Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen  |  No. 2 2017

A Tetragramaton, na a nen fu Yehofa Gadu di sikiifi anga Hebrew letter. I mu leisi en fu baka go a fesi

A moo pikin letter fu a Hebrewtongo e taanga u biibi

A moo pikin letter fu a Hebrewtongo e taanga u biibi

U sa biibi taki ala den sani di Gadu paamisi o kon tuu? Yesesi be e biibi a sani ya, neen meke den sani di a be e leli sama be e taanga den biibi. Pakisei a ageisitoli di a gi di a be e leli sama a wan mongo. A sani ya sikiifi a Mateyesi 5:18. Yesesi taigi den sama taki: „Fu tuutuu mi e taigi u, taki winsi hemel anga goontapu á be o de moo, tokuso a moo pikin pisi fu a Weiti o kon tuu namo.”

A moo pikin letter fu a Hebrewtongo a י (yot). Anga a letter ya a nen fu Yehofa * Gadu e bigin aini Hebrewtongo. Den leliman fu a Dyu weiti anga den Faliseiman, be e si ala den letter fu a Weiti fu Gadu enke wan santa sani.

Yesesi be taki winsi hemel anga goontapu á de moo, tokuso a moo pikin pisi fu a Weiti o kon tuu. Ma Beibel e soi taki hemel anga a goontapu o de fu teego (Psalm 78:69). Yesesi be wani soi taki ala den sani di sikiifi aini a Weiti, te doo a moo pikinwan o kon tuu.

Yehofa Gadu e booko en ede anga den moo pikin pisi fu a Weiti? Eeye. Pakisei a sani ya: Gadu be taigi den Islayelisama fu fositen taki den á be mu booko den bon fu a sikapu di den be e nyan na a Paskafesa (Ekisodesi 12:46). A sani ya be e gei wan pikin sani. Den be sabi saide den á be mu du a sani ya? A gei enke den á be sabi. Ma Yehofa Gadu be sabi taki a sani ya a be wan polofeititoli di be e soi taki den á be o booko nawan fu den bon fu a Mesiyas, di den be o kii en na a ponsu.​—Psalm 34:20; Yohanisi 19:31-33, 36.

San a sani di Yesesi taki e leli u? Useefi sa biibi taki ala den sani di Yehofa Gadu paamisi o kon tuu. Te doo den moo pikinwan. A moo pikin letter fu a Hebrewtongo e taanga u biibi tuutuu.

^ paragraaf 3 A moo pikin letter fu a Giikitongo a iota. A letter ya anga a Hebrew wan י (yod) e sikiifi aseefi fasi beina. A Weiti fu Mosesi be sikiifi aini Hebrewtongo. Neen meke a gei enke di Yesesi taki a moo pikin pisi fu a Weiti o kon tuu, na a moo pikin Hebrew letter a be e taki.