Skip to content

Skip to table of contents

Wi á be meke fu e dede

Wi á be meke fu e dede

ALA SAMA wani libi langa, u wani piisii fu a libi tu. Pakisei fa a be o de efu u be poi libi fu teego sondee booko-ede anga siki. U be o abi moo ten fu de makandaa anga den sama di u lobi, fu koi anga fu leli nyun sani.

Saide u wani libi fu teego? Beibel taki Gadu poti a fii fu libi fu teego aini libisama (Peleikiman 3:11). Beibel e soi tu taki „Gadu a lobi” (1 Yohanisi 4:8). I si enke wan Gadu di lobi sama be o meke wi anga a fii fu libi fu teego, efu a be sabi taki wi á be o poi libi fu teego?

Nawan sama wani dede. Beibel taki dede a u „feyanti” (1 Korentesama 15:26). Son sama a yonkuuyonkuu den e dede, taawan e libi gaandi. Ma winsi fa, ala wi o dede wan dei. Son sama e feele te den e pakisei taki den o dede wan dei. Wan ten o kon pe dede ná o de moo?

DEN SANI DI E SOI TAKI U BE MEKE FU LIBI FU TEEGO

Kande yu o foondoo fu sabi taki Gadu á be meke libisama fu e dede. A Beibel buku Genesesi e soi taki Gadu be wani ala libisama libi fu teego a goontapu. Di Gadu meke goontapu, a poti ala sani aini di wi abi fanowdu fu libi fu teego. Baka dati a meke a fosi man Adan, neen a poti en aini wan paladeisi aini a dyali Eden. Baka dati, „Gadu si taki ala den sani di a be meke be bun”.​—Genesesi 1:26, 31.

 Adan á be abi nawan fowtu di Gadu meke en (Deitolonomi 32:4). Efa, a uman di Gadu be meke gi Adan a be wan moin uman. Enseefi á be abi nawan fowtu. Yehofa be taigi den taki: „U meke pikin fuu a goontapu da u de basi fi en. U basi den fisi fu a se, den meti di e fee a tapu, anga ala den meti di e waka a doti.”​—Genesesi 1:28.

A be o teke ten fosi a goontapu be o man fuu anga den bakapikin fu Adan anga Efa. Bika di Efa be o meke pikin, da den pikin fi en be o meke pikin tu te enke a hii goontapu fuu (Yesaya 45:18). I si enke Yehofa be o paamisi Adan anga Efa a sani ya, efu a be sabi taki den á be o libi langa fu si ala den bakapikin fu den di be o fuu a goontapu?

Pakisei a wooko di Gadu be gi Adan fu basi ala den meti. A be mu gi ala den meti nen tu. A sani ya be o teke ten (Genesesi 2:19). Fu be man basi den meti, Adan be o abi fu leli sabi den bun fosi. A sani ya be o teke moo ten enke fu gi den nen namo.

Fu man du den sani di Gadu be taigi den fu du, Adan anga Efa be mu libi langa. Fu taki en kiin, Adan libi langa moo san wi e libi aini a ten ya.

GADU WANI LIBISAMA LIBI FU TEEGO AINI WAN PALADEISI A GOONTAPU

DEN SAMA FU FOSI BE E LIBI LANGA

Adan, 930 yali

Metusala, 969 yali

Nowa, 950 yali

Aini a ten ya, 70-80 yali

Beibel e soi taki den sama fu fositen be e libi langa moo den sama fu a ten ya. A taki: „Ala anga ala Adan libi 930 yali.” Baka dati a taki fu ete sigisi man di be libi moo enke 900 yali. Den man ya a be Set, Enos, Keinan, Yered, Metusala, anga Nowa. Ala den man ya be e libi na a ten fosi a Fuudu. Nowa be libi 600 yali fosi a Fuudu (Genesesi 5:5-27; 7:6; 9:29). Fa den man ya be e du libi langa so?

Den man di u kai a tapu ya be e libi koosube fu a ten di libisama á be abi sondu. Kande na a sani ya meke den be e libi langa so. Ma saide a te u ná abi sondu fosi wi o poi libi langa? San o yeepi u fu wi á dede moo? Fu fende a piki fu den akisi ya, u mu sabi fosi saide wi e gaandi da wi e dede.