Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  september 2016

 A TOLI DI SIKIIFI A FESISE | PE U SA FENDE TOOSUTU?

Pe i sa fende toosutu te sani e miti i?

Pe i sa fende toosutu te sani e miti i?

A omen sani e miti u. Na a bigin u be taki fu wantu polobelema di e miti sama. Ma now wi o taki fu fo fu den polobelema ya. Yu o si fa omen sama fende toosutu di nowtu miti den. Wi o si fa Gadu gi den taanga-sikin.

TE U NÁ ABI WOOKO

Seth * taki: „Na aseefi yuu den puu mi anga mi uman a wooko. Na a moni di den famii fu u be e gi u, anga den pikinpikin wooko di u be e du, yeepi u tu yali langa. A sani ya meke mi uman Priscilla be e booko en ede. Mi be e fii enke mi á be abi fa.”

„San yeepi u? Ala yuu Priscilla be e pakisei san Yesesi taki a Mateyesi 6:34. A be taki, wi á mu booko wi ede anga tamaa, bika tamaa abi en booko-ede. Boiti dati, begi yeepi en fu a á booko en ede tumisi. Mi dati a Psalm 55:22 gi mi taanga-sikin. Leti enke a sama di sikiifi a psalm ya, mi fiingi den lai fu mi gi Yehofa. Nownow mi e wooko, ma toku mi e holi san Yesesi taki a Mateyesi 6:20-22 a pakisei, neen meke u nai libi bigi. Ma san moo pelensipali, a lobi fu u kon moo taanga. Wi anga Gadu toon bun mati tu.”

Jonathan taki: „Di a bodeleifi fu a famii be tapu, mi be e booko mi ede. Bika mi á be sabi fa sani be o waka aini a ten di e kon. Fu di a kondee be abi moni polobelema meke a fu soso u be wooko taanga 20 yali langa. Mi anga mi uman be bigin e kwali fu moni ede. Wi á be poi bai sani anga pinpas bika wi á be abi moni a banku.

„Ma Gadu Wowtu anga en yeye yeepi u fu sabi san u be mu du. Mi be kon fusutan taki mi be mu du ala wooko di mi fende. Boiti dati, wi á be e bai sani di wi á be abi fanowdu moo. Fu di wi a Yehofa Kotoigi, meke den baala anga sisa fu a kemeente yeepi u tu. Den gi u taanga-sikin, den yeepi u aini den taanga ten de.”

TE A TOOW FI I BOOKO

Raquel taki: „Di mi man gwe fika mi, a be ati mi te. Mi ati be boon tu. A sani de be e meke mi e kusumi, mi á be sabi san fu du. Ma di mi anga Gadu toon mati, mi fende taanga-sikin. Mi be e begi Gadu ala dei, a sani de be e meke mi fii bun. Mi e si enke a Gadu yeepi mi fu mi kisi miseefi baka.”

„Ai bigi gi mi taki a gi wi en Wowtu Beibel. Mi á be e booko mi ede moo. Mi e meke moiti fu du san apostel Pawlesi be taki a Romesama 12:21: ’Ná meke ogii wini i, ma e du bun fu wini ogii.’”

„Wan bun mati fu mi yeepi mi fu fusutan saide mi mu fika a sani di miti mi. A soi mi san sikiifi a Peleikiman 3:6 neen a taigi mi taki wan ten de fu ’gi abaa’. A be taanga gi mi fu du san a taki, ma a dati mi be mu du. Nownow mi nai pakisei san be miti mi moo. Mi e du sani di e gi mi piisii.”

Elizabeth taki: „Te i toow booko, yu abi yeepi fanowdu. Wan bun mati fu mi holibaka gi mi di a toow fu mi booko. A kee pina anga mi, a gi mi taanga-sikin, a be soi mi taki a lobi mi. A á be e koti pasi gi mi. Mi e biibi taki a Yehofa meke a sisa ya yeepi mi fu mi kisi miseefi.”

TE I SIKI EFUSO GAANDI

Luis, di u be taki fi en na a fosi artikel, e siki neen ati. A tu leisi a misi fu dede. Nownow ala dei a 16 yuu langa den e poti sani gi en neen nosu fu a boo. A taki: „Mi e begi Yehofa ala yuu. Te mi  kaba begi, mi e fii fa a yeye fi en e gi mi kaakiti. Begi e gi mi kaakiti fu holidoo. Mi e biibi Gadu. Mi sabi taki ai booko en ede anga mi.”

Petra di pasa 80 yali taki: „Mi wani du omen sani, ma mi á poi. Ai hati mi fu si fa mi gusontu e go a baka. Mi nai fii bun, bika a omen deesi mi mu diingi. Mi e pakisei fa Yesesi be e begi en Dda fu a puu wan ibi tesi gi en. Yehofa be gi Yesesi kaakiti, a so a gi mi kaakiti tu. A begi e yeepi mi ala dei. Mi e fii moo bun te mi taki anga Gadu.”Mateyesi 26:39.

A so Julian e fii tu. A 30 yali kaba a siki di den e kai multiple sclerosis e fooseli en. A siki ya e meke sama lan. Julian taki: „Fosi, a dikitoo sutuu mi be e sidon. Ma nownow a lolosutuu mi e sidon. Ma toku mi e piisii fu di mi e yeepi taawan. Te i lobi gi sama sani, i nai pakisei a pina di yu e pina. Yehofa e gi u kaakiti te a de fanowdu, enke fa a paamisi. Leti enke apostel Pawlesi mi sa taki: ’Mi poi du ala sani bika na a sama di e gi kaakiti e yeepi mi.’”Filipisama 4:13.

TE WAN SAMA FI I DEDE

Antonio taki: „Mi á be poi biibi di mi yee taki wagi naki nda kii. A be ati mi te, bika a waka a be e waka neen wagi naki en. Mi á be poi du nawan sani. A 5 dei a didon na ati-osu fosi a dede. Mi á be e kee a mma fesi, mi be e holi miseefi. Ma te mi wawan be de, mi be e bali kee. Mi be e akisi miseefi taki: ’Saide a sani ya pasa? Saide?’

„Den taanga ten de, mi be e begi Yehofa ala yuu fu a yeepi mi fu holi miseefi. Saafisaafi mi be e fii moo bun. Mi membee taki Beibel taki ’ogii ten anga sani di wi á poi si a fesi’ e miti ala u. Gadu á poi lei, neen meke mi e biibi taki mi o si nda di a o weki baka.”Peleikiman 9:11; Yohanisi 11:25; Titesi 1:2.

„A hati u taki a boi fu u dede di a opalani kai, ma wi e pakisei den moin sani di wi anga en be e du.”—Robert

A so Robert di u be taki fi en na a fosi artikel e denki tu. A taki: „Mi anga mi uman Maribel gwenti begi Yehofa, neen meke wi e fii bun enke fa Filipisama 4:6, 7 e taki. A sani ya yeepi u fu taigi den nyunsu man taki wi e biibi taki den sama di dede o weki baka. A hati u taki a boi fu u dede di a opalani kai, ma wi e pakisei den moin sani di wi anga en be e du. Wi e puubei fu pakisei den moin ten de.

„Den Kotoigi baala anga sisa fu u taigi u taki den si taki u be holi useefi di u be e taki fu a biibi fu wi a tv. U taigi den taki a di den begi gi u meke u be man du a sani de. Den bosikopu di den sende gi u, meke u si taki Yehofa be e holibaka gi u.”

Den toli ya e soi taki Gadu e toosutu sama winsi sowtu tesi efuso polobelema e miti den. Fa a de anga yu? Winsi sowtu polobelema yu abi, i poi fende toosutu. * Neen meke i mu suku yeepi a Yehofa. Neen na a „Gadu di e toosutu u te u de aini banowtu”.2 Korentesama 1:3.

^ paragraaf 5 Den kengi son nen aini a artikel ya.

^ paragraaf 23 Efi i wani toon Gadu mati efuso efi i wani a yeepi i anga den polobelema fi i, da gaantangi taki anga wan Yehofa Kotoigi na a pisi pe yu e tan efuso sikiifi biifi gi a beikantoo di moo koosube gi i.