Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen  |  No. 2 2017

A de fanowdu fu taki kiin a fesi anga a sama

Te wan sama di i lobi siki tokotoko

Te wan sama di i lobi siki tokotoko

DOREEN dyombo di a yee taki en man Wesley abi kanker neen ede. Wesley be abi 54 yali di dataa taigi den a sani ya. * Dataa piki den taki a wantu mun namo Wesley o libi. Doreen taki: „Mi á be poi biibi a sani ya. A omen wiki mi á fusutan miseefi. Mi á be e biibi taki a wi a sani ya miti. Noiti mi be denki a sani ya o miti u.”

A tyali taki a ná Doreen wawan a sani ya e miti. Iniiwan sama sa kisi wan siki di á poi betee. A omen sama e solugu den lobiwan fu den di abi wan siki di dataa á poi deesi. Wi e gafa ala den sama ya, bika a á makiliki fu solugu wan sama di siki tokotoko. Fa osufamii sa yeepi den sama ya? San o yeepi den sama di e solugu den sowtu sama ya te sani e moo den? San e pasa te a sama de fu dede? Meke u luku fosi saide a á makiliki fu solugu wan sama di siki tokotoko.

DEN POLOBELEMA FU A TEN YA

Aini a ten ya sani e waka taa fasi fu di dataa fende deesi gi son siki. Wan sani fu wan ondoo yali pasa, sama á be e libi langa so winsi den be e tan aini den gudu kondee. Sama be e dede gawgaw te den be siki efuso te den be kisi mankei. Ati-osu á be ipi tu. Te wan sama be siki, neen famii be e luku en. Neen meke a osu sama be e dede tu.

Aini a ten ya dataa fende deesi di e yeepi sama pikinso te den abi son siki. Neen meke den sama di abi den siki ya, nai dede gaw so moo. Fosi, te sama be abi son siki, den á be e libi langa. Ma nownow den e libi omen yali anga den siki ya. Winsi sama e libi moo langa te den abi son siki, dati á wani taki a betee den betee. Son leisi a siki e pina a sama te, da a á poi yeepi enseefi. Boiti dati a á makiliki fu solugu wan sama di abi wan siki di ná abi deesi.

 Nownow sama nai dede a osu moo enke fosi. Den e dede na ati-osu. A omen sama fu a ten ya á si fa sama e dede. A wantu sama namo si a sani ya. Fu di den á sabi fa sani e waka te wan sama e dede, meke den e feele fu solugu den famii di siki tokotoko. San sa yeepi den sama ya?

SEEKA A FESI

Leti enke fa a toli fu Doreen e soi, a omen sama e buuya te wan sama di den lobi abi wan siki di ná abi deesi. San o yeepi i fu de seekaseeka, winsi yu e booko-ede, winsi yu e feele efuso kusumi? Wan sama di be e dini Gadu a fositen be begi taki: „Soi u fa u mu teli u dei, fu u sa koni” (Psalm 90:12). Begi Yehofa anga i hii ati fu a soi i fa i sa pasa den lasiti dei anga a sama fi i a wan bun fasi.

A sani ya wani taki i mu seeka sani bun a fesi. Efu a sama poi taki, efu a wani taki a toli ya anga i, a be o bun fu akisi en sama a wani taki gi en te a á poi taki moo. U mu akisi a sama bun san a wani u du, te a á poi boo bun moo. Akisi en efu a wani u tyai en go na ati-osu efuso du taa sani fu yeepi en. A sani ya o meke sani waka enke fa a siki sama wani. Boiti dati a famii fu a sama di siki ná o abi kosensi fonfon bakaten te den du son sani gi en. Beibel taki: „Te sama nai taki kiin anga denseefi, ala sani e buuya.”​—Odo 15:22.

FA I SA YEEPI A SAMA

Wan fasi fa i sa yeepi wan siki sama di de fu dede, a te yu e gi en taanga-sikin. U mu soi a sama taki u lobi en. U mu soi en tu taki wi e booko wi ede anga en. Fa u sa du a sani ya? Leisi efuso singi gi en. Suku buku anga singi di o meke a fii bun. A omen sama e fii bun te den famii e holi den ana, da den e taki switi anga den.

Son leisi a bun fu kai i nen gi a sama te i go luku en. Wan buku taki: „Gaanse leisi winsi a sama á man taki, si, fii, sumee efuso tesi sani moo, tokuso a poi yee ete. Winsi a gei enke ai siibi, toku noiti i mu taki sani koosube fi en di yu á wani a yee.”

Begi anga a sama son langa i fende a okasi. Beibel taki wan leisi wan gaan tesi be miti apostel Pawlesi anga den Kelesten di be e wooko anga en. Den á be sabi efu den be o tan a libi. San den akisi den taa Kelesten fu du gi den?  Pawlesi taigi den mati fi en taki: „Wan fasi fa u sa yeepi u tu, a te wi e begi gi u fayafaya” (2 Korentesama 1:8-11). A de taanga fanowdu fu begi anga u hii ati gi den sama di abi booko-ede efuso di siki wan gaan siki.

SI SANI ENKE FA DEN DE TUUTUU

Te u fusutan taki wan sama di u lobi e dede, ai du wi ogii tuutuu. Fu di Gadu á be meke u fu wi e dede, meke noiti wi o gwenti a sani ya. Noiti wi o si dede enke wan kowownu sani (Romesama 5:12). Gadu Wowtu e kai dede wan feyanti (1 Korentesama 15:26). Neen meke sama nai wani pakisei taki wan sama fu den sa dede. A so ala libisama de.

Ma efu den famii e pakisei a fesi san sa pasa te wan sama de fu dede, da a sani de o yeepi den fu den á feele tumisi te den sani ya e pasa. A o yeepi den tu fu man seeka sani bun, sondee fu buuya. Son sani di u mu du sikiifi aini a faki „ Den lasiti wiki fosi wan sama dede”. A ná ala den sani di sikiifi aini a faki ya e pasa te wan sama e dede. Kande a ná baka makandaa enke fa a sikiifi aini a faki a o pasa tu. Ma a omen sama son wan fu den sani ya miti fosi den dede.

Te a sama di i lobi dede, a be o bun fu piki wan mati fi i, di be piki yu a fesi taki a o yeepi i. Son leisi a de fanowdu fu soi den famii anga den sama di be e solugu a siki sama, taki a nai pina moo. A Gadu di meke u taigi u taki „dedesama á sabi nawan sani”.​—Peleikiman 9:5

A MOO BUN SAMA DI E SOLUGU DEN SIKI SAMA

Te wan sama wani yeepi u, wi á mu taki nono

A de taanga fanowdu fu poti ala sani aini Gadu ana te wan famii fi i abi wan siki di ná o betee. Boiti dati te wi e kusumi te a famii fu u dede, u mu meke Gadu yeepi u tu. A poi meke taawan taki sani efuso du sani fu gi u taanga-sikin. Doreen taki: „Mi leli taki te wan sama wani yeepi mi, mi á mu taki nono. Ná pikin yeepi taawan yeepi u di a sani ya miti u. Mi anga mi man be e fii enke a Yehofa be e taigi u taki: ’Mi ná o gwe fika u, mi o yeepi u.’ Mi de anga u.”

Yehofa Gadu na a moo bun sama di poi solugu wan siki sama. A sabi fa wi e fii, bika neen meke u. A de kabakaba fu gi wi a yeepi di wi abi fanowdu fu wi á gi abaa. A paamisi u taki dyonson a o puu dede gi u. Boiti dati a o meke miliyunmiliyun sama di dede wiki baka (Yohanisi 5:28, 29; Openbaring 21:3, 4). Te a ten de doo, ala u o taki aseefi sani di apostel Pawlesi be taki: „Dede yu á poi wini moo. Dede, pe i maka de?”​—1 Korentesama 15:55.

^ paragraaf 2 Son wan fu den nen aini a artikel ya kengi.