Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 5

Ala yuu Samuweli be e du bun

Ala yuu Samuweli be e du bun

Fanafu di Samuweli be de wan pikin boi, a be e tan koosube fu a tabernakel. Na a tabernakel a be e wooko. A tabernakel na a peesi pe sama be e go fu dini Yehofa. I sabi fa Samuweli du kon fika na a tabernakel? A mma fu Samuweli den be e kai Hanna. Meke u luku wantu sani fu Hanna fosi.

Ná a tide Hanna be wani wan pikin, ma a á be poi meke pikin. Neen a begi Yehofa fu a yeepi en fu meke wan. A paamisi Yehofa taki efu a meke wan boi, a be o sende en go wooko na a tabernakel. A be o tan koosube fu a tabernakel tu. Yehofa aliki a begi fi en neen baka dati a meke wan boi. Hanna kai a boi fi en Samuweli. A du san a be paamisi Yehofa, neen meke di Samuweli be abi dii efu fo yali, neen a tyai en go na a tabernakel fu dini Yehofa.

Eli a be a hei piliste na a tabernakel. A hei pilisite na a sama di be e de a fesi fu begi Yehofa na a tabernabakel. Den tu gaan boi fu Eli be e wooko enke pilisite de tu. I sabi ete, a tabernakel na a osu pe sama be e go fu dini Gadu. Náwan sama be mu du ogii ape. Ma den boi fu Eli be e du somen ogii de. Samuweli be si den sani di den be e du. Samuweli be e du ogii enke den boi fu Eli?— A soso bun sani a be e du, enke fa en mma anga en dda be leli en.

San Eli be mu du anga den tu boi fi en?— A be mu sitaafu den. A á be mu meke den wooko na a osu fu Gadu moo. Ma a á sitaafu den. Neen ede Yehofa ati boon neen anga den boi fi en. Neen meke a be o sitaafu den.

Samuweli taigi Eli san Yehofa taki

Wan neti Samuweli be e siibi, neen a yee wan sama e kai en taki: ’Samuweli oo!’ Neen a opo lon go a Eli. Ma Eli taigi en taki: ’Mi á kai yu’. A sani ya pasa ete tu leisi. Baka di a yee a siten du fu dii leisi neen Eli taigi en taki di a o yee en moo da a mu piki en taki: ’Mi e aliki Yehofa, i sa taki.’ Samuweli du san Eli taigi en.  Neen Yehofa taigi Samuweli taki: ’Taigi Eli taki mi o sitaafu a hii osufamii fi en fu den ogii di den du.’ A be makiliki gi Samuweli fu taigi Eli a sani ya?— Eeye, a be taanga gi en. Ma aladi Samuweli be e feele, toku a be du san Yehofa taigi en. A sani di Yehofa be taki pasa tuu. Den kii den tu boi fu Eli. Eli dede tu.

U mu de enke Samuweli. A du san Yehofa lobi, winsi fa a be e si taawan e du ogii. Yu noh? Yu o go e du san Yehofa lobi tu, enke Samuweli? Efi i du san Yehofa lobi, da a o piisii. I mma anga i dda seefi o piisii tu.

LEISI AINI I BEIBEL