Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen  |  No. 1 2017

 A TOLI DI SIKIIFI A FESISE | YU E SI A KADO DI GADU GI LIBISAMA ENKE WAN GAAN SANI?

Fa i mu si a gaan bun di Gadu du gi i?

Fa i mu si a gaan bun di Gadu du gi i?

„A lobi di Kelestesi lobi u, e bigi gi u . . . A dede gi ala sama fu den sama di de a libi, á libi fu denseefi moo, ma den mu libi gi a sama di dede gi den.”2 Korentesama 5:14, 15.

TE WAN sama gi i wan sani di yu á be denki, da a bun fu gi en daa. Na a sani de Yesesi be meke sama fusutan di a be deesi den tin man di be abi wan takuu siki di dataa á be poi deesi. Wan fu den tin man „daai kon baka, neen a bali taanga gi Gadu daa”. Yesesi taki: „A ná tin man kon kiin noh? Neen pe den taa neigin de?” (Lukasi 17:12-17) A sani ya e leli u taki a gawgaw wan sama sa feegete den bun di taawan du gi en.

A dede di Yesesi dede gi u, na a moo gaan kado di wan sama be sa gi u. San u mu du fu soi taki a wan gaan sani Gadu du gi u?

  • Leli sabi a sama di gi yu a kado ya. Yesesi dede gi u. Ma dati á wani taki ala libisama o fende teego libi. Neen meke Yesesi be taigi Gadu aini wan begi taki: „Efu wan sama wani libi fu teego, da a mu sabi yu, a tuutuu Gadu, anga Yesesi Kelestesi, a sama di i sende kon a goontapu” (Yohanisi 17:3). Efu wan sama taigi i taki di i be yonkuu, pikin moo i be dede. Ma a wan man yeepi i. Yu á be o wani sabi a man de noh? Yu á be o wani sabi saide a yeepi i noh? Yehofa Gadu pai a paiman fu fii wi fu wi á dede moo. A wani i sabi en. A wani yu anga en toon mati. Beibel taki: „Kon  koosube a Gadu, da enseefi o kon koosube a yu.”Yakowbesi 4:8.

  • Soi taki yu e biibi taki a dede fu Yesesi o tyai wini gi i. „A sama di e biibi a manpikin fu Gadu, o libi fu teego” (Yohanisi 3:36). Fa wan sama e soi taki ai biibi? A den sani di ai du. Neen meke a den sani di wan sama e du e soi efu ai biibi taki a dede fu Yesesi o tyai wini gi en (Yakowbesi 2:17). San u mu du? Te wan sama langa wan kado gi i, a te i langa ana teke en fosi da a toon fi i. A leti so u mu meke moiti fu fende wini fu a dede di Yesesi dede gi u. San na a moiti di u mu meke? Meke moiti fu sabi fa Gadu wani i libi, da i libi enke fa a wani. * Begi Gadu fu a gi i paadon. Begi en fu a yeepi i fu abi wan kiin kosensi tu. Te yu e begi Gadu, i mu biibi taki a dede fu Yesesi o meke u man libi aini freide aini a ten di e kon. Wi o abi wan bun libi tu!Hebrewsama 11:1.

  • Membee a dede fu Yesesi. Yesesi taki u mu membee a dede fi en ala yali. A sani ya o yeepi u fu wi á feegete a gaan bun di Yehofa du gi u. Yesesi be taki: „U mu e du a sani ya fu membee mi” (Lukasi 22:19). Yehofa Kotoigi o membee a dede fu Yesesi a tudewooko 11 april 2017 baka te a san dongo. Wan lezing o holi di o soi saide a be de fanowdu fu Yesesi dede. A o soi tu san a den wini di wi e fende nownow fu di Yesesi dede gi u anga sowtu wini wi o fende aini a ten di e kon. A komakandaa ya o holi wan yuu namo. A yali di pasa a 20 miliyun sama a hii goontapu be membee a dede fu Yesesi. Anga ala piisii wi e kai yu fu kon membee a dede fu Yesesi anga u, bika a wan gaan bun Gadu du gi u.

^ paragraaf 7 A moo bun fasi fu leli sabi Gadu fu man toon en mati, a te wi e sutudeli Beibel, a Wowtu fu Gadu. Akisi den Yehofa Kotoigi fu soi i fa den e sutudeli Beibel anga sama. I sa go na a website fu u, www.jw.org/djk tu