Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2016

 ONDOOFENITOLI

Mi e piisii fu di mi e gi taawan sani

Mi e piisii fu di mi e gi taawan sani

MI BE abi 12 yali di mi kon fusutan taki mi abi wan pelensipali sani fu gi sama. Di mi be de a wan kelen komakandaa, wan baala akisi mi efu mi wani peleiki. Winsi fa mi á be peleiki noiti ete, tokuso mi taki eeye. U go peleiki a wan peesi, neen a gi mi wantu buku di e taki fu Gadu Kownukondee. A taigi mi taki: „Go a den sama di de na a se pasi anda, da mi o go na a se ya.” Mi be e feele, ma tokuso mi bigin peleiki osu fu osu. Mi paati ala den buku fu mi gawgaw. A omen sama be wani den buku di mi be e paati.

Mi meke aini a yali 1923 na a foto Chatham, Kent, a Ingiisikondee. Aini den yali baka a Fosi Goontapu Feti, sama be e denki taki sani be o waka moo bun a goontapu. Ma di den si taki a sani ya á pasa, a omen lasi-ati, leti enke mi mma anga nda. Den á be e biibi den fesiman fu wan fu den Anitii keliki moo, di be e feti fu fende moo makiti aini a keliki. Di mi be abi den neigin yali so, mma bigin go na a zaal fu a Internationaal Organisâsi fu Bijbel Ondrosukuman. Den Yehofa Kotoigi be e holi komakandaa na ape. Wan fu den sisa be e leli mi anga den taa pikin sani fu Beibel aini a buku di den e kai De Harp Gods. Mi be lobi den sani di mi be e leli.

MI LELI FU DEN BAALA DI BE GAANDI MOO MI

Di mi pasa twalufu yali, mi be lobi toosutu sama anga a Wowtu fu Gadu. Mi be lobi peleiki osu fu osu mi wawan, ma te mi be e peleiki anga taawan, mi be e leli omen sani. Wan leisi, mi anga wan moo gaandi baala be e go na a peesi di u be o peleiki a dei de. Di u pasa wan pastoo neen mi taki: „Luku wan kaabita e pasa anda.” A baala saka komoto neen baisigii neen a taki fu mi sidon neen se a wan udu tapu. A akisi mi taki: „Sama gi yu a leti fu kai sama kaabita?” Meke u paati a bun nyunsu anga piisii, da u fika a pisi de gi Yehofa.” Enke yonkuu boi mi be si fa a switi fu gi sama sani.Mateyesi 25:31-33; Toli 20:35.

Wan taa baala leli mi taki efu mi wani piisii te mi e du sani gi sama, mi mu abi pasensi. En uman á be lobi Yehofa Kotoigi. Wan leisi a kai mi fu mi go nyan neen osu. Di en uman si taki a peleikiwooko a komoto, en ati boon te neen a fiingi te paki naki u. Bakaten a fende wini fu di a holi pasensi. En uman toon Yehofa Kotoigi.

 Aini september 1939, Ingiisikondee bigin feti anga Doisilikondee. A ten de a 16 yali mi be abi. Aini maart 1940, neen mi anga mma dopu a wan peesi den e kai Dover. Aini yuni 1940, a mi doomofu mi be e de, da mi e si fa dunsudunsu suudati be e pasa anga feti wagi. Den suudati ya be de aini a feti fu Ingiisikondee anga Doisilikondee (a feti fu Duinkerken). Mi be e si taki a feti be buuya den fusutan. Boiti dati den á be abi howpu. Mi be wani taigi den san Gadu Kownukondee o du aini a ten di de a u fesi. Aini aseefi yali de Doisilikondee bigin towe bom gi Ingiisikondee. Ala neti den opalani fu Doisilikondee di be e towe bom be e fee pasa a pe u be e tan. U be e feele te u be e yee den bom e piki. Te Mamanten a omen booko osu u be e si. A sani ya moo taanga mi biibi taki na a Kownukondee wawan o meke sani go bun aini a ten di e kon.

MI BIGIN WAN LIBI DI E GI MI PIISII

Aini 1941 mi bigin anga a fuuten diniwooko. A wooko ya meke mi piisii tuutuu. Mi be e wooko a Royal Dockyard aini Chatham pe den be e meke sipi. A omen sama be wani a wooko ya, bika a be e pai bun. Ma a foluku fu Yehofa be sabi taki Kelesten á be mu mumui anga feti. A ten fu 1941, u be sabi tu taki wi á be mu holibaka gi den sama di e meke feti sani (Yohanisi 18:36). Ma a peesi di mi be e wooko be e meke dokiboto fu feti, neen meke mi fika a wooko de, neen mi bigin anga a fuuten diniwooko. A fosi peesi di den baala sende mi go a Cirencester wan moin foto a Cotswold.

Di mi be abi 18 yali, mi koti sitaafu neigin mun langa fu di mi á be wani toon suudati. Mi á be e fii bun seefiseefi di den sooto mi. Ma a á teke langa neen den wakitiman anga den sitaafuman bigin akisi mi saide den sooto mi. Anga piisii mi taigi den san mi e biibi.

Di mi komoto a sitaafu, mi anga Leonard Smith, * peleiki a omen peesi aini a foto Kent pe u meke. Den suudati fu Doisilikondee be e fee pasa a foto Kent, fu losi bom gi London. Fanafu a yali 1944 a moo enke wan dunsu bom kai a Kent. Den be e poti den bom ya aini opalani di á be abi pilowtu. Den e kai den opalani ya doodlebug. Te u be yee a opalani be dede a tapu, da u be sabi kaba taki a o kai a doti da a piki.  Ala sama be e feele. A pisiten de u be e sutudeli anga wan osufamii di be abi feifi sama. Son yuu te u be e sutudeli, da u be e go a wan ayee tafaa ondoo. Den be meke a tafaa ya fu kibii wi te a osu be o booko kai. Bakaten a hii osufamii dopu.

PELEIKI A TAA KONDEE

Mi e kai sama fu kon a wan konkelesi di mi be e pionili a Ierland (ondoo)

Baka a feti, mi pionili tu yali a Ierland. Te u be e go osu fu osu, u be e taigi den sama taki wi a zendeling, da u be e akisi efu den abi wan peesi gi u fu u tan. U be e paati Wakititolen a sitaati. Ma Ierland á be de enke Ingiisikondee. Lomusu sama be lai a Ierland. A omen sama be fende taki a soso wi e soso useefi, bika nawan sama o aliki u. Wan leisi wan man taigi u taki a o du sani anga u. Di mi tyai a taki go a wan sikowtu neen a taigi mi taki: „We yu á be sabi taki a so sani be o waka noh?” Wi á be sabi taki a so den pastoo be abi makiti . Te den sama be teke den buku fu u den be e lasi den wooko. Den yaki u puu a pe u be e tan tu.

U be kon fusutan taki efu u be go a wan taa peesi, a be o moo bun fu peleiki a den peesi pe den pastoo á sabi u. Neen meke a den sama di be e tan a faawe fosi u be e peleiki gi. Baka dati neen u bigin peleiki gi den sama di be e tan koosube fu u. Winsi fa sama be e taki den o du ogii anga u, tokuso u be e sutudeli anga wan yonkuman dii leisi aini wan wiki, a wan peesi den e kai Kilkenny. Mi be lobi a peleikiwooko, neen meke mi be wani go na a zendeling sikoo. A so mi sikiifi biifi gi a Wakititolen Beibel Sikoo Gilead.

A boto di den e kai Sibia a be wi zendeling osu fu 1948 te anga 1953 (leti ana)

Baka di u go feifi mun na a gilead sikoo, den sende fo fu u go a den pikin tabiki na a Karibis Se. U komoto a New York aini november fu a yali 1948 anga wan boto den e kai Sibia. A be langa 18 meter. Mi á be waka anga boto ete, neen meke mi be e poolo di mi yee taki anga boto u be o gwe. Wan fu den zendeling di den e kai Gust Maki, be e tyai sipi omen yali kaba. A soi u fa u mu tyai a boto. A soi u fa u mu opo efuso saka den gaiden. A leli u wooko anga kompas, anga fa u mu tyai a boto te a winta e wai u go a pe a wani. Gust be sabi en wooko. Baka 30 dei u doo den Bahama tabiki, winsi fa a dondoo be e bali.

U ’PAATI A BOSIKOPU A DEN TABIKI’

Baka di u peleiki wantu mun a den Bahama tabiki u komoto ape, neen u go a den Bovenwindse anga den Benedenwindse tabiki. Den tabiki ya be de wan sani fu 800 kilomeiti fu den Virgin tabiki anga Trinidad. U peleiki feifi yali a den tabiki pe Kotoigi á be de. Son leisi a omen wiki wi á be e man sende efuso fende bosikopu. Ma a be e switi gi u fu leli sama fu Yehofa a den tabiki!Yelemiya 31:10.

Den zendeling di be e tyai a boto Sibia (fu leti ana go a kukutu ana): Ron Parkin, Dick Ryde, Gust Maki, anga Stanley Carter

Te u be doo lanpeesi, da den sama be e kon luku sama kon de. Son wan fu den a fositoon den si den sowtu boto de. Taawan a fositoon den si bakaa. Den sama di be e tan a den tabiki be sabi Beibel bun. Boiti dati den be abi bun manii. Son leisi den e gi u kasaba, fisi, afukati anga pinda. Winsi a boto fu u á be bigi, tokuso u be man boli aini, u be e siibi aini. U be e wasi koosi aini tu.

Te u be go a soo, da u be e go taki anga den  sama. U be e taigi den taki wi o holi wan lezing di e taki fu Beibel. Te sapaten mofu, da u be e naki a bel fu a boto. A be moin fu si fa den sama be e kon. Den abeni fu den be de enke moin sitali. Son yuu a wan sani fu 100 sama be e kon, da den e akisi u sani te enke gaan neti. Den be lobi singi, neen meke u be e sikiifi wantu Kownukondee singi gi den. Ala u be e meke moiti fu singi den singi. Baka dati den sama be e singi anga u. Den be e singi moin te. Den ten de be switi!

Son leisi te u be kaba sutudeli anga wan sama, da a be e waka go na a taa osu anga u. A be e sidon te u be e sutudeli anga a taa sama. Te u be tan wantu wiki a wan peesi da u be e gwe. U be e taigi den sutudi di be angii fu a waaleiti tuutuu, taki den mu leli den taa sama te enke u kon baka. A be moin fu si fa somen fu den be e si a sani ya enke wan pelensipali wooko.

Nownow a omen sama e go koi a den tabiki ya. A wataa baaw. Boiti dati a lai moin lanpeesi anga palmbon. Moo fuu, a neti u be e komoto a wan tabiki go na a taawan. Den poofosu efuso Dolfijn be lobi suwen na a boto sikin. Te u be de a liba tapu, i be e yee fa a boto be e meke na a wataa tapu. Te neti te a mun be kiin, da a se be e gei wan langa beenki pasi.

Baka di u peleiki feifi mun a den tabiki, neen u go a Porto Riko fu bai wan masyini boto. Di u doo, neen mi miti wan moin zendeling sisa den e kai Maxine Boyd. Mi be lobi en. A yonkuuyonkuu kaba a be lobi a peleikiwooko. Bakaten a go a Dominika enke zendeling te enke a yali 1950. Ma den lanti fu a kondee a be Lomusu sama, neen meke den yaki Maxine puu na a kondee. Fu di mi be e wooko a sipi, meke mi be sa tan wan mun namo a Porto Riko. Baka dati mi go wantu yali a den tabiki baka. Bakaten mi taki a miseefi taki’ Ronald, efi i wani a uman ya, yu á mu daaidaai. Baka dii wiki neen mi begi en. Baka sigisi wiki neen u toow. Den sende mi anga Maxine go a Porto Riko enke zendeling. Neen meke noiti mi á go aini a nyun boto.

U bigin anga a kelen wooko aini a yali 1956. U be lobi go luku den baala anga sisa. Somen fu den be pooti. Tu Kotoigi osufamii, di be abi omen pikin be e tan a Potala Pastillo. Mi be lobi boo tutu gi den. Wan leisi mi aksi wan fu den meisyo den e kai Hilda, efu a be wani go a peleikiwooko anga u. Neen a taki: „Mi wani, ma mi á poi. Mi ná abi nawan susu.” U bai wan susu gi en neen wi anga en go peleiki. Baka omen yali, di mi anga Maxine go a Brooklyn aini a yali 1972, neen wan fu den sisa di toon zendeling a dei de kon taki anga u. Den sende en go a Ekwador enke zendeling. A taigi u taki: „Wi á sabi mi moo noh?” Mi na a meisyo fu Pastillo di á be abi susu. A Hilda! U poolo te neen wataa lon a wi ain.

Aini a yali 1960, neen u bigin wooko na a beikantoo fu Porto Riko, di be de aini wan pikin osu a Santurce, San Juan. Biginbigin a mi anga Lennart Johnson be e du gaanse fu a wooko. En anga en uman a den fosi Kotoigi fu Dominika. Den foloisi go a Porto Riko aini a yali 1957. Bakaten, Maxine be e sende Wakititolen gi den sama di be sende akisi Betel. Ala wiki a moo enke 1000 Wakititolen a be e sende gi sama. A be lobi a wooko ya, bika a be e pakisei den somen sama di den buku ya be e yeepi fu sabi Yehofa.

Mi be lobi a wooko di mi be e du a Betel, bika a be e gi mi a okasi fu koboloiki mi kaakiti gi Yehofa. Ma a ná ala yuu a be makiliki. Aini a yali 1967 mi be mu seeka sani gi wan gaan konkelesi di be o holi a Porto Riko. A omen baala anga sisa be o kon na a konkelesi ya. Baala Nathan Knorr di be e tii a wooko fu Yehofa Kotoigi a ten de, be kon a Porto Riko. A be denki mi á be seeka sani gi den zendeling fu den kon a Porto Riko, ma a ná be tuu. Bakaten a kaasi mi. A taigi mi taki a be denki mi be poi seeka sani bun. Mi á piki en, ma mi be e fii enke a á libi bun anga mi. Mi ati be boon neen wan pisiten. Ma toku wan leisi di mi anga Maxine si Baa Knorr, a kai u go neen kambaa, neen a boli gi u.

A omen leisi u go luku den sama fu mi a  Ingiisikondee. Di mi anga mi mma kon a waaleiti, nda á be kon. Ma te den baala di be e wooko a Betel be e kon holi lezing, mma be e meke den tan a wi osu. Nda si taki den baala ya di be e teke fesi a Betel be abi sakafasi. Den á be de enke den pastoo di a be e buuse omen yali. A dopu aini a yali 1962 enke wan Yehofa Kotoigi.

Mi anga Maxine a Porto Riko baka di u toow. A taa fowtow a di u toow 50 yali aini 2003

Mi lobi uman, Maxine, dede aini a yali 2011. Mi e angii fu si en te a o weki baka. Na a sani ya e toosutu mi. Den 58 yali di mi anga en toow, u si fa den Yehofa Kotoigi a Porto Riko kon moo ipi. Biginbigin a wan sani fu 650 Kotoigi be de aini a kondee, nownow a beina 26.000 Kotoigi de aini a kondee! Fanafu 2013 na a Ameekankondee e luku a wooko fu Porto Riko. Den sende mi go a Wallkill, New York. A 60 yali mi tan a Porto Riko, neen meke mi e si miseefi enke wan Porto Riko sama. Mi be lobi Porto Riko, ma mi be abi fu go yeepi a wan taa kondee.

„GADU LOBI WAN SAMA DI E GI SANI ANGA PIISII”

Te anga now, mi lobi a wooko di mi e du a Betel gi Yehofa. Nownow mi pasa 90 yali. Mi wooko a fu gi a Betel famii taanga-sikin. Di mi kon a Wallkill, anga 600 baala anga sisa mi taki kaba. Son wan fu den e kon a mi fu taki anga mi fu den polobelema di den abi aini a toowlibi efuso taa polobelema. Taawan e wani sabi fa den sa fende wini fu a wooko di den e wooko a Betel. Taawan di á toow langa ete, e wani sabi sani fu a toowlibi. Son wan fu den baala di den sende go aini a pioniliwooko e kon taki anga mi tu. Mi e aliki ala den sama di e kon taki anga mi. Te a de fanowdu mi e taigi den taki: „’Gadu lobi wan sama di e gi sani anga piisii’. Neen meke i mu du i wooko anga piisii. A Yehofa yu e du en gi.”2 Korentesama 9:7.

Efi i wani piisii anga a wooko di yu e du a Betel efuso wan taa peesi, i mu pakisei saide a sani di yu e du pelensipali. Winsi san wi e du a Betel a Gadu wi e wooko gi. Ai yeepi „a koni saafu di u sa fitoow” fu gi den baala anga sisa leli a hii goontapu (Mateyesi 24:45). Winsi on pe wi e dini Yehofa, wi abi okasi fu gafa en. Meke u piisii anga san a gi u fu du, bika „Gadu lobi wan sama di e gi sani anga piisii”.

^ paragraaf 13 A toli fu Leonard Smith de aini A Waktitoren fu 15 april 2012.