Skip to content

Skip to secondary menu

Skip to table of contents

Yehofa Kotoigi

Okanisitongo

A Wakititolen (anga sutudi-artikel)  |  augustus 2016

Sani di leisiman akisi

Sani di leisiman akisi

Saide den feyanti fu Yesesi ati be e boon di en anga den bakaman fi en á be e wasi den ana enke fa a weiti fu den be e taki?

Disi a wan fu den sani di den feyanti fu Yesesi be fende taki den disipel á be e du. A Weiti fu Mosesi be e taki fu wantu sani di be e meke wan sama á kiin. Wantu fu den sani ya a kokobe, te wan man senpeesi be e puu wan sowtu wataa, te wan uman de neen futu, te wan sama be holi wan dede meti efuso dede sama. A Weiti be e soi tu san a sama mu du fu a kiin baka. A be mu gi wan ofaandi efuso wasi en sikin.Lefitikesi kapitel 11-15; Numeri kapitel 19.

Den Dyu leliman, di sama sabi enke rabi be e meke sowtu a sowtu weiti gi a foluku. Wan buku e taki a omen pikin weiti den rabi be e meke di e soi on ten wan sama á kiin, anga fa a sama di á kiin be sa meke taa sama á kiin tu. Den rabi be poti weiti tu di e soi san be sa kiin baka anga san á be poi kiin moo. Den be e soi tu san wan sama be mu du fu a kiin baka.

Den feyanti fu Yesesi akisi en taki: „Saide den disipel fi i nai du san den sama fu fosi be gwenti du? Saide den e nyan anga tyobo ana?” (Malikisi 7:5) Den Faliseiman á be e taki fu a wasi di sama mu wasi den ana fosi den nyan, fu den á siki. Den be meke wan weiti taki fosi wan sama nyan, a be mu iti wataa neen ana. A buku e soi taki „a den Faliseiman be e taki sowtu paapi anga sowtu wataa den mu koboloiki. A den be e taki tu sama mu kandi a wataa anga on pe fu en ana a mu wasi doo”.

San Yesesi du di a yee den somen weiti di den keliki fesiman meke? A taki: „A polofeiti Yesaya be abi leti di a sikiifi aini Gadu buku taki: ’Anga mofu a foluku ya e dini mi, ma den ati de faawe fu mi [Yehofa]. A sosokaali den e dini mi, bika a den weiti fu libisama den e leli taawan.’ U nai holi den weiti fu Gadu, anga libisama gwenti wi e wooko.”Malikisi 7:6-8.