Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 7

Yu e feele te i wawan de?

Yu e feele te i wawan de?

Yu e si a pikin boi na a fowtow? A gei enke neen wawan de. A tan enke ai feele. Iseefi be fii so wan leisi tu?— Ala sama e fii so sonleisi. Beibel e taki fu wantu mati fu Yehofa di be e fii enke a den wawan de. Den be e feele tu. Wan fu den den be e kai Eliya. Kon u luku sama a be Eliya.

Iseibeli be wani kii Eliya

A ten di Eliya be e tan aini Islayeli, Yesesi á be kon a goontapu ete. A kownu di be e tii a ten de a be Akab. A á be e dini a tuu Gadu Yehofa. En anga en uman Eseibeli be e dini a falisi gadu Ba-al. Neen meke gaanse fu den Islayelisama bigin dini Ba-al tu. Eseibeli be ogii, a be wani kii ala den sama di be e dini Yehofa. A be wani kii Eliya tu. I sabi san Eliya du?—

 Eliya lon gwe! A lon gwe faawe aini wan sabana, neen a go kiibi aini wan siton olo. Saide a go kibii?— A be e feele. Ma a á be mu feele. Saide? Bika a be sabi taki Yehofa o poi yeepi en. Yehofa be soi Eliya kaba fa a taanga. Wan leisi di a be begi, neen Yehofa aliki a begi fi en, di a meke faya komoto a tapu. A so Yehofa sa yeepi en a leisi ya tu!

Fa Yehofa be yeepi Eliya?

Aini a olo Eliya de, neen Yehofa taki anga en. A akisi en taki: ’San yu e du ya?’ Neen Eliya taki: ’A mi wawan too e dini yu ete. A mi wawan de. Mi e feeIe enke den o kii mi.’ Eliya be denki taki den be kii ala den taa sama di be e dini Yehofa. Ma Yehofa taigi en taki: ’A ná tuu. Seibi dunsu sama de ete di e dini mi. Ná feele. Mi abi moo wooko gi i!’ I denki a be switi gi Eliya di a yee a sani ya?—

San yu e leli fu a toli fu Eliya?— Noiti yu á mu si enke a yu wawan de. Yu á mu feele tu. Den mati fi i lobi Yehofa. Den lobi i tu. Yehofa taanga. Ala yuu a o yeepi i! Ala yuu Yehofa o de anga i. A sani ya nái meke i piisii noh?—

LEISI AINI I BEIBEL

  • 1 Kownu 19:3-18

  • Psalm 145:18

  • 1 Peitilisi 5:9