Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2016

Sama sete a toowlibi? Saide a sete en?

Sama sete a toowlibi? Saide a sete en?

„Yehofa Gadu taki: ’A á bun fu a man wawan tan. Mi o meke wan sama gi en di fiti en, wan sama di sa yeepi en.’”GENESESI 2:18.

SINGI: 36, 11

1, 2. (a) Sama sete a toowlibi? (b) San a fosi man anga uman be e fusutan fu a toowlibi? (Luku a fowtow na a bigin.)

SAMA e si a toowlibi enke wan sani di de fanowdu. Sama sete a toowlibi? Saide a sete en? Wi o fusutan a toowlibi moo bun efu u sabi den sani ya. Wi o si den wini fu a toowlibi moo bun tu. Di Gadu be meke a fosi man Adan, a be gi en a wooko fu gi den meti nen. Ma Adan be si taki ala den meti be abi den paa, neen wawan á be abi ’wan sama di fiti en efuso wan sama di sa yeepi en’. Na a sani de meke Gadu meke Adan siibi dipi. A puu wan bansabon fi en, neen a meke wan uman. Baka dati Yehofa tyai a uman gi Adan. Neen a toon en uman. (Leisi Genesesi 2:20-24.) A sani ya e soi taki a Yehofa seefi sete a toowlibi.

2 Baka omen yali, Yesesi be taki a sani di Yehofa be taki aini a dyali fu Eden. A be taki: „Neen ede meke wan man o gwe fika en mma anga en dda. A o tan anga en uman,  da den o toon wan sikin” (Mateyesi 19:4, 5). Adan anga en uman be musu e fusutan taki den be fiti, bika a wan bansabon fu Adan Gadu be teke meke a uman. Noiti Yehofa be wani wan man anga en uman paati. A á be wani wan man abi omen uman efuso wan uman abi omen man.

A TOOWLIBI A WAN FU DEN SANI DI YEHOFA SETE

3. Saide Gadu sete a toowlibi?

3 Ná pikin piisii Adan be piisii di a fende a uman. Bakaten a kai en Efa. Efa be e fiti Adan. Yehofa be meke en fu a yeepi en. A toowlibi fu den be e gi den piisii (Genesesi 2:18). Gadu be sete a toowlibi fu di a be wani goontapu fuu anga libisama (Genesesi 1:28). Den pikin be o lobi den mma anga den dda. Ma baka wan pisiten den pikin ya be o gwe fika den mma anga den dda, da den be o go sete den osufamii. A hii goontapu be o fuu anga libisama. A den sama ya be o meke a goontapu ya toon wan paladeisi.

4. San pasa anga a fosi toowlibi?

4 Sani á waka bun anga a fosi toowlibi, di Adan anga Efa taangayesi Gadu. „A fosi sineki” di den e kai Saatan Didibii be koli Efa. A taigi en taki efu a nyan wan fu den sii fu a bon fu „sabi bun anga ogii”, a be o sabi sani di a á be sabi ete. A be o sabi san bun anga san ogii. Efa á lesipeki Adan enke a edeman fu a osufamii, bika a á taki anga en fosi a nyan a sii. Adan dati holibaka gi en uman, bika di Efa gi en a sii, a nyan tu. A so a taangayesi Gadu.Openbaring 12:9; Genesesi 2:9, 16, 17; 3:1-6.

A wan enkii fasi fa sani sa waka bun aini a toowlibi, a te man anga uman e aliki Yehofa. Te den nai gi taawan a fowtu fu den sani di den du

5. San wi e leli fu a fasi fa Adan anga Efa piki Yehofa?

5 Di Yehofa kai Adan anga Efa a kuutu, neen Adan gi en uman a fowtu. A taki: „Na a uman di i gi mi, gi mi a sii fu a bon, neen mi nyan.” Efa dati gi a sineki a fowtu. A taki na a sineki koli en (Genesesi 3:12, 13). Adan anga Efa be e suku ala sowtu sani fu soi saide den taangayesi Yehofa. Yehofa be sitaafu den fu a sani di den du. A toli fu Adan anga Efa e leli u wan sani! Ai soi u taki a wan enkii fasi fa sani sa waka bun aini a toowlibi, a te man anga uman e aliki Yehofa. Den á mu e gi taawan a fowtu fu den sani di den du.

6. San a tekisi fu Genesesi 3:15 e leli u?

6 Winsi fa Saatan meke a fosi man anga uman taangayesi Yehofa aini Eden, tokuso Yehofa taki wan polofeititoli  di e soi taki libisama o abi wan bun libi aini a ten di e kon. (Leisi Genesesi 3:15.) A polofeititoli de, e soi taki „a pikin fu a uman” be o masi Saatan. Ala den engel a hemel di e libi enke fa Yehofa wani, de enke wan uman gi Yehofa. A o meke wan fu den engel ya „masi” Didibii. A pikin fu a uman, o gi sama a okasi fu fende a libi di a fosi man anga uman be abi. Ala den sama di e libi enke fa Gadu wani o fende a okasi fu libi fu teego a goontapu, enke fa Yehofa abi a pakisei.Yohanisi 3:16.

7. (a) San pasa anga a toowlibi fanafu di Adan anga Efa taangayesi Gadu? (b) Fa man anga uman mu tyai denseefi aini a toowlibi?

7 Di Adan anga Efa taangayesi Gadu, a toowlibi fu den á waka bun. A sani de meke a toowlibi fu den bakapikin nai waka bun tu. Ala den umanpikin fu den, be o meke pikin anga pen. Umansama be o go e angii fu den man. Den manengee be o go e fooseli den uman. Den be o du ogii anga den efuso taigi den hati sani. A den sani ya wi e si aini a ten ya (Genesesi 3:16). Yehofa wani ala manengee lobi den osufamii. A wani den uman saka denseefi a den man ondoo (Efeisesama 5:33). Efu man anga uman e taki fiti anga denseefi, den o poi losi omen polobelema.

A TOOWLIBI FANAFU A TEN FU ADAN TE ENKE A FUUDU

8. Fa sani be waka anga a toowlibi fanafu a ten fu Adan te enke a ten fu a Fuudu?

8 Fosi Adan anga Efa dede, den meke omen manpikin anga umanpikin (Genesesi 5:4). Kain, a fosi manpikin fu den, be toow anga en famii. Lamek wan fu den bakapikin fu Kain, na a fosi man di be libi anga tu uman (Genesesi 4:17, 19). Fanafu a ten fu Adan te enke a ten fu Nowa, a wantu sama namo be e dini Yehofa. Wantu fu den sama ya a Abel, Heinok, Nowa anga en osufamii. Beibel taki aini a ten fu Nowa „den manpikin fu a tuu Gadu si fa den umanpikin fu libisama be moin. Neen den bigin teke ala den wan di den wani enke den uman”. Ma Gadu á be meke engel fu libi anga uman. Boiti dati, den pikin di den meke anga den uman, a be gaan gadyaa man. Den be e kai den Neifilim. A ten de, „libisama be e du somen ogii a goontapu”. Boiti dati „a soso ogii den be e pakisei aini den ati”.Genesesi 6:1-5.

9. San Yehofa du anga den ogii sama aini a ten fu Nowa? San wi e leli fu a sani di pasa na a ten de?

9 Yehofa be taki a be o sungu a goontapu anga wataa, da ala den ogii sama be o dede. Nowa, a be wan „peleikiman fu leti-du” (2 Peitilisi 2:5). Ma den sama á be e aliki den sani di Nowa be e taigi den. A soso den sani di den be gwenti du ala dei den be e poti pakisei. Wan fu den sani ya na a toow di den be e toow. Yesesi be taki, den sama fu a ten fu u be o de enke den sama fu a ten fu Nowa. (Leisi Mateyesi 24:37-39.) Aini a ten ya, a omen sama nai aliki a bun nyunsu fu a Kownukondee di wi e paati. Wi e  paati a bosikopu ya fosi a ogii goontapu ya poli. San wi e leli fu a ten fu Nowa? Wi e leli taki wi á mu meke sani enke toow efuso a meke di u wani meke pikin, toon a moo pelensipali sani gi u te da u feegete taki a dei fu Yehofa de koosube.

A TOOWLIBI BAKA A FUUDU TE ENKE A TEN FU YESESI

10. (a) Fa sama e si a didon di sama e didon anga denseefi? (b) Saide den sama di toow sa waka a Abalaham anga Sala baka?

10 A wan kodo uman Nowa be abi. Ala den boi fu Nowa be abi wan uman tu. Ma baka a Fuudu, a omen man be e libi anga omen uman. Aini son kondee sama e si a didon di man anga uman e didon anga denseefi enke wan lawlaw sani. Son leisi na a biibi fu den e gi den taanga-sikin fu du a sani de. Di Abalaham anga Sala be go a Kana-an, den be e tan koosube fu sama di á be e lesipeki a toowlibi. Yehofa be poli Sodom anga Gomora fu di den sama fu den foto ya á be e tyai denseefi bun. Abalaham á be de enke den sama fu den foto ya. Abalaham a be wan bun man. Den uman di toow, sa waka a Sala baka, bika a be e lesipeki en man. (Leisi 1 Peitilisi 3:3-6.) Abalaham be du ala san a be poi fu meke en boi Isaki toow anga wan uman di e dini Yehofa. Na aseefi sani Isaki du gi en boi Yakopu. A Yakopu na a afo fu den 12 lo fu Islayeli.

11. Fa a Weiti fu Mosesi be e yeepi den Islayelisama?

11 Bakaten, Yehofa meke wan kuudei anga a foluku fu Islayeli. A gi den a Weiti fu Mosesi. A weiti ya be e soi man anga uman di be e dini Yehofa san den be mu du fu sani waka bun aini a toowlibi. A be e taki fa sani mu waka te wan man abi omen uman. A be e soi den tu taki den á be mu toow anga sama di nai dini Yehofa. (Leisi Deitolonomi 7:3, 4.) Te den be abi wan gaan polobelema aini a toowlibi, den be sa go a den gaanwan fu kondee fu yeepi den. A weiti be e yeepi man anga uman tu fu den á didon anga wan taa sama boiti den toowpaa, fu den á dyalusu efuso e denki taki a taawan e du sani di á fiti. Winsi fa a weiti be e gi den pasi fu booko toow, tokuso a be e kibii a man anga a uman. Wan fu den sani di a Weiti be e taki, a taki wan man be sa booko toow efu en uman du „wan sani di á fiti” (Deitolonomi 24:1). A Beibel nai taki finifini san a den sani „di á fiti”. Ma tokuso a man á be poi booko toow fu lawlaw sani ede.Lefitikesi 19:18.

NOITI I MU GWE FIKA I TOOWPAA

12, 13. (a) Fa den man be e libi anga den uman aini a ten fu Maleyaki? (b) San o pasa anga wan dopu Kelesten di toow anga wan taa sama man efuso wan taa sama uman?

12 Aini a ten fu a polofeiti Maleyaki, a omen man be e fika den uman fu lawlaw sani ede. Den man ya be e booko toow fu toow anga wan moo yonkuu uman efuso wan uman di nai dini Yehofa. Aini a ten fu Yesesi den Dyu  be e fika den uman fu „iniiwan pikin sani” (Mateyesi 19:3). Yehofa e buuse a booko di sama e booko toow fu lawlaw sani.Leisi Maleyaki 2:13-16.

13 Aini a ten ya, a foluku fu Yehofa e si a paati di man anga uman e paati enke wan sani di á bun. Neen meke den nai paati lawlaw. Ma kon u taki wan dopudopu Kelesten di toow didon anga wan taa sama toowpaa, neen a booko a toow fi en fu a sa toow anga a sama ya. Efu sowan Kelesten á soi taki a sani di a du e hati en, den o puu en na a kemeente, bika a kemeente a wan peesi pe sama e libi wan kiin libi (1 Korentesama 5:11-13). Fosi den teke sowan Kelesten baka, a mu du sani di e soi taki a kengi. A mu soi taki ai hati en tuutuu taki a du sowan sani (Lukasi 3:8; 2 Korentesama 2:5-10). Beibel á taki o langa den owluman mu puu wan sama fu a kemeente fosi den teke en baka. Son leisi ai teke wan yali efuso wantu yali fosi a sama soi taki a sani di a du e hati en tuutuu. Ma winsi den teke sowan sama baka, tokuso a o abi fu „gi Gadu faantiwowtu fu a sani di a du”.Romesama 14:10-12; luku De Wachttoren fu 15 februari 1980 blz. 31, 32.

A TOOWLIBI FU DEN KELESTEN

14. Sowtu wini a Weiti fu Mosesi tyai gi a foluku?

14 A foluku fu Islayeli wooko anga a Weiti fu Mosesi moo enke 1500 yali. A Weiti ya tyai omen wini gi a foluku fu Gadu. A be e soi den san den mu du te den be abi polobelema aini a osufamii. Boiti dati, a be e seeka den gi a ten di a Mesiyas be o kon (Galasiyasama 3:23, 24). Di Yesesi dede, a foluku fu Gadu á be e wooko anga a Weiti fu Mosesi moo. Gadu be sete sani taa fasi (Hebrewsama 8:6). Gadu á be gi den Kelesten pasi fu du son sani di a Weiti fu Mosesi be e gi den pasi fu du.

15. (a) Fa Gadu wani Kelesten si a toowlibi? (b) San wan Kelesten mu holi a pakisei te a wani booko toow?

15 Wan leisi neen wan Faliseiman akisi Yesesi wan sani fu a toowlibi. Yesesi piki en taki, Gadu be gi den Islayelisama pasi fu booko toow di a be gi den a Weiti fu Mosesi, ma a ná a sani de a be abi a pakisei di a sete a toowlibi (Mateyesi 19:6-8). A sani di Yesesi piki en e soi taki, Kelesten mu si a toowlibi enke fa Gadu be sete en na a bigin (1 Timotiyesi 3:2, 12). Fu di den sama di toow „a wan sikin,” meke Gadu á wani den paati. A lobi di den lobi Gadu anga a lobi di den lobi denseefi o yeepi den fu den á paati. Efu wan man booko toow anga en uman sondee a uman du ogii neen osu efuso wan uman booko toow anga en man sondee a man waka gi en, den ná abi a okasi fu toow moo (Mateyesi 19:9). A wan Kelesten seefi mu luku efu a o gi en toowpaa paadon te a waka gi en. Efu a wan di waka, soi taki a sani di a du e hati en, da na a taawan  mu luku efu a wani gi en paadon, enke fa a polofeiti Hoseya be gi en uman Gomer paadon di a du ogii neen osu. Na a sani ya Yehofa du tu di a foluku fu Islayeli be soi taki den ogii di den be du be e hati den (Hoseya 3:1-5). Ma efu wan Kelesten sabi taki en toowpaa waka gi en, neen a didon anga en, da a sani de wani taki a gi en paadon. Beibel nai gi den a okasi fu booko toow moo.

16. San Yesesi taki fu den sama di poi tan sondee den toow?

16 Yesesi taki, a wan enkii sani di sa meke wan Kelesten booko toow, a te en toowpaa waka gi en efuso te a du ogii neen osu. Baka dati a taki fu den sama di á toow. A taki: „Meke den sama di poi, tan sondee fu toow” (Mateyesi 19:10-12). A omen sama á wani toow fu di den wani dini Yehofa sondee fu sani puu den pakisei. A fiti fu u gafa ala den sama de!

17. San o yeepi wan Kelesten fu sabi efu a mu toow?

17 San o yeepi wan sama fu sabi efu a mu toow? A sama seefi mu luku efu a poi tan sondee fu toow. A apostel Pawlesi be e gafa den sama di á wani toow. Ma a taki: „Ma fu di hululibi de na ala se, meke wan man mu abi en uman, wan uman seefi mu abi en man.” A taki tu: „Ma efu den á poi holi denseefi, meke den toow, bika a moo bun fu toow, pe fu den fii fu den e moo den.” Ma te wan sama toow, da a sani de e yeepi en fu a á du sani di á fiti. Sani enke a pee di sama e pee anga den sen peesi, efuso taa sani di á fiti. Ma den sama di wani toow mu luku tu efu den doo a yali fu toow. Pawlesi taki: „Ma efu wan sama á toow, neen a si enke ai tyai enseefi a wan fasi di á fiti, efu a á yonkuu tumisi, neen a wani toow, da meke a toow” (1 Korentesama 7:2, 9, 36; 1 Timotiyesi 4:1-3). Nawan sama mu gi wan yonkuuwan taanga-sikin fu toow, fu di den fii fi en e fooseli en. Bika kande a yonkuuwan á kaba fu tyai den faantiwowtu fu a toowlibi.

18, 19. (a) Fa a toowlibi fu wan Kelesten e bigin? (b) San wi o luku aini a taa artikel?

18 A toowlibi fu wan Kelesten e bigin te wan dopu baala toow anga wan dopu sisa. Den mu lobi Yehofa anga den hii ati. A lobi di den lobi denseefi mu meke den wani tan den hii libi anga denseefi. Yehofa o meke sani waka bun gi den, bika den du san Beibel taki. Den „toow anga wan bakaman fu „Masaa” (1 Korentesama 7:39). Sani o waka bun aini den toowlibi efu den e wooko anga den leli fu Beibel ala yuu.

19 Nownow wi e libi aini „den kiiboi dei”. A omen sama ná abi den manii di o yeepi den fu abi wan bun toowlibi (2 Timotiyesi 3:1-5). Aini a taa artikel wi o taki fu wantu tekisi di o yeepi Kelesten fu abi wan toowlibi di e gi den piisii winsi san e pasa. A sani ya o yeepi den tu fu tan waka na a pasi di e tyai sama go a teego libi.Mateyesi 7:13, 14.