Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 6

David á be e feele sani

David á be e feele sani

San yu e du te yu e feele?— Yu e lon go ai mma anga i dda fu den yeepi i? Wan taa sama de di sa yeepi tu. A taanga moo ala libisama. I sabi sama neen?— A Yehofa Gadu. Meke u luku wan toli fu wan boi aini Beibel di den e kai David. A á be e feele sani, bika a be sabi taki Yehofa o yeepi en ala yuu.

Fanafu di David meke, neen en mma anga en dda e leli en taki a mu lobi Yehofa. Na a sani de meke David á be e feele, winsi wan gaan ogii be miti en. A be sabi taki Yehofa neen mati. A be o yeepi en. Wan leisi David be e luku wantu sikapu neen wan gaan bigi lew kon kisi wan fu den sikapu. I sabi san David du? A lon na a lew baka te a kisi en, neen a kii en. Wan taa leisi wan beer be kon a den sikapu tu. A beer seefi a kii. Sama be yeepi David?— A Yehofa.

Wan sani be pasa wan taa leisi tu pe David be soi taki a abi deki ati tuutuu. Den Islayelisama be e feti anga den Filisteyasama. Wan fu den Filisteya suudati be langa bigi gadyaa. En nen a be Goliat. A gaan bigi man ya be e soso Yehofa anga den Islayeli suudati. A be e kai den Islayeli suudati fu kon feti anga en namonamo. Ma den be e feele. Di David yee san pasa neen a taigi Goliat taki: ’Mi o kon feti anga i. Yehofa o yeepi mi. Mi o wini i.’ I si enke David be abi deki ati?— Eeye, a bunbun deki ati a be abi. I wani sabi san be pasa baka dati?

David teke en aselenga anga feifi gaata siton fu go feti anga Goliat. Ma di Goliat si taki David a wan pikin boi, neen a bigin e soso en. David taigi en taki: ’Yu e kon a mi anga fetihow, ma mi dati e kon a yu aini a nen fu Yehofa!’ Neen a poti wan fu den siton aini a aselenga, neen a lon enke ai go a Goliat, neen fim, a fiingi a siton naki en leti neen fesi ede! Neen kpung! A gaan bigi man kai dede pii. Den Filisteyasama feele te ala den lon gwe fiyaa. Fa  wan pikin boi enke David du kii a gaan bigi man de?— A Yehofa be yeepi en. Yehofa be taanga dyow moo a langa man!

David á be e feele bika a be sabi taki Yehofa o yeepi en

San a toli fu David e leli i?— Yehofa taanga moo ala libisama. En nai mati. Neen meke taa leisi te yu e feele, yu á mu feegete taki a Yehofa na sama di poi yeepi i fu abi deki ati!