Skip to content

Skip to table of contents

Te i man efuso yu uman waka gi i

Te i man efuso yu uman waka gi i

„Mi be wani dede di mi man taigi mi taki a o fika mi, fu wan moo yonkuu uman ede. A du mi ogii te, moomoo te mi be e pakisei san mi du gi en.”​—Maria, Sipaniyookondee.

„Di mi uman gwe fika mi wanboowanboo, mi be e fii enke wan pisi fu mi be dede. Ala den sani di u be abi a pakisei fu du, buuya. Son dei mi be e si enke mi á be e booko mi ede moo, da bakaten mi be e bigin kusumi baka.”​—Bill, Sipaniyookondee.

TE I man efuso yu uman waka gi i, a wan hati sani. A tuu taki son sama gi den toowpaa paadon di a soi taki a sani di a du hati en, neen den meke moiti fu taanga den toowlibi baka. * Ma winsi a toow á booko, tokuso te wan toowpaa kon sabi taki en man efuso uman waka gi en, ai hati en tuutuu. Fa i sa fende toosutu efu a sani ya miti i?

WANTU BEIBELTEKISI DI SA YEEPI I

A omen man anga uman fende toosutu aini Beibel di den toowpaa waka gi den. Den kon fusutan taki Gadu e si san e miti den. Ai fii gi den tu.​—Maleyaki 2:13-16.

„Te sani be e moo mi, a yu be e toosutu mi fu mi sa piisii baka.”​Psalm 94:19.

Bill taki: „Te mi e leisi a tekisi ya mi e fii enke Yehofa e toosutu mi, enke fa wan dda e toosutu en pikin fu di ai booko en ede anga en.”

„Te wan sama e du sani enke fa i wani, i nai fika a sama de.”​Psalm 18:25.

Carmen man waka gi en omen mun. A taki: „Mi man be e waka gi mi, ma mi be sabi taki Yehofa á be gwe fika mi. Noiti a o du wan hati sani anga mi.”

„Wi á mu booko wi ede anga nawan sani, ma taigi Gadu ala sani te wi e begi . . . Begi en fayafaya. Da a freide fu Gadu di libisama á poi fusutan o kibii wi ati anga u fusutan.”​Filipisama 4:6, 7.

Sasha taki: „A omen leisi mi e leisi a tekisi ya go kon. Mi be e begi naamo, neen Gadu yeepi mi fu mi á booko mi ede tumisi moo.”

Ala den sama di taki den sani a tapu ya, be e wani gi abaa son leisi. Ma den be e fitoow Yehofa. Den sutudeli a Wowtu fi en tu. Na a sani de toosutu den. Bill taki: „Na a biibi fu mi yeepi mi fu holidoo di mi be e fii enke mi hii libi buuya. Winsi fa mi be e fii enke mi e waka aini ’dunguu’ wan hii pisiten, tokuso Gadu á be fika mi.”​—Psalm 23:4.

^ paragraaf 4 Efi i wani sabi on ten i sa gi i toowpaa paadon te a waka gi i, da leisi a artikel di den e kai „Als een huwelijkspartner ontrouw is” aini a Ontwaakt! fu 22 april 1999.