Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2016

Meke moiti fu Yehofa belesi i

Meke moiti fu Yehofa belesi i

„I feti anga Gadu anga libisama te enke i wini.”GENESESI 32:28.

SINGI: 60, 38

1, 2. Anga san a foluku fu Yehofa e feti?

FANAFU a ten fu Abel te enke a ten ya, neen tesi e miti den sama di e dini Gadu. Pawlesi be taigi den Hebrew Kelesten taki den ’be e holidoo di omen tesi miti den’, fu di den be wani Yehofa belesi den efuso piisii anga den (Hebrewsama 10:32-34). Pawlesi be taki, a moiti di wan Kelesten mu meke na aseefi enke a moiti di den Giikisama be mu meke te den be e sitee lon, sitee suwa efuso feti (Hebrewsama 12:1, 4). Aini a ten ya, u de aini wan sowtu siteelon tu. Wi e meke moiti fu fende teego libi, ma wi abi feyanti di wani puu u pakisei. Den wani u gi abaa, da u ná o fende wini aini a ten di e kon.

2 A moo gaan feyanti fu u, a Saatan anga en goontapu. Anga den tu sani ya wi e feti (Efeisesama 6:12). A de taanga fanowdu fu meke moiti fu wi á biibi den lei di a  goontapu ya e leli sama. U mu luku bun tu fu wi á du sani di á fiti. U mu tan faawe fu sani enke hululibi, somoko, takuu tabaka anga a diingi di sama e diingi duungu. U mu meke moiti fu wi á lasi-ati tu. Boiti den sani ya, u mu feti anga den swakifasi fu u.2 Korentesama 10:3-6; Kolosesama 3:5-9.

3. Fa Gadu e yeepi u fu feti anga den feyanti fu u?

3 Wi o poi wini den taanga feyanti ya? Eeye, ma a ná o makiliki. Pawlesi be taki a de enke wan man di e sitee naki kofu. A taki: „Te mi e naki, mi e maiki bun fu mi á naki winta” (1 Korentesama 9:26). Leti enke fa wan sama e sitee naki kofu, a so u mu feti anga den feyanti fu u. Yehofa e yeepi u fu feti a feti ya. Ai leli u anga a Beibel, den buku fu u, komakandaa, kelen-komakandaa anga den konkelesi. Yu e wooko anga ala den sani di a gi i? Efi i nai wooko anga den, i ná o poi feti anga den feyanti ya. A o de enke yu e naki winta.

4. San u mu du fu ogii á wini u?

4 U mu de na ain ala yuu. Saide? Den feyanti fu u sa feti anga u te u swaki efuso te u nai poti pakisei. Beibel e wasikoi u taki: „Ná meke ogii wini i, ma i mu e du bun namo, da ogii ná o poi wini i” (Romesama 12:21). Efu wi e feti enke fa u poi, wi o wini. Ma efu wi á de na ain, da Saatan, a goontapu fi en anga den swakifasi fu u, o wini u. Neen meke yu á mu gi abaa. Yu á mu booko-saka te da i nai feti moo!1 Peitilisi 5:9.

5. (a) Efu u wani den sani di Yehofa paamisi u, da san u mu holi a pakisei? (b) Fu sama wi o taki?

5 Efu u wani wini, u mu sabi saide wi e feti. A di u wani Yehofa piisii meke wi e feti. Boiti dati, u wani den sani di a paamisi u. Hebrewsama 11:6 e taki: „Wan sama di e dini Gadu mu biibi taki a de tuutuu. A mu biibi tu taki ai pai den sama di e suku en anga den hii ati.” A tekisi taki u mu suku Yehofa anga u hii ati. Dati wani taki efu u wani Yehofa piisii anga u, u mu meke taanga moiti (Toli 15:17). Beibel e kai omen sama di be du a sani ya. Wantu fu den sama ya a Yakopu, Lakeli, Yowsefu anga Pawlesi. Den tesi di be miti den á be makiliki, ma toku den pasa den tesi de. A libi fu den e soi taki efu u meke moiti, Yehofa o belesi u tu. Meke u luku fa u sa du a sani de.

EFI I MEKE MOITI YEHOFA O BELESI I

6. San yeepi Yakopu fu suwa anga a engel? Sowtu wini a fende di a du a sani de? (Luku a fowtow na a bigin.)

6 A omen tesi miti Yakopu, ma a holidoo fu di a be lobi Yehofa. A á be wani du nawan sani di be o meke en anga Yehofa poli. A be e biibi anga en hii ati taki Yehofa be o belesi den bakapikin fi en enke fa a be paamisi (Genesesi 28:3, 4). Di Yakopu be abi beina 100 yali, a suwa anga wan engel fu di a be wani Gadu belesi en. (Leisi Genesesi 32:24-28.) Anga en eigi kaakiti a be suwa anga a taanga engel ya? Nono. Ma a soi taki a be de kabakaba fu du ala san a poi fu fende den sani di Yehofa paamisi en. Yehofa belesi Yakopu fu di a holidoo. A kai Yakopu, Islayeli. A nen ya wani taki „feti efuso sitee anga  Gadu”. Yakopu fende a sani di useefi e suku, a meke Yehofa piisii, neen a belesi en.

7. (a) Sowtu polobelema Lakeli be abi? (b) San Lakeli du? Fa Yehofa belesi en?

7 Lakeli, a uman fu Yakopu di a be moo lobi, be e angii fu si fa Yehofa be o belesi en man tu. Ma wan polobelema be de. Lakeli á be poi meke pikin. Te wan uman á be poi meke pikin na a ten de, a be wan gaan sen sani. Fa Lakeli holidoo winsi fa a sani ya be de enke wan tesi gi en? Noiti a lasi howpu. A be e begi Yehofa ala yuu. Na a sani de yeepi en fu holidoo. Yehofa du san Lakeli begi en, a yeepi en fu a meke pikin. Neen meke Lakeli taki: „Ná pikin feti mi feti anga mi sisa. Ma now mi wini en!” Neen meke a kai a boi Naftali!”Genesesi 30:8, 20-24.

8. San be miti Yowsefu? Saide u sa waka neen baka?

8 Fu di Yakopu anga Lakeli biibi be taanga, meke Yowsefu waka a den baka di tesi be miti en. Di Yowsefu be abi 17 yali en hii libi kengi. Den dyalusu baala fi en seli en enke saafu. Baka dati a tan omen yali a sitaafu-osu a Egepte, winsi fa a á be du ogii (Genesesi 37:23-28; 39:7-9, 20, 21). Ma a á meke den  sani di miti en meke a kon abi takuu manii. A á suku fu du ogii anga den sama di du ogii anga en tu. Saide? A á be wani du sani di be o meke en anga Yehofa poli, bika a be lobi en anga en hii ati (Lefitikesi 19:18; Romesama 12:17-21). Wi o fende wini efu u waka a Yowsefu baka. Winsi sani á be go bun di u be moo nyoni efuso winsi sani nai go bun nownow, tokuso u mu meke moiti fu holidoo, da Yehofa o belesi u. A ná abi misi.Leisi Genesesi 39:21-23.

9. Fa u sa waka a Yakopu, Lakeli anga Yowsefu baka?

9 Aini a ten ya, a omen tesi e miti u tu. Kande sama e kuutu i fu wan sani di yu á du. Kande den e poli i nen efuso e soso i fu di den e dyalusu anga i. Yu á mu meke den sani ya meke i lasi-ati. Pakisei san yeepi Yakopu, Lakeli anga Yowsefu fu tan dini Yehofa anga piisii. Gadu yeepi den, a belesi den tu fu di den be e soi taki den e si en fu wan gaan sani taki den anga en a mati. Den be e meke moiti fu fende den sani di den be e begi Yehofa. Wi e libi aini den kiiboi dei, neen meke u mu biibi den sani di Yehofa paamisi u anga u hii ati. I de seekaseeka fu feti efuso wooko taanga fu meke Yehofa piisii?

DE KABAKABA FU FETI FU YEHOFA BELESI I

10, 11. (a) Saide u mu meke moiti fu Yehofa belesi u? (b) San o yeepi u fu du sani enke fa Yehofa wani?

10 Saide wi abi fu feti son leisi fu Gadu belesi u? A fu di wi a sondu sama. Son yuu wi e fii fu du sani di á bun. Son wan fu u á kaba lobi a peleikiwooko. Taawan siki efuso e fii enke den ná abi mati. Son yuu ai taanga gi son baala anga sisa fu gi taawan paadon. Winsi on langa wi e dini Yehofa, tokuso ala u mu feti anga den sani di e meke a taanga gi u fu dini Gadu, a sama di e pai den sama di holidoo.

Yu e meke moiti fu Yehofa belesi i? (Luku paragraaf 10, 11)

11 A á makiliki gi Kelesten fu libi enke fa Yehofa wani, moomoo te wi e fii fu du sani di á fiti (Yelemiya 17:9). Efu a so yu e fii, begi Yehofa fu a gi yu en santa yeye. Di yu o begi Yehofa en santa yeye, a o gi yu kaakiti fu du sani enke fa a wani, a o belesi i. Meke moiti fu du sani di e soi taki i wani a gi i san yu akisi en. Puubei fu leisi Beibel ala dei, meke ten fu sutudeli anga iseefi, holi a Osufamii Anbegi tu.Leisi Psalm 119:32.

12, 13. San yeepi tu kotoigi fu feti anga den sondu fii fu den?

12 A omen toli de di e soi fa Gadu Wowtu, en yeye anga den buku fu u, yeepi den baala anga sisa fu den á du sani di á bun. Wan yonkuu baala be leisi wan artikel di e soi san u mu du te wi e fii fu du wan sani di á bun. A nen fu a artikel na „Hoe kunnen we verkeerde verlangens weerstaan?” A artikel ya de aini a Ontwaakt! fu 8 december 2003. Sowtu wini a fende? A taki: „Mi e feti fu mi á pakisei sani di á bun. Di mi leisi aini a artikel taki ’a omen baala anga sisa e feti anga den sondu fii fu den winsi fa a taanga’, a yeepi mi fu si taki a ná mi wawan abi a polobelema de. Taa baala anga sisa abi en tu.” A baala  ya fende wini tu fu a artikel „Alternatieve leefstijlen—Keurt God ze goed?” di de aini a Ontwaakt! fu 8 oktober 2003. Di a leisi a artikel, a kon si taki na ala yuu son sama abi fu feti anga son swakifasi leti enke te wan ’maka’ de aini i sikin (2 Korentesama 12:7). Ma winsi fa den abi fu feti ala yuu fu den á sondu, tokuso den sabi taki sani o go bun aini a ten di e kon. A baala ya taki: „Neen meke mi e biibi taki mi poi holidoo. Mi e gi Yehofa daa, taki ai yeepi wi anga en olikanisâsi fu holidoo ibii dei aini a ogii goontapu di wi e libi ya.”

13 Luku san wan sisa fu Ameekankondee taki. A sisa ya sikiifi taki: „Mi e gi u daa, taki ala yuu wi e gi u san wi abi fanowdu. Son yuu mi e fii enke a mi u sikiifi den artikel ya gi. A omen yali kaba mi e feti fu mi á du wan sani di Yehofa buuse. Son yuu, mi e wani gi abaa. Mi sabi taki Yehofa abi tyali-ati. Mi sabi tu taki a lobi gi sama paadon. Ma mi e fii fu du wan sani di a á lobi. San moo ogii, dipi aini mi ati mi á buuse a sani di mi e fii fu du. Neen meke mi e si enke Yehofa ná o wani yeepi mi. A fii ya be e fooseli mi. Di mi leisi a artikel di den e kai ’Yu abi „wan ati di sabi” Yehovah?’ aini A Waktitoren fu 15 maart 2013, mi si taki Yehofa wani yeepi mi tuutuu.”

14. (a) Fa Pawlesi be e si a feti di a be mu feti anga den sondu fi i fi en? (b) San u mu du fu den sondu fii fu wi á basi u?

14 Leisi Romesama 7:21-25. Pawlesi seefi be sabi fa a taanga fu feti anga den sondu fii efuso den swakifasi fu u. Ma a be sabi taki efu a be begi Yehofa a o wini. A be sabi taki a be mu biibi Yehofa anga a dede di Yesesi dede gi u. Fa a de anga wi? Wi o man feti anga den swakifasi fu u? Eeye, ma u mu waka a Pawlesi baka. U mu biibi Yehofa, wi á mu biibi useefi. U mu biibi a paiman di Yesesi pai gi u tu.

15. Fa Yehofa o yeepi u fu pasa den tesi di e miti u?

15 Son yuu Yehofa e luku efu wi e booko wi ede anga wan toli tuutuu. Pakisei a sani ya. San wi o du efu u siki wan gaan siki? San wi o du efu wan famii fu u siki? Efu wi e biibi Yehofa tuutuu, wi o begi en fu a gi wi a kaakiti di wi abi fanowdu fu holidoo. Wi o begi en tu fu a yeepi u fu wi á lasi u piisii (Filipisama 4:13). Den toli di e soi fa Kelesten fu fosi anga den du fu a ten ya holidoo, e soi taki begi sa yeepi u fu holidoo.

MEKE MOITI FU YEHOFA BELESI I

16, 17. San i de seekaseeka fu du?

16 Efi i booko-saka te da i gi abaa Saatan o poolo. Neen meke i mu meke moiti fu du „san bun” (1 Tesalonikasama 5:21). I poi wini Saatan. I poi wini a ogii goontapu fi en anga ala den sondu fii di e fooseli i! Efi i fitoow Gadu anga i hii ati taki a o gi yu a kaakiti di yu abi fanowdu, yu o wini.2 Korentesama 4:7-9; Galasiyasama 6:9.

17 Ná weli fu feti. Ná gi abaa. E meke moiti seefi. A ná abi misi, Yehofa o ’belesi i te enke i nai mankei nawan sani’.Maleyaki 3:10.