Skip to content

Skip to secondary menu

Skip to table of contents

Yehofa Kotoigi

Okanisitongo

Leli i pikin

 TOLI 10

Ala yuu Yesesi be e aliki

Ala yuu Yesesi be e aliki

Na ala yuu yu e wani aliki i mma anga i dda?— A ná ala yuu yu e wani aliki. I sabi sama Yesesi be e aliki ala yuu?— A be e aliki Yehofa. A be e aliki en mma anga en dda tu. A toli fu Yesesi o yeepi i fu aliki i mma anga i dda ala yuu. Kon u go luku a toli ya.

Fosi Yesesi be kon a goontapu, a be de anga en Dda Yehofa a hemel. Ma Yesesi be abi wan mma anga dda a goontapu ya tu. Den be e kai den Maliya anga Yosefu. I sabi fa den du toon en mma anga en dda?—

Yehofa be teke Yesesi puu aini hemel, neen a poti en aini Maliya bee. A sani di Yehofa du de a be wan wonduu. A so Yesesi goo aini Maliya bee enke fa ala taa beibi e goo aini den mma bee. Baka neigin mun neen Maliya meke en. A so Maliya anga Yosefu toon en mma anga en dda a goontapu ya.

Di Yesesi be abi 12 yali, neen a du wan sani di e soi fa a lobi en Dda Yehofa. A sani ya be pasa di Yesesi anga en famii be e waka a langa pasi fu go na a Paskafesa a Yelusalem. A Paskafesa na a fesa di den Islayelisama be e holi fu membee fa Yehofa be puu den a Egeptekondee. Di den e daai go a osu baka, neen Yosefu anga Maliya á poi fende Yesesi. I sabi pe a be de?—

Saide Yesesi be go na a tempel?

Yosefu anga Maliya daai go baka gawgaw a Yelusalem fu suku Yesesi. Den be buuya, bika den á be poi fende en. Ma baka dii dei,neen den go fende en aini a tempel! I sabi saide Yesesi be de aini a tempel?— Te a go ape da ai leli sani fi en Dda Yehofa. A be lobi Yehofa. Neen meke a be wani sabi san a mu du fu meke Yehofa piisii. Di Yesesi kon bigi tokuso a be aliki Yehofa ete, winsi fa a be e taanga gi en son leisi. Yesesi be e aliki Yosefu anga Maliya tu?— Beibel taki a be e aliki den.

San a toli fu Yesesi e leli i?— I mu e aliki i mma anga i dda, winsi ai taanga gi i son leisi. Yu o go e aliki den?—

LEISI AINI I BEIBEL

  • Lukasi 1:30-35; 2:45-52

  • Efeisesama 6:1

  • Hebrewsama 5:8