Skip to content

Skip to table of contents

 A TOLI DI SIKIIFI A FESISE | SAN NA A MOO BUN KADO DI DE?

„Na a moo moin kado di wan sama gi mi”

„Na a moo moin kado di wan sama gi mi”

A dati wan meisyo fu 13 yali taki di den gi en wan dagu. Wan uman di abi wan bodeleifi taki, a computer di en dda gi en di a be e go a sikoo, kengi en libi. Wan man di toow nyunyun taki, a kaita di en uman be meke gi en di den toow 1 yali, na a moo moin kado di wan sama gi en.

Son yuu fu a yali sama e du ala san den poi fu gi den famii efuso mati wan „moin” kado. A omen fu den sama di e gi taawan kado wani a sama taigi en taki disi na a moo bun kado di wan sama gi en. Fa a de anga yu? I wani gi sama kado di o meke den fii bun? I wani sama gi i den sowtu kado ya tu?

A bun fu sidon denki a sani ya, bika ai switi gi sama te taawan e gi den kado. Anga ala, a sama seefi di gi a taawan a kado e fii bun. Neen meke Beibel taki: „Wan sama di e gi taawan sani o fii moo koloku moo enke te taawan e gi en sani” (Toli 20:35). Efu a sama lobi a kado di i gi en, a o moo piisii.

San o yeepi i anga a sama di i wani gi wan kado fu fii bun? Meke u taki yu á poi gi a sama wan dii sani, san i sa du fu meke a sama lobi a kado di yu o gi en?