Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2016

San o yeepi wan Kelesten fi en toowlibi waka bun?

San o yeepi wan Kelesten fi en toowlibi waka bun?

„Meke ibii man lobi en uman enke fa a lobi enseefi. A uman mu lesipeki en man anga en hii ati.”EFEISESAMA 5:33.

SINGI: 87, 3

1. Te wan man anga wan uman toow, a libi e switi gi den. Ma san sa miti den bakaten? (Luku a fowtow na a bigin.)

TE A MAN anga a uman si denseefi na a toow dei, da ná pikin piisii den e piisii. A pisiten di den be e leli sabi denseefi, a lobi fu den be e kon moo taanga dei fu dei. Te fu kaba den e seeka sani fu toow. Te den toow kaba, den abi fu kengi son sani di den be gwenti du efu den wani libi na a wan. A Yehofa sete a toowlibi. A wani a toowlibi waka bun, neen meke a soi man anga uman san den mu du fu den toowlibi waka bun (Odo 18:22). A soi den tu taki ’banowtu o miti den sama di toow’ (1 Korentesama 7:28). San o yeepi toowpaa fu den sowtu polobelema ya á miti den tumisi? San Kelesten mu du efu den wani den toowlibi waka bun?

2. Sowtu lobi mu de aini wan osufamii?

 2 Beibel e leli u taki lobi de taanga fanowdu. Ma a omen sowtu fasi de fa man anga uman mu soi lobi aini a toowlibi. A de taanga fanowdu fu den poolo anga denseefi. Den mu lobi denseefi. Te den meke pikin, den mu lobi den tu. Ma na a lobi di Beibel e taki e meke wan toowlibi waka bun. Apostel Pawlesi be taki fu a lobi ya di a be taki: „Meke ibii man lobi en uman enke fa a lobi enseefi. A uman mu lesipeki en man anga en hii ati.”Efeisesama 5:33.

SOWTU FAANTIWOWTU MAN ANGA UMAN ABI AINI A TOOWLIBI?

3. Fa toowpaa mu lobi denseefi?

3 Pawlesi sikiifi taki: „Manengee, i mu lobi yu uman, enke fa Kelestesi lobi a kemeente, te a dede fi en ede” (Efeisesama 5:25). Den Kelesten e waka a Yesesi baka, neen meke den lobi taawan enke fa Yesesi be lobi den bakaman fi en. (Leisi Yohanisi 13:34, 35; 15:12, 13.) Wan Kelesten di toow mu lobi en toowpaa anga en hii ati. A mu de kabakaba fu dede gi en efu a de fanowdu. Ma te polobelema de aini a toowlibi, da kande den nai lobi denseefi so moo. San o yeepi den te a lobi e koo? Na a lobi di Beibel taki Kelesten mu abi. A lobi de „abi boo anga ala sani. Ai biibi ala sani, ai howpu ala sani, ai holidoo winsi san e pasa”. A lobi ya „e tan fu teego” (1 Korentesama 13:7, 8). Te wan toowpaa e holi a mofu di den meke a pakisei, te den e meke moiti fu tan anga denseefi, da den o suku yeepi a Yehofa te den abi polobelema.

4, 5. (a) San na a faantiwowtu fu a edeman fu a osufamii? (b) Fa wan uman mu si a faantiwowtu fi en man? (c) San wan toowpaa be mu du di den toow?

4 Pawlesi be soi san na a faantiwowtu di man anga uman abi aini a toowlibi. A be taki: „Meke den uman saka denseefi a den man ondoo, leti enke fa den e saka denseefi a Masaa ondoo, bika a man na a ede fu a uman, leti enke fa Kelestesi na a ede fu a kemeente” (Efeisesama 5:22, 23). A sani ya á wani taki a man bun moo en uman. Yehofa be soi taki a uman abi wan gaan faantiwowtu, bika a be taki: „A á bun fu a man wawan tan. Mi o meke wan sama gi en di fiti en, wan sama di sa yeepi en” (Genesesi 2:18). Wan uman mu yeepi en man fu a de wan bun osufamii edeman. A man mu meke moiti fu waka a Yesesi baka, bika a Yesesi na a „ede fu a kemeente”. Te a man e meke a moiti ya, da en uman o fii bun. A o moo makiliki gi en fu lesipeki en man. A o moo makiliki gi en fu holibaka gi en man tu.

Wi e fusutan useefi moo bun di u du sani enke fa Yehofa wani

5 Cathy di toow anga Fred taki: „Di mi á be toow mi be e solugu miseefi. Ma di mi toow mi be mu kengi son sani. Mi be mu fitoow mi man taki neen o solugu taki sani waka bun. A á be makiliki, ma nownow wi e fusutan useefi moo bun di u du sani enke fa Yehofa wani.” [1] (Luku a pisi: Ete wan pelensipali sani.) Fred taki: „A á be makiliki fu teke fesi. Bika mi be mu e du sani fu u tu man fii bun. Ma mi be e  begi Yehofa fu a yeepi mi. Mi be e aliki mi uman tu. Neen meke nownow sani e go moo bun. Mi e si taki wi e fusutan useefi bun!”

6. Fa lobi o yeepi man anga uman fu „libi na a wan” te den abi polobelema?

6 A toowlibi o waka bun efu den sama di toow ’abi boo anga denseefi. Den mu gi denseefi paadon anga den hii ati te den meke wan fowtu’. Den o go e meke fowtu, bika den a sondu sama. Te den meke fowtu, den mu luku san den sa du fu a á pasa moo. Den mu leli fu gi denseefi paadon. Boiti dati, den mu meke moiti fu soi a lobi di Beibel e taki. Na a lobi ya „e meke sama e libi na a wan” (Kolosesama 3:13, 14). Toowpaa o man soi a lobi ya gi denseefi te den abi pasensi, te den e libi switi anga denseefi anga te den „nai holi taawan na ati” (1 Korentesama 13:4, 5). Te den kwali, den mu meke moiti fu taki fusutan denseefi fosi a taa dei (Efeisesama 4:26, 27). Te wan fu den du wan hati sani anga a taawan a mu abi sakafasi anga deki-ati fu taigi en taki „wai ede gi mi baa”. A sani ya o yeepi den fu losi a polobelema moo gaw. Den o moo lobi denseefi tu.

A DE FANOWDU FU POOLO ANGA I TOOWPAA

7, 8. (a) San Beibel e taki fu a didon di man anga uman e didon anga denseefi? (b) Saide toowpaa mu e poolo anga denseefi?

7 Beibel e taki fa toowpaa mu si a didon di man anga uman e didon anga denseefi. (Leisi 1 Korentesama 7:3-5.) Den sama di toow mu poti pakisei a san den toowpaa abi fanowdu. Den mu e booko den ede anga a fasi fa den toowpaa e fii tu. Efu wan man nai libi switi anga en uman, a o taanga gi a uman fu didon anga en anga piisii. Beibel e taki wan man mu ’libi anga en uman anga koni’ (1 Peitilisi 3:7). Noiti wan man efuso wan uman mu dwengi en toowpaa fu didon anga en, ma a den tu man mu wani. Ai moo teke ten fosi wan umansama abi a fii fu didon anga en man, ma manengee de taa fasi. Den e kisi a fii ya moo gaw. Tokuso a ná te a man efuso te a uman fii, da den mu didon namonamo, ma ala den tu man mu wani.

8 Beibel nai soi on fa efuso omen leisi wan man efuso wan uman mu poolo anga en toowpaa. Ma ai soi fa son man anga uman be e poolo anga denseefi (Singi fu Salomo 1:2; 2:6). Man anga uman mu libi switi anga denseefi.

9. Saide a á bun fu abi a fii fu didon anga wan sama di wi á toow anga en?

9 Te u lobi Gadu anga taa sama, u ná  o meke nawan sani poli u toowlibi. Son sama poli den toowlibi fu di den e luku buku, efuso felon di e soi fa man anga uman e didon anga denseefi. U mu meke moiti fu wi á poti pakisei a den sowtu sani de. Wi á mu poolo gi wan sama di wi á toow anga en, bika a sani de be o soi taki wi á lobi u toowpaa. Holi a pakisei taki Gadu e si san wi e du anga san wi e denki. A sani ya o gi u taanga-sikin fu du san a wani. A o gi u taanga-sikin tu fu lobi u toowpaa.Leisi Mateyesi 5:27, 28; Hebrewsama 4:13.

TE POLOBELEMA DE AINI A TOOWLIBI

10, 11. (a) Omen sama e booko toow aini a ten ya? (b) San Beibel e taki fu booko toow? (c) San o yeepi toowpaa fu den á booko toow gaw?

10 Efu wan toowpaa nai losi den polobelema di den abi, den o wani paati efuso booko a toow. Aini son kondee, afu fu den sama di e toow e booko toow. A sani ya nai pasa makiliki aini a Kelesten kemeente. Ma tokuso, dei fu dei a omen Kelesten e abi gaan polobelema aini den toowlibi.

11 Beibel taki: „Wan uman á mu fika en man. . . . Ma efu a fika en, da a mu tan sondee man, efuso a mu kon bun anga en man baka. Wan man á mu fika en uman tu” (1 Korentesama 7:10, 11). Kande son toowpaa e si enke den ná o poi losi den polobelema fu den. Kande den e si enke den mu paati namonamo. Ma Yesesi be soi taki Gadu nai si booko toow enke wan lawlaw sani. A be taki: „Nawan sama mu paati san Gadu tyai kon a wan” (Mateyesi 19:3-6; Genesesi 2:24). Yehofa á wani toowpaa booko toow (1 Korentesama 7:39). Ala u mu holi a pakisei taki Yehofa o akisi u faantiwowtu fu den sani di wi e du. A sani ya o yeepi u fu losi den polobelema fu u fosi den kon moo ogii.

Kelesten toowpaa e losi den polobelema fu di den e meke Gadu tii den

12. Sowtu polobelema e meke toowpaa e wani booko toow?

12 Saide son toowpaa e abi gaan polobelema? Son wan fu den be abi wan taa denki fu a toowlibi. Te sani nai go enke fa den be denki, da den e fii booko-saka. Taawan ati e boon. Boiti dati a ná ala sama kiya na aseefi fasi. A ná ala den e du sani na aseefi fasi tu. Son leisi den anga den main efuso den pai nai go. Son leisi te den mu koboloiki den moni efuso te den mu kiya den pikin, den nai denki go na a wan se. Ma a wan bun sani fu si taki gaanse Kelesten toowpaa e losi den polobelema fu di den e meke Gadu tii den.

13. On ten wan sama be sa paati anga en toowpaa?

13 Son leisi a bunbun sani e pasa di e meke wan man anga uman paati. Son  sama paati fu di en toowpaa á wani solugu en. Son leisi den toowpaa e fon den. Boiti dati den e tapu den fu dini Yehofa. Te wan toowpaa abi polobelema, den mu akisi den owluman fu yeepi den. Den baala ya abi ondoofeni. Den sa yeepi i fu si fa i sa wooko anga den sani di i leli. Te wan toowpaa e akisi Yehofa fu a yeepi den anga en santa yeye, da a o yeepi den fu du san Beibel taki. A o yeepi den tu fu abi den manii di wan Kelesten mu abi. (Galasiyasama 5:22, 23) [2]—Luku a pisi: Ete wan pelensipali sani.

14. San Beibel e taki te wan Kelesten toowpaa nai dini Yehofa?

14 Beibel e soi taki a abi wini te wan baala efuso wan sisa tan anga en toowpaa, winsi en toowpaa nai dini Yehofa. (Leisi 1 Korentesama 7:12-14.) Wan man efuso wan uman di nai dini Yehofa „santa” te a toow anga wan sama di e dini Yehofa. Den yonkuu pikin di den abi „santa” tu, neen meke Gadu e kibii den. Pawlesi be taigi den sama di toow taki: „Uman, i sabi efu yu o poi yeepi i man fu a teke a biibi? Man, i sabi efu yu o poi yeepi yu uman fu a teke a biibi?” (1 Korentesama 7:16). A omen baala efuso sisa yeepi den toowpaa fu dini Yehofa.

15, 16. (a) San Beibel taki fu Kelesten uman di abi wan man di nai dini Yehofa? (b) San wan Kelesten mu du te en toowpaa fika en?

15 A apostel Pawlesi taigi Kelesten uman taki den mu saka denseefi a den man ondoo. A taki: „Saka useefi a u man ondoo. Te son wan fu den á wani du san Gadu Wowtu e taki, da a fasi fa wi e tyai useefi sa meke den kon a biibi sondee fu u taigi den wan sani, bika denseefi si fa wi e libi wan kiin libi  anga fa wi abi lesipeki. A uman sa taki wawan leisi anga en man fu Beibel, ma efu a wani en man kon aini a tuu biibi, a mu ’abi lesipeki anga sakafasi. Den manii ya mu de enke wan koosi di nai poli neen sikin. A den sani ya Gadu lobi.’1 Peitilisi 3:1-4.

16 San wan Kelesten mu du efu en man efuso en uman di nai dini Yehofa wani paati anga en? Beibel taki: „Efu a man efuso a uman di á de a biibi wani gwe, fika en meke a gwe. Efu a gwe, da a baala efuso a sisa ná abi fu tan anga en toowpaa namonamo. Gadu wani u libi waka bun” (1 Korentesama 7:15). Winsi fa sani o waka moo bun te den paati, tokuso Beibel e soi taki a man efuso a uman di e dini Yehofa, á poi toow anga wan taa sama. Boiti dati, a á mu dwengi en toowpaa fu tan anga en. Kande a wan di nai dini Yehofa o wani kon bun anga en. Kande a toon wan sama di e dini Yehofa bakaten.

SAN MU DE U MOO GAAN BOOKO-EDE AINI A TOOWLIBI?

Te wi e poti a dini di wi e dini Yehofa a fesi, wi o moo piisii aini a toowlibi (Luku paragraaf 17)

17. San toowpaa mu poti a fesi?

17 Fu di wi e libi a den „kiiboi dei” fu a goontapu ya, meke ’a libi e taanga’ gi u (2 Timotiyesi 3:1-5). Neen meke wi abi Yehofa fanowdu fu yeepi u. Pawlesi be sikiifi taki „a ten di fika á langa moo. . . . Meke den man di abi uman, de enke den ná abi uman. . . . Meke den sama di e wooko anga den sani fu a goontapu, libi enke den sama di nai wooko anga den sani ya tumisi” (1 Korentesama 7:29-31). Pawlesi á be wani soi taki den sama di toow mu poti den toowpaa a wan se. Ma fu di wi e libi aini den lasiti dei, meke u mu poti a dini fu Yehofa a fesi.Mateyesi 6:33.

18. Saide Kelesten poi abi wan toowlibi di e waka bun?

18 Winsi omen sama e booko toow aini a ten ya, tokuso u toowlibi poi waka bun. Ma efu u wani u toowlibi waka bun, u mu meke moiti fu wi anga Yehofa toon bun mati. Boiti dati, u mu e mosoo anga en foluku, u mu wooko anga den leli fu Beibel. U mu meke a santa yeye fu Yehofa tii wi tu. Efu wi e du den sani ya, u na o „paati san Gadu tyai kon a makandii”.Malikisi 10:9.

^ [1] (paragraaf 5) Den kengi wantu nen aini a artikel ya.

^ [2] (paragraaf 13) Luku a pisi di den e kai „San Bijbel e taki fu brokotrow èn fu a prati di trowpatna e prati?” na a pisi Tra prenspari sani aini a buku Meki Gado tan lobi yu.