Skip to content

Skip to secondary menu

Skip to table of contents

Yehofa Kotoigi

Okanisitongo

I toowlibi poi waka bun

 PISI 7

Fa i mu kweki i pikin

Fa i mu kweki i pikin

„Den sani di mi e taigi u tide mu de aini wi ati. U mu leli den pikin fu u den sani ya ala yuu, fu den á feegete den.”Deitolonomi 6:6, 7

Di Yehofa sete a osufamii libi, neen a gi mma anga dda a faantiwowtu fu luku den pikin fu den (Kolosesama 3:20). A wi enke mma anga dda abi a faantiwowtu fu leli den pikin fu u fu lobi Yehofa. A u mu yeepi den tu fu den komoto sama (2 Timotiyesi 1:5; 3:15). I mu meke moiti fu sabi san de aini den pikin fi i ati tu. A de fanowdu fu yu enke mma anga dda tyai useefi bun. Bika a dati den pikin fi i e luku. A Wowtu fu Yehofa mu de aini i ati, dan fosi yu o man poti a leli fu Yehofa aini den pikin fi i ati.Psalm 40:8.

 1 DEN PIKIN FI I Á MU FEELE FU KON TAKI ANGA I

SAN BEIBEL E TAKI FU A TOLI YA: „I mu de gaw fu aliki, ma yu á mu de gaw fu taki” (Yakowbesi 1:19). Yu á wani den pikin fi i feele fu kon taki anga i. Den mu man si a yu taki den sa kon taki anga yu iniiwan yuu di den wani. Meke den e fii switi te yu anga den de, da a ná o taanga gi den fu e taki fa den e fii anga fa den e denki (Yakowbesi 3:18). Efu den si enke yu o bali den efuso yu ati o boon, da den ná o taigi i ala sani. I mu abi pasensi anga den pikin fi i. I mu e taigi den ala yuu taki i lobi den.Mateyesi 3:17; 1 Korentesama 8:1.

SAN I MU DU:

  • Meke ten gi den pikin fi i te den wani taki anga i

  • I mu e taigi den ala yuu taki i lobi den, ná te den abi polobelema namo

2 MEKE MOITI FU FUSUTAN SAN DEN WANI TAKI

SAN BEIBEL E TAKI FU A TOLI YA: „Sani o waka bun anga a sama di man si a fini fu wan toli” (Odo 16:20). Son leisi te a pikin fi i taki wan sani, yu a mu luku na a fasi fa den e taki, ma i mu puubei fu fusutan san den wani taki. Te den e taki sani, den lobi meke a sani bigi moo enke fa a de. Den e taki sani sondee fu denki tu. „Te wan sama e piki aini wan toli sondee a yee a fini fi en, da a wan don sani ai du de” (Odo 18:13). Yu ati á mu e boon gaw.Odo 19:11.

SAN I MU DU:

  • Winsi san i pikin e taigi i, yu á mu ligei anga en efuso koti en mofu te ai taki

  • Denki fa i be e fii di i be abi a yali fu den. Pakisei san be pelensipali gi i a ten de

 3 DEN PIKIN MU MAN SI TAKI WI E WOOKO MAKANDII

SAN BEIBEL E TAKI FU A TOLI YA: „Mi manpikin, aliki te i dda e gi i leli. Ná wai den leli fi i mma poti a wanse tu” (Odo 1:8). Yehofa gi mma anga dda a faantiwowtu fu kweki den pikin fu den. I mu leli i pikin fu lesipeki i. Leli den fu e aliki i tu (Efeisesama 6:1-3). Wan pikin e sabi te en mma anga en dda nái „denki go na a wan se” (1 Korentesama 1:10). Efu u tu man e denki taa fasi fu wan toli, wi á mu de ape e hali taki a den pikin fesi, efuso den ná o lesipeki u enke mma anga dda moo.

SAN I MU DU

  • Taki fiti fa wi o kweki den pikin

  • Efu u tu man ná abi a wan denki aini a fasi fa u wani kweki den pikin, da iniiwan fu u mu puubei fu fusutan fa a taawan e denki

 4 SEEKA A FESI

SAN BEIBEL E TAKI FU A TOLI YA: „Kiya wan boi fu a waka na a bun pasi di a mu waka” (Odo 22:6). I ná o sidon pii da den pikin fi i komoto sama. U mu seeka a fesi fa u wani kweki den pikin fu u. U mu fiti tu fa wi o pii ain gi den te den du wan sani di á bun (Psalm 127:4; Odo 29:17). Pii ain gi den á wani taki namonamo taki a sitaafu i mu sitaafu den. Ma a wani taki tu taki i mu yeepi den fu fusutan saide den mu du sani enke fa i wani (Odo 28:7). I mu leli den fu lobi a Wowtu fu yehofa. Yeepi den tu fu fusutan fa den mu wooko anga den leli fu Beibel (Psalm 1:2). A dati o yeepi den fu sabi san bun anga san á bun.Hebrewsama 5:14.

SAN I MU DU:

  • Yeepi den pikin fi i fu si Gadu enke wan tuutuu sama di den sa fitoow

  • Yeepi den fu fusutan sowtu sani o meke den anga Gadu á de mati moo. Sonwan fu den sani ya de a Internet. Soi den fa den mu koti pasi gi den sowtu sani de. Leli den tu fu luku bun anga sama di e tyai gaansama fasi a pikinengee

    „Kiya wan boi fu a waka na a bun pasi di a mu waka”

Wan mma anga wan dda e leli a boi fu den yonkuu yonkuu fu dini Yehofa, te enke a dopu