Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 1

U poolo di u kon sabi a kibii toli

U poolo di u kon sabi a kibii toli

Wan sama taigi i wan sani di a á taigi taa sama ete?​— * Dati den e kai wan kibii toli, bika taa sama á sabi en. Beibel e taki fu so wan toli. Den e kai a toli ya „wan santa kibii toli” fu di a komoto a Gadu. Den engel be wani sabi moo fu a toli ya tu. I wani sabi san na a kibii toli ya?—

San den engel be wani kon sabi?

Gadu be meke a fosi man anga uman langa ten pasa. Den be e kai den Adan anga Efa. Gadu be gi den wan moi peesi fu tan di den e kai a dyali fu Eden. Efu den be aliki Gadu, da den anga den pikin fu den be o meke a hii goontapu kon moi enke a dyali fu Eden. A be o toon wan paladeisi. Den be o tan aini a Paladeisi fu tego. Ma i sabi ete san Adan anga Efa be du?—

Adan anga Efa taangayesi Gadu neen ede meke wi á de aini a paladeisi nownow. Ma Gadu taki a o meke a hii goontapu kon moi, da ala libisama o de anga piisii. Den o libi fu tego tu. Fa Gadu o du a sani ya? Wan hii pisi ten sama á be sabi fa a o du en. A be wan kibii toli.

Di Yesesi be kon a goontapu, a be e leli sama moo sani fu a kibii toli ya. A toli ya be e taki fu a Kownukondee fu Gadu. A be taigi sama fu begi Gadu fu meke a Kownukondee kon, bika na a Kownukondee ya o meke a goontapu toon wan moi paladeisi.

I poolo di i kon sabi a toli ya?— Ná feegete taki a soso den sama di e aliki Yehofa o tan aini a Paladeisi. Beibel abi tyaipi toli fu man anga uman di be e aliki Yehofa. Yu á wani sabi den sama ya noh?— Meke u go luku sama a wan tu fu den sama ya. Wi o luku tu san u mu du fu de enke den.

^ paragraaf 3 Te yu o go e leisi den toli aini a buku ya, yu o si a maiki ya (—). Wan tu akisi o de neen baka. I mu wakiti a den pisi ya fu a pikin fi i piki.