Skip to content

Skip to secondary menu

Skip to table of contents

Yehofa Kotoigi

Okanisitongo

I toowlibi poi waka bun

 PISI 1

Meke Gadu yeepi i fi i toowlibi waka bun

Meke Gadu yeepi i fi i toowlibi waka bun

„A sama di meke den na a bigin, be meke den enke man anga uman.”Mateyesi 19:4

Yehofa * Gadu be toow a fosi man anga uman. A Beibel e taki a be meke a fosi uman, neen a „tyai en go na a man”. Adan poolo te neen a taki: „disi a bon di meke anga mi bon, dugudugu di meke anga mi dugudugu” (Genesesi 2:22, 23). Te anga now ete Yehofa wani den sama di toow de koloku.

Te i toow biginbigin, da kande yu e denki taki ala sani o waka bun aini i toowlibi. Ma enke fa sani de tuutuu, da winsi wan man anga wan uman lobi denseefi, tokuso ná ala yuu sani o go e waka bun (1 Korentesama 7:28). I sa fende Beibel leli aini a buku ya, di o meke i toowlibi, i hii osulibi waka bun, efi i wooko anga den.Psalm 19:8-11.

 1 TYAI A FAANTIWOWTU DI YEHOFA GI I

SAN BEIBEL E TAKI FU A TOLI YA: A man na a ede fu a osu.Efeisesama 5:23.

Yehofa wani taki yu enke a man mu solugu a uman fi i anga lobi (1 Peitilisi 3:7). A meke a uman fu a fiti taa a yu enke a man. A wani i lesipeki a uman. A wani i lobi en tu (Genesesi 2:18). I mu lobi yu uman a sowan fasi taki den sani di a wani mu moo pelensipali gi i moo enke san iseefi wani.Efeisesama 5:25-29.

Efu yu na a uman, da Yehofa wani i lesipeki i man. A wani i yeepi en tu fu man tyai a faantiwowtu fi en bun (1 Korentesama 11:3; Efeisesama 5:33). Wooko makandii anga en anga i hii ati (Kolosesama 3:18). A dati o meke i moi gi i man tuutuu. A o meke i moi gi Yehofa tu.1 Peitilisi 3:1-6.

SAN I MU DU:

  • Akisi a sama di yu anga en toow san i sa du fu toon wan  moo bun man efu uman gi en. Aliki bun te ai taki, da i meke moiti fu du den sani di a taigi i

  • I mu abi pasensi. A o teke ten fu u tu man kon fusutan san u mu du fu meke a taawan de koloku

2 SOI TAKI YU E BOOKO YU EDE ANGA A FASI FA A TOOWPAA FI I E DENKI

SAN BEIBEL E TAKI FU A TOLI YA: I mu e meke moiti fu sabi san a man efu a uman fi i lobi (Filipisama 2:3, 4). Du sani fu soi taki yu e si a sama di i toow anga en enke wan gudu di Gadu gi i, bika Yehofa wani den diniman fu en „libi bun anga ala sama” (2 Timotiyesi 2:24). „Te wan sama nái denki fosi a taki, da a leti enke ai sutu taawan anga how, ma a mofu taki fu wan koniman de enke deesi”. Neen meke i mu luku bun san yu e taki (Odo 12:18). A yeye fu Yehofa o yeepi i fu taki anga lobi anga switifasi.Galasiyasama 5:22, 23; Kolosesama 4:6.

SAN I MU DU:

  • Fosi i go sidon taki anga a sama di yu anga en toow, da i mu begi Yehofa fu a yeepi i fu aliki bun. Akisi en tu fu a yeepi i fu man holi iseefi te ai taki

  • Denki bun san yu o taki, anga fa yu o taki en

 3 DENKI GO NA A WAN SE

SAN BEIBEL E TAKI FU A TOLI YA: Te u toow, da u tu man e toon „wan sikin” (Mateyesi 19:5). Ma toku u de tu apaiti libisama ete. Ná ala yuu wi o go e denki a wan. Neen ede meke u mu e meke moiti fu taki fusutan useefi, fu u sa denki go na a wan se (Filipisama 2:2). Taki fiti fosi u du wan sani. Beibel taki: „Te wi e meke taawan poti wi a pasi, da den sani di u wani du o waka bun” (Odo 20:18). Luku fosi san a Beibel e taki, fosi u du wan sani.Odo 8:32, 33.

SAN I MU DU:

  • Meke a toowpaa fi i sabi fa yu e fii anga fa yu e denki, ná taki fu aladei sani wawan

  • Akisi en fa ai denki, fosi i go du wan sani

^ paragraaf 4 Beibel e taki a nen fu Gadu a Yehofa.