Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 9

Yelemiya be e tan taki anga taa sama fu Yehofa

Yelemiya be e tan taki anga taa sama fu Yehofa

Saide meke den sama ati boon a Yelemiya?

Yehofa meke sama yeepi Yelemiya

Son leisi sama e lafu wi. Den ati e boon a wi te wi e taigi den sani fu Yehofa. Da kande i nái wani taki fu Yehofa moo. A sani ya miti i kaba?— Beibel e taki fu wan boi di be lobi Yehofa. Ma beina a á be wani taki fu Yehofa moo. En nen a be Yelemiya. Kon u luku sama a be Yelemiya.

Yehofa be sende Yelemiya fu taigi den sama taki den á mu du ogii moo. A ten de Yelemiya á be de gaan manengee ete. A sani ya be taanga gi Yelemiya fu du. A be e feele. Neen a taigi Yehofa taki: ’Mi á sabi san mi mu taigi den. Mi yonkuu ete.’ Ma Yehofa piki en taki: ’Ná feele, mi o yeepi i.’

 Neen Yelemiya taigi den sama taki Yehofa o sitaafu den efu den á kengi. Den sama du san Yelemiya taigi den?— A lafu den be e lafu en. Sonwan fu den ati be e boon neen. Taawan be wani kii en! Fa Yelemiya be e fii?— A be e feele. Neen meke a taki: ’Mi ná o taki sani fu Yehofa moo.’ Ma a be taki sani fu Yehofa ete?— A be taki sani fu Yehofa ete. A di a be lobi Yehofa meke a be e taki. A fu di Yelemiya á tapu fu taki fu Yehofa, meke Yehofa kibii en.

Wan leisi, wan tu ogii man towe Yelemiya go aini wan dipi olo. A olo be lai tokotoko. A á be abi nyanyan anga wataa aini a olo. Den man ya be wani fika Yelemiya fu a dede. Ma Yehofa yeepi en. A komoto aini a olo!

San yu e leli fu a toli fu Yelemiya?— A be e feele son leisi, ma tokuso a be e tan taki fu Yehofa. Te yu e taki fu Yehofa, son leisi sama o go e lafu i. Son leisi den ati o go e boon a yu. Kande sen o kisi i tu. Efuso i sa feele. Ma noiti i mu tapu fu taki fu Yehofa. Ala yuu a o yeepi i, leti enke fa a be yeepi Yelemiya.