Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuni 2016

Wan manii di bun moo dyamanti

Wan manii di bun moo dyamanti

Sama e si dyamanti enke wan gaan dii siton. A omen miliyun dala i mu abi fu bai son wan fu den. Ma wan sani de di moin gi Gadu moo dyamanti efuso taa dii siton?

 Haykanush di e tan a Armeiniya, a wan peleikiman di á dopu ete. Wan leisi a fende wan pasport koosube fi en osu. A omen moni anga kaita di den e bai sani be de aini a pasport. A uman ya taigi en man san a fende. En man seefi a be wan peleikiman di a dopu ete.

Haykanush anga en man be pooti, boiti dati den be abi paiman, ma toku den tyai a moni gi a sama di abi a pasport. A man di be abi a pasport anga den famii fi en foondoo. Haykanush anga en man taigi a man taki a den sani di den e leli aini a Beibel meke den tyai a moni anga a pasport gi en. Baka dati Haykanush anga en man taigi a famii taki den a Yehofa Kotoigi, neen den gi den wantu buku fu den leisi.

A famii ya be wani pai Haykanush fu a sani di a du, ma a á teke a moni. A taa dei, a uman fu a man di be abi a pasport go luku Haykanush anga en man a osu. Fu di a be wani soi Haykanush taki a sani di a du bigi gi en, meke a gi en wan dyamanti finga linga. A uman be wani a teke a finga linga namonamo.

Leti enke a osufamii ya, a omen sama e foondoo fu a sani di Haykanush anga en man du. Ma Yehofa be foondoo? Fa a si a sani di den du? Haykanush anga en man fende wini fu a sani di den du?

DEN MANII DI BUN MOO GUDU

A á taanga fu piki den akisi ya. Saide? A foluku fu Gadu sabi taki te den abi den manii fi en, da a sani de bun moo dyamanti, gowtu efuso taa gudu. A sani ya e soi taki den sani di Yehofa e si enke gudu, a ná aseefi enke san libisama e si fu pelensipali sani (Yesaya 55:8, 9). A foluku fu Yehofa e meke moiti fu abi den manii fi en, bika Gadu lobi den manii ya.

Wi e si a sani ya te u luku san Beibel e taki fu koni anga a fusutan di wan sama e fusutan sani kiin. Odo 3:13-15 e taki: „Wan koni sama o de koloku. Wan sama di e fusutan sani bun o de koloku. Bika te wan sama koni, a bun moo te a abi solufu. Te wan sama koni tuutuu, a bun moo te a abi gowtu anga koraal-siton. Nawan sani di e meke sama piisii, de enke koni.” A sani ya e soi taki den manii ya, pelensipali gi Yehofa moo moni anga gudu.

Fa ai si wan sama di e du sani anga wan kiin ati?

Yehofa e du sani a wan leti fasi. A „á poi lei” (Titesi 1:2). A meke a apostel Pawlesi sikiifi gi den fosi Hebrew Kelesten taki: „E begi gi u naamo, bika u sabi taki wi abi wan kiin kosensi, fu di u wani du ala sani anga wan kiin ati.”Hebrewsama 13:18.

Yesesi seefi e du sani anga wan kiin ati. Wan leisi Kayafas, a Hei Pilisite taigi en taki: „Aini a nen fu Masaa Gadu, taigi u efu a yu na Kelestesi, a Manpikin fu Gadu!” Yesesi á lei, a taigi en taki en na a Mesiyas. Anga ala fa a be sabi taki den Dyu di be de na a moo hei kuutu be o leisi dede sitaafu gi en efu a be taki a sani de, tokuso a á koli den.Mateyesi 26:63-67.

Fa a de anga u? Wi e lei son leisi fu fende moni efuso taa gudu? Wi e du sani anga wan kiin ati winsi san e pasa?

TE A TAANGA FU DU SANI ANGA WAN KIIN ATI

A taanga fu du sani anga wan kiin ati aini a ten ya, bika a omen sama ’lobi denseefi  namo, den lobi moni’ tu (2 Timotiyesi 3:2). Te moni polobelema de anga te wooko taanga fu fende, da a omen sama e si fufuu, dyote anga lei enke wan kowownu sani. Den e si enke a wan enkii fasi fa den sa fende den sani di den wani, a te den e bidiigi taawan. Son Kelesten seefi bidiigi taawan, neen meke den ná abi wan bun nen aini a kemeente moo.1 Timotiyesi 3:8; Titesi 1:7.

Gaanse Kelesten e waka a Yesesi baka. Den e fusutan taki a moo pelensipali fu abi den manii fu Gadu moo enke fu abi moni efuso gudu. Neen meke den pikin fu den Kotoigi nai spiek a sikoo (Odo 20:23). Te yu e du sani anga wan kiin ati, kande i ná o fende kado enke Haykanush. Ma toku a so Gadu wani u tyai useefi. A sani ya e yeepi u fu abi wan kiin kosensi, wan sani di yu á poi bai anga moni.

Luku a toli fu Gagik. A taki: „Fosi mi  toon wan Kelesten, mi be e wooko a wan gaan bodeleifi. A basi fu a bodeleifi á be wani pai lantimoni, neen meke a á be wani taigi lanti omen moni a bodeleifi be e meke. Fu di mi be de wan sowtu dikitoo, meke a moo gaan basi be taigi mi taki mi mu pai a lantiman di o kon na a bodeleifi fu a á taki a toli. Baka wan pisiten den be sabi mi enke wan sama di e bidiigi taawan. Ma di mi toon Yehofa Kotoigi, mi á be wani bidiigi sama moo, neen meke mi fika a wooko. Neen mi opo mi bodeleifi. Fanafu di mi opo a bodeleifi, dei a pasa di mi á pai lanti moni.”2 Korentesama 8:21.

Gagik taki: „Na afu fu a moni di mi be e wooko fosi, mi e fende nownow, neen meke a be moo taanga gi mi fu solugu mi osufamii. Ma tokuso mi e fii moo bun. Mi e dini Yehofa anga wan kiin kosensi. Mi nai bidiigi sama moo, neen meke den boi fu mi sa waka a mi baka. Boiti dati den sama di e piki lantimoni, anga den taa sama di mi anga den e wooko e fitoow mi. Nownow den sabi mi enke wan man di e du sani anga wan kiin ati.”

YEHOFA E YEEPI U

Yehofa lobi den sama di e gafa en, fu di den e meke moiti fu abi den manii fi en. Neen meke a lobi den sama di e du sani anga wan kiin ati (Titesi 2:10). A paamisi u taki a o yeepi u efu wi e tyai useefi so. A meke Kownu David sikiifi taki: „Mi be yonkuu, ma now mi kon gaandi. Tokuso noiti mi si Gadu fika wan sama di e libi a wan leti fasi. Noiti mi si en pikin e begi nyanyan.”Psalm 37:25.

A toli fu Rut e soi taki a sani di David sikiifi a tuu. Rut holibaka gi en main Naomi, winsi fa Naomi be gaandi. A foloisi go a Islayeli, fu di a be wani dini a tuu Gadu (Rut 1:16, 17). A á be e bidiigi sama, ma a be e wooko taanga. A be e piki nyanyan a sama goon enke fa a weiti be e gi pootiman pasi fu du. Yehofa á be fika Rut anga Naomi (Rut 2:2-18). Na aseefi sani ya David ondoofeni bakaten. Boiti a solugu di Yehofa solugu Rut, a du moo gi en. A meke a toon wan fu den afo fu Kownu David anga a Mesiyas!Rut 4:13-17; Mateyesi 1:5, 16.

Son leisi ai taanga gi son sama di e dini Yehofa fu fende moni fu bai den sani di den abi taanga fanowdu. Ma tokuso den nai bidiigi sama, den e wooko taanga. Fu di den e tyai denseefi so meke den e soi taki a du di den e du sani anga wan kiin ati, pelensipali gi den moo moni anga gudu.Odo 12:24; Efeisesama 4:28.

Leti enke Rut, a so omen Kelesten soi taki den e biibi taki Yehofa poi solugu den. Den e biibi taki Gadu o du san a taki. A paamisi taki: „Mi ná o gwe fika i. Noiti mi o fika i wawan” (Hebrewsama 13:5). A omen leisi Yehofa soi taki a poi yeepi den sama di e du sani anga wan kiin ati. A soi tu taki a wani yeepi den. Ala yuu ai yeepi den sama di e dini en fu fende den sani di den abi taanga fanowdu enke fa a paamisi den.Mateyesi 6:33.

Libisama e si dyamanti anga taa dii sani enke pelensipali sani. Ma te wi e du sani anga wan kiin ati anga te wi e soi taa bun manii, da u Dda di e tan a hemel e piisii. Bika den fasi ya pelensipali gi en moo dyamanti, gowtu anga taa sowtu dii siton.

Te wi e du sani anga wan kiin ati, da wi o abi wan kiin kosensi te wi e peleiki