Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen  |  No. 1 2017

 A TOLI DI SIKIIFI A FESISE | YU E SI A KADO DI GADU GI LIBISAMA ENKE WAN GAAN SANI?

Wan kado di bun moo ala taawan

Wan kado di bun moo ala taawan

A SANI fu saapu sikiifitiki di de aini Jordan ana a ná wan kofaliki sani. A meke enke wan boto. Jordan lobi a sani ya moo ala den taa sani di a abi. A taki: „A wan mati fu u di den e kai Russell be gi mi a kado ya di mi be yonkuu. A be lobi kon a den sama fu mi.” Di Russel dede, neen Jordan kon fusutan taki a man ya be e yeepi en gaandda, en mma anga en dda te den be de a nowtu. Jordan taki: „Di mi kon fusutan san Russel du, neen mi moo lobi a kado ya.”

A toli fu Jordan e soi taki wan sama di fende wan kado sa si en fu wan gaan sani, winsi taa sama e si en enke wan kowownu sani. Beibel e taki fu wan kado di bun moo ala taawan. Yohanisi 3:16 taki: „Gadu be lobi goontapu te, neen ede meke a sende a wan kodo Manpikin fi en kon, fu meke den sama di e biibi aini en, á mu dede, ma den mu fende a libi fu teego.”

A kado ya sa meke u fende teego libi. Moo so gaan kado á de. Son sama nai si a sani ya fu wan gaan sani, ma tuu Kelesten e teke en fu ’bigi’ (Psalm 49:8; 1 Peitilisi 1:18, 19). Ma saide Gadu be sende en manpikin kon a goontapu fu dede gi u?

Den sani di apostel Pawlesi taki e soi u saide. A be taki: „Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu” (Romesama 5:12).  A fosi man di den e kai Adan sondu di a ná aliki Gadu, neen meke a dede. Na a sani de meke ala libisama e dede, bika ala den na Adan bakapikin.

„A paiman fu sondu a dede. Ma Gadu koboloiki Kelestesi Yesesi fu gi u teego libi enke kado” (Romesama 6:23). Gadu sende en manpikin Yesesi kon a goontapu fu dede gi u fu fii wi fu sondu anga dede. Den sama di e biibi taki a dede fu Yesesi o tyai wini gi den o fende teego libi.Romesama 3:24.

Pawlesi be sabi taki a omen belesi wi o fende fu di Yesesi dede gi u. Neen meke a be taki: „U mu gi Gadu daa, bika a du u wan gaan bun” (2 Korentesama 9:15). Noiti wi o kaba fusutan a gaan bun di Gadu du gi u. A omen kado Gadu gi u. Ma saide a dede di Yesesi dede gi u na a moo gaan kado di a gi u? Saide a á de enke den taa kado? * Fa u mu soi taki a sani di Gadu du ya e bigi gi u? Wi e gi i taanga-sikin fu leisi den tu artikel di e kon, bika den e soi san Beibel e taki fu den akisi ya.

^ paragraaf 8 Yesesi „dede fu wi ede” fu fii wi. Nawan sama be dwengi en (1 Yohanisi 3:16). Ma a Gadu be wani Yesesi kon dede gi u. Neen meke den tu artikel di e kon o soi san Gadu du fu meke Yesesi kon dede gi u.