Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuni 2016

Yu e meke Yehofa seeka i enke fa wan sama di e meke patu e seeka a tokotoko?

Yu e meke Yehofa seeka i enke fa wan sama di e meke patu e seeka a tokotoko?

„Islayeli, leti enke fa a tokotoko e de aini a sama di e meke doti patu ana, a so u de aini mi ana.”YELEMIYA 18:6.

SINGI: 60, 22

1, 2. Saide meke Gadu be lobi Daniyeli? Fa u sa aliki Gadu enke Daniyeli?

DI DEN be tyai den Dyu go a Babilon, den si taki a foto be lai falisi gadu. Den sama fu a foto be e dini ogii yeye tu. Tokuso den sama enke Daniyeli anga den dii mati fi en biibi be taanga. Denseefi a be Dyu, ma den á be meke den sama fu Babilon poli den (Daniyeli 1:6, 8, 12; 3:16-18). Daniyeli anga den mati fi en be e si Yehofa enke a sama di mu seeka den. Den dini Yehofa den hii libi. Winsi fa Daniyeli be e tan a wan peesi pe sama á be e tyai denseefi bun, tokuso wan engel be kai Daniyeli „wan man di Gadu lobi”.Daniyeli 10:11, 19.

2 Aini Beibel ten, te wan sama be e meke doti patu, a be e poti a tokotoko aini wan sani fu meke a kon enke fa a  wani. Aini a ten ya den tuu Kelesten sabi taki a Yehofa abi a leti fu tii hemel anga goontapu. Neen abi a makiti fu seeka sama. (Leisi Yelemiya 18:6.) Yehofa abi a makiti fu seeka ibiiwan sama poti enke fa a wani. Tokuso a nai dwengi sama fu kengi efuso fu du san a wani. A wani useefi gi en a okasi fu a seeka u. A artikel ya o soi u fa u sa de enke safu tokotoko aini Gadu ana. Wi o luku den dii akisi ya: (1) Fa u sa meke moiti fu ná abi manii di o meke u de enke taanga tokotoko, efuso sama di nai aliki Yehofa? (2) San o yeepi u fu de enke safu tokotoko efuso sama di e aliki Yehofa? (3) Fa mma anga dda sa soi taki den e aliki Yehofa te den e kiya den pikin?

MEKE MOITI FI I ATI Á TAANGA

3. San a den sani di sa meke u ná aliki Yehofa moo? Sama a sani ya be miti?

3 Odo 4:23 taki: „A yu ati na a moo pelensipali sani di i mu kibii, bika na ape a libi de.” U mu meke moiti fu u ná abi heimembee. U mu meke moiti fu u biibi á swaki tu. Boiti dati wi á mu gwenti du sondu. Bika den sani ya sa meke u ná aliki Yehofa moo (Daniyeli 5:1, 20; Hebrewsama 3:13, 18, 19). Na a sani de be pasa anga Kownu Usiya fu Yuda. (Leisi 2 Koloniki 26:3-5, 16-21.) Usiya be lobi aliki Yehofa. En anga Yehofa a be mati tu, neen meke Gadu be gi en makiti. Ma „di a fende moo makiti, neen a be kon abi bigifasi”. A be kon abi heimembee te a be wani boon ofaandi aini a tempel, winsi fa a be sabi taki a den pilisite wawan be mu du a wooko de. Di den pilisite taigi en taki a be fowtu, neen en ati boon! Yehofa sitaafu a heimembee kownu ya. A meke a kokobe te enke a dede.Odo 16:18.

4, 5. Gi wan toli di e soi san o miti u efu wi á meke moiti fu abi sakafasi?

4 Heimembee sa meke u si enke u bun moo taawan. A sani ya sa meke u nai aliki moo te taawan e yeepi u fu du san Beibel e taki (Odo 29:1; Romesama 12:3). A sani ya be miti wan owluman den e kai Jim. A be e sitee anga den taa owluman aini a kemeente fu wan toli. Jim taki: „Mi taigi den baala taki den ná abi bun manii, neen mi waka gwe.” Baka sigisi mun Jim go a wan taa kemeente, ma den á be poti enke owluman aini a kemeente de. A sani ya meke a booko-saka. A be e si enke a be abi leti. A sani de meke a á be e dini Yehofa moo. Tin yali langa Jim gwe fika Yehofa. A taki a be abi heimembee te neen a bigin gi Yehofa a fowtu. A omen yali den baala meke moiti fu yeepi Jim, ma a á be wani aliki den.

5 Jim taki: „Mi be fende namonamo taki a den taa baala fowtu.” A toli ya e soi u taki heimembee sa meke u nai si den fowtu fu u moo. A sani ya sa meke u de enke taanga tokotoko (Yelemiya 17:9). Wan baala efuso wan sisa du wan sani anga i kaba, di meke yu ati boon? I fii booko-saka wan leisi kaba fu di i lasi wan gaandi? San i du di den sani ya miti i? I be fusutan taki a libi di  i mu libi bun anga i baala anga sisa, anga a dini di i mu dini Yehofa, na a moo pelensipali sani?Leisi Psalm 119:165; Kolosesama 3:13.

6. San sa pasa te u gwenti du sani di á fiti?

6 Te wan sama gwenti du wan sondu, te ai kibii a sondu di ai du, da o taanga gi en fu teke den sani di Yehofa e leli en. A sa bigin si sondu enke wan lawlaw sani. Wan baala taki, baka wan pisiten a be bigin si den sondu fi en enke lawlaw sani (Peleikiman 8:11). Wan taa baala di be lobi luku felon efuso buku di e soi fa man anga uman e didon anga denseefi taki: „Mi be bigin kuutu den owluman.” A sani de be meke en anga Yehofa á be de mati moo. Son sama á kibii den sondu fu den, neen meke den owluman be poi yeepi den. Ma efu wi e kuutu den baala di e kon taki anga u, efuso wi e gi taawan a fowtu fu den sani di u du, pe fu u akisi Yehofa paadon, wi ati o kon taanga.

Den Islayelisama dede aini a sabana fu di den á be e aliki Yehofa, den á be e fitoow en tu

7, 8. (a) Fa a toli fu den Islayelisama e soi san e pasa anga wan sama te a nai biibi? (b) San a toli ya e leli u?

7 Di Yehofa puu den Islayelisama a Egepte, den be si den somen wonduu di a du. Tokuso di den doo koosube fu a Paamisi Kondee, den á be wani aliki Yehofa moo. Saide? Den á be e biibi en. Pe fu den fitoow Yehofa neen na feele den bigin feele. Den bigin kuutu Mosesi tu. Den be wani go a Egepte baka, a kondee pe den be de a saafu. A sani ya be hati Yehofa. A taki: „On ten den sama ya o lesipeki mi?” (Numeri 14:1-4, 11; Psalm 78:40, 41). Fu di den Islayelisama á be wani aliki Yehofa moo, fu di den á be e biibi en, meke den dede aini a sabana.

8 Nownow u de koosube fu a nyun goontapu. A omen sani sa meke u biibi swaki, neen meke u mu meke moiti fu taanga u biibi. San u mu du fu taanga u biibi? A bun fu luku san Yesesi be taki a Mateyesi 6:33. Akisi iseefi den sani ya: ’Den sani di mi wani du anga den sani di mi e du nownow, e soi taki mi e biibi den sani di Yesesi’ taki? Mi e puu dei fu go a komakandaa anga peleikiwooko fu di mi wani meke moo moni? San mi o du efu mi wooko e teke ala mi ten anga mi kaakiti? Mi o meke a goontapu ya poti mi enke fa a wani? Mi o meke á tapu mi fu dini Yehofa?’

9. Saide u mu e ondoosuku u biibi? Fa u sa ondoosuku u biibi?

9 Efu wi e luku efuso aliki sani di á bun, boiti dati efu wi e mumui anga takuu mati efuso sama di den puu na a kemeente, u ná o wani aliki Yehofa moo. San i mu du efi i si enke a sani ya e miti i? Yu á mu daaidaai fu ondoosuku i biibi! Beibel taki: „U mu  e ondoosuku naamo luku efu u de a biibi. E soi namo sowtu sama a yu” (2 Korentesama 13:5). Ná koli iseefi. Sutudeli Gadu Wowtu ala yuu. Meke a Wowtu fu Gadu yeepi i fu kengi a fasi fa yu e denki.

DE ENKE SAFU TOKOTOKO

10. San o yeepi u fu de enke safu tokotoko aini Yehofa ana?

10 Yehofa gi u wantu sani di sa yeepi u fu de enke safu tokotoko. Den sani ya na a Wowtu fi en, a Kelesten kemeente anga a peleikiwooko. Te wi e leisi Beibel ala dei, te wi e sidon pakisei san u leisi, da wi o de enke safu tokotoko aini Yehofa ana. Wi e gi Yehofa a okasi fu seeka u. Yehofa be taigi den kownu fu Islayeli taki den be mu sikiifi a Weiti, da den e leisi en ala dei (Deitolonomi 17:18, 19). Den apostel be sabi taki efu den be wani du den wooko bun, den be mu e leisi a Wowtu fu Gadu ala dei. Den be mu e sidon pakisei den sani di den leisi tu. Den koboloiki omen pisi fu den Hebrewbuku fu Beibel aini den buku di den sikiifi. Te den be e leli sama, den be e gi den taanga-sikin fu leisi den buku ya tu (Toli 17:11). Leti enke den apostel, a so useefi e si taki a pelensipali fu leisi a Wowtu fu Gadu ala dei. U mu e sidon pakisei den sani di wi e leisi tu (1 Timotiyesi 4:15). A sani ya o yeepi u fu abi sakafasi. Wi o gi Yehofa a okasi fu seeka u tu.

Wooko anga den sani di Yehofa gi i, da yu o de enke safu tokotoko (Luku paragraaf 10-13)

11, 12. Fa Yehofa e koboloiki a kemeente fu yeepi u fu toon moo bun sama? Gi wan ondoofenitoli.

 11 Yehofa sabi san ibiiwan fu u abi fanowdu, neen meke ai koboloiki a Kelesten kemeente fu seeka u. Jim, di u be taki fi en a fesi, be bigin kengi en manii di wan owluman bigin booko en ede anga en. Jim taki: „A á meke mi fii enke a miseefi suku a polobelema. A á kuutu mi tu. A be wani yeepi mi.” Baka dii mun neen a owluman kai Jim fu kon a komakandaa. Jim taki a kemeente bali wadaa gi en. A fasi fa den soi en taki den lobi en meke a kengi a fasi fa a be e denki. A kon si taki a ná a fasi fa a be e fii na a moo pelensipali sani. A uman fu Jim anga den owluman fu a kemeente gi en taanga-sikin te a meke moiti kon dini Yehofa baka. Jim fende wini tu di a leisi den artikel di den e kai „Jehovah no e froedini foe kisi pori nen”, anga a artikel „Dini Jehovah na wan loyaal fasi”, di de aini A Waktitoren fu 15 november 1992.

12 Baka wan pisiten, Jim toon owluman baka. Fanafu di a toon owluman, a yeepi omen baala di be abi aseefi polobelema fi en. A gi den taanga-sikin tu. A taki, fosi a be e denki taki en anga Yehofa a be mati, ma a kon si taki a koli a be e koli enseefi. A hati en taki heimembee be meke ai poti pakisei a den fowtu fu taawan naamo, pe fu a be poti pakisei a den moo pelensipali sani.1 Korentesama 10:12.

Te wi e waka a Yesesi baka, sama o wani aliki a bosikopu di wi e paati. Kande a sani de o meke den libi bun anga u tu

13. Sowtu manii a peleikiwooko e yeepi u fu abi? Sowtu wini wi e fende te u abi den manii ya?

13 A peleikiwooko e yeepi u tu fu toon moo bun sama. Fa ai yeepi u? Te wi e paati a bun nyunsu u mu abi sakafasi anga den taa manii di a santa yeye e yeepi sama fu abi (Galasiyasama 5:22, 23). Pakisei den manii di a peleikiwooko yeepi i fu abi. Te wi e waka a Yesesi baka, sama o wani aliki a bosikopu di wi e paati. Kande a sani de o meke den libi bun anga u tu. Tu Kotoigi fu Australiya be si taki a sani ya a wan tuu sani. Di den go peleiki gi wan uman, neen a uman ati boon, a taki goofu anga den. Ma anga ala lesipeki den Kotoigi aliki en. Bakaten a hati a uman taki a á tyai enseefi bun, neen a sikiifi wan biifi gi a beikantoo. A akisi paadon fu a sani di a du. A taki: „Mi du wan don sani, bika tu sama be e paati a bosikopu fu Gadu, neen mi yaki den.” A toli ya e soi sowtu wini wi e fende, te wi e tyai useefi bun aini a peleikiwooko. A peleikiwooko e yeepi taawan, ma ai yeepi u fu abi bun manii tu.

 MMA ANGA DDA MU DU SAN YEHOFA WANI TE DEN E KIYA DEN PIKIN

14. San mma anga dda mu du efu den wani yeepi den pikin fu lobi den leli fu Beibel?

14 Gaanse pikinengee abi sakafasi. Boiti dati den e wani sabi sani (Mateyesi 18:1-4). Neen meke a wan koni sani te mma anga dda e yeepi den pikin fu lobi a waaleiti yonkuuyonkuu (2 Timotiyesi 3:14, 15). Fu man du a sani ya, mma anga dda seefi mu lobi den leli fu Beibel. Den mu e du den sani di den e leli tu. Te den e tyai denseefi so, da o moo makiliki gi den pikin fu lobi a waaleiti. Boiti dati, den pikin o fusutan taki a di den mma anga dda lobi den, meke den e kaasi den son leisi. Den o fusutan tu taki Yehofa lobi den.

15, 16. Fa mma anga dda sa soi taki den e fitoow Yehofa te den pikin komoto a waaleiti?

15 Son leisi winsi fa mma anga dda kiya den pikin aini waaleiti, tokuso son wan fu den pikin nai teke. Taawan e teke, ma den e komoto bakaten. Te a sani ya pasa, ai hati a famii. Wan sisa fu Zuid-Afiikan taki: „Di mi baala komoto a waaleiti, a be gei enke a dede a dede. Mi be fii en te!” Ma san a osufamii ya du? Den du san Beibel taki. (Leisi 1 Korentesama 5:11, 13.) En mma anga en dda be sabi taki efu den du san Gadu wani, na ala den o fende wini. Den be e si a puu di den puu en na a kemeente enke a Yehofa be e kaasi en, fu di a lobi en. Neen meke a te den be mu du wan pelensipali sani namo enke famii, den be e taki anga a boi fu den.

16 Fa a boi be e fii? A taki: „Mi be sabi taki a ná buuse mi famii be buuse mi, ma den be e du sani enke fa Yehofa anga en olikanisâsi taki. Te sama nai mumui anga i, a moo makiliki fu kon dini Yehofa baka. Yu e fusutan taki yu abi Yehofa fanowdu.” Pakisei fa a famii poolo di a yonkuu man ya bigin dini Yehofa baka! Efu wi e aliki Yehofa ala yuu, wi o fende wini. Wi o piisii tu. A ná abi misi.Odo 3:5, 6; 28:26.

Te wi abi sakafasi, te wi e aliki Yehofa, a o lobi u

17. Saide u mu aliki Yehofa ala yuu? Sowtu wini wi o fende?

17 A polofeiti Yesaya be taki, den Dyu di be o de a katibo a Babilon be o dini Yehofa baka. A taki: „Yehofa, a yu a u Dda. Wi na a tokotoko. A yu na a sama di e seeka u enke wan sama di e meke doti patu. A yu meke ala u.” Yesaya taki den Islayelisama be o begi Yehofa taki: „Ná pakisei den fowtu fu u moo baa. Gaantangi ná feegete taki wi ai foluku” (Yesaya 64:8, 9). Te wi abi sakafasi, te wi e aliki Yehofa, a o lobi u enke fa a be lobi Daniyeli. Yehofa o tan koboloiki en Wowtu, a santa yeye anga en olikanisâsi fu yeepi u fu toon moo bun sama. A sani de o yeepi u fu u ná abi sondu moo aini a ten di e kon, bika wi o toon Gadu pikin.Romesama 8:21.