Skip to content

Skip to secondary menu

Skip to table of contents

Yehofa Kotoigi

Okanisitongo

I toowlibi poi waka bun

 PISI 5

Fa i sa tan libi bun anga i famii

Fa i sa tan libi bun anga i famii

„Da teke booko ede fu taawan. Wooko switi anga taawan. Noiti si yuseefi hei moo taawan. Ná suku wini fi yu wawan namo. Teke pasensi anga taawan.”Kolosesama 3:12 (Beibel—Okanisi Tongo)

Solanga wan man anga wan uman toow, a wan nyun osufamii den sete de. Ala di yu o tan soi lesipeki anga lobi gi i mma anga i dda, tokuso a sama di i toow anga en mu de a moo pelensipali sama gi yu a goontapu. A sani ya o taanga gi son sama aini i famii fu fusutan. Ma den leli fu Beibel poi yeepi i fu tan libi bun anga i famii. Den o yeepi i fu meke a nyunyun toowlibi fi i waka bun tu.

 1 TAN LESIPEKI I MMA ANGA I DDA

SAN BEIBEL E TAKI FU A TOLI YA: „Lesipeki i mma anga i dda” (Efeisesama 6:2). Ala yuu i mu lesipeki i mma anga i dda winsi omen yali yu abi. Ná feegete taki a sama di i toow anga en mu poti pakisei neen mma anga en dda tu. „Lobi nái dyalusu” neen ede meke noiti yu á mu dyalusu te ai meke ten gi en mma anga en dda.1 Korentesama 13:4; Galasiyasama 5: 26.

SAN I MU DU:

  • Yu á mu e taki sani enke: „ala yuu den sama fi i e wisiwasi mi”, efuso „noiti i mma lobi san mi e du”

  • Puubei fu si sani enke fa a sama di yu anga en toow e si sani

 2 NÁ MEKE SAMA TAKI GI I OSUFAMII

SAN BEIBEL E TAKI FU A TOLI YA: „Neen ede meke wan man o gwe fika en mma anga en dda. A o tan anga en uman, da den o toon wan sikin” (Genesesi 2:24). Te i toow i mma anga i dda o go e si enke a den abi i faantiwowtu ete. A so meke den o go e wani taigi ete fa i mu libi.

Yu anga i toowpaa mu taki anga den a wan lesipeki fasi fu meke den sabi pete u wani den mumui doo aini u toowlibi. I sa taigi den kiin fa yu e denki, sondee fi i taki goofu anga den (Odo 15:1). Sakafasi, safu-ati anga pasensi o yeepi i fu libi bun anga den sama fi i. U mu abi lobi tu efu u wani, ’libi bun anga taawan.’Efeisesama 4:2.

SAN I MU DU:

  • Efu yu e booko yu ede anga a fasi fa famii e mumui aini u libi, da i mu suku wan bun ten fu taki fu a toli ya anga a sama di yu anga en toow

  • U tu man mu taki fiti fa wi o losi den sowtu polobelema ya