Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2016

I si enke a de fanowdu fu yeepi taawan fu go a fesi?

I si enke a de fanowdu fu yeepi taawan fu go a fesi?

„Mi o leli u bun sani”ODO 4:2.

SINGI: 93, 96

1, 2. Saide u mu leli taawan fu tyai faantiwowtu aini a kemeente?

YESESI wooko taanga fu peleiki fu a Kownukondee. Ma a be e teke ten leli den disipel fi en tu. A soi den fa den mu leli sama anga fa den mu yeepi a foluku fu Gadu. A leli den disipel fu de enke sikapuman di e solugu den sikapu fi en (Mateyesi 10:5-7). Filipesi be e peleiki fayafaya tu, ma toku a leli den umanpikin fi en fu peleiki tu (Toli 21:8, 9). Aini a ten ya, u mu yeepi taawan fu go a fesi tu. Saide?

2 A omen sama de aini den kemeente a hii goontapu di á dopu ete. Den sama ya abi leli fanowdu. U mu yeepi den fu fusutan saide a de fanowdu fu denseefi leisi efuso sutudeli Beibel. U mu yeepi den fu leli taa sama tu. U mu yeepi den dopu baala, fu den sa toon dinali efuso owluman. Ala sama di de aini a kemeente sa yeepi den nyun wan.Odo 4:2.

 LELI NYUN WAN FA DEN MU SUTUDELI BEIBEL

3, 4. (a) San Pawlesi taki u mu du efu u wani sani waka bun te wi e peleiki? (b) Fosi u gi den sutudi fu u taanga-sikin fu sutudeli Beibel, san useefi mu du?

3 Ala sama di e dini Yehofa mu e sutudeli a Beibel efu den wani sabi fa Gadu wani den tyai denseefi. Apostel Pawlesi be taigi den baala anga sisa a Kolose taki: „Wi á tapu fu begi gi u. Wi á tapu fu begi Gadu fu a gi u koni anga fu a yeepi u anga en yeye fu u fusutan sani moo bun.” Saide den Kolosesama be mu sutudeli a Wowtu fu Gadu? A sani ya be o meke den koni. A be o yeepi den fu ’tyai denseefi enke fa Yehofa wani, fu den sa de anga piisii ala yuu’. A be o yeepi den fu du ’ala den bun wooko’ di Yehofa be wani den du. Moomoo fu peleiki a bun nyunsu (Kolosesama 1:9, 10). Neen meke te wi e sutudeli anga wan sama u mu yeepi en fu fusutan taki a mu e leisi, a mu e sutudeli Beibel efu a wani dini Yehofa.

4 Efu useefi nai sutudeli Beibel, u ná o man yeepi den sutudi fu fusutan taki a sani de pelensipali. Efu wi e leisi Beibel da wi e sidon pakisei san u leisi, wi o fende wini fi en te wi e peleiki. Te wan sama akisi u wan muliki sani, wi o man soi en a piki aini Beibel. Boiti dati te wi e leisi fa Yesesi, Pawlesi anga taawan be e du a peleikiwooko, da wi e fende taanga-sikin fu peleiki, winsi a taanga son leisi. Te wi e taigi taawan san u leli anga den wini di u fende fu di wi e sutudeli Beibel, da a sani de sa gi den taanga-sikin fu sutudeli a Beibel tu.

5. Fa u sa yeepi den sutudi fu u fu abi a gwenti fu sutudeli Beibel?

5 Kande yu e pakisei taki: „Fa mi sa yeepi mi sutudi fu e sutudeli Beibel ala yuu?” Kande i sa soi en fa a mu seeka fosi i sutudeli anga en. I sa gi en taanga-sikin fu leisi a pisi di den e kai „Tra prenspari sani”, aini a buku di den e kai San Bijbel e leri wi trutru. Gi en taanga-sikin fu a leisi den tekisi tu. Baka dati, i sa soi en fa a sa seeka gi den komakandaa fu a sa gi piki. Gi en taanga-sikin fu a leisi den Wakititolen anga den Ontwaakt. I sa soi en fa a sa fende piki di abi fu du anga  Beibel. I sa soi en fa a mu wooko anga a Saanantongo Watchtower Library anga a Watchtower ONLINE LIBRARY a internet. Efi i puubei ala den sani ya, a o lobi en. A o wani leli moo tu.

6. (a) Fa i sa yeepi i sutudi fu lobi a Beibel? (b) San wan sutudi o du te a kon lobi a Wowtu fu Gadu?

6 Te wi e leli sama, u wani yeepi den fu fusutan taki Beibel pelensipali, bika ai yeepi u fu sabi Yehofa moo bun. Wi á mu dwengi en fu sutudeli, ma u mu soi en fa enseefi mu sutudeli. O moo ai leli sani fu Beibel o moo a o fii enke a psalm sikiifiman di be singi taki: „A kon di mi e kon moo koosube a Gadu bun gi mi. Na a Moo Hei Masaa Yehofa e kibii mi” (Psalm 73:28). A yeye fu Yehofa o yeepi ala den sama di wani toon en mati.

SOI DEN NYUN WAN FA DEN MU LELI TAAWAN

7. Fa Yesesi leli den bakaman fi en? (Luku a fowtow na a bigin.)

7 U sa leli omen sani fu a fasi fa Yesesi leli den apostel. Yesesi be e tyai den te a be e go peleiki, da den be e luku fa a be e leli sama. A soi den fa den mu peleiki tu (Mateyesi kapitel 10) [1] (Luku a pisi: Ete wan pelensipali sani.) Den be si fa Yesesi be e leli sama, neen meke a á teke langa fosi denseefi be poi leli taawan (Mateyesi 11:1). Meke u luku tu sani di u sa leli den nyun wan.

8, 9. (a) Fa Yesesi be e taki anga sama aini a peleikiwooko? (b) Fa u sa yeepi nyun peleikiman fu taki anga sama enke fa Yesesi be e taki anga sama?

8 Fa fu taki anga taawan. A ná anga gaan kulu namo Yesesi be e taki. A be e taki anga wan kodo sama tu. A be e taki switi anga den. Wan leisi a be taki anga wan uman di be go kisi wataa a wan peti koosube fu a foto Sikar (Yohanisi 4:5-30). Yesesi be taki anga wan man di den e kai Mateyesi Leifi tu. A man ya be e piki lantimoni. Baka dati a akisi en efu a wani toon wan disipel fi en. Mateyesi toon wan disipel fu Yesesi. Boiti dati a kai Yesesi anga wantu taa sama kon nyan neen osu. Di den go a Mateyesi osu, Yesesi taki anga omen sama ape.Mateyesi 9:9; Lukasi 5:27-39.

Te wi e taki switi anga sama, den o wani aliki den sani di wi e leli den

9 Yesesi taki moin anga Nataniyeli, winsi fa Nataniyeli be taki ogii fu den sama fu Nasaleti. Yesesi a be wan Nasaletisama. Tokuso a taki switi anga en. Neen meke Nataniyeli be wani sabi moo fu Yesesi (Yohanisi 1:46-51). Den toli ya e soi taki te wi e taki switi anga sama, den o wani aliki  den sani di wi e leli den. [2] [Luku a pisi: Ete wan pelensipali sani.] Efu u leli den nyun wan taki so anga sama, den o moo lobi a peleikiwooko.

10-12. (a) San Yesesi be e du te a be si taki wan sama wani yee a bun nyunsu? (b) Fa u sa yeepi nyun peleikiman fu leli sama den sani di sikiifi aini Beibel?

10 Leli den sama di wani aliki. Yesesi be abi omen sani fu du. Ma te sama be wani aliki en, a be e leli den omen sani. Wan dei, neen omen sama kon a wan lanpeesi fu aliki Yesesi. Yesesi anga Peitilisi go aini wan boto, neen Yesesi leli den sama. Baka dati a be wani leli Peitilisi wan sani tu. A du wan wonduu. A meke Peitilisi kisi tyaipi fisi. Neen a taigi Peitilisi taki: „Fanafu tide yu o go e kisi libisama.” Neen wantenwanten Peitilisi anga den sama di be de anga en „tyai den boto go a se, neen den fika ala sani” go waka a Yesesi baka.Lukasi 5:1-11.

11 Nikodeimesi be wani sabi Yesesi moo bun. Ma Nikodeimesi a be wan fu den man di be de na a moo gaan kuutu osu fu den Dyu. Fu di a be e booko en ede anga san sama o taki, meke a go luku Yesesi a neti. Yesesi á yaki en, ma a teke en ten leli en pelensipali sani (Yohanisi 3:1, 2). Ala yuu Yesesi be e teke en ten fu leli sama den sani di sikiifi aini Beibel. A be e taanga den biibi. A be e du a sani de anga en hii ati. Useefi mu de kabakaba fu go a den sama a wan yuu di moo bun gi den. U mu meke ten fu yeepi den fu fusutan a Beibel.

12 Te wi e wooko anga nyun peleikiman, u mu leli den fu go a den sama di wani aliki baka. U sa akisi den fu go anga u te wi e go a sutudi efuso gobaka. Da den o si fa den mu leli taawan. Den o si tu fa a switi fu yeepi wan sama fu sabi Yehofa. Den nyun peleikiman ya o de fayafaya fu go a den sama di be aliki den baka. Den o meke moiti fu sutudeli anga den tu. Boiti dati den o leli fu abi pasensi. Den ná o gi abaa gawgaw te den á poi miti sama a osu.Galasiyasama 5:22; luku a faki „ A á gi abaa”.

LELI NYUN WAN FA DEN MU YEEPI DEN BAALA ANGA DEN SISA

13, 14. (a) San yu e leli fu den sama di be e yeepi taawan aini a ten fu Beibel? (b) Fa u sa leli nyun peleikiman anga yonkuuwan fu soi lobi gi den baala anga sisa?

13 Yehofa wani a foluku fi en lobi denseefi enke baala anga sisa. A wani den yeepi denseefi tu (Leisi Lukasi 22:24-27; 1 Peitilisi 1:22.) Beibel taki Yesesi gi ala sani te doo en libi seefi, fu yeepi taawan (Mateyesi 20:28). Dorkas „du omen bun sani. A be e meke omen sani gi den pootiman” (Toli 9:36, 39). Maliya „wooko taanga” gi den baala anga sisa a Rome (Romesama 16:6). Fa u sa yeepi den nyun wan fu fusutan taki a de taanga fanowdu fu libi bun anga den baala anga sisa?

Leli nyun wan fa den mu yeepi den baala anga den sisa (Luku paragraaf 13, 14)

 14 Te wi e go luku gaandi sama efuso siki sama, da u sa kai wan nyun peleikiman fu go anga u. Te mma anga dda e go luku gaandi sama den sa tyai den pikin fu den, efu a fiti fu den go. Owluman sa tyai yonkuuwan efuso nyun wan te den e go boli gi gaandi baala anga sisa efuso te den e go du wan wooko gi den a den osu. Te den yonkuuwan anga den nyun wan si fa den baala anga sisa e booko den ede anga taawan, den o booko den ede anga den tu. Te wan owluman be e go peleiki a wan boiti peesi, a be lobi go luku wantu baala anga sisa di e tan ape. Wan yonkuu baala be lobi go anga en. Di a si fa a owluman be e booko en ede anga den sama, enseefi be e meke moiti fu yeepi den baala anga sisa fi en tu.Romesama 12:10.

15. Saide den owluman mu yeepi den taa baala fu go a fesi?

15 Yehofa gi manengee a faantiwowtu fu yeepi a kemeente fu den fusutan a Wowtu fu Gadu. Neen meke den baala mu sabi fa den mu holi bun lezing. Efu yu a wan owluman, da kande i sa aliki fa wan dinali e holi wan lezing da i yeepi en fu a du en moo bun (Nehemiya 8:8). [3]—Luku a pisi: Ete wan pelensipali sani.

16, 17. (a) Fa Pawlesi yeepi Timotiyesi fu go a fesi? (b) Fa owluman sa yeepi baala fu toon sikapuman aini a kemeente?

16 A de fanowdu fu yeepi moo baala fu toon sikapuman aini a kemeente. Di Pawlesi yeepi Timotiyesi fu go a fesi, a gi en taanga-sikin fu yeepi taawan. Pawlesi taki: „Meke a bun-ati di Gadu e soi den sama di de wan anga Kelestesi Yesesi, e gi i kaakiti naamo. Taigi den man di e aliki Gadu ala yuu den sani di mi taigi i, di omen sama e taki fi en. Da den man ya seefi o koni sai fu leli taawan” (2 Timotiyesi 2:1, 2). Timotiyesi leli omen sani fu Pawlesi, di be de wan owluman anga wan apostel. A be leli fa a sa du a peleikiwooko moo bun, anga fa a mu yeepi taawan aini a kemeente.2 Timotiyesi 3:10-12.

17 Pawlesi be de omen ten anga  Timotiyesi fu di a be wani leli en bun (Toli 16:1-5). Owluman sa waka a Pawlesi baka. Den sa tyai dinali di abi ondoofeni te den e go gi wan sama taanga-sikin. Da a dinali o sabi fa a mu leli taawan anga fa a mu soi lobi gi taawan. A o leli fu pasensi anga taawan tu. Boiti dati a o fitoow Yehofa te ai yeepi den baala anga sisa.1 Peitilisi 5:2.

A DE FANOWDU FU LELI TAAWAN

18. Saide u mu si a yeepi di u mu yeepi taawan fu go a fesi, enke wan pelensipali sani?

18 Aini den lasiti dei ya, a de fanowdu fu leli taawan fu peleiki moo bun. Baala de fanowdu fu yeepi a kemeente tu. Yehofa wani a foluku fi en go a fesi. A gi wi a gaandi fu yeepi den nyun wan. Neen meke a de taanga fanowdu fu meke moiti fu leli taawan enke Yesesi anga Pawlesi. U mu yeepi omen sama fu go a fesi, bika a peleikiwooko mu du fosi a kaba kon.

19. Fa u du sabi taki wi o fende wini te wi e yeepi taawan fu go a fesi?

19 Ai teke ten fu yeepi nyun wan fu go a fesi. Ma Yehofa anga Yesesi o yeepi u fu sabi san na a moo bun fasi fu yeepi den, a ná abi misi. Wi o piisii te wi o si fa den sama di u yeepi, ’e wooko taanga, anga fa den e meke moiti’ aini a kemeente efuso a peleikiwooko (1 Timotiyesi 4:10). Useefi mu meke moiti fu go a fesi tu. Enke Kelesten u mu meke moiti fu abi bun manii. U mu meke moiti tu fu wi anga Yehofa toon bun mati.

^ [1] (paragraaf 7) Yesesi taigi den disipel fi en taki (1) den mu peleiki fu a Kownukondee; (2) den mu biibi taki Gadu o gi den nyannyan anga den koosi di den abi fanowdu; (3) den á mu sitee anga den sama; (4) den mu fitoow Gadu te tesi e miti den; (5) den á mu feele san sama be o du anga den.

^ [2] (paragraaf 9) A buku di den e kai Kisi wini fu a Theokrasia Diniwroko-skoro, blz. 62-64, e soi wantu fasi fa u sa taki anga sama aini a peleikiwooko.

^ [3] (paragraaf 15) Kisi wini fu a Theokrasia Diniwroko-skoro buku, blz. 52-61, e soi san sa yeepi baala fu holi lezing moo bun aini a kemeente.