Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  yuni 2016

Leti enke a man di be de anga a pikin bataa di den seketasi e poti enki, a so Yesesi e maiki den sama di o tan a libi

Sani di leisiman akisi

Sani di leisiman akisi

A polofeiti Eseikiyeli be deen wan man di be de anga wan pikin bataa di den seketasi e poti enki, anga sigisi taa man di be de anga feti sani fu naki sama kii. Sama a den man ya?

Den man ya, a den engel di be mu poli Yelusalem. A den engel ya o poli a goontapu fu Saatan na a ten fu Alimakedon. A ná so u be e fusutan a sani ya fosi. Ma saide wi e fusutan en taa fasi nownow?

We, fosi a yali 607 fosi Kelestesi, neen Yehofa soi Eseikiyeli aini wan deen san be o pasa a Yelusalem fosi a poli. Aini a deen Eseikiyeli si den somen ogii di be e pasa aini a kondee. Baka dati a si sigisi man di be de anga „feti sani a den ana fu naki sama kii”. Boiti dati a si ete wan man „di be wei linnen koosi”. A man ya be de anga wan pikin bataa di den seketasi e poti enki (Eseikiyeli 8:6-12; 9:2, 3). Yehofa taigi a man ya taki: „Waka lontu a hii foto Yelusalem, da i maiki den sama di e kusumi anga den sama di e geme fu ala den ogii di den sama e du aini a foto, a den fesi-ede.” San u sa leli fu a deen ya? Sama na a man di be de anga a pikin bataa di den seketasi e poti enki?

Eseikiyeli be deen a sani ya aini a yali 612 fosi Kelestesi. A sani di a be si aini a deen pasa baka feifi yali, di Yehofa be meke den Babilonsama poli Yelusalem. A so Yehofa koboloiki den Babilonsama fu sitaafu a foluku fi en fu di den á be e aliki en (Yelemiya 25:9, 15-18). Ma fa sani waka anga den Dyu di á be lobi den ogii di be e pasa aini a foto? Yehofa be kibii den.

Enke fa Eseikiyeli be deen, da a neen be e  maiki den sama. Boiti dati a neen be kii den ogii sama. Ma a den engel di be abi a faantiwowtu fu poli Yelusalem be e du den sani ya. A polofeititoli ya e yeepi u fu fusutan san e pasa a hemel. Yehofa taigi den engel fu den solugu taki den ogii sama dede. Ma a taigi den tu fu den kibii den sama di e tyai denseefi bun. *

Aseefi sani ya o pasa aini a ten di e kon. Fosi u be e taki a man di de anga a pikin bataa di den seketasi e poti enki, a den salufu Kelesten di de a goontapu. U be e taki tu taki a den sama di be e aliki a bun nyunsu be e fende wan maiki a den fesi ede. A den sama ya be o tan a libi. Ma den ten di pasa u kon si taki u be abi fu kengi a fasi fa u be e fusutan a polofeititoli ya. U kon si taki Mateyesi 25:31-33 e soi taki a Yesesi abi a faantiwowtu fu taki sama a sikapu efuso kaabita. Neen e kuutu sama. A o du a sani ya na a ten fu a gaan banowtu. A ten de, den sama di de enke sikapu o tan a libi, ma den sama di de enke kaabita o dede.

San a deen fu Eseikiyeli e leli u? Ai leli u feifi sani:

  1.  Fosi Yelusalem booko, Eseikiyeli, Yelemiya anga Yesaya be e wasikoi sama fu a sani di be o pasa. Den be de enke sama di e holi wakiti. Aini a ten ya, Yehofa e koboloiki wan pikin kulu salufu Kelesten fu leli a foluku fi en. Boiti dati a pikin kulu ya e wasikoi sama fosi a gaan banowtu bigin. Na ala den sama di e dini Gadu, e wasikoi sama.Mateyesi 24:45-47.

  2.  Leti enke Eseikiyeli, a so a foluku fu Yehofa aini a ten ya, nai maiki den sama di o tan a libi. A peleiki den e peleiki fu wasikoi sama gi den sani di o pasa aini a ten di e kon. Den engel e yeepi du a wooko ya na a hii goontapu.Openbaring 14:6.

  3.  Leti enke den sama di be tan a libi na a ten fu Eseikiyeli, a so den sama di o tan a libi baka Alimakedon, ná o abi wan tuutuu maiki a den fesi ede. San sama mu du fu tan a libi na a ten fu a gaan banowtu? Te den yee a bosikopu ya, den mu meke moiti fu waka a Yesesi baka. Den mu paamisi Gadu taki den o libi enke fa a wani. Boiti dati den mu holibaka gi den baala fu Kelestesi anga a peleikiwooko (Mateyesi 25:35-40). Efu den du den sani ya, den o fende a maiki na a ten fu a gaan banowtu. Dati wani taki den o tan a libi.

  4.  A man di be de anga a pikin bataa di den seketasi e poti enki a Yesesi. Na a ten fu a gaan banowtu, Yesesi o maiki den sama fu a gaan kulu, fu di a o si den enke sikapu. Da den o abi a okasi fu libi fu teego a goontapu.Mateyesi 25:34, 46. *

  5.  Leti enke den sigisi man di be de anga feti sani fu naki sama kii, a so den engel di de a hemel o kii ala den sama di nai libi a wan leti fasi. Da ogii ná o de moo. A Yesesi e teke fesi na a feti ya.Eseikiyeli 10:2, 6, 7; Openbaring 19:11-21.

Den sani di u leli fu a deen ya e yeepi u fu fusutan taki, noiti Yehofa o kii den bun sama te a o kii den ogii sama (2 Peitilisi 2:9; 3:9). Den e membee u tu taki a peleikiwooko di wi e du aini a ten ya de taanga fanowdu. U mu wasikoi ala sama fosi a kaba doo!Mateyesi 24:14.

^ paragraaf 6 Wantu sama di be tan a libi a Baruk (a seketasi fu Yelemiya), Ebed-Meilek a Etiyopiya man anga den bakapikin fu den Rekabsama. Den sama ya á be abi wan tuutuu maiki a den fesi ede (Yelemiya 35:1-19; 39:15-18; 45:1-5). A maiki be e soi taki den be o tan a libi.

^ paragraaf 12 A á de fanowdu fu den salufu Kelesten fende a maiki ya. Den o fende a kiiboi maiki. A maiki de o soi taki den o go a hemel tuutuu. Den o fende a maiki de fosi den dede, efuso fosi a gaan banowtu.Openbaring 7:1, 3.