Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuni 2016

A mu e bigi gi i taki Yehofa e seeka i enke fa wan sama e seeka tokotoko fu meke patu

A mu e bigi gi i taki Yehofa e seeka i enke fa wan sama e seeka tokotoko fu meke patu

„Yehofa, . . . a yu na a sama di e seeka u enke wan sama di e meke doti patu. A yu meke ala u.”YESAYA 64:8.

SINGI: 89, 26

1. Saide nawan libisama di e meke doti patu poi doo Yehofa?

AINI november 2010, den seli wan Sineisi paapi wan sani fu 70 miliyun dala aini Ingiisikondee. A wan foondoo sani taki wan sama e teke wan lawlaw sani enke tokotoko, da ai meke en toon wan gaan moin sani, di dii te ná sipowtu. Na a sani de Yehofa e du tu. Ma nawan libisama a goontapu di e meke doti patu poi doo Yehofa. Beibel taki Yehofa „teke doti” efuso tokotoko, neen a meke wan man di á be abi fowtu (Genesesi 2:7). A man ya a Adan. Beibel e kai en wan „manpikin fu Gadu”. Gadu be meke en anga denseefi manii fi en.Lukasi 3:38.

2, 3. San o yeepi u fu de enke den Islayelisama di be soi taki ai hati den taki den á be tyai denseefi bun?

 2 Di Adan taanga yesi a sama di meke en, a á be abi a gaandi fu de Gadu manpikin moo. Ma a omen bakapikin fi en wani Yehofa enke den tiiman (Hebrewsama 12:1). Fu di den e saka denseefi na a Gadu di meke den ondoo, meke den e soi taki den á wani Saatan enke Dda, ma den wani Yehofa enke den Dda. Den wani a seeka den fu toon moo bun sama (Yohanisi 8:44). A fasi fa den e dini Yehofa anga den hii ati, e meke u denki a sani di den Islayelisama be taki baka di den be soi taki ai hati den taki den á be tyai denseefi bun. Den be taki: „Yehofa, a yu a u Dda. Wi na a tokotoko. A yu na a sama di e seeka u enke wan sama di e meke doti patu. A yu meke ala u.”Yesaya 64:8.

3 Aini a ten ya den sama di e dini Yehofa e du ala san den man fu abi sakafasi. Den e du ala san den man tu fu du san Yehofa taki. Den e teke en fu bigi taki den poi kai Yehofa den Dda. Den e piisii taki ai seeka den enke fa wan sama e seeka tokotoko fu meke patu. Yu o de enke safu tokotoko te Yehofa e seeka i fu toon wan moin patu? Wi e si fa Yehofa e seeka ibiiwan fu den baala anga sisa fu u? Aini a artikel ya wi o luku sama Yehofa e seeka. Wi o luku saide ai seeka den anga fa ai seeka den. Den toli ya o yeepi u fu abi den manii di de fanowdu.

SAMA YEHOFA E SEEKA?

4. San Yehofa e luku fosi a hali wan sama kon neen? Fa a be du a sani de aini a ten di pasa?

4 A fasi fa wi e si wan sama, a ná so Yehofa e si en. Ma ai ondoosuku a sama ati, da ai si fa a sama de tuutuu. (Leisi 1 Samuweli 16:7b.) Di Yehofa be sete a Kelesten kemeente, a be soi taki ai luku fa wan sama ati de. A be hali wantu sama di taawan be e si enke wisiwasiman kon neen anga en manpikin (Yohanisi 6:44). Wan fu den sama ya na a Faliseiman di den be e kai Sawlesi. A man ya a be „wan sama di be e taki ogii fu Gadu, di be e du ogii anga taawan anga di á be e sen” (1 Timotiyesi 1:13). Ma Yehofa be e si Sawlesi ati, a á be e si Sawlesi enke tokotoko di ná abi nawan wini (Odo 17:3). Ma a be si taki Sawlesi be poi toon wan sama di e peleiki gi den „taa nasi, den kownu, anga den Islayelisama” (Toli 9:15). Yehofa seeka taa sama tu fu du pelensipali wooko gi en. Son wan fu den sama ya a be sopiman, sama di á be e tyai denseefi bun na a se fu man anga uman libi, anga fufuuman (Romesama 9:21; 1 Korentesama 6:9-11). Den sama ya biibi kon taanga di  den ondoosuku a Beibel. Den meke Yehofa seeka den tu fu libi enke fa a wani.

A ná wi mu kuutu den sama fu a kemeente efuso den sama di wi e leli

5, 6. Te wi e si Yehofa enke a sama di e seeka u, da (a) fa wi o si den sama di wi e go leli? (b) fa wi o si u baala anga sisa?

5 Ala den sama di Yehofa e hali kon neen, a sama di ati bun. Neen meke wi á mu kuutu den sama di wi e miti aini a peleikiwooko efuso den sama aini a kemeente. Luku a ondoofenitoli fu wan man den e kai Michael. A taki: „Te den Kotoigi be e kon a mi osu, da mi be e daai fesi gi den. Mi be e du enke mi á si den. Mi be goofu! Ma bakaten mi miti wan osufamii di be e tyai denseefi bun. A fasi fa den be e tyai denseefi be meke mi lobi den. Mi dyombo di mi yee taki den sama ya a Yehofa Kotoigi. A fasi fa a osufamii ya be e tyai denseefi be meke mi go ondoosuku saide mi á lobi den Kotoigi. Mi kon si taki a di mi á be sabi den, anga fu di mi be e biibi den sani di sama e taki, meke mi be e buuse den Kotoigi.” Michael be wani sabi den Kotoigi moo bun. Neen meke a bigin sutudeli a Beibel. Baka wan pisiten neen a dopu. Nownow ai du a fuuten diniwooko.

6 A Yehofa e seeka u, enke fa wan sama e seeka tokotoko fu meke patu. Efu u holi a sani ya a pakisei, da wi o si u baala anga u sisa taa fasi. Wi o si den enke fa Yehofa e si den. Wi o si den enke sama di Yehofa e seeka ete. A sabi taki den poi toon moo bun sama efu a seeka den (Psalm 130:3). U sa de enke Yehofa te wi e si u baala anga u sisa enke fa ai si den. U sa wooko makandii anga Yehofa tu fu yeepi u baala anga u sisa fu den go a fesi (1 Tesalonikasama 5:14, 15). Den owluman fu a kemeente mu teke fesi fu du a sani ya.Efeisesama 4:8, 11-13.

SAIDE YEHOFA E SEEKA U?

7. Saide u mu teke en fu bigi te Yehofa e kaasi u?

7 Kande son sama e taki: ’Di mi be nyoni mi á be lobi te mi mma anga nda be e kaasi mi. A di mi meke pikin fosi neen mi fusutan saide den be e kaasi mi.’ Te wi e kon moo bigi, da wi e fusutan taki a di a sama lobi u, meke ai kaasi u. (Leisi Hebrewsama 12:5, 6, 11.) A di Yehofa lobi u enke en pikin, meke ai kaasi u. Ai seeka u enke fa wan sama e seeka tokotoko fosi a meke wan patu. A wani u toon koni sama, sama di de koloku. A wani u lobi en tu enke u Dda (Odo 23:15). A á wani u pina, efuso dede fu di wi á wani kengi.Efeisesama 2:2, 3.

Yehofa lobi wi enke en pikin, neen meke ai teke en ten seeka u

8, 9. Fa Yehofa e leli u aini a ten ya? Fa a o leli u aini a ten di e kon?

8 Di wi á be sabi Yehofa, u be abi wantu manii di a á lobi. Ma di u kon  sabi en, neen a seeka u. A yeepi u fu kengi. Na a sani de meke nownow wi abi bun manii (Yesaya 11:6-8; Kolosesama 3:9, 10). Nownow u de aini wan sowtu paladeisi di Yehofa e koboloiki fu seeka u fu toon moo bun sama. Neen meke winsi fa a goontapu ogii, u nai feele efuso booko wi ede. Kande son wan fu u kiya aini wan osufamii pe lobi á be de. Ma nownow wi abi baala anga sisa di lobi u (Yohanisi 13:35). U leli taki u mu lobi taawan. Ma a moo pelensipali sani, na a sabi di u kon sabi Yehofa, anga a fii di wi e fii taki a lobi u.Yakowbesi 4:8.

9 Aini a nyun goontapu wi o fende moo wini fu a paladeisi di u de aini nownow. Boiti dati wi o libi aini a tuutuu paladeisi di Gadu Kownukondee o tii. Aini a ten de seefi Yehofa o yeepi u fu toon moo bun sama. Wi o foondoo di wi o si fa a o leli u aini a ten di e kon (Yesaya 11:9). Yehofa o seeka u te da u ná abi sondu moo. A sani ya o meke a moo makiliki gi u fu fusutan den sani di wi o leli. A o makiliki gi u tu fu du den sani di wi o leli. Neen meke u mu gi Yehofa a okasi fu yeepi u fu toon moo bun sama. U mu soi en taki ai bigi gi u taki ai seeka u fu di a lobi u.Odo 3:11, 12.

FA YEHOFA E YEEPI U FU TOON MOO BUN SAMA?

10. Fa Yesesi soi taki a abi den manii fi en Dda?

10 Leti enke fa wan sama di e meke doti patu sabi sowtu tokotoko ai koboloiki, a so Yehofa sabi u tu. A sabi den manii fu u di á bun. A sabi san wi á poi du. A sabi fa u meke moiti fu go a fesi tu. Neen meke te ai yeepi u fu toon moo bun sama, ai holi den sani ya a pakisei. (Leisi Psalm 103:10-14.) Te u luku a fasi fa Yesesi libi anga den apostel fi en te den be e meke fowtu, da wi e si fa Yehofa de. Son leisi den apostel fi en be e sitee anga denseefi fu soi sama na a moo gaan wan. Efi i be de ape, fa i be o si den apostel? Kande yu á be o si den enke safu tokotoko. Ma Yesesi be sabi taki efu a be abi pasensi anga sakafasi, efu a be e taki switi anga den, da a sani de be o yeepi den apostel fu kengi (Malikisi 9:33-37; 10:37, 41-45; Lukasi 22:24-27). Di Yesesi weki baka, neen Yehofa gi den apostel a santa yeye. Fanafu a ten de, den á be e sitee anga denseefi moo. Ma den be e booko den ede anga a wooko di Yesesi fika gi den.Toli 5:42.

11. Fa David be soi taki a de enke safu tokotoko? Fa u sa waka neen baka?

11 Aini a ten ya Yehofa e koboloiki a Beibel, a santa yeye anga a kemeente fu yeepi u fu toon moo bun sama. Fa a Beibel e yeepi u? U mu sidon denki den sani di u leisi, baka dati u mu akisi Yehofa fu a yeepi u fu wooko anga den sani di u leli. Kownu David be sikiifi taki: „Mi e pakisei i te mi didon a mi bedi tapu, mi e pakisei yu a gaan neti” (Psalm 63:6). Boiti dati a sikiifi taki: „Mi o gafa Yehofa, a Gadu di e poti mi a pasi. Te neti tapu, da den sani di mi e pakisei e poti mi a pasi” (Psalm 16:7). David be e sidon pakisei  den leli fu Yehofa, da a be e meke den leli de kengi a fasi fa a be e denki. David be e du a sani de winsi a á be makiliki gi en (2 Samuweli 12:1-13). U mu meke moiti fu de enke David, bika a be abi sakafasi. A be e du san Yehofa taki tu. I mu akisi iseefi taki: „Te mi e leisi Beibel, mi e sidon pakisei den sani di mi e leli? Mi e meke a Wowtu fu Gadu kengi a fasi fa mi e denki? Mi poi du den sani de moo bun?’Psalm 1:2, 3.

12, 13. Fa Yehofa e koboloiki en santa yeye anga a kemeente fu yeepi u?

12 A santa yeye e yeepi u a omen fasi fu toon moo bun sama. Wan fu den sani di ai du, a yeepi ai yeepi u fu abi den manii fu Yesesi (Galasiyasama 5:22, 23). Wan fu den manii di a santa yeye e yeepi sama fu abi, a lobi. U lobi Gadu, u wani du san a taki tu. Boiti dati u wani a seeka u fu toon moo bun sama, bika wi e fende wini te wi e du san a taki. A santa yeye e yeepi u tu fu wi á meke a goontapu ya poli u (Efeisesama 2:2). Di a apostel Pawlesi be yonkuu, a be meke den Dyu keliki fesiman di be e fii denseefi poti en enke fa den wani. Ma a santa yeye yeepi en fu kengi. Bakaten a be sikiifi taki: „Mi poi du ala sani bika na a sama di e gi kaakiti e yeepi mi” (Filipisama 4:13). U mu akisi Yehofa fu a gi wi a santa yeye. Ma te wi e akisi en, u mu biibi taki a o gi wi en.Psalm 10:17.

Yehofa e koboloiki den owluman fu yeepi u, neen meke u mu e aliki den (Luku paragraaf 12, 13)

13 Yehofa e koboloiki a kemeente fu yeepi u fu toon moo bun sama. Efu den owluman si taki wi abi wan manii  di á bun, den e meke moiti fu yeepi u. Ma te den e yeepi u, den nai taigi u san denseefi e denki (Galasiyasama 6:1). Ma anga sakafasi den e begi Yehofa fu a gi den koni. Baka dati den e luku san a Beibel anga den buku fu a olikanisâsi e taki fu a toli. Efu den owluman kon taki anga i fu wan sani, kande fu a koosi di i wei, yu o si enke a Yehofa e seeka i fu di a lobi i? Efi i wooko anga san den taigi i, da yu e soi taki i wani de enke safu tokotoko. Yu e soi tu taki i wani Yehofa yeepi i fu toon moo bun sama. A sani de o tyai wini gi i.

14. Fa Yehofa e soi u taki a nai dwengi u fu kengi, winsi fa a poi du san a wani anga u?

14 Te wi e fusutan fa Yehofa e seeka u, da wi o libi bun anga u baala anga sisa. A o yeepi u fu si den sama di wi e miti aini a peleikiwooko anga den Beibelsutudi fu u, enke fa Yehofa e si den. Aini Beibel ten, fosi wan sama be meke wan patu a be e kiin a tokotoko. A be e puu ala den siton anga den taa sani di á be de fanowdu aini a tokotoko. A Yehofa na a moo bun sama di poi seeka u enke fa wan sama e seeka tokotoko fosi a meke wan patu. A nai dwengi u fu kengi, ma ai soi u den weiti fi en. A useefi mu meke moiti fu kengi.

15, 16. Gi wan ondoofenitoli fu wan Beibelsutudi di soi taki a wani Yehofa seeka en?

15 Luku san pasa anga Tessie, wan sisa a Australiya. A á be taanga gi en fu fusutan den leli fu Beibel. Ma tokuso a á be e go a fesi, a á be e go a komakandaa tu. A sisa di be e sutudeli anga en begi Yehofa, neen a taki a ná o go sutudeli anga Tessie moo. Ma wan foondoo sani pasa. Di a go sutudeli anga Tessie, neen Tessie taigi en saide a nai meke moiti fu go a fesi. A taigi en taki ai si enke ai holi enseefi a sipowtu, bika a lobi dobel. Ma a taigi en taki a o fika a libi de. A ná o dobel moo.

16 A á teke langa neen Tessie bigin go a komakandaa. A be e meke moiti fu abi den manii di wan Kelesten mu abi, winsi den mati fi en be e lafu en. Bakaten Tessie dopu. A toon wan kowownu pionili, winsi fa a be abi yonkuu pikin. A sani ya e soi taki te wan Beibelsutudi bigin meke moiti fu go a fesi, en anga Yehofa e toon mati. Boiti dati Yehofa e seeka en leti enke fa wan sama e seeka tokotoko te enke a toon wan moin patu.

17. (a) Fa yu e si a seeka di Yehofa e seeka i? (b) San wi o luku aini a taa artikel?

17 Aini a ten ya seefi sama e teke ten seeka tokotoko te enke a toon wan moin patu. A so Yehofa e teke en ten seeka u tu. Ai koboloiki den leli fi en fu seeka u. Ai luku efu wi e wooko anga den sani di a leli u tu. (Leisi Psalm 32:8.) Yu e si fa Yehofa e booko en ede anga i? Yu e si fa ai teke en ten fu seeka i? San o yeepi i fu de enke safu tokotoko gi Yehofa? San a den sani di o meke u de enke taanga tokotoko di á poi seeka? Fa mma anga dda sa wooko makandii anga Yehofa fu seeka den pikin? A taa artikel o piki den akisi ya.