow Yehofa anga i hii ati. Du san i poi fu holibaka gi a Kownukondee. Ná booko yu ede tumisi.’ Di a si fa sani waka bakaten, a be si kiin taki a Yehofa yeepi u. A sani ya meke ai biibi Gadu anga en hii ati. Ai biibi den sani di Beibel taki tu.”

18. San mma anga dda mu holi a pakisei?

18 Mma anga dda, wi á mu feegete taki wi á poi dwengi u pikin fu biibi Yehofa. Yu e paandi, gi wataa, ma a Yehofa wawan e meke a goo (1 Korentesama 3:6). Du san i poi fu leli den pikin fi i, da i begi Yehofa fu a yeepi den fu den biibi taanga. Yehofa o belesi a taanga wooko di yu e du. Ná feegete a sani de.Efeisesama 6:4.