Skip to content

Skip to secondary menu

Skip to table of contents

Yehofa Kotoigi

Okanisitongo

I toowlibi poi waka bun

 PISI 2

Libi bun anga i toowpaa

Libi bun anga i toowpaa

„Neen ede meke náwan sama mu paati san gadu tyai kon a makandii.”Malikisi 10:9

Yehofa wani u „du san bun” (Mika 6:8). A sani ya de taanga fanowdu aini a toowlibi. Bika efi i nái libi bun anga a taawan, a ná o poi fitoow i. Ma efi i wani lobi de aini a toowlibi fi i, da u mu e fitoow makandaa.

Aini a ten ya a taanga gi somen sama fu libi bun anga denseefi te den toow. Ma efi i wani i toowlibi waka bun, da tu sani de di i mu du.

 1 SI A TOOWLIBI FI I ENKE WAN PELENSIPALI SANI

SAN BEIBEL E TAKI FU A TOLI YA: „Fu u sa sabi san a den moo pelensipali sani” (Filipisama 1:10). I toowlibi a wan fu den moo pelensipali sani aini i libi. Neen na wan fu den sani di i mu e poti a fesi.

Yehofa wani i meke ten gi a toowpaa fi i, da u ’piisii makandaa aini a libi’ (Peleikiman 9:9). Ai soi u kiin taki ala yuu u mu e poti pakisei na a sama di wi anga en toow. U mu e meke moiti fu du sani fu a taawan piisii (1 Korentesama 10:24). Soi a sama di yu anga en toow taki i abi en fanowdu. Meke a si taki yu e piisii taki i toow anga en.

SAN I MU DU:

  • E teke ten ala yuu fu du sani makandaa. A toowpaa fi i mu si taki yu e meke ten gi en

  • Ná libi enke ai wawan de. Taki fiti anga a taawan fosi i du wan sani

 2 KIBII YU ATI

SAN BEIBEL E TAKI FU A TOLI YA: „Ala sama di e luku wan uman naamo anga a fii fu didon anga en, didon anga en kaba aini en ati” (Mateyesi 5:28). Efu wan sama e waka anga a denki fu didon anga wan taa sama, ma á neen man efu en uman, da a leti enke a waka gi a man efu a uman fi en kaba.

Yehofa taki „Kibii yu ati” (Odo 4:23; Yelemiya 17:9). Efi i wani kibii yu ati da i mu luku bun san anga san yu e luku (Mateyesi 5:29, 30). Du enke Yopu di be meke wan kuudei anga en ain taki noiti a o luku wan taa uman anga a denki fu didon anga en (Yopu 31:1). Noiti i mu luku sekisi buku efu felon. A yu uman efu i man namo i mu abi lobi fii gi. Noiti i mu kweki lobi fii gi wan taa sama.

SAN I MU DU

  • Meke ala sama si taki yu á wani taa sama kon na a toowlibi fu yu anga yu uman mindii

  • Holi den fii fu a sama di yu anga en toow a pakisei. Efi i man efu yu uman e fii wan fasi te i de makandaa anga wan sama, da yu á mu mumui anga a sama de moo, winsi a wan sama di yu anga en de bun