Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 3

Rakab be soi taki ai biibi aini Yehofa

Rakab be soi taki ai biibi aini Yehofa

Kon u du enke u de aini a foto Yerikow. A foto ya de aini a kondee Kana-an. Den sama di e tan ya nái biibi aini Yehofa. Wan uman e tan ya di den e kai Rakab.

Di Rakab be nyoni, a be yee fa Mosesi paati a wataa fu a lebi se, fu tyai den Islayelisama puu a Egeptekondee. A be yee tu fa Yehofa yeepi den fu wini den suudati di be e kon feti anga den. Now Rakab kon yee taki den Islayelisama meke kampu koosube fu Yerikow, a foto pe ai tan.

Rakab yeepi den Islayeli man fu di ai biibi aini Yehofa

Wan neti tu man fu Islayeli kibii go luku a foto. Den go na a osu fu Rakab. Neen a kai den kon aini osu kon kibii. A seefi neti de, a kownu fu Yerikow yee taki tu man fu Islayeli kibii kon aini a foto. Den de na a osu fu Rakab. Neen a kownu sende sama fu go kisi den. Ma Rakab kibii den tu man na a tapu osu fi en. Neen a taigi den sama fu a kownu taki: ’Den be de ya tuu, ma den gwe kaba. Efu u go a den baka nownow u sa kisi den ete.’ I sabi saide Rakab yeepi den man?— A fu di ai biibi aini Yehofa. A sabi tu taki Yehofa o gi den Islayelisama a kondee Kana-an.

Fosi den tu man gwe, den paamisi Rakab taki te a foto o poli, sani ná o pasa anga en anga den sama fi en. I sabi san den taigi en fu a du?— Den taki: ’Teke a lebi tetei ya, da i lengelenge en ai fensee. Efi i du enke fa u taigi i, da sani ná o miti den sama di de aini yu osu.’ Rakab du ala san den taigi en. I sabi san pasa baka dati?—

Yehofa yeepi Rakab anga den sama fi en fu den á dede

Baka wan tu dei, neen den Islayelisama bigin waka lontu a foto. Ma den be mu de pii te den be e waka. Den á be mu taki náwan sani. Den waka lontu a foto sigisi dei langa. Ala dei den e waka lontu en wan leisi. Ma di fu seibi dei, den waka seibi leisi lontu a foto, neen den bali taanga. Di den bali, neen Yehofa meke den sikotu fu a foto booko kai wuu. Ma a osu di de na a sikotu, pe a lebi tetei lengelenge na a fensee, á booko. Yu e si en na a fowtow?— Rakab anga den sama fi en á dede!

 San yu e leli fu a toli fu Rakab?— Den somen moi sani di Rakab leli fu Yehofa, be meke a biibi aini en. Iseefi e leli somen moi sani fu Yehofa. Yu e biibi aini Yehofa enke fa Rakab be e biibi aini en?— U sabi taki yu e biibi aini en!

LEISI AINI I BEIBEL

  • Yowsuwa 2:1-24; 6:1-5, 14, 15, 20-25

  • Hebrewsama 11:31