Skip to content

Skip to secondary menu

Skip to table of contents

Yehofa Kotoigi

Okanisitongo

I toowlibi poi waka bun

 PISI 3

Fa fu losi polobelema

Fa fu losi polobelema

„U mu lobi makandaa anga u hii ati, bika lobi e meke u wai ede gi omen sondu di taawan e du.”1 Peitilisi 4:8

Te wan man anga wan uman bigin libi, polobelema o de. Kande u tu man nái denki a wan fasi, u nái si sani a wan fasi, efuso wi abi taa gwenti di u kweki anga en. Taa taa polobelema de di sa komoto a doose kon miti i tu, sani di wi á be denki.

Son sama e wani tapu ain gi den polobelema fu den. Ma a Beibel e leli u taki u mu poti pakisei a den (Mateyesi 5:23, 24). Yu o moo fende wini, te yu e wooko anga den leli fu Beibel.

 1 TAKI FU A POLOBELEMA

SAN BEIBEL E TAKI FU A TOLI YA: „Wan ten de . . . fu taki” (Peleikiman 3:1, 7). Meke ten fu taki fu a polobelema fu u. Meke a sama di yu anga en toow sabi fa yu e fii anga fa yu e denki fu a toli tuutuu. Taigi a taawan ’fa sani de tuutuu’ te yu e taki anga en (Efeisesama 4:25). Winsi yu e kuku aini yu ati, toku i mu tan meke moiti fu wi á kwali. Te u nái taki goofu anga a taawan, da u ná o kwali fu pikin pikin sani ede.Odo 15:4; 26:20.

Winsi u tu man nái go na a wanse, toku i mu tan soi lesipeki gi a taawan. Ala yuu i mu tan soi en taki i lobi en (Kolosesama 4:6). Suku fu losi a polobelema gawgaw. Wi á mu puu taki anga useefi.Efeisesama 4:26.

SAN I MU DU:

  • Luku sowtu ten na a moo bun ten di u sa taki fu a polobelema

  • Te a taawan e taki, aliki, ná koti en mofu. Yu o fende a okasi fu taki tu

 2 ALIKI, MEKE MOITI FU FUSUTAN A TAAWAN

SAN BEIBEL E TAKI FU A TOLI YA: „U mu lobi makandaa enke fa baala e lobi makandaa. A yu mu de a fosiwan di e soi lesipeki gi taawan” (Romesama 12:10). A fasi fa yu e aliki de pelensipali. Meke moiti fu fusutan san a taawan wani taki. Soi en taki yu e fusutan fa ai si a toli, da a o si taki i abi sakafasi (1 Peitilisi 3:8; Yakowbesi 1:19). Ná meke enke yu e aliki da i nái poti pakisei a san ai taki. Efi i poi fika a sani di yu e du da i aliki, fika en, efuso akisi en efu u sa taki moo lati. Efu yu e fusutan taki a yu anga i toowpaa mu wooko makandii, da i ’ná o go e mandii gawgaw.’Peleikiman 7:9.

SAN I MU DU:

  • Tan poti pakisei a san a taawan e taki winsi san ai taki á bun gi i

  • Yu á mu luku san a taawan taki namo, ma i mu puubei fu fusutan saide a taki so. Luku fa ai taki a sani. Luku den sani di ai meke anga en ana anga fa ai poti en fesi te ai taki

3 DU SAN U TAKI

SAN BEIBEL E TAKI FU A TOLI YA: „Ala taanga wooko di wan sama e du abi wini, ma efu wi e taki anga mofu namo, da u nái du, a o tyai pina gi u” (Odo 14:23). Taki fiti a ná ala ete, ma u mu holi useefi a san u taki. Wi o abi fu meke taanga moiti fu man du san u taki, ma a o tyai wini (Odo 10:4). Te wi e wooko makandii wi o „fende wini” fu a taanga wooko fu u.Peleikiman 4:9.

SAN I MU DU:

  • U mu luku san ibii wan fu u mu du fu losi den polobelema fu u

  • Te u de te u mu e luku baka efu u du den sani di u be taki